པ་ཉྩི་ཀཱ་ཊཱི་ཀཱ
པ་ཎཱ་མཱ་དི་ཀ་ཐཱ
ཝི་ཛྫཱ་དྷ་ན་སྶ ས་མ་ནུ་སྶ་ར་ཎ་མྤི ཡ་སྶ,
པ་ཉྙཱ་ཝི་སུ་དྡྷ་ར་ཏ་ནཱ་ན་ཡ་ནེ་ཀ་ཧེ་ཏུ;
ཏཾ དྷ་མྨ་རཱ་ཛ་མ་མ་ལུ་ཛྫ་ལ་ཀི་ཏྟི་མཱ་ལཾ,
སཱ་མོ་ད་མཱ་ད་ར་མ་ཡེ ཧ་ད་ཡེ ནི་དྷཱ་ཡ.
ལ་དྡྷ་མྨ་ཧོ་ད་ཡ མ་ཧཱ་ད་ཡ (ས་མྤ་སཱ་དཱ) [ཛ་པ་སོ (པོ་ཏྠ་ཀེ)],
ས་ཀྐཱ(དི) ས་ཀྐ་ཏ་གུ་ཎཾ ར་ཏ་ན (དྭ་ཡ་ཉྩ) [ཏྟ་ཡ་ཏཱ (པོ་ཏྠ་ཀེ)];
(ཡཱ་པ་ཉྩི་ཀཱ) གུ་རུ་ཝ་ར་པྤ(བྷ་ཝཱ་ཏྱ་གཱ་ཧཱ) [ཧ་པཱ ཏྱ གཱ་ཡཱ (པོ་ཏྠ་ཀེ)],
ཏཾ སཱ་དྷུ སི་སྶ་ཛ་ན མ་ཛྫ་ཝ་གཱ་ཧ ཡཱ་མ.
ཛ་ཡ་ཏཱི་ཧ མ་ཧཱ་པ་ཉྙོ, སོ མོ་གྒ་ལླཱ་ཡ་ནོ མུ་ནི;
ཡ་སྶ སཱ་དྷུ་གུ་ཎུ་བྦྷཱུ་ཏ,ཀི་ཏྟི ས་བྦ་ཏྠ པ་ཏྠ་ཊཱ.
ཨི་ཙྩེ་ཝ མ་ན་ཝ་སེ་ས མ་ཏྟ་ནོ བྷ་ཡཱ་དྱཱུ་པ་དྡ་ཝོ་པ་གྷཱ་བྷ་ཀ་ར་སཱ་མ་ཏྠི་ཡ ཡོ་གེ་ན ས་ཀ་ལ་ཛ྄ཛྷ་ཏྟི་ཀ་བཱ་ཧི་ཡ་ནྟ་རཱ་ཡ ནི་ཝཱ་ར་ཎ མ་དྷི་པྤེ་ཏ་སི་དྡྷི ཝི་སེ་ས མ་བྷི་ཀ་ངྑི་ཡ ར་ཏ་ན་ཏྟ་ཡ ཝི་ས་ཡ་བྷཱུ་ཏཾ ཏཾ་སཱ་དྷ་ནེ ཀ་ནྟ་ནི་དཱ་ན བྷཱུ་ཏ་སྶ ཨཱ་ལོ་ཀི་ཡ་ཡཱ་ཏི་ས་ཡ་གུ་ཎ་ཝི་སེ་ས་ཡུ་ཏྟ་སྶ མ་ཧ་ཏོ པྱ་ཏི་མ་ཧ་ནཱི་ཡ་སྶ ར་ཏ་ན་ཏྟ་ཡ་སྶ ས་པྤ་སཱ་དཱ་ནུ་རཱུ་པཾ པཱུ་ཛཱ་ཝི་ས་ཡཾ ཏ་ད་ནུ་སྶ(ར་ཎཾ ཀ་ཏྭཱ) གུ་རུ་ས་ནྣི་ཡོ་ག་མ་ནུ་ཊྛཱ་ཏུཾ–
ཀི་ནྟེ་ཧི པཱ་ད་སུ་སྶཱུ་སཱ, ཡེ་སཾ ན་ཏྠི གུ་རཱུ་ནི་ཧ;
ཡེ ཏ་པྤཱ་ད་ར་ཛོ་ཀི་ཎྞཱ, ཏེ་ཝ སཱ་དྷཱུ ཝི་ཝེ་ཀི་ནོ་ཏི.
ཝ་ཙ་ན་ཏོ ཨ་ཏྟ་ནོ གུ་རུ་པཱུ་ཛཱ པུ་ར་སྶ་རཾ པ་ཉྩི་ཀཱ་ཝི་ཝ་ར་ཎཾ པ་ཐི’ཡཱ པ་ཉྩི་ཀཱ’ཏི་ཨཱ་དི་ནཱ ཀ་ཏ་པ་ཊི་ཉྙ་ཏྟཱ ས་མྤ་ཏི མ་ཧཱ་ད་ཡོ་ཏི་ཨཱ་དི་ནོ ག་ནྠ་སྶ སཱ་དྷུ་ཛ་ན་ཝ་ཎྞ་ནཾ ཝ་ཎྞ་ན་མཱ་ར་བྷི་སྶཱ་མ.
ན་ནུ ཙ ཝུ་ཏྟི་ག་ནྠ་སྶ ཝ་ཎྞ་ནཱ་ཡཾ ཀ་ཏཱ་བྷི་ནི་ཝེ་སོ-ཡ་མཱ་ཙ་རི་ཡོ་ཏི ཀ་ཐ་མི་ཧཱ་ན་དྷི་ཀ་ཏེ མ་ཧཱ་ད་ཡོ་ཏི་ཨཱ་དི་ཀེ པ་ཊི་པ་ནྣོ་ཏི ར་ཏ་ན་ཏྟ་པྤ་ཎཱ་མ་ག་ནྠ་ཀ་ཏྟུ་ག་ནྠ་ནི་སྶ་ཡ་ག་ནྠཱ་ར་མྦྷ་ཕ་ལ་ཨ་བྷི་དྷེ་ཡྻ་ས་ངྑཱ་ཏ- པ་ཡོ་ཛ་ན་སོ་ཏུ་ཛ་ན་ས་མུ་སྶཱ་ཧ་ནཱ་ནཾ ས་ནྡ་སྶ་ན་ཏྠཾ. ཏ་ཏྠ ར་ཏ་ན་ཏྟ་ཡ་པྤ་ཎཱ་མ ཀ་ར་ཎཾ ཨ་ནྟ་རཱ་ཡ་ཀ་རཱ་པུ་ཉྙ་ཝི་གྷཱ་ཏ་ཀ་ར་པུ་ཉྙ་ཝི་སེ་སུ་པྤཱ་ད་ནེ་ན ཀ་ཏྟུ མི་ཙྪི་ཏ་སྶ ག་ནྠ་སྶ ཨ་ན་ནྟ་རཱ་ཡེ་ནཾ པ་རི་ས་མཱ་པ་ན་ཏྠཾ. ཝ་ཙཱི་པ་ཎཱ་མོ པ་ནེ་ཏྠ སོ་ཏཱུ་ན་མྤི ཡ་ཐཱ་ཝུ་ཏྟ་ཏྠ་ནི་པྥཱ་ད་ན་ཀོ ཨཱ་ཙ་རི་ཡེ་ནཱ་པྱ་ཡ མ་ཏྠོ ད་སྶི་ཏོ་ཡེ་ཝ’ཏ་ཏྠ ར་ཏ་ན་ཏྟ་ཡ་པྤ་ཎཱ་མ་ས་ནྡ་སྶ་ན’ནྟི་ཨཱ་དི་ནཱ, ཝཱ་ཙ་སི་ཀ་ས་ཏྠཱ་དྷི་ཀཱ་ར་ཏོ་པི ཝ་ཙཱི་པ་ཎཱ་མོ་ཏི ཀཱ་ཡ་པྤ་ཎཱ་མོ མ་ནོ་པ་ཎཱ་མོ ཙ. ན ཀ་ཏོ, ག་ནྠ་ཀ་ཏྟུ་ས་ནྡ་སྶ་ནཾ ག་ནྠ་སྶ པ་མཱ་ཎ བྷཱ་ཝ་ཝི་བྷཱ་ཝ་ན་ཏྠཾ, ག་ནྠ་ནི་སྶ་ཡ་ས་ནྡ་སྶ་ནཾ ཨ་ཏྟ་ནི་ཡ་བྷཱ་ཝ་ས་ནྡྷ་སྶ་ནེ་ན ཏ་བྦི་སུ་དྡྷི་ད་སྶ་ན་ཏྠཾ, ག་ནྠཱ་ར་མྦྷ་ཕ་ལ་ད་སྶ་ནཾ ཏ་པྤ་ཊི་ཀྑེ་པ་ཀ་ཛ་ན་ནི་སེ་དྷཱ་ཡ, ཨ་བྷི་དྷེ་ཡྻ་ས་ངྑཱ་ཏ་ཡ་ཡོ་ཛ་ན་ས་ནྡ་སྶ་ནཾ ཝཱི་མཾ་སཱ་པུ་བྦ་ཀཱ་རཱི་ནཾ པ་ཡོ་ཛ་ནོ པཱ་ལ་མྦྷ་པུ་བྦི་ཀཱ ས་ཏྠེ པ་ཝ་ཏྟ་ཏཱི་ཏི སོ་ཏུ་ཛ་ན་ས་མུ་སྶཱ་ཧ་ནཾ (ཀ་ཏྭཱ) ཨཱ་ད་རེ་ན ག་ནྠེ པ་ཝ་ཏྟ་ན་ཏྠཾ, ཡ་དཱ་ཧུ –
ས་བྦ་སྶེ་ཝ ཧི ས་ཏྠ་སྶ, ཀ་མྨ་སྶཱ་པི ཙ ཀ་སྶ་ཙི;
ཀེ་ནེ་ཏཾ ག་ཡ྄ཧ་ཏེ ཏཱ་ཝ, ཡཱ་ཝ-ཝུ་ཏྟ་མྤ་ཡོ་ཛ་ནཾ་ཏི.
ན་ནུ ས་ཏྠ་པྤ་ཡོ་ཛ་ནཱ་ནཾ ས་མྦ་ནྡྷོ་པི ཝ་ཏྟ་བྦོ ཨི་ད་མ་སྶ པ་ཡོ་ཛ་ན་ནྟི ཡ་ཏོ–
སི་དྡྷ་པྤ་ཡོ་ཛ་ནཾ སི་དྡྷ,ས་མྦ་ནྡྷཾ སོ་ཏུ་མི་ཙྪ་ཏི;
སོ་ཏཱ་དོ ཏེ་ན ཝ་ཏྟ་བྦོ, ས་མྦ་ནྡྷོ ས་པྤ་ཡོ་ཛ་ནོ་ཏི.
ཏ་ཏྲེ་ད་མུ་ཏྟ་རཾ–
ས་ཏྟཾ པ་ཡོ་ཛ་ན་ཉྩེ་ཝ, ཨུ་བྷོ ས་མྦ་ནྡྷ་ནི་སྶ་ཡཱ;
ཏཾ ཝུ་ཏྟ་ནྟོ་ག་དྷ་ཏྟཱ ན, བྷི་ནྣོ ཝུ་ཏྟོ པ་ཡོ་ཛ་ནཱ་ཏི.
པ་ཡོ་ཛ་ན་པྤ་ཡོ་ཛ་ན་མྤ་ན སཱ་མ་ཏྠི་ཡ་ལ་དྡྷ་བྦཾ ས་ཡ་མཱ་ཙ་རི་ཡེ་ན ‘‘ཀོ པ་ན ས་དྡ་ལ་ཀྑ་ཎ་སྶ ཨ་ཛཱ་ན་ནེ དོ་སོ’’ཏི་ཨཱ་དི་ནཱ ཝུ་ཏྟ་ན་ཡེ་ན ཝི་ཉྙཱ་ཏ་བྦཾ.
ཏ་ཏྠ‘མ་ཧཱ་ད་ཡོ’ཏྱཱ་དི་ནཱ གཱ་ཐཱ་དྭ་ཡེ་ན ར་ཏ་ན་ཏྟ་ཡ་པ་ཎཱ་མོ ད་སྶི་ཏོ, ‘ཡོ ཨི་དྡྷི་མ་ནྟེ་སཱུ’ཏི་ཨཱ་དི་ནཱ ག་ནྠ་ཀ་ཏྟཱ, ‘ས་དྡ་ས་ཏྠ’ནྟི་ཨཱ་དི་ནཱ ག་ནྠ་ནི་སྶ་ཡོ, ‘ས་ངྑེ་པ་ན་ཡེ་ནཱ’ཏི་ཙ ‘སཱ་ར་བྷཱུ་ཏཾ ཝི་པུ་ལ་ཏྠ་གཱ ཧིཾ ཨ་ནཱ་ཀུ་ལ’ནྟི ཙ ཨི་མེ་ཧི ག་ནྠཱ་ར་མྦྷ་ཕ་ལཾ སོ་ཏུ་ཛ་ན་ས་མུ་སྶཱ་ཧ་ན་ཉྩ, ཨ་བྷི་དྷེ་ཡྻ་ས་ངྑཱ་ཏ་པྤ་ཡོ་ཛ་ན་མྤ་ན‘སཾ་ཝ་ཎྞ་ན’ནྟི ཨི་མི་ནཱ ད་སྶི་ཏཾ ཨ་ནྭ་ཏྠ བྱ་པ་དེ་སེ་ན སཾ་ཝ་ཎྞཱི་ཡ་ཏི ཝི་ཝ་རི་ཏྭཱ ཝི་ཏྠཱ་རེ་ཏྭཱ ཀ་ཐཱི་ཡ་ཏི ཨ་ཏྠོ ཨེ་ཏཱ་ཡཱ་ཏི སཾ་ཝ་ཎྞ་ནཱ་བྷི ཀ་ཏྭཱ, ཏ་མྤ་ན ཝི་ཝ་རི་ཏྭཱ ཀ་ཐ་ནཾ ས་དྡཱ་ནུ་སཱ་ས་ན་ས་ཏྠ་ས་ནྣི་སྶ་ཡ་ཏྟཱ ཨ་བྷི་དྷེ་ཡྻོ ནཱ་མ ས་མུ་དི་ཏེ་ན ས་ཏྠེ་ན ཝ་ཙ་ནཱི་ཡ་ཏྠོ ཏཾ [ཝ་ཙ་ནཱི་ཡ་ཏྠོ་ཏི (པོ་ཏྠ་ཀེ)] ཝུ་ཏྟ་ས་དྡཱ་ནུ་སི་ཊྛི་ས་ངྑཱ་ཏ་པ་ཡོ་ཛ་ན་མེ་ཝཱ་ཏི ཨ་ཡ་མེ་ཏྠ ས་མུ་དཱ་ཡ་ཏྠོ.
ཨ་ཡ་མྤ་ནེ་ཏྠ ཨ་ཝ་ཡ་ཝ་ཏྠོ-ཡོ་ཏི ཨ་ནི་ཡ་མ་ཝ་ཙ་ནཾ དྷ་མྨ་རཱ་ཛ་ས་དྡཱ པེ་ཀྑཱ་ཡ ཙེ་ཏྠ པུ་ལླི་ངྒ་ཏཱ, ཏེ་ནེ་ཏྠ ཝུ་ཙྩ་མཱ་ན་གུ་ཎ་ཝི་སེ་སཱ དྷཱ་ར་པུ་གྒ་ལ་ཝི་སེ་ས་ནི་ད་སྶ་ནཾ, ད་ཡ་ཏི དུ་ཀྑཾ ཨ་པ་ནེ་ཏྭཱ པ་རེ་སཾ སུ་ཁཾ ད་དཱ་ཏི, ད་ཡཱི་ཡ་ཏི ཝཱ ས་པྤུ་རི་སེ་ཧི ག་མི་ཡ(ཏི ས) ས་ནྟཱ་ནེ པ་ཝ་ཏྟཱི་ཡ་ཏི, ད་ཡ་ཏི ཝཱ པ་ར་དུ་ཀྑཾ ཧིཾ་ས་ཏི, ད་ཡ་ཏི ཝཱ པ་ར་དུ་ཀྑཾ ག་ཎྷཱ་ཏི ཏཾ་ཝ་སེ་ན ཨ་ཏྟ་ནོ ཧ་ད་ཡ་ཁེ་དཾ ཀ་རོ་ཏཱི་ཏི ད་ཡཱ, ‘‘ད་ཡ=དཱ་ན་ག་ཏི ཧིཾ་སཱ་དཱ་ནེ་སུ’’ ཨི་ཙྩ་སྨཱ ‘‘ཨི་ཏྠི་ཡ་མ་ཎ་ཏྟི་ཀ་ཡ་ཀྱཱ་ཙེ’’ཏི (༥-༤༩) ཨ་པྤ་ཙྩ་ཡོ, ཝི་ས་ཡ་མ་ཧ་ནྟ་ཏཱ་ཡ མ་ཧ་ཏཱི པ་ས་ཏྠཱ ཝཱ ད་ཡཱ ཨ་སྶཱ་ཏི མ་ཧཱ་ད་ཡོ, ཝི་སེ་ས་ན ས་མཱ་སེ ‘‘ས་དྡྷཱ་དི་ཏྭ’’ (༤-༨༤) ཝ་ཀྑ་མཱ་ན་པཱ་ར་མི་ཏཱ་ས་མྦྷ་ར་ཎ་དུ་ཀྑཱ་ནུ་བྷ་ཝ ནཱ་ན་མི་དཾ ཧེ་ཏུ་ཝ་ཙ་ནཾ, ཀ་མྨ་ཀི་ལེ་སེ་ཧི ཛ་ནི་ཏཱ་ཏི ཛ་ནཱ ས་ཏྟ་ལོ་ཀོ, ཨི་མི་ནཱ ཁཱི་ཎཱ་ས་ཝཱ་པི ས་ངྒ་ཡ྄ཧ་ནྟི ཏེ་ས་མྤི དི་ཊྛ་དྷ་མྨི་ཀ་སུ་ཁ་ཝི་ཧཱ་ར་ས་ངྑཱ་ཏ ཧི་ཏ་སྶ དཱ་ན་ཏོ, ཛ་ནཱ་ནཾ ས་མཱུ་ཧོ ཛ་ན་ཏཱ ཏ་སྶཱ ཧི་ཏཱ་ཡ ཨ་བྷི་ཝ་ཌྜྷི་ཡཱ ས་ཀ་ལ་ཝ་ཊྚ དུ་ཀྑ་ནི་སྶ་ཊ་ནི་བྦཱ་ན་སུ་ཁ་བྷཱ་གི་ཡ་ཀ་ར་ཎཱ་ཡཱ་ཏི ཝུ་ཏྟཾ ཧོ་ཏི, ཨ་སྶ་ཙ’ས་མྤཱུ་ར་ཡ’ནྟི ཨི་མི་ནཱ’དུ་ཀྑ་མ་ནུ་བྷ་ཝཱི’ཏི ཨི་མི་ནཱ ཙ ས་མྦ་ནྡྷོ, ས་མྦོ་དྷཱི་ཏི ཨེ་ཏྠ སཾ་ས་དྡོ སཱ་མ་ནྟི ཨི་མ་མ་ཏྠཾ དཱི་པེ་ཏི, ཏ་སྨཱ སཾ་ས་ཡ་མེ་ཝ ཨ་ན་ཉྙ་བོ་དྷི་ཏོ ཧུ་ཏྭཱ ཙ་ཏྟཱ་རི ས་ཙྩཱ་ནི བུ་ཛ྄ཛྷ་ཏི པ་ཊི་ཝི་ཛ྄ཛྷ་ཏི ཨེ་ཏཱ་ཡཱ་ཏི ས་མྦོ་དྷི, སཾ་པུ་བྦཱ བུ་དྷ་དྷཱ་ཏུ་ཏོ ‘‘ཨི’’ཨི་ཏི ཎྭཱ་དི (ཀོ) ཨི་པྤ་ཙྩ་ཡོ, ས་ཝཱ་ས་ན་ས་ཀ་ལ་སཾ་ཀི་ལེ་ས་པྤ་ཧཱ་ཡ་ཀཾ བྷ་ག་ཝ་ཏོ ཨ་ར་ཧ་ཏྟ་མ་གྒ་ཉྙཱ་ཎཾ ས་བྦ་ཉྙུ་ཏ་ཉྙཱ་ཎ་ནྟི་པི ཝ་ད་ནྟི, ས་མྤཱ་པ་ཡ་ཏཱི་ཏི ས་མྤཱ་པ་ཀཾ, ས་མྦོ་དྷི་ཡཱ ས་མྤཱ་པ་ཀ་ནྟི ཚ་ཊྛཱི་ས་མཱ་སོ, ཀི་ནྟི དྷ་མྨ་ཛཱ་ཏཾ དྷ་མྨ་ས་དྡེ་ནེ་ཏྠ པཱ་ར་མི་དྷ་མྨཱ པ་ཉྩ་མ་ཧཱ་པ་རི་ཙྩཱ་གཱ་ད་ཡོ ཙ ཨ་དྷི་པྤེ་ཏཱ, ཏེ་པི ཧི ཨ་ཏྟཱ་ནཾ དྷཱ་རེ་ནྟཾ དྷཱ་རེ་ནྟི ས་མྦོ་དྷི ས་མྤཱ་པ་ན་སཱ་མ་ཏྠི་ཡ་ཡོ་གེ་ན པ་རེ་པི དྷཱ་རེ་ནྟི ནཱ་མཱ་ཏི དྷ་མྨཱ་ཏི ཝུ་ཙྩ་ནྟི, ‘དྷ་ར=དྷཱ་ར་ཎེ’ཨི་ཙྩ་སྨཱ ཁཱི་སུ, ཝི་ཡཱ་དི་སུ་ཏྟེ་ན ཎྭཱ་དི(ཀོ) མ་པྤ་ཙྩ་ཡོ, དྷ་མྨཱ་ནཾ་ཛཱ་ཏཾ, དྷ་མྨཱ་ཨེ་ཝ་ཝཱ ཛཱ་ཏཾ, ས་མྦོ་དྷི་ས་མྤཱ་པ་ཀ་ཉྩ ཏཾ དྷ་མྨ་ཛཱ་ཏཾ ཙེ་ཏི ཝི་སེ་ས་ན་ས་མཱ་སོ, ‘ས་མྤཱུ་ར་ཡ’ནྟི མ་སྶེ་ཏཾ ཀ་མྨཾ, ས་མྤཱུ་ར་ཡ་ནྟི པ་ཡོ་ག་ས་མྤ་ཏྟི་ཡོ་གཱ དཱི་པ་ངྐ་ར (པཱ་ད)མཱུ་ལེ ཧ་ཏྠོ་པ་ག་ཏ་མྤི ནི་བྦཱ་ན་མྤ་ཧཱ་ཡ ཡ་ཐཱ་ཝུ་ཏྟ་ཀ་རུ་ཎཱ་གུ་ཎ་ཡོ་ག་སཱི་ཏ་ལཱི་བྷཱུ་ཏ་ཧ་ད་ཡ་ཏཱ་ཡ ‘‘ཀ་ཐ་ནྣཱ་མེ་ཏེ ཨ་ཙྩ་ནྟ དུ་སྶ་ཧ་ཝ་ཊྚ་དུ་ཀྑོ་པ་ག་ཏེ ས་ཏྟེ ཏཾ་མ་ཧཱ་དུ་ཀྑཱ མོ་ཙེ་སྶཱ་མཱི’’ཏི ཝ་ཊྚ་དུ་ཀྑ་ནི་སྶ་ར་ཎེ་ཀ་ཧེ་ཏུ་ཏཱ་ཡ ས་མྨཱ པཱུ་རེ་ནྟོ ཝ་ཌྜྷེ་ནྟོ ཝུ་ཌྜྷིཾ ཝི་རཱུ་ལ༹ྷཾ ཝེ་པུ་ལླཾ ག་མེ་ནྟོ་ཏི ཝུ་ཏྟཾ ཧོ་ཏི, ཧེ་ཏུ་ཡེ་ཝེ་ད་མ་པི དུ་ཀྑཱ་ནུ་བྷ་ཝ་ན་སྶ, མ་ཧཱ་ད་ཡ་ཏཱ པ་ན་སྶ པ་ར་མྤ་ར་ཧེ་ཏུ, དུ་ཊྛུ ཁ་ན་ཏི ཀཱ་ཡི་ཀཾ ཨ་སྶཱ་ད་ནྟི’དུ་པུ་བྦཱ ཁ་ནི་སྨཱ’ ‘‘ཀྭཱི’’ཏི (༥-༤) ཀྭི, དུ་ཀྑཾ ཀཱ་ཡི་ཀ་དུ་ཀྑ ཝེ་ད་ནཱ, ཀཱི་དི་ས་ནྟི ཨཱ་ཧ-’ཨ་ན་ནྟ་རཱུ་པ’ནྟི, ས་བྷཱ་ཝ་ཝ་ཙ་ནོ ཡཾ རཱུ་པ་ས་དྡོ ‘‘པི་ཡ་རཱུ་པ’’ནྟི་ཨཱ་དཱི་སུ་ཝི་ཡ, ཏེ ཙ དུ་ཀྑ་ས་བྷཱ་ཝཱ (ཨ་ན་ནྟཱ) ཨ་ན་ནྟ་ཀཱ་ར་ཎཱ་ནཾ ཝ་སེ་ན, ཏ་སྨཱ ཨ་ན་ནྟཾ རཱུ་པཾ ས་བྷཱ་ཝོ ཨ་སྶཱ་ཏི ཨ་ན་ནྟ་རཱུ་པཾ, ཏཾ དུ་ཀྑཾ ཨ་ནུ་བྷ་ཝཱི ཝི་ནྡཱི, ཀི་མི་ཝཱ་ཏི ཨཱ་ཧ-‘སུ་ཁཾ ཝཱ’ཏི, སུ་ཊྛུ ཁ་ན་ཏི ཀཱ་ཡི་ཀཾ ཨཱ་བཱ་དྷ་ནྟི སུ་ཁཾ, ཨི་ཝ་ས་དྡོ ས་དྷ་མྨ་ཏྟ་ས་ངྑཱ་ཏོ་པ་མཱ་ཛོ་ཏ་ཀོ, ས་དྷ་མྨ་ཏྟ་ཉྷི ཨུ་པ་མཱ, ཝུ་ཏྟ་ཉྷི ‘‘ཨུ་པ་མཱ་ནོ་པ་མེ་ཡྻཱ་ནཾ, ས་དྷ་མྨ་ཏྟཾ སི་ཡོ པ་མཱ’’ཏི, ཀིཾ ཝུ་ཏྟཾ ཧོ་ཏི ‘‘ཨ་ནི་ཊྛཱ་ནུ་བྷ་ཝ་ན་ས་བྷཱ་ཝཱ་ཡཱ་པི དུ་ཀྑ་ཝེ་ད་ནཱ་ཡ ཨ་ནུ་བྷ་ཝ་ན་ས་བྷཱ་ཝ་སཱ་མ་ཉྙེ་ན ཨ་ཛ྄ཛྷཱ་ས་ཡ་ས་མྤ་ཏྟི་ཝི་སེ་ས་ཡོ་གཱ མ་ཧཱ་ཀཱ་རུ་ཎི་ཀ་སྶ སུ་ཁེ་ན ས་དི་ས་ཏཱ་པ་ཏྟི་ཧོ་ཏཱི་ཏི དུ་ཀྑ་མྤི ས་མཱ་ནཾ ཏཾ སུ་ཁ་མི་ཝ ཝི་ནྡཱི’’ཏི. ཀ་ཐ་མ་ཉྙ་ཐཱ ཝ་ཊྚ་དུ་ཀྑ་ཏོ ས་ཀ་ལ་ལོ་ཀ་སྶ ས་མུ་དྡྷ་ར་ཎཾ སི་ཡཱ་ཏི, ཨ་ཐ་ཝཱ སུ་ཁ་མི་ཝ སུ་ཁཾ ཝི་ནྡ་ནྟོ ཝི་ཡ ཨ་ན་ཉྙ་ཝི་ནྡི་ཡ་མ་པི ཏཱ་དི་སཾ དུ་ཀྑཾ ས་ཀ་ལ་ལོ་ཀ་ཧི་ཏཱ་ཝ ཧི་ཏ་མ་ན་ཏཱ་ཡ ཝི་ནྡཱི་ཏི ཨ་ཏྠོ, ཏེ་ནཱ་ཧ ‘ཨ་ཁི་ནྣ་རཱུ་པོ’ཏི, ཨ་ཁི་ནྣཾ པ་རི་སྶ་མ་མ་པྤ་ཏྟཾ རཱུ་པཾ ས་བྷཱ་ཝོ ཨ་སྶཱ་ཏི ཝི་གྒ་ཧོ.
ཏཾ དྷ་མྨ་རཱ་ཛ་ནྟི ཡོ་ཏི ཨ་ནི་ཡ་མ་ནི་དྡི་ཊྛ་སྶ ཝུ་ཏྟ་གུ་ཎ་ཝི་སེ་སཱ་དྷཱ་ར པུ་གྒ་ལ་སྶ་ནི་ཡ་མ་ན་ཝ་ཙ་ནཾ, དྷ་མྨེ་ན རཱ་ཛ་ཏི ནོ ཨ་དྷ་མྨེ་ནཱ་ཏི ཝཱ, ཨ་ཏྟ་ནཱ པ་ཊི་ཝི་དྡྷ་སྶ སཱ་མི་བྷཱ་ཝེ་ན དྷ་མྨ་སྶ རཱ་ཛཱ སཱ་མཱི་ཏི ཝཱ, ཨ་ཏྟ་ནཱ པ་ཊི་ཝི་ཛ྄ཛྷི་ཡ་མཱ་ནེ དྷ་མྨེ པ་ཊི་ཝི་ཛ྄ཛྷ་ནྟོ་ཝ ཏ་ཏྠ རཱ་ཛ་ཏི དི་པྤ་ཏཱི་ཏི ཝཱ, པ་རཱུ་པ་ཀཱ་ར་ཝ་སེ་ན ཏ་ད་ཏྠཱ་ཡེ་ཝ པ་ཊི་པ་ནྣ་ཏྟཱ པ་རེ་སཾ དྷ་མྨཾ རཱ་ཛེ་ཏི པ་ཀཱ་སེ་ཏཱི་ཏི ཝཱ དྷ་མྨ་རཱ་ཛཱ, ཏཾ དྷ་མྨ་རཱ་ཛཾ ན་མི་ཏྭཱ་ཏི ས་མྦ་ནྡྷོ, ན་མ་སྶི་ཏྭཱ་ཏི ཨ་ཏྠོ, ཀཱི་དི་ས་ནྟི ཨཱ་ཧ-‘ཛི་ཏ་མཱ་ར་ཝཱི་རཾ སུ་དྷ་ནྟ སོ་ཝ་ཎྞ་ནི་བྷ’ནྟི. ཏ་ཏྠ མཱ་རོ ཙ སོ ཝཱི་རོ་ཙཱ་ཏི མཱ་ར་ཝཱི་རོ ཛི་ཏོ ཝི་དྟེ་དྷ་སྟ་བ་ལོ མཱ་ར་ཝཱི་རོ ནཱ་ཏི ཛི་ཏ་མཱ་ར་ཝཱི་རོ, ཏཾ, ཀི་ཉྩཱ་པི དེ་ཝ་པུ་ཏྟ་ཀི་ལེ་སཱ་བྷི་ས་ངྑཱ་ར་མ་ཙྩུ་ཀྑ་ནྡྷ མཱ་རཱ-ནེ་ན ཛི་ཏཱ ཨེ་ཝ, ཏ་ཐཱ་པི ཝཱི་ར་ས་དྡ་ས་ནྣི་དྷཱ་ནེ་ན དེ་ཝ་པུ་ཏྟ་མཱ་རེ ག་ཧི་ཏེ ཏཾ་ཝི་ཛ་ཡཱ ཨ་ཉྙེ་པི ཛི་ཏཱ ཨེ་ཝ ནཱ་མ ཧོ་ནྟཱི་ཏི ཝི་ཉྙེ་ཡྻཾ, སུ་ཊྛུ དྷ་ནྟཾ དྷ་མི་ཏཾ ཨུ་དྡྷ་རི་ཏཾ སུ་དྷ་ནྟཾ, སུ་ཝ་ཎྞ་མེ་ཝ སོ་ཝ་ཎྞཾ, སུ་དྷ་ནྟ ཙ ཏཾ སོ་ཝ་ཎྞ་ཉྩ, ཏ་སྶེ་ཝ ནི་བྷཱ སོ་བྷཱ ཨ་སྶེ་ཏི ས་མཱ་སོ, ཨ་ཐ་ཝཱ སུ་དྷ་ནྟ་ཉྩ ཏཾ སུ་ཝ་ཎྞཾ ཙེ་ཏི ས་མཱ་སེ ཏ་སྶི་ད་ནྟི ‘‘ཎོ’’ཏི (༤-༣༤) ཎ་པྤ་ཙྩ་ཡེ ‘‘མ་ཛ྄ཛྷེ’’ཏི (༤-༡༢༦) མ་ཛ྄ཛྷ་ཝུ་དྡྷི་ཡཾ སུ་དྷ་ནྟ་སོ་ཝ་ཎྞཾ པ་ཊི་མཱ་རཱུ་པཾ, ཏེ་ན ནི་བྷོ ས་དི་སོ, ཏཾ.
ཨེ་ཏྟཱ་ཝ་ཏཱ ཙ –
ཧེ་ཏུ ཕ་ལཾ པ་ར་ཏྠོ ཙ, ས་བྦོ་པི ཐུ་ཏི་ས་ངྒ་ཧོ;
ཧེ་ཏུ ས་མྦོ་དྷི་ཏོ, པུ་བྦེ་ཝ, ཡ་མ་ཉྙཾ ཏ་ཏོ་པ་རཱི་ཏི.
ཝུ་ཏྟ་ཧེ་ཏུ་ཕ་ལ་ས་ཏྟོ་པ་ཀཱ་ར་ཝ་སེ་ན བུ་དྡྷ་ར་ཏ་ན་སྶ ཐུ་ཏི་པུ་བྦ་ཀ་མྤ་ཎཱ་མཾ ད་སྶེ་ཏྭཱ ཨི་དཱ་ནི དྷ་མྨ་རཱ་ཛེ་ན ཏེ་ནཱ་པི པཱུ་ཛ་ནཱི་ཡ་སྶ དྷ་མྨ་ར་ཏ་ན་སྶ ནི་པ་ཙྩ་ཀཱ་རཾ ད་སྶེ་ཏུཾ‘དྷ་མྨ་ཉྩ མོ་ཧ་ནྡྷ་ཏ་མ་པྤ་དྷཾ་སི’ནྟི ཨཱ་ཧ, ཏ་ཏྠ ཙ ས་དྡོ ‘དྷ་མྨ་ཉྩ ན་མི་ཏྭཱ’ཏི [ན་མ་སྶི་ཏྭཱ (པོ་ཏྠ་ཀེ)] ན་མ་སྶ་ན་ཀྲི་ཡཱ་ཡ དྷ་མྨཾ ས་མྤི་ཎྜེ་ཏི, ཀི་མྦྷཱུ་ཏ་ནྟི ཨཱ་ཧ, ‘མོ་ཧ་ནྡྷ་ཏ་མ་པྤ་དྷཾ་སི’ནྟི, མུ་ཡ྄ཧ་ཏཱི་ཏི མོ་ཧོ=ཨ་ཉྙཱ་ཎཾ, ཨ་ནྡྷ་ཡ་ཏི ས་མ་ཏྠ་ཙ་ཀྑུ་ཝི་ཉྙཱ་ཎ་པ་རི་ཧཱ་ནེ་ནཱ་ཏི ཨ་ནྡྷཾ, ཨ་ནྡྷ་ཉྩ ཏཾ ཏ་མ་ཉྩེ་ཏི ཨ་ནྡྷ་ཏ་མཾ=བཱ་ལ༹ྷ་ཏི་མི་རཾ, མོ་ཧོ་ཡེ་ཝ ཏཾ་ས་དི་ས་ཏཱ་ཡ ཨ་ནྡྷ་ཏ་མ་ནྟི མོ ཧ་ནྡྷ་ཏ་མཾ, ཏཾ པ་དྷཾ་སེ་ཏི པ་ཀཱ་རེ་ན ནཱ་སེ་ཏི སཱི་ལེ་ནཱ་ཏི མོ་ཧ་ནྡྷ་ཏ་མ་པྤ་དྷཾ་སཱི, པ་ས་དྡ་སྶ་པ་ཀཱ་ས་ན་ཏྠཾ ཧི་ཏྭཱ པ་ཀཱ་ར་ཏྠ་སྶེ་ཝ ག་ཧ་ཎ་ཏོ པ་རི་ཡ་ཏྟི་ཡཱ ས་ཧ–
སོ་ཏཱ་པ་ཏྟཱ་ད་ཡོ མ་གྒཱ,ཙ་ཏྟཱ་རོ ཏ་པྥ་ལཱ་ནི་ཙ;
ཙ་ཏྟཱ་རི ཨ་ཐ ནི་བྦཱ་ནཾ, དྷ་མྨཱ ལོ་ཀུ་ཏྟ་རཱ ན་ཝཱ་ཏི.
ཝུ་ཏྟ་ན་ཝ་ལོ་ཀུ་ཏྟ་ར་མྨོ ག་ཧི་ཏཱ་ཏི ཝི་ཉྙཱ་ཏ་བྦཾ, ཨ་ཉྙ་ཐཱ ཨ་ར་ཧ་ཏྟ་མ་གྒོ་ཝ ག་ཡ྄ཧེ་ཡྻ, ཀ་སྨཱ པ་ནེ་ཏྠ མོ་ཧ་སྶེ་ཝ པ་ཧཱ་ནཾ ཝུ་ཏྟཾ, ནེ་ཏ་རེ་ས་ནྟི ཏ་མྨཱུ་ལ་ཀ་ཏྟཱ ས་བྦ་ཀི་ལེ་སཱ་ནཾ, ཏ་པྤ་ཧཱ་ན་སྨི་ཉྷི ཝུ་ཙྩ་མཱ་ནེ ཏ་མྨུ་ཁེ་ནེ་ཏ་རེ་ས་མྤི པ་ཧཱ་ནཾ ཝུ་ཏྟ་མེ་ཝ ཧོ་ཏཱི་ཏི.
ཨེ་ཝཾ དྷ་མྨ་ར་ཏ་ན་སྶ ན་མ་ཀྐཱ་རཾ ད་སྶེ་ཏྭཱ ཨི་དཱ་ནི ཏ་དཱ་དྷཱ་ར་བྷཱུ་ཏ་ས་ངྒྷ་ར་ཏ་ནཾ ན་མ་སྶི་ཏུཾ ‘ས་ངྒྷཾ ཏ་ཐཱ ས་ངྒྷ་ཊི་ཏཾ གུ་ཎེ་ཧཱི’ཏི ཝུ་ཏྟཾ, ཏ་ཏྠ ཏ་ཐཱ་ས་དྡོ ས་མུ་ཙྩ་ཡེ ཝཱ, ཝ་ཙོ་ཡུ་ཏྟི་ཡཾ ཝཱ, ཝ་ཙོ་ཡུ་ཏྟི་པ་ཀྑེ ཙ ས་དྡོ ཨཱ་ནེ་ཏྭཱ ས་མྦ་ནྡྷི་ཏ་བྦོ, ཀི་ལེ་སཱ་ད་ཡོ སཾ་ཧ་ན་ཏི ཧིཾ་ས་ཏཱི་ཏི ས་ངྒྷོ, སཾ་པུ་བྦ་ཏོ ཧ་ན་ཏི་སྨཱ ཀྭི་མྷི ‘‘ཀྭི་མྷི གྷོ་པ་རི་པ་ཙྩ་ས་མོ ཧཱི’’ཏི (༥.༡༠༠) ཧ་ན་སྶ གྷོ, ཀི་ལེ་ས་ཧིཾ་ས་ན་ཉྩེ་ཏྠ ཏ་ད་ངྒཱ་དི་ཝ་སེ་ན ག་ཧི་ཏཾ, གུ་ཎེ་ཧཱི་ཏི སཱ་མ་ཉྙ་ནི་དྡེ་ས་ཏོ ས་མྨུ་ཏི་ས་ངྒྷེ་ན ས་དྡྷིཾ
ཙ་ཏྟཱ་རོ ཙ པ་ཊི་པ་ནྣཱ, ཙ་ཏྟཱ་རོ ཙ ཕ་ལེ་ཋི་ཏཱ;
ཨེ་ས ས་ངྒྷོ ཨུ་ཛུ་བྷཱུ་ཏོ, པ་ཉྙཱ་སཱི་ལ་ས་མཱ་ཧི་ཏོ་ཏི.
ཝུ་ཏྟ་ཨ་ཊྛ་ཨ་རི་ཡ་པུ་གྒ་ལཱ ག་ཡ྄ཧ་ནྟི, གུ་ཎེ་ཧཱི་ཏི ལོ་ཀི་ཡ་ལོ་ཀུ་ཏྟ་རེ་ཧི སཱི་ལཱ་དི་གུ་ཎེ་ཧི, ས་ངྒྷ་ཊི་ཏ་ནྟི སཾ་ཧ་ཏཾ.
ཨེ་ཝ་མ་ན་ནྟ་རཱ་ཡེ་ན ག་ནྠ་པ་རི་ས་མཱ་པ་ན་ཏྠ་མ་ན་ནྟ གུ་ཎ་ཝི་སི་ཊྛ་ལོ་ཀ་ཏྟ་ཡ་གྒ་སཱི་ཁཱ་མ་ཎི་བྷཱུ་ཏ་སྶ ར་ཏ་ན་ཏྟ་ཡ་སྶ པ་ཎཱ་མཾ ད་སྶེ་ཏྭཱ ཨི་དཱ་ནི ག་ནྠ ཀ་ཏྟཱ་དི་ཡ་ཐཱ་ཝུ་ཏྟ་ཏྠོ་པ་ད་སྶ་ན པུ་བྦ་ངྒ་མ་མ་ཏྟ་ནཱ ས་མཱ་ར་བྷི་ཏ་བྦཾ ག་ནྠ ཀ་ར་ཎཾ པ་ཊི་ཉྙཱ་ཏུ་ཀཱ་མོ’ཡོ ཨི་དྡྷི་མ་ནྟེ་སཱུ’ཏི་ཨཱ་དི་མཱ་ཧ, ཏ་ཏྠ ‘ཡོ’ཏི ཨི་མ་སྶ ‘ཏ་ནྣཱ་མ་དྷེ་ཡྻེ་ནཱ’ཏི ཨི་མི་ནཱ ས་མྦ་ནྡྷོ, ཨེ་ཏཱ་ཡ ས་ཏྟཱ ཨི་ཛ྄ཛྷ་ནྟི ཨི་དྡྷཱ ཝུ་དྡྷཱ ཨུ་ཀྐཾ་ས་ག་ཏཱ ཧོ་ནྟཱི་ཏི ཨི་དྡྷི=ཨི་དྡྷི་ཝི་དྷཱ་ད་ཡོ ལོ་ཀི་ཡཱ ལོ་ཀུ་ཏྟ་རཱ ཙ སཱ ཨེ་ཏེ་ས་མ་ཏྠཱི་ཏི ཨི་དྡྷི་མ་ནྟོ, ཏེ་སུ ཨི་དྡྷི་མ་ནྟེ་སུ, ཨི་དྡྷི་མ་ནྟཱ་ནཾ མ་ཧཱ་སཱ་ཝ་ཀཱ་ནཾ མ་ཛ྄ཛྷེ་ཏི ཨ་ཏྠོ, མ་ཧ་ཏྟ་པྤ་ཏྟོ་ཏི མ་ཧ་ཏྟཾ མ་ཧ་ནྟ་བྷཱ་ཝཾ ག་ཏོ, ཏ་ནྣཱ་མ་དྷེ་ཡྻེ་ནཱ་ཏི ཏ་སྶེ་ཝ ནཱ་མ་དྷེ་ཡྻ་མ་སྶཱ་ཏི ཏ་ནྣཱ་མ་དྷེ་ཡྻོ, ཏེ་ན, ཏ་པོ་དྷ་ནེ་ནཱ་ཏི མུ་ནི་ནཱ, ཀིཾ ཝུ་ཏྟཾ ཧོ་ཏི- ‘‘ཨེ་ཏ་ད་གྒཾ བྷི་ཀྑ་ཝེ མ་མ སཱ་ཝ་ཀཱ་ནཾ བྷི་ཀྑཱུ་ནཾ ཨི་དྡྷི་མ་ནྟཱ་ནཾ ཡ་དི་དཾ མོ་གྒ་ལླཱ་ནོ’’ཏི བྷ་ག་ཝ་ཏཱ ཨི་དྡྷི་མ་ནྟེ་སུ ཨེ་ཏ་ད་གྒེ ཋ་པི་ཏོ མ་ཧཱ་མོ་གྒ་ལླཱ་ན་ཏྠེ་རོ ནཱ་མ ཡོ དུ་ཏི་ཡོ ཨ་གྒ་སཱ་ཝ་ཀོ… (ཏེ་ན ས་མཱ་ན་ནཱ་མ་དྷེ་ཡྻེ་ནཱ་ཏི) ཏ་མ་པ་དི་ས་ནྟོ-ཡ་མཱ་ཙ་རི་ཡོ ཨ་ནུ་དྡྷ་ཏ་བྷཱ་ཝེ་ན ཨུ་ཛུ་ནཱ་ཀྐ་མེ་ན ནཱ་མཱ་དི་ཀ་མ་ཝ་ཏྭཱ ཝ་ངྐ་ཝུ་ཏྟི་ཡཱ ཨ་ཏྟ་ནོ མོ་གྒ་ལླཱ་ནོ་ཏི ནཱ་མཾ མ་ཧཱ་སཱ་མི་ཊྛཱ་ན་ནྟ་ར་པྤ་ཏྟིཾ ཀཱ་ལོ་ཙི་ཏ་པ་ཉྙཱ ཝེ་ཡྻ་ཏྟི་ཡཾ བུ་དྡྷ་སཱ་ས་ནོ་པ་ཀཱ་རི་ཏཱ་དི་ཉྩ ཝི་བྷཱ་ཝེ་ཏི. ‘ཡཾ ར་ཙི་ཏ’ནྟི ས་མྦ་ནྡྷོ, ར་ཙི་ཏ་ནྟི ཀ་ཏཾ, ཀི་ནྟི ཨཱ་ཧ ས་དྡ་ས་ཏྠ’ནྟི, ས་དྡ་ས་ཏྠཾ ནཱ་མ སུ་ཏྟ, ས་དྡ་ལ་ཀྑ་ཎ་བྱཱ་ཀ་ར་ཎཱ་དྱ་པ་ར་ནཱ་མ་དྷེ་ཡྻཾ, སུ་ཏྟཾ(ཧི) ‘ས་དྡཱ (ལ་ཀྑཱི་ཡ་ནྟི) སཱ་སཱི་ཡ་ནྟི ཨ་ནུ་སཱ་སཱི་ཡ་ནྟི པ་ཀ་ཏི་པྤ་ཙྩ་ཡཱ་དི་ཝི་བྷཱ་ག་ཀ་པྤ་ནཱ་ཡ ཨེ་ཏེ་ནཱ’ཏི ས་དྡ་ལ་ཀྑ་ཎ་ནྟི ཙ ‘བྱཱ་ཀ་རཱི་ཡ་ནྟི ས་དྡ་ནི་པྥཱ་ད་ན་ཝ་སེ་ན ཀ་ཐཱི་ཡ་ནྟི ཨེ་ཏེ་ནཱ’ཏི བྱཱ་ཀ་ར་ཎ་ནྟི ཙ ཝུ་ཙྩ་ཏི, ཨ་པ་ར་མྤ་ན ཝུ་ཏྱཱ་དི ཏ་དུ་པ་ཀ་ར་ཎ་བྷཱ་ཝེ་ན ས་དྡ་ས་ཏྠཾ ས་དྡ་ལ་ཀྑ་ཎཾ བྱཱ་ཀ་ར་ཎ་ནྟི ཙ ཝུ་ཙྩ་ཏཱི་ཏི ད་ཊྛ་བྦཾ, ཨ་ནུ་ན་ནྟི ཏ་བྦི་སེ་ས་ནཾ, ཨ་སེ་ས་ལ་ཀྑི་ཡོ་པ་ས་ངྒཱ་ཧ་ཀ་བྷཱ་ཝེ་ན ཝ་ཏྟ་བྦ་སྶཱ་པ་ར་སྶཱ་བྷཱ་ཝཱ ས་མྤུ་ཎྞ་ནྟི ཨ་ཏྠོ, ཨ་ཐཱ་ཏི ཨ་ན་ནྟ་ར་ཏྠེ ནི་པཱ་ཏོ, ས་དྡ་ས་ཏྠ་ར་ཙ་ནཱ་ན་ནྟ་ར་ནྟི ཨ་ཏྠོ, ཏ་སྶེ་ཏི ས་དྡ་ས་ཏྠ་སྶ, ཝུ་ཏྟི ཙ ས་མཱ་སཱ ཀ་ཏཱ་ཏི ས་མྦ་ནྡྷོ, སུ་ཏྟཾ ཝི་ཝ་རཱི་ཡ་ཏི ཨེ་ཏཱ་ཡཱ་ཏི ཝུ་ཏྟི, ས་མ་སྶ་ཏེ ས་ངྑི་པཱི་ཡ་ཏཱི་ཏི ས་མཱ་སཱ.
ཏ་སྶཱ་པཱི་ཏི ཝུ་ཏྟི་ཡཱ་པི, ས་ངྒ་ཧེ་ཏྭཱ ས་དྡ་ཝ་སེ་ན ས་ངྐུ་ཙི་ཏཾ ཝི་ཡ ཀ་ཏྭཱ ཁི་པ་ནཾ ས་ངྑེ་པོ, ཏ་སྶ ན་ཡོ ཀ་མོ ས་ངྑེ་པ་ན་ཡོ, ཏེ་ན, བྷོ་ཝཱ་ཏི ཡོ ས་དྡ་ས་ཏྠ་སྶ ཝུ་ཏྟི་ཡཱ ཙ ཀ་ཏྟཱ སོ ཨེ་ཝ, ཨི་དཱ་ནི སུ་ཏྟ་ཝུ་ཏྟི་ར་ཙ་ནཱ་ན་ནྟ་ར་མ་ཝ་ས་ར་པྤ་ཏྟེ ཨི་མ་སྨིཾ ཀཱ་ལེ, ས་མཱ་ར་བྷེ་ཡྻ ས་མྨཱ ཨཱ་ར་མྦྷཾ ཀ་རེ་ཡྻ བ་ཧུ་ནྣཾ ཀྲི་ཡཱ་ཀྑ་ཎཱ་ན་མཱ་དི་བྷཱུ་ཏཾ ཀྲི་ཡཱ་ཀྑ་ཎ་མ་ནུ་ཏི་ཊྛེ་ཡྻ, ཀི་ནྟི སཾ་ཝ་ཎྞ་ནཾ, སཾ་ཝ་ཎྞཱི་ཡ་ཏི ཨ་ཏྠོ ཨེ་ཏཱ་ཡཱ་ཏི སཾ་ཝ་ཎྞ་ནཱ, པ་ཉྩཱི་ཡ་ཏི ཝི་པ་ཉྩཱི་ཡ་ཏི བྱ་ཏྟཱི ཀ་རཱི་ཡ་ཏི ཝུ་ཏྟི ཨ་ཏྠོ ཨེ་ཏཱ་ཡཱ་ཏི ཝཱ, ཏཾ པ་ཉྩ་ཡ་ཏཱི་ཏི ཝཱ ལ་དྡྷ་ནཱ་མ་པ་ཉྩི་ཀཱ, ཏཾ.
ཨེ་ཝ་མ་ཏྟ་ནཱ ཀ་ར་ཎཱི་ཡ་ས་ཏྠ་མྤ་ཊི་ཛཱ་ནི་ཏྭཱ ཏ་ད་ན་ནྟ་རཾ ‘‘དྭེ མེ བྷི་ཀྑ་ཝེ པ་ཙྩ་ཡཱ ས་མྨཱ་དི་ཊྛི་ཡཱ ཨུ་པྤཱ་དཱ་ཡ (ཀ་ཏ་མེ དྭེ) པ་ར་ཏོ ཙ གྷོ་སོ (ཨ་ཛ྄ཛྷ་ཏྟ་ཉྩ) ཡོ་ནི་སོ མ་ན་སི་ཀཱ་རོ’’ཏི ཝ་ཙ་ན་ཏོ ས་མྨཱ་ས་ཝ་ན་པ་ཊི་བ་དྡྷཱ ས་བྦཱ་པི སཱ་ས་ན (པྤ་ཊི) ས་མྤ་ཏྟཱི་ཏི སཱ་ས་ན་པྤ་ཊི་པ་ཏྟི་ཡཱ བྱཱ་ཀ་ར་ཎ་སྶ མཱུ་ལ་ཀཱ་ར་ཎ་ཏྟཱ ཏཾ ས་ཝ་ནེ སཱ་དྷུ་ཛ་ནེ ནི་ཡོ་ཛེ་ནྟོ ‘ཏཾ སཱ་ར་བྷཱུ་ཏ’ནྟི་ཨཱ་དི་མཱ་ཧ, ཏ་ཏྠ ཏ་ནྟི ཡ་ས་དྡ་ཝི་ར་ཧེ་པི ཨ་དྷི་ཀ་ཏ་ཏྟཱ སཾ་ཝ་ཎྞ་ནཾ པ་རཱ་མ་ས་ཏི, ཏཾ སུ་ཎ་ནྟཱུ’ཏི ས་མྦ་ནྡྷོ, སཱ་དྷཱུ་ཏི ས་ཝ་ན་ཀྲི་ཡཱ་ཝི་སེ་ས་ནཾ, ཨ་ཏྠཱ་ནུ་རཱུ་པཾ བྱ་ཉྫ་ནཾ, བྱ་ཉྫ་ནཱ་ནུ་རཱུ་པ་ཉྩ ཨ་ཏྠཾ་ས་ལླ་ཀྑེ་ཏྭཱ ཨ་ན་ཉྙ་མ་ནཱ ཧུ་ཏྭཱ ས་ཀྐ་ཙྩཾ སུ་ཎ་ནྟཱུ་ཏི ཨ་ཏྠོ སུ་ཝ་ཎྞ་བྷཱ་ཛ་ནེ ནི་ཀྑི་ཏྟ་སཱི་ཧ་ཝ་སཱ་ཝི་ཡ ཨ་ཝི་ན་སྶ་མཱ་ནཾ ཀ་ཏྭཱ ཧ་ད་ཡེ ཋ་པ་ན་ཝ་སེ་ན, ས་ཀྐ་ཙྩ་ས་ཝ་ན་མེ་ཝ ཧི སོ་ཏཱུ་ན་མ་ཏྠཱ་ཝ་ཧཾ ཧོ་ཏཱི་ཏི, ས་ནྟོ་ཏི ས་ཝ་ན་ཀྲི་ཡཱ་ཡ ཀ་ཏྟཱ་རོ ད་སྶེ་ཏི, ཏ་ཐཱ སཱ་ཏི་ས་ཡ་བྱཱ་ཀ་ར་ཎཾ… ཏ་ཐཱ་ཝི་དྷཱ ཨེ་ཝ ས་པྤུ་རི་སཱ སཱ་དྷུ་ཀཾ སོ་ཏུ་ཀཱ་མཱ ཧོ་ནྟཱི་ཏི, ཀི་མྦྷཱུ་ཏ་ནྟི ཨཱ་ཧ ‘སཱ་ར་བྷཱུ་ཏ’ནྟི་ཨཱ་དི, བྷཱུ་ཏ་ས་དྡོ ཨེ་ཏྠ ‘‘བྷཱུ་ཏ་སྨིཾ པཱ་ཙི་ཏྟི་ཡ’ནྟི་ཨཱ་དཱི་སུ ཝི་ཡ ཝི་ཛྫ་མཱ་ན་ཏྠོ, ཕེ་གྒུ་ཏྟཱ་བྷཱ་ཝེ་ན ཨ་པ་རི་ཙྩ་ཛ་ནཱི་ཡ་ཏཱ་ཡ སཱ་རོ ཐི་རཾ སོ ཨ་ཏྠོ བྱ་ཉྫ་ན་ཉྩ ཨ་སྶཱ ཨ་ཏྠཱི་ཏི སཱ་རཱ ཙ སཱ བྷཱུ་ཏཱ་ཙ, ཨ་ཐ ཝཱ ལོ་ཀི་ཡ་ལོ་ཀུ་ཏྟ་ར་གུ་ཎཱ་ཏི་ས་ཡ་སཱ་དྷ་ནེ་ཀ་སཱ་དྷ་ན་བྷཱ་ཝ་ཏོ སེ་ཊྛ་ཊྛེ་ན སཱ་ར་ཉྩ སཱ བྷཱུ་ཏཱ་ཙཱ་ཏི སཱ་ར་བྷཱུ་ཏཱ, ཏཾ ག་ནྠོ ཡེ་ཝེ་ཏྠ ས་ངྑེ་པི་ཏོ, ཨ་ཏྠོ པ་ན ན་ཡ་གྒཱ་ཧི་ཏ་ཏཱ་ཡ་པི ས་བྦ་ཐཱ ད་སྶི་ཏོ་ཡེ་ཝཱ་ཏི ཝི་པུ་ལཾ ཨ་ཏྠཾ ག་ཎྷཱ་ཏཱི་ཏི ཝི་པུ་ལ་ཏྠ་གཱ་ཧཱི, ཏཾ, ཝི་དྷཱི་ཡ་མཱ་ན་ཝ་ཎྞ་ནཱ་ཀྐ་མ་ཝི་སེ་སེ་ན བྱཱ་ཀུ་ལ་སྶ ཝ་ཎྞ་ནཱ་ཀྐ་མ་སྶ ནི་ར་ས་ན་ཏོ ན་ཏྠི ཨཱ་ཀུ་ལཾ ཀི་ཉྩི ཨ་སྶཱ་ཏི ཨ་ནཱ་ཀུ་ལཾ, ཏཾ, ཨི་མི་ནཱ ཙ ཀ་ཙྩཱ་ཡ་ན་ཝུ་ཏྟི་ཝ་ཎྞ་ནཱ་སུ ན ཏ་ཐཱ་བྷཱ་ཝཾ ད་སྶེ་ཏི.
ཏ་དེ་ཝ་མ་དྷི་ཀ་ཏ་ཏྟཱ་ཡེ་ཝཱ་ཡ་མཱ་ཙ་རི་ཡོ ག་ནྠཱ་ར་མྦྷེ’མ་ཧཱ་ད་ཡོ ཡོ’ཏི་ཨཱ་དི་ཀེ པ་ཊི་པ་ཛྫི་ཏྭཱ དཱ་ནི ཨ་ཏྟ་ནཱ ཝ་ཎྞ་ནཱི་ཡ་སྶ ག་ནྠ་སྶཱ་དི བྷཱུ་ཏཾ ཝཱ་ཀྱ་མ་ན་དྷི་ཀ་ཏ་པ་རི་ཧཱ་ར་མུ་ཁེ་ནེ་ཝོ་པ་ནྱ་སྱ བྱཱ་ཁྱཱ་ཏུ་མཱ་ཧ- ‘ཨི་དྷཱ’ཏི་ཨཱ་དི, ཏ་ཏྠ ཨི་དྷཱ་ཏི ཨི་མ་སྨིཾ མཱ་ག་དྷི་ཀ་ས་དྡ་ལ་ཀྑ་ཎ་ཝི་ར་ཙ་ནཱ་དྷི་ཀཱ་རེ, མཱ་ག་དྷཱ་ནཾ ས་དྡཱ་ནཾ ཨི་ད་ནྟི མཱ་ག་དྷི་ཀཾ, མཱ་ག་དྷི་ཀཾ ས་དྡ་ལ་ཀྑ་ཎ་ནྟི ཝི་སེ་ས་ན ས་མཱ་སོ, ཝི་ར་ཙ་ཡི་ཏུ་ཀཱ་མོ་ཏི ཀ་ཏྟུ་ཀཱ་མོ, ར་ཏིཾ་ཛ་ནེ་ཏཱི་ཏི ར་ཏ་ནཾ, ར་མ་ཡ་ཏཱི [ར ཏ་ཡ་ཏཱི (པོ་ཏྠ་ཀེ)] ཏི (ཝཱ) ར་ཏ་ནཾ ཨ་ན་པྤ་ཙྩ་ཡེ་ན, ཨ་ཐ་ཝཱ ཡཾ ལོ་ཀེ ཙི་ཏྟཱི་ཀ་ཏཱ་དི་ཀཾ ར་ཏ་ན་ནྟི ཝུ་ཙྩ་ཏི, ཨི་ད་མྤི ཏཾ ས་དི་ས་ཏཱ་ཡ ར་ཏ་ན་ནྟི ཝུ་ཙྩ་ཏི, ཏ་ཐཱ་ཙཱ་ཧུ–
ཙི་ཏྟཱི་ཀ་ཏཾ མ་ཧ་གྒྷ་ཉྩ, ཨ་ཏུ་ལཾ དུ་ལླ་བྷ་ད་སྶ་ནཾ;
ཨ་ནོ་མ་ས་ཏྟ་པ་རི་བྷོ་གཾ, ར་ཏ་ནཾ ཏེ་ན ཝུ་ཙྩ་ཏཱི་ཏི.
བུ་དྡྷཱ་དཱི་ན་མེ་ཏ་མ་དྷི་ཝ་ཙ་ནཾ, ཏ་ཡོ ཨ་ཝ་ཡ་ཝཱ ཨ་སྶཱ་ཏི ཏ་ཡཾ, ས་མུ་དཱ་ཡོ, ར་ཏ་ནཱ་ནཾ ཏ་ཡཾ ར་ཏ་ན་ཏྟ་ཡཾ, ཨ་ཝ་ཡ་ཝ་ཝི་ནི་མྨུ་ཏྟ་སྶ པ་ན ས་མུ་དཱ་ཡ་སྶ ཨ་བྷཱ་ཝ་ཏོ ཏཱི་ཎི ཨེ་ཝ ར་ཏ་ནཱ་ནི ཝུ་ཙྩ་ནྟི, པ་ཎ་མ་ནཾ པ་ཎཱ་མོ, ར་ཏ་ན་ཏྟ་ཡ་གུ་ཎ་ནི་ནྣ་ཏཱ, པ་ཎ་མ་ནྟི ཨེ་ཏཱ་ཡཱ་ཏི ཝཱ པ་ཎཱ་མོ, པ་ཎཱ་མ་ཀྲི་ཡཱ་ནི་པྥཱ་དི་ཀཱ ཀུ་ས་ལ་ཙེ་ཏ་ནཱ, ར་ཏ་ན་ཏྟ་ཡ་སྶ པ་ཎཱ་མོ་ཏི ཚ་ཊྛཱི་ས་མཱ་སོ, ཨ་བྷི་དྷཱི་ཡ་ཏི པ་ཊི་པཱ་དཱི་ཡ་ཏཱི་ཏྱ་བྷི་དྷེ་ཡྻོ ས་མུ་དི་ཏེ་ན ས་ཏྠེ་ན ཝ་ཙ་ནཱི་ཡ་ཏྠོ, ཡེ་ན ཙ ཡོ པ་ཊི་པཱ་དཱི་ཡ་ཏི སོ ཏ་སྶ ཨ་ཏྠོ ཧོ་ཏཱི་ཏི, སོ ཙ པ་ཀ་ཏི་པྤ་ཙྩ་ཡཱ་དི་ཝི་བྷཱ་ག་ཀ་པྤ་ནཱ་ཡ ས་དྡཱ་ནཾ ས་ངྑ་ར་ཎཾ, ས་དྡ་ས་ཏྠེ་ན ཧི ས་དྡ་ས་ངྑ་ར་ཎ་མེ་ཝ པ་ཊི་པཱ་དཱི་ཡ་ཏི, (ར་ཏ་ན་ཏྟ་ཡ་པྤ་ཎཱ་མོ ཙ ཨ་བྷི་དྷེ་ཡྻོ ཙ) ར་ཏ་ན་ཏྟ་ཡ་པྤ་ཎཱ་མཱ་བྷི་དྷེ་ཡྻ་ནྟི ཙ་ཏྠ་ས་མཱ་སོ, ཏ་སྶ ས་ནྡ་སྶ་ནཾ ཨ་ཏྠོ ཡ་སྶཱ་ཏི ཨ་ཉྙ་པ་ད་ཏྠོ, ཀི་ནྟཾ ཝཱ་ཀྱཾ, ཏཱ ཝཱ་ཏི ཝཱ་ཀྱཱ་ལ་ངྐཱ་རེ, ན་ནུ་ཙེ་ཝ་མ་དྷི་ཀ་ཏ་ཏྟེ་པི ཨ་བྷི་དྷེ་ཡྻ་མ་ཏྟ་མེ་ཝ་ད་སྶེ་ཏ་བྦཾ སི་ཡཱ ཀིཾ ཝཱ་ཙཱ་པ་ཎཱ་མེ་ན, ཀཱ་ཡ་མ་ནོ་མ་ཡེ་ནཱ་པི པུ་ཉྙཱ་ཏི ས་ཡ་པྤ་ཏྟི་ཡཱ ཨ་བྷི་ས་མཱི་ཧི་ཏ་ཏྠ་སི་དྡྷི ཧོ་ཏེ་ཝཱ་ཏི ཙོ་ད་ནཾ མ་ན་སི ནི་དྷཱ་ཡ ཝ་ཙཱི་པ་ཎཱ་མ་སྶ པ་ར་ཏྠ་ས་ནྣི་སྶ་ཡ་ཏ་ཉྩ ཏ་སྶེ་ཝ ཝི་བྷཱ་གེ་ན པ་ཡོ་ཛ་ན་ཉྩ ད་སྶེ་ཏུ་མཱ་ཧ- ‘ཏ་ཏྠ’ཨི་ཙྩཱ་དི, གུ་ཎ་ས་དྡོ ཨེ་ཏྠ ‘‘ས་ཏ་གུ་ཎཱ ད་ཀྑི་ཎཱ པཱ་ཊི་ཀ་ངྑཱ’’ཏི་ཨཱ་དཱི་སུ ཝི་ཡ ཨཱ་ནི་སཾ་ས་ཊྛོ, གུ་ཎཱ་ན་མཱ་ནི་སཾ་སཱ་ནཾ ཨ་ནུ་ཀཱུ་ལཾ ཨ་ནུ་གུ་ཎཾ, ཧེ་ཏུ་མ་ནྟ་ཝི་སེ་ས་ན་མེ་ཏཾ, པ་དྷཱ་ན་བྷཱ་ཝཾ ནཱི་ཏཾ པ་ཎཱི་ཏཾ ཨ་ཏི་ཨུ་ཏྟ་མ་ནྟི ཨ་ཏྠོ, ཨ་ཏཱི་ས་ཡེ་ན པ་ཎཱི་ཏཾ པ་ཎཱི་ཏ་ཏ་རཾ, ཙི་ཏྟ་སྶ་ས་ནྟཱ་ནཾ པ་བ་ནྡྷོ ཙི་ཏྟ་ས་ནྟཱ་ནཾ, པ་ཎཱི་ཏ་ཏ་ར་ཉྩ ཏཾ ཙི་ཏྟ་ས་ནྟཱ་ན་ཉྩ, ཨ་ནུ་གུ་ཎ་ཉྩ ཏཾ པ་ཎཱི་ཏ་ཏ་ར་ཙི་ཏྟ་ས་ནྟཱ་ན་ཉྩཱ་ཏི ཝི་སེ་ས་ན་ས་མཱ་སོ, ཏ་པྤ་ཎཱ་མ་ཀ་ར་ཎེ་ན ཨ་ནུ་གུ་ཎ…པེ… ས་ནྟཱ་ནཾ ཡེ་ས་ནྟི ཨ་ཉྙ་པ་ད་ཏྠོ, ཏེ་སཾ, ཡ་ཐཱ ཏེ སོ་ཏཱ་རོ ར་ཏ་ན་ཏྟ་ཡ་སྶ པ་ཎཱ་མ་ཀ་ར་ཎེ་ན པུ་ཉྙཱ་ཏི་ས་ཡ་པྤ་ཊི་ལཱ་བྷཱ ཨ་ནེ་ཀཱ་ནི་སཾ་སཱ་ཏི་ས་ཡ་པྤ་ཊི་ལཱ་བྷཱ་ནུ་ཀཱུ་ལ ཙི་ཏྟ་ས་ནྟཱ་ན་ཏཱ་ཡ པ་དྷཱ་ན་ཏ་ར་ཙི་ཏྟ་ས་ནྟཱ་ནཱ ཧོ་ནྟི, ཏ་ཐཱ པ་ཝ་ཏྟཱ་ན་ནྟི ཨ་དྷི་པྤཱ་ཡོ, ཨི་ད་མྤི ཨ་དྷི་ག་ཏཱ…པེ… ནྟ་རཱ་དྷཱ་ན་ནྟཱི་མེ་སཾ ཧེ་ཏུ་བྷཱ་ཝེ་ན ཏི་ཊྛ་ཏི, ཨ་དྷི་ག་ཏཱ པ་ཏྟཱ ཨ་ནེ་ཀེ བ་ཧཱུ ཨཱ་ནི་སཾ་ས་ཝི་སེ་སཱ ཨཱ་ཡུ ཝ་ཎྞ་སུ་ཁ་བ་ལ་པ་ཊི་བྷཱ་ནཱ་ད་ཡོ ཡེ་ས་ནྟི ཝི་གྒ་ཧོ, ཝི་སོ་སི་ཏཱ སུ་ཀྑཱ་པི་ཏཱ ཨ་ནྟ་རཱ་ཡཱ བྷ་ཡཱ་ད་ཡོ ཨ་ཛ྄ཛྷ་ཏྟི་ཀཱ བཱ་ཧི་ཡཱ ཝཱ ཡེ་སཾ ཏ་ཐཱ་ཝི་དྷཱ་ནཾ སོ་ཏཱུ་ནཾ, ཨེ་ཏེ་པི ཨ་བྷི,པེ,དྡྷ་ཏྠ་ནྟི ཨི་ཙྩ་སྶ ཧེ་ཏཱུ, ཨ་བྷི་ས་མཱི་ཧི་ཏ་སྶ ཨ་ནུ་ཊྛི་ཏ་སྶ ཀ་ཏ་ནི་ཊྛི་ཏ་སྶ ག་ནྠ་སྶ ཨ་ཝ་བོ་དྷོ་ཡེ་ཝ ཕ་ལཾ, ཏ་སྶ སི་ཛ྄ཛྷ་ན་ཏྠཾ, ཀི་ནྟཾ ར་ཏ་ན་ཏྟ་ཡ་པྤ་ཎཱ་མ་ས་ནྡ་སྶ་ནཾ.
ས་ཙྩཾ པུ་ན་པི ས་ཙྩ་ནྟི, བྷུ་ཛ་མུ་ཀྑི་པྤ ཝུ་ཙྩ་ཏེ;
ས་ཀ་ཏྠོ ན་ཏྠཱི ན་ཏྠེ་ཝ,པ་ར་སྶ་ཏྠ་མ་ཀུ་བྦ་ཏོ་ཏི.
ཝ་ཙ་ན་ཏོ པ་ར་ཏྠོ་ཝ ས་པྤུ་རི་སེ་ཧི ཀ་ཏྟ་བྦོ, པ་ར་ཏྠེ ས་མྤཱ་དི་ཏེ པ་ན ས་ཀ་ཏྠོ ས་མྤ་ནྣོ་ཝ ནཱ་མ སི་ཡཱ་ཏི མ་ན་སི ཀ་ཏྭཱ ཨཱ་ཧ- ‘ཨེ་ཏ་དེ་ཝཱ’ཏི་ཨཱ་དི. ཀཱ་ཡ་མ་ནོ་ས་མཱ་ཙ་ར་ཎེ་ན ས་མྤ་ཛྫ་མཱ་ན་ཉྩ ཝ་ཙཱི་ས་མཱ་ཙ་ར་ཎེ་ན ས་མྤ་ཛྫ་ཏེ་ཝཱ་ཏི ཨ་ནེ་ནེ་ཝ ཝཱ་ཀྱེ་ན ཝི་ཉྙཱ་ཡ་ཏཱི་ཏི ཨ་ཝ་ག་ནྟ་བྦཾ, བུ་དྡྷི པུ་བྦཱ ཡ་སྨིཾ ཀ་ར་ཎེ ཏཾ བུ་དྡྷི པུ་བྦཾ, ཏཾ སཱི་ལེ་ན ཀ་རོ་ནྟཱ བུ་དྡྷི་པུ་བྦ་ཀཱ་རི་ནོ, ཨ་བྷི་དྷེ་ཡྻ་སྶ ཨ་དྷི་ག་མོ ཛཱ་ན་ནཾ པུ་བྦོ ཡ་སྶ སོ ཨ་བྷི་དྷེ་ཡྻཱ་དྷི་ག་མ་པུ་བྦ་ཀོ, ཨ་ཝ་ཏཱ་རོ པ་ཝ་ཏྟི, ཨེ་ཀ་དེ་ས་ད་སྶ་ནེ ‘‘ས་མུ་དྡོ དི་ཊྛོ’’ཏི ཝི་ཡ ཨེ་ཀ་དེ་སེ་པི ས་མུ་དཱ་ཡ་ཝོ་ཧཱ་ར་ད་སྶ་ན་ཏོ པ་ཙྪི་མ པཱ་དེ་ནཱ་ཏི ཝུ་ཏྟཾ, པ་ཙྪི་མ་པཱ་ད་སྶེ་ཀ་དེ་ས་བྷཱུ་ཏེ་ན ‘ས་དྡ་ལ་ཀྑ་ཎ’མི་ཙྩ་ནེ་ནཱ་ཏི ཨ་ཏྠོ, སཱ་དྷི་ཡཾ ས་དྡཱ་ནཾ ས་ངྑ་ར་ཎཾ, སཱ་དྷ་ནཾ བྱཱ་ཀ་ར་ཎཾ, ཏཾ ལ་ཀྑ་ཎཾ ས་བྷཱ་ཝོ ཨ་སྶཱ་ཏི སཱ་དྷི་ཡ་སཱ་དྷ་ན་ལ་ཀྑ་ཎོ, སཱ་དྷི་ཡ་སྶེ་དཾ སཱ་དྷ་ནཾ, སཱ་དྷ་ན་སྶ ཙེ་དཾ སཱ་དྷི་ཡ་ནྟི ཨེ་ཝ་མ་སྶེ་ད་མྦྷཱ་ཝ་ཧེ་ཏུ་ས་བྷཱ་ཝོ ས་མྦ་ནྡྷོ་ཏི ཝུ་ཏྟཾ ཧོ་ཏི, པ་ཡོ་ཛ་ནཾ ཨ་བྷི་དྷེ་ཡྻ་ས་དྡོ་པ་ད་སྶི་ཏཾ ས་དྡ་ས་ངྑ་ར་ཎཾ, ཏ་ཏྠ ས་མྦ་ནྡྷ་སྶ་ནྟོ་ག་དྷ་ཏྟཾ… སཱ་དྷི་ཡོ་པ་ད་སྶ་ན་མུ་ཁེ་ན སཱ་དྷ་ན་སྶཱ་པི ད་སྶི་ཏ་ཏྟཱ ནི་སྶ་ཡོ་པ་ད་སྶ་ན་ཏོ, ཨུ་སྶུ་ཀྐཾ ས་མྨཱ་ཝཱ་ཡཱ་མཾ, བུ་དྡྷ་ཏྟཾ ས་བྦ་ཉྙུ་ཏ་ཉྙཱ་ཎཾ, པཱུ་རེ་ཏྭཱ་ཏི–
མ་ནུ་སྶ་ཏྟཾ ལི་ངྒ་ས་མྤ་ཏྟི, ཧེ་ཏུ ས་ཏྠཱ་ར་ད་སྶ་ནཾ;
པ་བྦ་ཛྫཱ གུ་ཎ་ས་མྤ་ཏྟི, ཨ་དྷི་ཀཱ་རོ ཙ ཚ་ནྡ་ཏཱ;
ཨ་ཊྛ་དྷ་མྨ་ས་མོ་དྷཱ་ནཱ, ཨ་བྷི་ནཱི་ཧཱ་རོ ས་མི་ཛ྄ཛྷ་ཏཱི་ཏི.
ཝུ་ཏྟ་ཨ་ཊྛ་དྷ་མྨ་ས་མ་ནྣཱ་ག་ཏེ་ན ཨ་བྷི་ནཱི་ཧཱ་རེ་ན ས་མ་ནྣཱ་ག་ཏཱ ཧུ་ཏྭཱ ཡ་ཐཱ་ཝུ་ཏྟེ པཱ་ར་མི་ཏཱ་ད་ཡོ དྷ་མྨེ པཱུ་རེ་ཏྭཱ་ཏི ཨ་ཏྠོ, ཨཱ་ག་ཏཱ་ཏི ས་ཏྟ་ཏྟིཾ་ས་བོ་དྷི་པ་ཀྑི་ཡ་དྷ་མྨཱ་ནུ་བྲཱུ་ཧ་ནེ་ན ཨཱ་ག་ཏཱ, ཨི་དྷཱ་ཏི ཨི་མ་སྨིཾ ལོ་ཀེ, ཨཱ་ག་ཏཱ་ཏི པ་ཏྟཱ ཨུ་པྤ་ནྣཱ, ཏ་ཐཱ་ག་ཏོ་ཏི ཡ་ཐཱ ས་མྤ་ཏི ཛཱ་ཏཱ ཏེ བྷ་ག་ཝ་ནྟོ ས་ཏྟ་པ་ད་ཝཱི་ཏི་ཧཱ་རེ་ན ག་ཏཱ, ཏ་ཐཱ ཨ་ཡ་མྤི ཨུ་ཏྟ་རཱ་བྷི་མུ་ཁཾ ག་ཏོ་ཏི ཨ་ཏྠོ, མུ་ཧུ་ཏྟ་ཛཱ་ཏོ་ཝཱ་ཏི ས་མྤ་ཏི་ཛཱ་ཏོ ཨེ་ཝ, ཛཱ་ཏ་ས་མ་ན་ནྟ་ར་མེ་ཝཱ་ཏི ཝུ་ཏྟཾ ཧོ་ཏི, ཝི་ཀྐ་མཱི་ཏི ཨ་ག་མཱ་སི, ས་ཏྟ པ་དཱ་ནི ག་ནྟྭཱ་ན དི་སཱ ཝི་ལོ་ཀེ་སཱི་ཏི ཨི་དཾ ‘‘དྷ་མྨ་ཏཱ ཨེ་སཱ བྷི་ཀྑ་ཝེ ས་མྤ་ཏི ཛཱ་ཏོ བོ་དྷི་ས་ཏྟཱ ས་མེ་ཧི པཱ་དེ་ཧི པ་ཏི་ཊྛ་ཧི་ཏྭཱ’’ཏི ཨེ་ཝ མཱ་དི་ཀཱ་ཡ པཱ་ལི༹་ཡཱ ས་ཏྟ་པ་ད་ཝཱི་ཏི་ཧཱ་རཱུ་པ་རི་ཋི་ཏ་སྶ ས་བྦ་དི་སཱ་ནུ་ཝི་ལོ་ཀ་ན་སྶ ཝུ་ཏྟ་ཏྟཱ ཝུ་ཏྟཾ, དི་སཱ ཝི་ལོ་ཀེ་སི ས་མ་ནྟ་ཏོ་ཏི ཨི་ད་མྤ་ན ‘ས་མེ་ཧི པཱ་དེ་ཧི ཕུ་སཱི ཝ་སུ་ནྡྷ་ར’ནྟི ཨེ་ཏ་སྶ ཨ་ན་ནྟ་རཾ ད་ཊྛ་བྦཾ… པཱ་དེ་ཧི ཝ་སུ་ནྡྷ་རཱ་ཕུ་ས་ནཱ་ན་ནྟ་ར་མེ་ཝ ད་ས་དི་སཱ་ཝ་ལོ་ཀི་ཏ་ཏྟཱ, ཨ་ཊྛ་ངྒཱ་ནི ནཱ་མ–
ཝི་ས་ཊྛཾ མ་ཉྫུ ཝི་ཉྙེ་ཡྻཾ, ས་ཝ་ནཱི་ཡཱ-ཝི་སཱ་རི་ནོ;
བི་ནྡུ ག་མྦྷཱི་ར་ནི་ནྣཱ་དི,ཙྩེ་ཝ་མ་ཊྛ་ངྒི་ཀོ ས་རོ་ཏི.
ཝུ་ཏྟཱ་ནི ཨ་ཊྛ་ངྒཱ་ནི, ཏ་ཐཱ་ག་ཏོ་ཏི ཨི་མ་སྶེ་ཝ ཝི་སུཾ ཨ་ཏྠ་པ་རི་ཡཱ་ཡཾ ད་སྶེ་ཏུཾ ‘ཨ་ཐ་ཝཱ’ཏི་ཨཱ་དི་མཱ་ཧ, ཨ་རི་ཡེ་ན སེ་ཏུ་ནཱ་ཏི ས་མ་ཐ་ཝི་པ་སྶ་ནཱ་ས་ངྑཱ་ཏེ་ན ཨུ་ཏྟ་མེ་ན མ་གྒེ་ན, ཨེ་ཝ་མཱ་དི་ནཱ་ཏི་ཨཱ་དི་ས་དྡེ་ན ཏེ་སཾ ཏེ་སཾ དྷ་མྨཱ་ནཾ ས་བྷཱ་ཝ་ས་ར་ས་ལ་ཀྑ་ཎཾ ཏ་ཐཾ ཨཱ་ག་ཏོ ཡ་ཐཱ་ཝ་ཏོ ཨ་དྷི་ག་ཏོ’ཡེ་ག་ཏྱ་ཏྠཱ ཏེ བུ་དྡྷྱ་ཏྠཱ, ཡེ བུ་དྡྷྱཱ ཏེ ག་ཏྱ་ཏྠཱ’ཏི་ཏ་ཐཱ་ག་ཏོ་ཏི ཨེ་ཝ་མཱ་དིཾ ས་ངྒ་ཎྷཱ་ཏི, ཏ་ཏྠ་ཏ་ཏྠཱ་ཏི ཏེ་སུ ཏེ་སུ དཱི་གྷཱ་ག་མཱ་དཱི་སུ, ཏ་ཐཱ་ག་ཏ་བྷཱ་ཝོ་ཏི ཏ་ཐཱ་ག་ཏོ་ཏི བྷ་ཝ་ནཾ ནི་པྥ་ཏྟི ན་མ་སྶ་ན་ཀི་རི་ཡཱ་བྷི་ས་མྦ་ནྡྷཱ་ཏི’ན་མ་སྶི་ཏྭཱ’ཏི ཨེ་ཏྠ ན་མ་སྶ་ན་ཀི་རི་ཡཱ་ཡ ཨ་བྷི་ས་མྦ་ནྡྷཱ ཨི་མི་ནཱ ཏ་ཐཱ་ག་ཏཱ་དཱི་ནཾ ཀ་མྨ་ཏྟཾ ཝི་བྷཱ་ཝེ་ཏི, ན་མ་སྶ་ན་ཀི་རི་ཡཱ་ཝི་སེ་ས་ན་ཏྟཱ་ཏི ‘ན་མ་སྶི་ཏྭཱ’ཏི ན་མ་སྶ་ནཾ ཀ་ཏྭཱ་ཏི ཝུ་ཏྟཾ ནཱ་མ སི་ཡཱ་ཏི ན་མ་སྶ་ན་ནྟི ཝུ་ཏྟ་ན་མ་སྶ་ན་ཀི་རི་ཡཱ་ཡ ཝི་སེ་ས་ན་ཏྟཱ, བོ་དྷི་ཡཱ་ཏི བོ་དྷི་ཝུ་ཙྩ་ཏི ཙ་ཏཱུ་སུ མ་གྒེ་སུ ཉཱ་ཎཾ, ཏཾ བྷ་ག་ཝཱ ཨེ་ཏྠ པ་ཏྟོ་ཏི (བོ་དྷི, ཏ་སྶཱ) བོ་དྷི་རུ་ཀྑ་སྶཱ་ཏི ཨ་ཏྠོ, མཱུ་ལེ་ཏི མཱུ་ལ་ས་མཱི་པེ ‘‘ཡཱ་ཝ མ་ཛ྄ཛྷ་ནྷི་ཀེ ཀཱ་ལེ ཚཱ་ཡཱ ཕ་ར་ཏི ནི་ཝཱ་ཏེ པ་ཎྞཱ་ནི པ་ཏ་ནྟི ཨེ་ཏཱ་ཝ་ཏཱ རུ་ཀྑ་མཱུ་ལཾ’’ཏི་ཨཱ་དཱི་སུ ཝི་ཡ, ན་ནུ ཨ་ཉྙེ་པི ཁཱི་ཎཱ་ས་ཝཱ ‘ཨ་གྒ་མ་གྒེ་ནེ’ཙྩཱ་དི་ནཱ ཝ་ཀྑ་མཱ་ན ན་ཡེ་ན ནི་པྥ་ནྣཱ ཨེ་ཝཱ་ཏི ཨ་ནུ་ཡོ་གཾ མ་ན་སི་ཀ་ཏྭཱ ཝུ་ཏྟཾ ‘ས་ཧེ་ཝ ཝཱ་ས་ནཱ་ཡཱ’ཏི, ན ཧི བྷ་ག་ཝ་ནྟཾ ཋ་པེ་ཏྭཱ ཨ་ཉྙེ ས་ཧ ཝཱ་ས་ནཱ་ཡ ཀི་ལེ་སེ པ་ཧཱ་ཏུཾ ས་ཀྐོ་ནྟི, ཨེ་ཏེ་ན ཨ་ཉྙེ་ཧི ཨ་སཱ་དྷཱ་ར་ཎཾ བྷ་ག་ཝ་ཏོ ཨ་ར་ཧ་ཏྟ་ནྟི ད་སྶེ་ཏི, ཏེ་ནེ་ཝ ཨི་དྡྷ་ས་དྡ་སྶ ཨ་ཏྠཾ ད་སྶེ་ནྟོ’ཏེ་པི ཧི’ཙྩཱ་དི་ཀཾ ཝ་ཀྑ་ཏི, ཀཱ་པ་ནཱ་ཡཾ ཝཱ་ས་ནཱ ནཱ་མ པ་ཧཱི་ན་ཀི་ལེ་ས་སྶཱ་པི ཨ་པྤ་ཧཱི་ན་ཀི་ལེ་ས་སྶ པ་ཡོ་ག་ས་དི་ས་པ་ཡོ་ག་ཧེ་ཏུ་བྷཱུ་ཏོ ཀི་ལེ་ས་ནི་ཧི་ཏོ སཱ་མ་ཏྠི་ཡ་ཝི་སེ་སོ’ཨཱ་ཡ་སྨ་ཏོ པི་ལི་ནྡ་ཝ་ཙྪ་སྶ ཝ་ས་ལ་ས་མུ་དཱ་ཙཱ་ར་ནི་མི་ཏྟཾ ཝི་ཡ’, ཨ་གྒ་མ་གྒེ་ནཱ་ཏི ཨ་ར་ཧ་ཏྟ་མ་གྒེ་ན, ས་བྦ་ཀི་ལེ་སེ རཱ་གཱ་དི་ཀེ, ཨ་ར་ཧ་ཏྟཾ ཨ་གྒ་ཕ་ལཾ, ས་མྨུ་ཏི ཨུ་པ་པ་ཏྟི་དེ་ཝ་བྷཱ་ཝ་ཏོ ཨ་ཉྙེ་ན ཝི་སུ་དྡྷི དེ་ཝ་བྷཱ་ཝེ་ནཱ་ཏི་ནི་པྥ་ནྣ་ཏྟཱ ཨཱ་ཧ-‘ཝི་སུ་དྡྷི་དེ་ཝ་བྷཱ་ཝེ་ནཱ’ཏི, ས་ཀ་ལ་ཀི་ལེ་ས་ཀཱ་ལུ་སྶི་ཡཱ་པ་ག་མེ་ན ཝི་སུ་དྡྷི་པྤ་ཏྟི་ཡཱ ས་བྦ་ཉྙུ་གུ་ཎཱ ལ་ངྐཱ་རེ་ན ཝི་སུ་དྡྷི་དེ་ཝ་བྷཱ་ཝེ་ནཱ་ཏི ཨ་ཏྠོ.
‘ཨི་དྷ=སཾ་སི་དྡྷི་ཡཾ’ ཨི་དྡྷ་ཝ་ནྟོ ཨི་དྡྷཱ་ཏྟ་པྤ་ཙྩ་ཡེ་ན, ‘གུ་ཎ=ཨཱ་མ་ནྟ་ཎེ’ བྷཱུ་ཝཱ་དི་སེ་སོ, གུ་ཎཱི་ཡ་ནྟི པ་རི་ཙཱི་ཡ་ནྟི སེ་ཡྻ་ཏྟི་ཀེ་ཧཱི་ཏི གུ་ཎཱ ཀ་པྤ་ཙྩ་ཡེ་ན, ཏེ་པཱི་ཏི སཱ་ཝ་ཀ་པ་ཙྩེ་ཀ་བུ་དྡྷཱ་པི, ཧི ས་དྡོ ཧེ་ཏུ་མྷི, ཡ་སྨཱ ཨ་གྒཾ…པེ… ཨ་ནཱུ་ན་གུ་ཎཱ, ཏ་སྨཱ་ཏི ཨ་ཏྠོ, ས་བྦ་ཉྙུ་ཏཱ་དཱི་ན་ནྟི་ཨཱ་དི་ཀཾ ཏེ་སཾ ས་བྦ་ཉྙུ་བུ་དྡྷེ་ཧི ཨཱུ་ན་གུ་ཎ་ཏཱ་ཡ ཧེ་ཏུ་ཝ་ཙ་ནཾ, ཀེ་ཙི ‘སི་དྡྷོ མི་དྡྷ་གུ་ཎོ ཨ་སྶཱ་ཏི སི་དྡྷ་མི་དྡྷ་གུ་ཎ་ནྟི དུ་ཊྛ་མ་ཏྠཾ པ་རི་ཀ་པྤེ་ཏྭཱ ཝཱ་ཀྱ་མི་དཾ དཱུ་སེ་ནྟི, ཏེ པ་ན ‘མི་དྡྷོ ནཱ་མ ཀོ་ཙི གུ་ཎོ ན་ཏྠཱི’ཏི ཙ, ‘ཏ་ཐཱ་ག་ཏོ ནཱ་མ མི་དྡྷ གུ་ཎོ ན ཧོ་ཏཱི’ཏི ཙ, ‘ཏཱ་དི་སོ ཙེ སི་ཡཱ ན ཉཱ་ཎ་ནི་སྶི་ཏ་པཱུ་ཛཱ པ་ཀ་ཏོ་པ་ཡོ་གི་ནཱི བྷ་ཝ་ཏཱི’ཏི ཙ ཨ་ཛཱ་ནི་ཏྭཱ ཝ་ད་ཐ ཏུ་མྷེ་ཧི ཝ་ཏྭཱ ཨུ་ཡྻོ་ཛེ་ཏ་བྦཱ, མ་ངྒ་ལ་ཏྠ་ཉྩེ་ཏྠཱ་དོ སི་དྡྷ་ས་དྡོ་པཱ་དཱ་ནཾ, མ་ངྒ་ལཱ་དཱི་ནི ཧི ས་ཏྠཱ་ནྱ་བྱཱ་ཧ་ཏ་པྤ་ས་རཱ་ནི ཧོ་ནྟྱཱ་ཡ་སྨ་ནྟ་བྱཱ་ཁྱཱ་ཏུ་སོ་ཏུ་ཀཱ་ནི ཙ, དྷ་མྨ་ས་ངྒྷཱ་ན་མྤཱི་ཏི ཨི་མི་ནཱ ཨ་ཝ་ཡ་ཝེ་ན ཝི་གྒ་ཧེ་པི ས་མུ་དཱ་ཡ་སྶ ས་མཱ་ས་ཏྠ་ཏྟཱ ཨ་ཉྙ་པ་ད་ཏྠ་ས་མཱ་སོ་ཡཾ ཏ་གྒུ་ཎ་སཾ་ཝི་ཉྙཱ་ཎོ་ཏི དཱི་པེ་ཏི, ཏེ་ནཱ་ཧ- ‘ཨ་ཉྙ་པ་ད་ཏྠེ’ཙྩཱ་དི, གུ་ཎཱི་བྷཱུ་ཏཱ་ན་མྤཱི་ཏི ཨ་པྤ་དྷཱ་ན་བྷཱུ་ཏཱ་ན་མྤི ཝི་སེ་ས་ན་བྷཱུ་ཏཱ་ན་མྤི ཨ་ཉྙ་པ་ད་ཏྠ་སྶ པ་དྷཱ་ན་ཏྟཱ, ཀི་རི་ཡཱ་ཏི་ས་མྦ་ནྡྷོ ཝ་ག་མྱ་ཏེ དྷ་མྨ་ས་ངྒྷཱ་ནཾ གུ་ཎཱི་བྷཱུ་ཏཱ་ན་མྤི ཏ་ད་ཝི་ནཱ་བྷཱ་ཝི་ཏྟེ་ན ན་མ་སྶ་ནཱ་ཏི་ས་མྦ་ནྡྷཱ, ཏ་དེ་ཝ ས་མ་ཏྠེ་ཏི ‘ཏ་ཐཱ་ཧ’ཙྩཱ་དི་ནཱ, པུ་ཏྟེ་ན ས་ཧ ཝ་ཏྟ་མཱ་ནོ་ཏི ཏ་གྒུ་ཎ་སཾ་ཝི་ཉྙཱ་ཎ་ཨ་ཉྙ་པ་ད་ཏྠ་ས་མཱ་ས་ཏྟཱ ཏུ་ལྱ་མུ་བྷི་ནྣ་མྤི ཨཱ་ག་མ་ན་ནྟི པུ་ཏྟོ་པི ཨཱ་ག་ཏོ་ཏི པ་ཏཱི་ཡ་ཏེ, ཏ་ཏྠཱ་ཏི ནི་དྡྷཱ་ར་ཎེ ས་ཏྟ་དྷཱི, ཨ་ཏྟཱ་ན་ནྟི དྷ་མྨཾ ད་སྶེ་ཏི, དྷཱ་རེ་ནྟེ་ཏི ཨ་ཏྟ་ནི ཋ་པེ་ནྟེ པ་ཝ་ཏྟེ་ནྟེ ཨུ་པྤཱ་དེ་ནྟེ, ཙ་ཏྟཱ་རོ་པི ཨ་པཱ་ཡཱ སཱ་མ་ཉྙ་ཝ་སེ་ན’ཨ་པཱ་ཡེ’ཏི ཝུ་ཏྟཱ, ཀི་ལེ་ས་ཝ་ཊྚ ཀ་མྨ་ཝ་ཊྚ ཝི་པཱ་ཀ་ཝ་ཊྚ་ཝ་སེ་ན ཏ་ཡོ ཝ་ཊྚཱ, ཏེ་སུ དུ་ཀྑཾ, ཏ་སྨིཾ, དྷཱ་རེ་ཏཱི་ཏི ཝུ་ཏྟ་དྷཱ་ར་ཎཾ ནཱ་མ ཨ་ཏྠ་ཏོ ཨ་པཱ་ཡཱ་དི་ནི་བྦ་ཏྟ་ཀ་ཀི་ལེ་ས་ཝི་དྡྷཾ་ས་ནཾ, ཏ་ཉྩ ཡ་ཐཱ་རཱུ་པཾ ཀི་ལེ་ས་ས་མུ་ཙྪི་ནྡ་ན་ཏ་པྤ་ཊི་པྤ་སྶ་དྡྷི ཨཱ་ལ་མྦ་ན་བྷཱ་ཝེ་ན ཧོ་ཏཱི་ཏི ཨཱ་ཧ- ‘སོ…པེ… ཝ་སེ་ནཱ’ཏི, ན་ཝ་ནྣ་མྤི, ཏེ ས་མ་དྷི་ག་མ་ཧེ་ཏུ་ཏཱ་ཡ དྷ་མྨོ་ཡེ་ཝ ནཱ་མཱ་ཏི ‘ད་སཱ’ཏི་ཨཱ་དི ཝུ་ཏྟཾ, ཏ་ཏྠ ཀཱ་ར་ཎ་མཱ་ཧ- ‘ཏ་མྨཱུ་ལ་ཀ་ཏྟཱ’ཏི་ཨཱ་དི, ཏ་མྨཱུ་ལ་ཀ་ཏྟཱ་ཏི ཏཾ ཀཱ་ར་ཎ་ཏྟཱ, སཱི་ལ་དི་ཊྛི་སཱ་མ་ཉྙེ་ནཱ་ཏི ཨ་རི་ཡེ་ན སཱི་ལེ་ན ཨ་རི་ཡཱ་ཡ ཙ དི་ཊྛི་ཡཱ ས་མཱ་ན་བྷཱ་ཝེ་ན, ཨ་རི་ཡཱ་ན་ཉྷི སཱི་ལ་དི་ཊྛི་ཡོ མ་གྒེ་ནཱ་ག་ཏ་ཏྟཱ ས་བྦ་ཐཱ ས་མཱ་ནཱ་ཝ, ཏེ་ན ཏེ ཡ་ཏྠ་ཀ་ཏྠ་ཙི ཋི་ཏཱ་པི ས་ཧ་ག་ཏཱ་ཝཱ་ཏི སཾ་ཧ་ཏོ་ཏི ཨི་མ་སྨིཾ ཨ་ཏྠེ ས་ངྒྷོ་ཏི པ་ད་སི་དྡྷི ད་ཊྛ་བྦཱ, ཨ་དྷི་པྤེ་ཏ་ཝ་སེ་ན པ་ནེ་ཏཾ ཝུ་ཏྟཾ, ལོ་ཀི་ཡ་སཱི་ལ་དི་ཊྛི་ཡཱ སཱ་མ་ཉྙེ་ན སཾ་ཧ་ཏ་ཏྟཱ ས་མྨུ་ཏི་ས་ངྒྷོ་པི པ་ཎཱ་མཱ་ར་ཧོ་ཡེ་ཝཱ་ཏི ད་ཊྛ་བྦཾ.
ཨ་ཐ ཀེ་ཏེ ས་དྡཱ, ཡེ་ས་མི་དཾ ལ་ཀྑ་ཎཾ བྷཱ་སི་སྶ་ནྟི པ་ཊི་ཉྙཱ་ཏ་ནྟི ཨཱ་ཧ-‘ས་དྡཱ གྷ་ཊ་པ་ཊཱ་ད་ཡོ’ཏི, ཨཱ་དི་ས་དྡེ་ན རུ་ཀྑཱ་ད་ཡོ, ན་ནུ ས་ནྟི མེ་གྷ་ས་དྡ་ས་མུ་དྡ་ས་དྡཱ་ད་ཡོ་པཱི་ཏི ན ནི་ར་ཏྠ་ཀཱ་ན་མི་དྷཱ་ནུ་པ་ཡོ་གི་ཏྟཱ, ཡེ ལོ་ཀ་ས་ངྐེ་ཏཱ་ནུ་རོ་དྷེ་ནཱ་ཏྠ་པྤ་ཀཱ་ས་ཀཱ ཏེ་སཾ སཱ་ཏྠ་ཀཱ་ན་མེ ཝི་དཾ ལ་ཀྑ་ཎ་ནྟི, ཨ་པི་ཙ ‘ས་དྡཱ གྷ་ཊ་པ་ཊཱ་ད་ཡོ’ཏི ཝ་ད་ནྟོ ཝེ་དི་ཀཱ་ནཾ ཝི་ཡ ཨུ་ནྟི [ཉ་ཏྠི (པོ་ཏྠ་ཀེ)] ཨཱ་དཱི་ནཾ ཨ་ནུ་པུ་བྦཱི་ནི་ཡ་མཱ་ཝ་ཏྠཱ་ན་མ་ས་མྦྷ་ཝཱ ཏ་ད་ནུ་ཀྐ་མེ་ན ནི་པྥཱ་དི་ཡ་མཱ་ན་ན་མྤི ས་དྡཱ་ནཾ ལོ་ཀི་ཡ་ཏྟཱ་ན་བྷི་ཝ་ཏྟ་ན་ཉྩ བོ་དྷེ་ཏཱི་ཏི ད་ཊྛ་བྦཾ, ནུ ཏ་ཏྠ པ་ཀཱ་ས་ཀ་ཏྠཾ ས་དྡ་སྶ ས་མུ་དཱ་ཡ་ཝ་སེ་ན ཝཱ སི་ཡཱ པ་ཙྩེ་ཀ་ཝ་ཎྞ་ཝ་སེ་ན ཝཱ, ཏ་ཏྠ ཡ་དི པ་ཙྩེ་ཀ་ཝ་ཎྞཱ པ་ཀཱ་ས་ཡེ་ཡྻུཾ, གྷ་ཊ་ས་དྡེ གྷ་ཀཱ་རོ་ཡེ་ཝ གྷ་ཊ་ཏྠཾ, པ་ཀཱ་ས་ཡེ་ཡྻ, ཏ་ཐཱ ཙཱ་ཉྙེ་ས་མ་ཀཱ་རཱ་དཱི་ན་མ་ན་ཏྠ ཀ་ཏཱ སི་ཡཱ, ཨ་ཐ ས་མུ་དི་ཏཱ པ་ཀཱ་ས་ཡེ་ཡྻུཾ, ཏ་དཱ ཝ་ཎྞཱ་ན་མུ་ཙྩཱ་ར་ཎཱ་ན་ནྟ་ར་ཝི་ནཱ་སི་ཏྟཱ ས་མུ་དཱ་ཡོ་ཡེ་ཝ ན སི་ཡཱ, ཏ་ཐཱ ས་ཏི ཀ་ཐ མ་ཏྠཾ ས་དྡོ པ་ཀཱ་ས་ཡ་ཏཱི་ཏི ཙེ ཀ་མེ་ན སོ་ཏ་ཙི་ཏྟཱ་དི་ག་ཧི་ཏ་ཀྑ་ར པཱ་ལི༹་ཡཱ ཙ ཡོ ས་དྡོ་ཏི ཝི་ཉྙེ་ཡྻོ སཱ་ཏྠ་ཀོ ཙི་ཏྟ་གོ་ཙ་རོ, ཙི་ཏྟ་གོ་ཙ་ར་སྶཱ་པི ས་དྡ་སྶ པ་ན བཱ་ལ་ཛ་ན་པྤ་བོ་དྷཱ་ཡ ཀ་པྤ་ནཱ་མ་ཏྟེ་ན པ་ཀ་ཏྱཱ་དི་ཝི་བྷཱ་ག་ཏོ, ན ས་བྷཱ་ཝེ་ནཱ་ནྭཱ་ཁྱཱ་ནཾ, ཏེ་ནཱ་ཧ-‘པ་ཀ་ཏྱཱ’དི ཨཱ་དི, ན་ནུ གོ་ཨི་ཙྩཱ་དི་སཱ་དྷུ་ས་དྡ་ནི་ཡ་མེ ས་ཏི གོ་ཏཱ་ད་ཡོ ཨ་སཱ་དྷུ ས་དྡཱ་ཏི ཝི་ཉྙཱ་ཡ་ནྟི ག་ནྟ་བྦ་མ་གྒ་ནི་ཡ་མེ ཨ་ག་ནྟ་བྦ་མ་གྒོ ཝི་ཡ, གོ་ཏཱ་དི ཨ་སཱ་དྷུ་ས་དྡ་ནི་ཡ་མེ ཝཱ གོ་ཨི་ཙྩཱ་ད་ཡོ ས་དྡཱ སཱ་དྷ་ཝོ་ཏི ཨ་ག་ནྟ་བྦ་མ་གྒ་ནི་ཡ་མེ ག་ནྟ་བྦ་མ་གྒོ ཝི་ཡ, ཀིཾ ས་དྡཱ་ན་མ་ནྭཱ་ཁྱཱ་ནེ་ནཱ ཏི་ད་མཱ་ས་ངྐི་ཡ པ་ཡོ་ཛ་ན་མཱ་ཧ- ‘ལ་ཀྑ་ཎཱ་བྷི་དྷཱ་ནཾ་ཙེ’ཙྩཱ་དི, ས་དྡཱ་ན་མྤ་ཊི་པ་ཏྟི་ཡཾ པ་ཊི་པ་ད་པཱ་ཋ་སྶཱ་ནཱུ་པཱ་ཡ་ཏྟཾ ད་སྶེ་ཏུ་མཱ་ཧ- ‘ཨ་ཉྙ་ཐེ’ཙྩཱ་དི, ཨ་ཉྙ་ཐཱ་ཏི ཨ་ས་ཏི ལ་ཀྑ་ཎཱ་བྷི་དྷཱ་ནེ, ས་ཀྐ་ཏཱ་དཱི་ཏི་ཨཱ་དི་ས་དྡེ་ན པཱ་ཀ་ཏཱ་དིཾ ས་ངྒ་ཎྷཱ་ཏི, བ་ཧུ་ཝི་དྷ་ཏྟཾ ས་ཀྐ་ཏ་པཱ་ཀ་ཏ་པེ་སཱ་ཙི་ཀ་ཨ་པ་བྦྷཾ་ས་ཝ་སེ་ན, མ་ག་དྷེ་སུ ཝི་དི་ཏཱ་ཏི ཨི་མ་སྨིཾ ཨ་ཏྠེ ‘‘ཨ་ཉྙ་སྨི’’ནྟི (༤-༡༢༡) མཱ་ག་དྷཱ་ནཾ ཨི་ད་ནྟི ཨ་ཏྠེ ‘‘ཎོ’’ཏི (༤-༣༤) ཎ་པྤ་ཙྩ་ཡེ མཱ་ག་དྷཱ མཱ་ག་དྷ་ནྟི ཙ པ་ད་ནི་པྥ་ཏྟི ཝེ་དི་ཏ་བྦཱ་ཏི ད་སྶེ་ཏུ་མཱ་ཧ- ‘མ་ག་དྷེ་སྨི’ཙྩཱ་དི, མ་ག་དྷེ་སུ ཝི་དི་ཏཱ་ཏི་ཨཱ་དི་ནོ ཨ་དྷི་པྤཱ་ཡཾ ཝི་ཝ་རི་ཏུ་མཱ་ཧ- ‘ཨི་དཾ ཝུ་ཏྟཾ ཧོ་ཏཱི’ཏི་ཨཱ་དི, ཏ་ཏྠ ཨི་ད་ནྟི ཨི་དཱ་ནི ཝ་ཀྑ་མཱ་ནཾ མཱ་ག་དྷཾ…པེ… ཧོ་ཏཱི་ཏི ཨེ་ཏཾ ཝུ་ཏྟཾ ཧོ་ཏཱི་ཏི མ་ག་དྷེ་སུ…པེ… ལ་ཀྑ་ཎཾ མཱ་ག་དྷ་ནྟི ཝ་ད་ཏཱ པ་ཀཱ་སི་ཏཾ ཧོ་ཏཱི་ཏི ཨ་ཏྠོ, ཧི་ས་དྡོ’མ་ག་དྷེ་སྭི’ཙྩཱ་དི་ནཱ ཝུ་ཏྟཾ ས་མ་ཏྠ་ཡ་ཏི, ལ་ཀྑ་ཎཾ ཝི་སེ་ས་ཡ་ཏཱ་ཏི ས་དྡ་ལ་ཀྑ་ཎ ས་དྡ་སྶ ཨུ་ཏྟ་ར་པ་ད་ཏྠ་པྤ་དྷཱ་ན་ཏྟཱ མཱ་ག་དྷ་ནྟི ཨི་མི་ནཱ ལ་ཀྑ་ཎཾ ཝི་སེ་ས་ཡ་ཏཱ བྱ་ཝ་ཙྪེ་ད་ཡ་ཏཱ ཝུ་ཏྟི་ཀཱ་རེ་ན, ཨ་ཏྠ་ཏོ་ཏི སཱ་མ་ཏྠི་ཡ་ཏོ, ས་དྡེ ཙ ཝི་སེ་སི་ཏོ ཧོ་ཏཱི་ཏི ས་དྡ་ལ་ཀྑ་ཎ་ས་དྡོ མཱ་ག་དྷེ ཨེ་ཝ [ས་དྡེ་ཨེ་ཝ (པོ་ཏྠ་ཀེ)] བྱ་ཝ་ཙྪེ་དི་ཏོ ཧོ་ཏི, ཨ་ཡ་མེ་ཏྠཱ་དྷི་པྤཱ་ཡོ ‘མ་ག་དྷེ་སུ ཝི་དི་ཏཱ མཱ་ག་དྷཱ་ཏི ས་དྡེ ག་ཧེ་ཏྭཱ ཏེ་ས་མི་དཾ མཱ་ག་དྷ་ནྟི མཱ་ག་དྷ་ས་དྡེ་ན ཡ་སྨཱ ས་དྡ་ལ་ཀྑ་ཎ་ས་དྡེ ལ་ཀྑ་ཎཾ ཝི་སེ་སི་ཏཾ, ཏ་སྨཱ ས་དྡ་ལ་ཀྑ་ཎ་ས་དྡེ ས་དྡོ ཡ་དི ཨ་མཱ་ག་དྷོ ཀ་ཐཾ ལ་ཀྑ་ཎཾ མཱ་ག་དྷཾ སི་ཡཱ་ཏི སཱ་མ་ཏྠི་ཡཱ ས་དྡོ་པི ཝི་སེ་སི་ཏོ ཧོ་ཏཱི’ཏི, ན་ནུ མཱ་ག་དྷ་ནྟི ལ་ཀྑ་ཎ་སྶ མཱ་ག་དྷ ས་དྡ་ས་མྦ་ནྡྷི་ཏྟ་ཛྷཱ་པ་ན་ཏོ ས་དྡ་ལ་ཀྑ་ཎ་ནྟི ཨེ་ཏྠ ས་དྡ་ས་དྡ་སྶ ནི་ར་ཏྠ་ཀ ཏཱ་པ་ཏྟི ཧོ་ཏཱི་ཏི, ན ཧོ་ཏི ག་མྨ་མཱ་ན་ཏྠ་སྶ ས་དྡ་སྶ པ་ཡོ་ག་མྤ་ཏི ཀཱ་མ་ཙཱ་ར་ཏྟཱ ས་དྡ་ལ་ཀྑ་ཎ་ས་དྡ་སྶ ཝཱ ས་མཱ་ས་ཏྠེ ནི་རུ་ལ༹ྷ་ཏྟཱ ‘‘ཏ་ཏྲི་དཾ སུ་ག་ཏ་སྶ སུ་ག་ཏ་ཙཱི་ཝ་ར་པྤ་མཱ་ཎ’’ནྟི་ཨཱ་དཱི་སུ ཝི་ཡ, ཀོ་པ་ནཱ་ཏི་ཨཱ་དི་ས་དྡ་ལ་ཀྑ་ཎ་ནྟི ཨི་མི་ནཱ ཨ་བྷི་དྷེ་ཡྻ་ས་ངྑཱ་ཏ་པ་ཡོ་ཛ་ན་སྶ ད་སྶི་ཏ་ཏྟཱ ཏ་པྤ་ཡོ་ཛ་ན་པུ་ཙྪ་ན་པ་རཱ ཙོ་ད་ནཱ, ཝུ་ཙྩ་ཏེ་ཙྩཱ་དི པ་རི་ཧཱ་རོ, ཡ་ཐཱ ས་བྦ་ཐཱ་ཏྟ་པ་ར་ཧི་ཏ་ཀཱ་མེ་ན.
པི་ཡོ ཙ ག་རུ བྷཱ་ཝ་ནཱི་ཡོ, ཝ་ཏྟཱ ཙ ཝ་ཙ་ན་ཀྑ་མོ;
ག་མྦྷཱི་ར་ཉྩ ཀ་ཐཾ ཀ་ཏྟཱ,ནོ་ཙཱ ཋཱ་ནེ ནི་ཡོ་ཛ་ཀོ་ཏི.
ཝུ་ཏྟེ་ཧི ཏ་ཏོ པ་རེ་ཧི ཙ པ་ས་ཏྠ་ཏ་རེ་ཧི གུ་ཎ་ཝི་སེ་སེ་ཧི ས་མུ་པེ་ཏཾ གུ་རུཾ.
ཏ་སྨཱ ཨ་ཀྑ་ར་ཀོ་ས་ལླཾ, ས་མྤཱ་དེ་ཡྻ ཧི་ཏ་ཏྠི་ཀོ;
ཨུ་པ་ཊྛ་ཧཾ གུ་རུཾ ས་མྨཱ, ཨུ་ཊྛཱ་ནཱ་དཱི་ཧི པ་ཉྩ་ཧཱི་ཏི.
ཝ་ཙ་ན་ཏོ ཨུ་ཊྛཱ་ན-ཨུ་པ་ཊྛཱ་ན-པ་རི་ཙ་རི་ཡཱ-སུ་སྶཱུ་སཱ ས་ཀྐ་ཙྩ་སི་པྤ་པ་ཊི་གྒ་ཧ་ཎེ་ཧི ས་མྨཱ ཨུ་པ་ཊྛ་ཧ་ནྟེ་ན ས་ཝ་ན,ཨུ་གྒ་ཧ་ན-དྷཱ་ར་ཎ-པ་རི་པུ་ཙྪཱ-བྷཱ་ཝ་ནཱ ཧི ཀ་ངྑཱ་ཝི་ཙྪེ་དཾ ཀ་ཏྭཱ ཝི་ཉྙཱ་ཏ་བྦཾ ས་དྡ་ལ་ཀྑ་ཎཾ, ཏ་ཐཱ ཨ་ཝི་ཉྙཱ་ཏཾ ས་དྡ་ལ་ཀྑ་ཎ་མ་ནེ་ནཱ་ཏི ཨ་ཝི་ཉྙཱ་ཏ་ས་དྡ་ལ་ཀྑ་ཎོ པུ་གྒ་ལོ, ཧི་ས་དྡོ ཨ་ཝ་དྷཱ་ར་ཎེ, སོ ‘དྷ་མྨ་ཝི་ན་ཡེ་སུ ཀུ་ས་ལོ ན ཧོ་ཏཱི’ཏི ཨེ་ཏྠ ད་ཊྛ་བྦོ, ཀུ་ས་ལོ ད་ཀྑོ ན ཧོ་ཏི, ཏ་ཏྠ དྷ་མྨ་ཝི་ན་ཡེ་སུ སུ་ཏྟ་ནྟཱ་ཏཱ་བྷི་དྷ་མྨ་ས་ངྑཱ་ཏེ་སུ དྷ་མྨེ་སུ ཙེ་ཝ ཝི་ན་ཡེ ཙ, ཀ་སྨཱ–
ཡོ ནི་རུ་ཏྟིཾ ན སི་ཀྑེ་ཡྻ, སི་ཀྑ་ནྟོ པི་ཊ་ཀ་ཏྟ་ཡཾ;
པ་དེ་པ་དེ ཝི་ཀ་ངྑེ་ཡྻ, ཝ་ནེ ཨ་ནྡྷ་ག་ཛོ ཡ་ཐཱ་ཏི.
ཝ་ཙ་ན་ཏོ, ཨ་ཡ་མེ་ཏྠཱ་དྷི་པྤཱ་ཡོ ‘‘ཡ་ཐཱ ཝུ་ཏྟ་ན་ཡེ་ན ས་མྦྷཱུ་ཏ་པ་ད བྱཱ་མོ་ཧ་ཝ་སེ་ན པ་ད་ཏྠེ་པི བྱཱ་མོ་ཧ་ས་མྦྷ་ཝ་ཏོ སུ་ཏྟ་ནྟོ་པ་ད་སྶི་ཏཱ་ཡ དི་ཊྛི་ཝི་ནི་ཝེ་ཊྛ་ནཱ་ཡ ཙ ཨ་བྷི་དྷ་མྨཱ་ག་ཏེ ནཱ་མ་རཱུ་པ་པ་རི་ཙྪེ་དེ ཙ ཝི་ན་ཡ ནི་དྡི་ཊྛེ སཾ་ཝ་རཱ་སཾ་ཝ་རེ ཙ ཨ་ཀོ་ས་ལླཾ སི་ཡཱ’’ཏི, ཡ་ཐཱ་དྷ་མྨ་ནྟི དྷ་མྨ་ཝི་ན་ཡ ས་དྡ་སྶ ཡོ-ཏྠོ ཝི་ན་ཡ་སུ་ཏྟཱ་བྷི་དྷ་མྨ་ས་ངྑཱ་ཏོ, ཏ་སྶ སོ-ཏྠོ, ཏ་ད་ན་ཏི་ཀྐ་མེ་ན, པ་ཊི་པ་ཛྫི་ཏུ་མ་ས་ཀྐོ་ནྟོ་ཏི ཏ་ཏྠ་ཏ་ཏྠེ་ཝ ཝུ་ཏྟཱ་སུ ཨ་དྷི་སཱི་ལ ཨ་དྷི་ཙི་ཏྟ ཨ་དྷི་པ་ཉྙཱ་སི་ཀྑཱ་སུ པ་ཝ་ཏྟི་ཏུཾ ཨ་ས་མ་ཏྠོ, ཀུ་ས་ལོ པ་ན ས་མ་ཏྠོ པ་ཉྙཱ་ཝི་སེ་སཱ་ལོ་ཀ་པ་ཊི་ལཱ་བྷ་ཏོ, ཝུ་ཏྟཾ ཧི–
ཡཱ་ཝ ཏི་ཊྛ་ནྟི སུ་ཏྟ་ནྟཱ, ཝི་ན་ཡོ ཡཱ་ཝ དི་པྤ་ཏི;
ཏཱ་ཝ ད་ཀྑ་ནྟི ཨཱ་ལོ་ཀཾ, སཱུ་རི་ཡེ ཨ་བྦྷུ་གྒ་ཏེ ཡ་ཐཱ་ཏི.
པ་ཊི་པ་ཏྟི་ནྟི པ་ཊི་པ་ཛྫཱི་ཡ་ཏཱི་ཏི པ་ཊི་པ་ཏྟཱི་ཏི ཡ་ཐཱ་ཝུ་ཏྟཾ ཏི་ཝི་དྷ་མྤི པ་ཊི་པ་ཏྟིཾ, ཝི་རཱ་དྷེ་ཏྭཱ་ཏི ནཱ་སེ་ཏྭཱ, ན་སྶ་ཏི ཧི པ་ཊི་པ་ཏྟི ཏེ་སུ་ཡེ་ཝཱ ཀོ ས་ལླ་ཏ་མ་ག་ཏ་ཏྟཱ, ཏ་ཐཱ ཙཱ་ཧུ–
སུ་ཏྟ་ནྟེ་སུ ཨ་ས་ནྟེ་སུ, པ་མུ་ཊྛེ ཝི་ན་ཡ་མྷི ཙ;
ཏ་མོ བྷ་ཝི་སྶ་ཏི ལོ་ཀེ, སཱུ་རི་ཡེ ཨ་ཏྠ་ངྒ་ཏེ ཡ་ཐཱ་ཏི.
སཾ་སཱ་ར་དུ་ཀྑ་སྶེ་ཝ བྷཱ་གཱི ཧོ་ཏི… ཡ་ཐཱ་ཝུ་ཏྟཱ-ནུ་ཀྐ་མ་པ་རི་ཙྩཱ་གེ་ན ཨ་ནུ་རཱུ་པ་པ་ཊི་པ་ཏྟི་ཡཱ པ་ཊི་ལ་བྷི་ཏ་བྦ་ཏྟཱ ཨ་དྷི་ག་མ་ཝི་ས་ཡ་སྶ [ཝི་ས་ཐ་ཏྟཱ (པོ་ཏྠ་ཀེ)] ཡོ ག་ཀྑེ་མ་སྶ, ཝུ་ཏྟ་ཉྷི ཏ་སྶཱ་ནུ་ལོ་མ་པ་ཊི་པ་ཏྟི་མཱུ་ལ་ཀ་ཏྟཾ–
སུ་ཏྟ་ནྟེ ར་ཀྑི་ཏེ ས་ནྟེ, པ་ཊི་པ་ཏྟི ཧོ་ཏི ར་ཀྑི་ཏཱ;
པ་ཊི་པ་ཏྟི་ཡཾ ཋི་ཏོ དྷཱི་རོ, ཡོ་ག་ཀྑེ་མཱ ན དྷཾ་ས་ཏཱི་ཏི.
ཨེ་ཏཱ་ཝ་ཏཱ ཨ་ཝི་ཉྙཱ་ཏ་ས་དྡ་ལ་ཀྑ་ཎ་སྶ ས་ཀ་ཏྠ་པ་རི་ཧཱ་ནིཾ ད་སྶེ་ཏྭཱ ཨི་དཱ་ནི ས་ཀ་ཏྠ་ས་མྤ་ཏྟི་མཱུ་ལི་ཀཱ པ་ར་ཏྠ་ས་མྤ་ཏྟཱི་ཏི ཏ་ད་བྷཱ་ཝཱ ཏཱ་དི་སོ པུ་གྒ་ལོ པ་རེ་ས་མྤི པ་ཙྩ་ཡོ བྷ་ཝི་ཏུཾ ན ས་ཀྐོ་ཏཱི་ཏི ད་སྶེ་ཏུཾ ‘ན་ཙཱ’ཏི་ཨཱ་དི ཝུ་ཏྟཾ, པ་ཏི་ཊྛཱ་ཏི དྷཱ་ར་ཎཾ, ཏ་ཉྩེ་ཏྠ ཏེ་སཾ ཏེ་སཾ ཀུ་ལ པུ་ཏྟཱ་ནཾ དྷ་མྨ་ཝི་ན་ཡ་སི་ཀྑཱ་པ་ནཾ ཏཾ་ཏཾ ཀ་མྨ་ཏོ ནི་ཏྠ་ར་ཎཱ་དི ཙ, ཏ་དུ་བྷ་ཡ མེ་ཝཱ-ནྷ་ས་ངྒི་ཀཾ པ་ཏི་ཊྛཾ, མུ་ཁྱ་བྷཱུ་ཏ་མྤ་ན ཏ་མྨཱུ་ལ་ཀེ སུ་པ་རི་སུ་དྡྷ་སཱི་ལེ པ་ཏི་ཊྛཱ་པ་ན་མེ་ཝ, ཏ་དུ་པ་ཀ་ར་ཎ་ཏྠོ སི་ཀྑཱ་པ་ནཱ་དི, ཨི་དྷ པ་ན ཏཾ སཱ་དྷ་ན་བྷཱུ་ཏོ པུ་གྒ་ལོ ཨུ་པ་ཙཱ་ར་ཏོ པ་ཏི་ཊྛཱ་ཏི ག་ཧེ་ཏ་བྦོ, ཧི་ས་དྡོ ཡ་ཐཱ་ཝུ་ཏྟ ས་མ་ཏྠ་ན་ཏྠེ ནི་པཱ་ཏོ, ས་དྡ་ལ་ཀྑ་ཎ་ཉྙཱུ་ཡེ་ཝཱ་ཏི ཨ་ཝ་དྷཱ་ར་ཎ་མྤ་ན ཏེ་སུ ཏ་བྦི་དཱུ་ཡེ་ཝ ས་མ་ཏྠོ་ཏི ད་སྶ་ན་ཏྠཾ པ་ཀ་ར་ཎ་ཝ་སེ་ན ཝུ་ཏྟཾ, ཨ་ཏྟ་ནོ པ་ན སུ་གུ་ཏྟ་སཱི་ལ་ཀྑ་ནྡྷ་ཝི་ར་ཧེ་ན ཀ་དཱ་ཙི ཀོ་ཙི ཡ་ཐཱ་ཝུ་ཏྟཱ་ནཾ པ་ཏི་ཊྛཱ་བྷ་ཝི་ཏུཾ ན ས་ཀྐོ་ཏི… ཏ་མྨཱུ་ལ་ཀ་ཏྟཱ ས་དྡྷ་མྨ་ཊྛི་ཏི་ཡཱ ས་པ་ར་པ་ཏི་ཊྛཱ བྷཱ་ཝ་སྶ ཙ, ཏེ་ནེ་ཝ ཝི་ན་ཡ་དྷ་རེ ཨཱ་ནི་སཾ་སཾ ད་སྶེ་ནྟེ་ན བྷ་ག་ཝ་ཏཱ ཏ་པྤ་དྷཱ་ནཾ ཏ་པྤ་མུ་ཁཾ་ཝ ཀ་ཏྭཱ ‘‘པ་ཉྩི་མེ བྷི་ཀྑ་ཝེ ཨཱ་ནི་སཾ་སཱ ཝི་ན་ཡ་དྷ་ར པུ་གྒ་ལེ, ཀ་ཏ་མེ པ་ཉྩ ཨ་ཏྟ་ནོ སཱི་ལ་ཀྑ་ནྡྷོ སུ་གུ་ཏྟོ ཧོ་ཏི སུ ར་ཀྑི་ཏོ, ཀུ་ཀྐུ་ཙྩ་པ་ཀ་ཏཱ་ནཾ པ་ཊི་ས་ར་ཎཾ ཧོ་ཏི, ཝི་སཱ་ར་དོ ས་ངྒྷ མ་ཛ྄ཛྷེ ཝི་ཧ་ར་ཏི, པ་ཙྩ་ཏྟྠི་ཀེ ས་ཧ་དྷ་མྨེ་ན སུ་ནི་གྒ་ཧི་ཏཾ ནི་གྒ་ཎྷཱ་ཏི, ས་དྡྷ་མྨ་ཊྛི་ཏི་ཡཱ པ་ཊི་པ་ནྣོ ཙ ཧོ་ཏཱི’’ཏི ཝུ་ཏྟཾ, ཨ་ཏྠཱ་ནུ་རཱུ་པ་ནྟི ཨ་ཏྟ་ནོ ཝ་ཙ་ནཱི་ཡ་སྶ་ཏྠ་སྶ ཝཱ་ཙ་ཀ་ཏྟེ་ན ཡོ་གྱཾ, བྱ་ཉྫ་ནཱ་ནུ་རཱུ་པ་ནྟི ཨ་ཏྟ་ནོ ཝཱ་ཙ་ཀ་སྶ ཝ་ཙ་ནཱི་ཡ་ཏྟེ་ན ཡོ་གྱཾ, པ་རི་ཝཱ་སཱ་དཱི་སཱུ་ཏི་ཨཱ་དི་ས་དྡེ་ན ཨ་བྦྷཱ་ནཱ་དིཾ ས་ངྒ་ཎྷཱ་ཏི, ཏཾ་ཏཾ་ཀ་མྨ་ནྟི པ་རི་ཝཱ་སཱ་དི་ཀཾ ཏཾ་ཏཾ་ཀ་མྨཾ, ཨ་ཉྙོ་ཏི ཨ་ས་དྡ་ལ་ཀྑ་ཎ་ཉྙཱུ, ན ཀེ་ཝ་ལ་མ་ནེ་ན ས་ཀ་ཏྠ་པ་ར་ཏྠཱ་ཝ ནཱ་སི་ཏཱ, ཨ་ཐ ཁོ་ཏི ཝི་དྷོ ས་དྡྷ་མྨོ་པི ནཱ་སི་ཏོ་ཡེ་ཝཱ་ཏི ཝ་ཏྠུ་མཱ་ཧ ‘ཨ་ཛཱ་ན་ནྟོ པ་ནཱ’ཏི་ཨཱ་དི, ཨ་ཡ་ཐཱ་པ་ཊི་པ་ཛྫ་མཱ་ནོ་ཏི ས་དྡ་ལ་ཀྑ་ཎ་ཉྙུ་ནཱ ཡ་ཐཱ ཡེ་ན པ་ཀཱ་རེ་ན ཨ་ཏྠཱ་ནུ་རཱུ་པཾ བྱ་ཉྫ་ནེ བྱ་ཉྫ་ནཱ་ནུ་རཱུ་པ་ཉྩ ཨ་ཏྠེ པ་ཊི་པ་ཛྫི་ཏ་བྦཾ, ཏ་ཐཱ ཨ་པྤ་ཊི་པ་ཛྫ་མཱ་ནོ, ཏ་ཐཱ ཙ ཝ་ཀྑ་ཏི– ཏ་ཐཱ ཧི སོ ས་དྡ་ལ་ཀྑ་ཎ མ་ཛཱ་ན་ནྟོ’ཏི་ཨཱ་དི. ཏི་ཝི་དྷ་མྤི ས་དྡྷ་མྨ་ནྟི པ་རི་ཡ་ཏྟི་པ་ཊི་པ་ཏྟི་ཨ་དྷི་ག་མ་ཝ་སེ་ན་ཏི ཝི་དྷ་མེ་ཝ ས་དྡྷ་མྨཾ, ཏ་ཏྠ ཏི་པི་ཊ་ཀ་བུ་དྡྷ་ཝ་ཙ་ནཾ པ་རི་ཡ་ཏྟི་ས་དྡྷ་མྨོ ནཱ་མ, ཏེ་ར་ས དྷུ་ཏ་གུ་ཎཱ ཙུ་དྡ་ས ཁ་ནྡྷ་ཀ་ཝ་ཏྟཱ་ནི དྭེ ཨ་སཱི་ཏི མ་ཧཱ་ཝ་ཏྟཱ་ནཱི་ཏི ཨ་ཡཾ པ་ཊི་པ་ཏྟི་ས་དྡྷ་མྨོ ནཱ་མ, ཙ་ཏྟཱ་རོ མ་གྒཱ ཙ་ཏྟཱ་རི ཙ ཕ་ལཱ་ནི ཨ་ཡཾ ཨ་དྷི་ག་མ་ས་དྡྷ་མྨོ ནཱ་མ, ཏ་ཐཱ་ཧི་ཙྩཱ་དི་ནཱ ཝུ་ཏྟ་མ་ཏྠཾ ས་མ་ཏྠེ་ཏི, ཏ་མྤི པཱ་ལི༹་ཡཱ ཐི་རཱི་ཀཱ་ཏུཾ ‘ཝུ་ཏྟཾ ཧེ་ཏ’ནྟི་ཨཱ་དི་མཱ་ཧ, ཏ་ཏྠ དྷ་མྨཱ་ཏི ཧེ་ཏཱུ, ས་དྡྷ་མྨ་སྶཱ་ཏི ཡ་ཐཱ་ཝུ་ཏྟ་སྶ ཏི་ཝི་དྷ་སྶ ས་དྡྷ་མྨ་སྶ, པ་ད་བྱ་ཉྫ་ན་ནྟི པ་ད་ཉྩ བྱ་ཉྫ་ན་ཉྩ ཏཾ, ཏ་ཏྠ པ་དཾ ནཱ་མ སྱཱ་དྱ་ནྟཾ ཏྱཱ་དྱ་ནྟ་ཉྩ, བྱ་ཉྫཱི་ཡ་ཏི ཨ་ཏྠོ ཨེ་ཏེ་ནཱ་ཏི བྱ་ཉྫ་ནཾ-ཝཱ་ཀྱཾ ཨ་ཐ་ཝཱ པ་ཛྫ་ཏེ ག་མྱ་ཏེ ཨ་ཏྠོ ཨེ་ཏེ་ནཱ་ཏི པ་དཾ-སྱཱ་དྱ་ནྟཱ་དི, ཝཱ་ཀྱཾ་ཝ བྱ་ཉྫ་ནཾ, སི་ཐི་ལ་དྷ་ནི་ཏཱ་དི་པ་ད་མེ་ཝ་ཝཱ ཝུ་ཏྟ་ན་ཡེ་ན བྱ་ཉྫ་ན་ནྟི པ་ད་བྱ་ཉྫ་ནཾ, ཏཾ, དུ་ནྣི་ཀྑི་ཏྟཾ དུ་ཊྛུ ནི་ཀྑི་ཏྟཾ ཋ་པི་ཏཾ ཝི་རཱ་དྷེ་ཏྭཱ ཀ་ཐི་ཏཾ, ཨ་ཏྠོ ཙ དུ་ནྣཱི་ཏོ་ཏི དུ་ནྣི་ཀྑི་ཏྟ་ཏྟཱ་ཡེ་ཝ པ་ད་བྱ་ཉྫ་ན་སྶ ཏ་བྦ་ཙ་ནཱི་ཡོ་པི དུ་ཊྛུ་ཝི་ཉྙཱ་ཏོ ཧོ་ཏི, ཝུ་ཏྟ་པ་ཊི་པ་ཀྑ་ཏོ་ཏི ‘ཨ་ཝི་ཉྙཱ་ཏ་ས་དྡ་ལ་ཀྑ་ཎོ་ཧི’ཙྩཱ་དི་ནཱ ཝུ་ཏྟ་སྶ ཝི་ཉྙཱ་ཏ་ས་དྡ་ལ་ཀྑ་ཎ་ཏྟཱ་དི་ནཱ པ་ཊི་པ་ཀྑ་བྷཱ་ཝ་ཏོ, བྷཱ་ཝ་པྤ་དྷཱ་ནོ ཧི ཨ་ཡཾ ནི་དྡེ་སོ,ཏྟ་པྤ་ཙྩ་ཡ་ལོ་པོ ཝཱ, ན ཧི ཨ་ཏྟཱ་ཝ ཨ་ཏྟ་ནཱ ཝེ་དི་ཏ་བྦོ་ཏི ཡུ་ཏྟ་ནྟི.
ཏ་དེ་ཝ་ནྟི་ཨཱ་དི་ནཱ ཡ་ཐཱ་ཝུ་ཏྟཾ ནི་ག་མེ་ཏྭཱ ས་ཉྙཱ་ཝི་དྷཱ་ནེ པ་ཡོ་ཛ་ནཾ ད་སྶེ་ཏི, ཏ་ནྟི ཧེ་ཏྭ་ཏྠེ ནི་པཱ་ཏོ, ཡ་སྨཱ ས་དྡ་ལ་ཀྑ་ཎ་སྶ ཛཱ་ན་ནཾ་སཱ་ནི སཾ་སཾ ཏ་སྨཱ་ཏི ཨ་ཏྠོ, ཨེ་ཝ་ནྟི ནི་ད་སྶ་ན་ཏྠེ ནི་པཱ་ཏོ, ཨེ་ཝཾ ས་པྤ་ཡོ་ཛ་ན་ནྟི ས་མྦ་ནྡྷོ, ཏ་དེ་ཝ་ནྟི ཝཱ ནི་པཱ་ཏ་ས་མུ་དཱ་ཡོ ཡཾ, ཝུ་ཏྟེ་ན པ་ཀཱ་རེ་ནེ་ཏྱ་སྨིཾ ཨ་ཏྠེ ཝ་ཏྟ་ཏེ. ན་ནུ་ཙ ས་ཉྙཱི་ནཾ ས་ཉྙཱ་ནཾ ཝ་ཏྟ་བྦ་ཏྟེ ‘‘ཨ་ཨཱ་ད་ཡོ ཏི་ཏཱ་ལཱི་ས་ཝ་ཎྞཱ’’ཏི་ཨཱ་དཱི་ནཾ ཝཱ་ཀྱཱ་ནཾ ཝི་སུཾ་ཝི་སུཾ མ་ཧ་ནྟ་ཏྟཱ ཀུ་ཏོ ལཱ་གྷ་ཝཾ ས་ཏྠ་སྶཱ་ཏི མ་ཉྙ་མཱ་ནོ ‘ཏ་ཐཱ་ཧི’ཙྩཱ་དི་ནཱ ས་ཉྙཱ་ཝི་དྷཱ་ནེ ལཱ་གྷ་ཝ་ས་བྦྷཱ་ཝཾ ས་མ་ཏྠེ་ཏི, ཧོ་ཏེ་ཝཱ་ཏི ཨ་ཝ་དྷཱ་ར་ཎེ་ན ཀ་ཏྠ་ཙི པ་ར་ས་ཏྠེ ཝི་ཡ ནོ ན ཧོ་ཏཱི་ཏི ད་སྶེ་ཏི, པ་ཊི་པ་ཏྟི་ལཱ་གྷ་ཝ་མྤི ཙེ་ཏྠ ཧོ་ཏེ་ཝ, ཏ་ཐཱ་ཧི ‘‘ཝ་ཎྞ་པ་རེ་ན ས་ཝ་ཎྞོ་པི’’ཙྩཱ་དོ (༡-༢༤) ཝ་ཎྞཱ་དི་ས་ཉྙཱ་ས་མུ་དྡྷ་རི་ཏཱ ནཱ་ཏྟཱ་ན་མ་ཏྟཱ་ཝ་ག་མེ་ཏུ་མ་ལ་ནྟི པ་རེ པུ་ཙྪི་ཏྭཱ ཛཱ་ནི་ཏ་བྦཱ ཨ་སྶ, ཏ་ཏོ ས་ཉྙཱ-ཝ་སེ་ཡཱ, ཏ་ཏོ་སྶ ས་ཉྙཱ་ཏི ས་ཉྙཱ་ས་ཉྙཱི་ཝི་ཝེ་ཙ་ནཾ ཏ་ད་ནུ་ཊྛཱ་ན་ནྟི པ་ར་མྤ་རཱ་པེ་ཀྑཱ་ཡ བྷ་ཝི་ཏ་བྦཾ པ་ཊི་པ་ཏྟི གཱ་ར་ཝཱ་བྷཱ་ཝཱ. ཨི་དཱ་ནི ས་ངྑེ་པ་ཏོ ས་ཏྠ་ཀྐ་མཾ ད་སྶེ་ཏུ་མཱ་ཧ-ཨེ་ཝཾ ཏཱ་ཝི’ཙྩཱ་དི, ཏཱ་ཝཱ་ཏི པ་ཋ་མཾ, ཨུ་པ་ཡུ་ཛྫ་མཱ་ན་ཏྟཱ་ཏི བྱཱ་པཱ་རི་ཡ་མཱ་ན་ཏྟཱ, ཝི་ས་ཡོ གོ་ཙ་རོ ཡ་ཏྠེ་ཏེ སྱཱ་ད་ཡོ ཝི་དྷཱི ཡ་ནྟེ, ས་ཧ ཝི་ས་ཡེ་ནཱ་ཏི ས་ཝི་ས་ཡཱ, པ་ཋ་མཾ ཀ་རཱི་ཡ་ཏཱི་ཏི པ་ཀ་ཏི ཡ་ཏོ སྱཱ་ད་ཡོ ཝི་དྷཱི་ཡ་ནྟེ, ས་ཧ པ་ཀ་ཏི་ཡཱ་ཏི ས་པྤ་ཀ་ཏི་ཀཱ, ལི་ངྒཱ་དི་ཀ་ནྟི ཨཱ་དི་ས་དྡེ་ན‘ས་ལ་བྷ་ཙྪཱ་ཡ’མི་ཙྩཱ་དོ ཨེ་ཀ་ཏྟཱ་དི, ལི་ངྒེ་བྷ་ཝཱ ལི་ངྒི་ཀཱ-ཨི་ཏྠི་ཝི་དྷ་ཡོ, ཨེ་ཀ་ཏྠཱི་བྷཱ་ཝོ ས་མཱ་སོ, ཏེ་ན, སཱ་མ་ཉྙ་ཏོ ས་མཱ་ན་ཏྟཱ, ས་མཱ་ན་ཏྟ་ནྟུ་ཎཱ་དི་ཝུ་ཏྟི་ཡཱ ‘‘རཱ་ཛཱ་དི་ཝི་སི་ཊྛེ པུ་རི་སཱ དོ་ཝི་ཡ’ཝ་སི་ཊྛཱ་དི་ཝི་སི་ཊྛེ ཨ་པ་ཙྩཱ་དི་མྷི ཨ་ཏྠེ པ་ཝ་ཏྟ་ན་ཏོ.
ཨི་ཏི མོ་གྒ་ལླཱ་ན་པ་ཉྩི་ཀཱ་ཊཱི་ཀཱ་ཡཾ སཱ་ར་ཏྠ་ཝི་ལཱ་སི་ནི་ཡཾ
ར་ཏ་ན་ཏྟ་ཡ་པ་ཎཱ་མཱ་དི་ཀ་ཐཱ ས་མ་ཏྟཱ.