༢. ས་ཨུ་པཱ་དི་སེ་ས་སུ་ཏྟཾ

༡༢. ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠིཾ པི་ཎྜཱ་ཡ པཱ་ཝི་སི. ཨ་ཐ ཁོ ཨཱ་ཡ་སྨ་ཏོ སཱ་རི་པུ་ཏྟ་སྶ ཨེ་ཏ་ད་ཧོ་སི – ‘‘ཨ་ཏི་པྤ་གོ ཁོ ཏཱ་ཝ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏུཾ, ཡཾ་ནཱུ་ནཱ་ཧཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻ’’ནྟི. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི.

ཏེ་ན ཁོ པ་ན ས་མ་ཡེ་ན ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི – ‘‘ཡོ ཧི ཀོ་ཙི, ཨཱ་ཝུ་སོ, ས་ཨུ་པཱ་དི་སེ་སོ ཀཱ་ལཾ ཀ་རོ་ཏི, ས་བྦོ སོ ཨ་པ་རི་མུ་ཏྟོ ནི་ར་ཡཱ ཨ་པ་རི་མུ་ཏྟོ ཏི་ར་ཙྪཱ་ན་ཡོ་ནི་ཡཱ ཨ་པ་རི་མུ་ཏྟོ པེ་ཏྟི་ཝི་ས་ཡཱ ཨ་པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ’’ཏི. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ བྷཱ་སི་ཏཾ ནེ་ཝ ཨ་བྷི་ན་ནྡི ན་པྤ་ཊི་ཀྐོ་སི. ཨ་ན་བྷི་ན་ནྡི་ཏྭཱ ཨ་པྤ་ཊི་ཀྐོ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི – ‘‘བྷ་ག་ཝ་ཏོ ས་ནྟི་ཀེ ཨེ་ཏ་སྶ བྷཱ་སི་ཏ་སྶ ཨ་ཏྠཾ ཨཱ་ཛཱ་ནི་སྶཱ་མཱི’’ཏི. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཨི་དྷཱ་ཧཾ, བྷ་ནྟེ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ སཱ་ཝ་ཏྠིཾ པི་ཎྜཱ་ཡ པཱ་ཝི་སིཾ. ཏ་སྶ མ་ཡ྄ཧཾ, བྷ་ནྟེ, ཨེ་ཏ་ད་ཧོ་སི – ‘ཨ་ཏི་པྤ་གོ ཁོ ཏཱ་ཝ སཱ་ཝ་ཏྠི་ཡཾ པི་ཎྜཱ་ཡ ཙ་རི་ཏུཾ; ཡཾ་ནཱུ་ནཱ་ཧཾ ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མེ་ཡྻ’ནྟི. ཨ་ཐ ཁོ ཨ་ཧཾ, བྷ་ནྟེ, ཡེ་ན ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ཨཱ་རཱ་མོ ཏེ་ནུ་པ་ས་ངྐ་མིཾ; ཨུ་པ་ས་ངྐ་མི་ཏྭཱ ཏེ་ཧི ཨ་ཉྙ་ཏི་ཏྠི་ཡེ་ཧི པ་རི་བྦཱ་ཛ་ཀེ་ཧི ས་དྡྷིཾ ས་མྨོ་དིཾ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ. ཏེ་ན ཁོ པ་ན ས་མ་ཡེ་ན ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ ས་ནྣི་སི་ནྣཱ་ནཾ ས་ནྣི་པ་ཏི་ཏཱ་ནཾ ཨ་ཡ་མ་ནྟ་རཱ་ཀ་ཐཱ ཨུ་ད་པཱ་དི – ‘ཡོ ཧི ཀོ་ཙི, ཨཱ་ཝུ་སོ, ས་ཨུ་པཱ་དི་སེ་སོ ཀཱ་ལཾ ཀ་རོ་ཏི, ས་བྦོ སོ ཨ་པ་རི་མུ་ཏྟོ ནི་ར་ཡཱ ཨ་པ་རི་མུ་ཏྟོ ཏི་ར་ཙྪཱ་ན་ཡོ་ནི་ཡཱ ཨ་པ་རི་མུ་ཏྟོ པེ་ཏྟི་ཝི་ས་ཡཱ ཨ་པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ’ཏི. ཨ་ཐ ཁོ ཨ་ཧཾ, བྷ་ནྟེ, ཏེ་སཾ ཨ་ཉྙ་ཏི་ཏྠི་ཡཱ་ནཾ པ་རི་བྦཱ་ཛ་ཀཱ་ནཾ བྷཱ་སི་ཏཾ ནེ་ཝ ཨ་བྷི་ན་ནྡིཾ ན་པྤ་ཊི་ཀྐོ་སིཾ. ཨ་ན་བྷི་ན་ནྡི་ཏྭཱ ཨ་པྤ་ཊི་ཀྐོ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐ་མིཾ – ‘བྷ་ག་ཝ་ཏོ ས་ནྟི་ཀེ ཨེ་ཏ་སྶ བྷཱ་སི་ཏ་སྶ ཨ་ཏྠཾ ཨཱ་ཛཱ་ནི་སྶཱ་མཱི’’’ཏི.

‘‘ཀེ ཙ [ཀེ་ཙི (སྱཱ. པཱི.), ཏེ ཙ (ཀ.)], སཱ་རི་པུ་ཏྟ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ བཱ་ལཱ ཨ་བྱ་ཏྟཱ, ཀེ ཙ [ཀེ་ཙི (སྱཱ. པཱི. ཀ.) ཨ. ནི. ༦.༤༤ པཱ་ལི༹་ཡཱ སཾ་ས་ནྡེ་ཏ་བྦཾ] ས་ཨུ་པཱ་དི་སེ་སཾ ཝཱ ‘ས་ཨུ་པཱ་དི་སེ་སོ’ཏི ཛཱ་ནི་སྶ་ནྟི, ཨ་ནུ་པཱ་དི་སེ་སཾ ཝཱ ‘ཨ་ནུ་པཱ་དི་སེ་སོ’ཏི ཛཱ་ནི་སྶ་ནྟི’’!

‘‘ན་ཝ་ཡི་མེ, སཱ་རི་པུ་ཏྟ, པུ་གྒ་ལཱ ས་ཨུ་པཱ་དི་སེ་སཱ ཀཱ་ལཾ ཀུ་རུ་མཱ་ནཱ པ་རི་མུ་ཏྟཱ ནི་ར་ཡཱ པ་རི་མུ་ཏྟཱ ཏི་ར་ཙྪཱ་ན་ཡོ་ནི་ཡཱ པ་རི་མུ་ཏྟཱ པེ་ཏྟི་ཝི་ས་ཡཱ པ་རི་མུ་ཏྟཱ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ. ཀ་ཏ་མེ ན་ཝ? ཨི་དྷ, སཱ་རི་པུ་ཏྟ, ཨེ་ཀ་ཙྩོ པུ་གྒ་ལོ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི, ས་མཱ་དྷི་སྨིཾ པ་རི་པཱུ་ར་ཀཱ་རཱི, པ་ཉྙཱ་ཡ མ་ཏྟ་སོ ཀཱ་རཱི. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི. ཨ་ཡཾ, སཱ་རི་པུ་ཏྟ, པ་ཋ་མོ པུ་གྒ་ལོ ས་ཨུ་པཱ་དི་སེ་སོ ཀཱ་ལཾ ཀུ་རུ་མཱ་ནོ པ་རི་མུ་ཏྟོ ནི་ར་ཡཱ པ་རི་མུ་ཏྟོ ཏི་ར་ཙྪཱ་ན་ཡོ་ནི་ཡཱ པ་རི་མུ་ཏྟོ པེ་ཏྟི་ཝི་ས་ཡཱ པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ.

‘‘པུ་ན ཙ་པ་རཾ, སཱ་རི་པུ་ཏྟ, ཨི་དྷེ་ཀ་ཙྩོ པུ་གྒ་ལོ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི, ས་མཱ་དྷི་སྨིཾ པ་རི་པཱུ་ར་ཀཱ་རཱི, པ་ཉྙཱ་ཡ མ་ཏྟ་སོ ཀཱ་རཱི. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི…པེ… ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི…པེ… ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི…པེ… ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི. ཨ་ཡཾ, སཱ་རི་པུ་ཏྟ, པ་ཉྩ་མོ པུ་གྒ་ལོ ས་ཨུ་པཱ་དི་སེ་སོ ཀཱ་ལཾ ཀུ་རུ་མཱ་ནོ པ་རི་མུ་ཏྟོ ནི་ར་ཡཱ པ་རི་མུ་ཏྟོ ཏི་ར་ཙྪཱ་ན་ཡོ་ནི་ཡཱ པ་རི་མུ་ཏྟོ པེ་ཏྟི་ཝི་ས་ཡཱ པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ.

‘‘པུ་ན ཙ་པ་རཾ, སཱ་རི་པུ་ཏྟ, ཨི་དྷེ་ཀ་ཙྩོ པུ་གྒ་ལོ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི, ས་མཱ་དྷི་སྨིཾ མ་ཏྟ་སོ ཀཱ་རཱི, པ་ཉྙཱ་ཡ མ་ཏྟ་སོ ཀཱ་རཱི. སོ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ རཱ་ག་དོ་ས་མོ་ཧཱ་ནཾ ཏ་ནུ་ཏྟཱ ས་ཀ་དཱ་གཱ་མཱི ཧོ་ཏི, ས་ཀི་དེ་ཝ ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རོ་ཏི. ཨ་ཡཾ, སཱ་རི་པུ་ཏྟ, ཚ་ཊྛོ པུ་གྒ་ལོ ས་ཨུ་པཱ་དི་སེ་སོ ཀཱ་ལཾ ཀུ་རུ་མཱ་ནོ པ་རི་མུ་ཏྟོ ནི་ར་ཡཱ…པེ… པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ.

‘‘པུ་ན ཙ་པ་རཾ, སཱ་རི་པུ་ཏྟ, ཨི་དྷེ་ཀ་ཙྩོ པུ་གྒ་ལོ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི, ས་མཱ་དྷི་སྨིཾ མ་ཏྟ་སོ ཀཱ་རཱི, པ་ཉྙཱ་ཡ མ་ཏྟ་སོ ཀཱ་རཱི. སོ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨེ་ཀ་བཱི་ཛཱི ཧོ་ཏི, ཨེ་ཀཾ་ཡེ་ཝ མཱ་ནུ་ས་ཀཾ བྷ་ཝཾ ནི་བྦ་ཏྟེ་ཏྭཱ དུ་ཀྑ་སྶ་ནྟཾ ཀ་རོ་ཏི. ཨ་ཡཾ, སཱ་རི་པུ་ཏྟ, ས་ཏྟ་མོ པུ་གྒ་ལོ ས་ཨུ་པཱ་དི་སེ་སོ ཀཱ་ལཾ ཀུ་རུ་མཱ་ནོ པ་རི་མུ་ཏྟོ ནི་ར་ཡཱ…པེ… པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ.

‘‘པུ་ན ཙ་པ་རཾ, སཱ་རི་པུ་ཏྟ, ཨི་དྷེ་ཀ་ཙྩོ པུ་གྒ་ལོ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི, ས་མཱ་དྷི་སྨིཾ མ་ཏྟ་སོ ཀཱ་རཱི, པ་ཉྙཱ་ཡ མ་ཏྟ་སོ ཀཱ་རཱི. སོ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཀོ་ལཾ་ཀོ་ལོ ཧོ་ཏི, དྭེ ཝཱ ཏཱི་ཎི ཝཱ ཀུ་ལཱ་ནི ས་ནྡྷཱ་ཝི་ཏྭཱ སཾ་ས་རི་ཏྭཱ དུ་ཀྑ་སྶ་ནྟཾ ཀ་རོ་ཏི. ཨ་ཡཾ, སཱ་རི་པུ་ཏྟ, ཨ་ཊྛ་མོ པུ་གྒ་ལོ ས་ཨུ་པཱ་དི་སེ་སོ ཀཱ་ལཾ ཀུ་རུ་མཱ་ནོ པ་རི་མུ་ཏྟོ ནི་ར་ཡཱ…པེ… པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ.

‘‘པུ་ན ཙ་པ་རཾ, སཱ་རི་པུ་ཏྟ, ཨི་དྷེ་ཀ་ཙྩོ པུ་གྒ་ལོ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི, ས་མཱ་དྷི་སྨིཾ མ་ཏྟ་སོ ཀཱ་རཱི, པ་ཉྙཱ་ཡ མ་ཏྟ་སོ ཀཱ་རཱི. སོ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ས་ཏྟ་ཀྑ་ཏྟུ་པ་ར་མོ ཧོ་ཏི, ས་ཏྟ་ཀྑ་ཏྟུ་པ་ར་མཾ དེ་ཝེ ཙ མ་ནུ་སྶེ ཙ ས་ནྡྷཱ་ཝི་ཏྭཱ སཾ་ས་རི་ཏྭཱ དུ་ཀྑ་སྶ་ནྟཾ ཀ་རོ་ཏི. ཨ་ཡཾ, སཱ་རི་པུ་ཏྟ, ན་ཝ་མོ པུ་གྒ་ལོ ས་ཨུ་པཱ་དི་སེ་སོ ཀཱ་ལཾ ཀུ་རུ་མཱ་ནོ པ་རི་མུ་ཏྟོ ནི་ར་ཡཱ པ་རི་མུ་ཏྟོ ཏི་ར་ཙྪཱ་ན་ཡོ་ནི་ཡཱ པ་རི་མུ་ཏྟོ པེ་ཏྟི་ཝི་ས་ཡཱ པ་རི་མུ་ཏྟོ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ.

‘‘ཀེ ཙ, སཱ་རི་པུ་ཏྟ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ བཱ་ལཱ ཨ་བྱ་ཏྟཱ, ཀེ ཙ ས་ཨུ་པཱ་དི་སེ་སཾ ཝཱ ‘ས་ཨུ་པཱ་དི་སེ་སོ’ཏི ཛཱ་ནི་སྶ་ནྟི, ཨ་ནུ་པཱ་དི་སེ་སཾ ཝཱ ‘ཨ་ནུ་པཱ་དི་སེ་སོ’ཏི ཛཱ་ནི་སྶ་ནྟི! ཨི་མེ ཁོ, སཱ་རི་པུ་ཏྟ, ན་ཝ པུ་གྒ་ལཱ ས་ཨུ་པཱ་དི་སེ་སཱ ཀཱ་ལཾ ཀུ་རུ་མཱ་ནཱ པ་རི་མུ་ཏྟཱ ནི་ར་ཡཱ པ་རི་མུ་ཏྟཱ ཏི་ར་ཙྪཱ་ན་ཡོ་ནི་ཡཱ པ་རི་མུ་ཏྟཱ པེ་ཏྟི་ཝི་ས་ཡཱ པ་རི་མུ་ཏྟཱ ཨ་པཱ་ཡ་དུ་གྒ་ཏི་ཝི་ནི་པཱ་ཏཱ. ན ཏཱ་ཝཱ་ཡཾ, སཱ་རི་པུ་ཏྟ, དྷ་མྨ་པ་རི་ཡཱ་ཡོ པ་ཊི་བྷཱ་སི བྷི་ཀྑཱུ་ནཾ བྷི་ཀྑུ་ནཱི་ནཾ ཨུ་པཱ་ས་ཀཱ་ནཾ ཨུ་པཱ་སི་ཀཱ་ནཾ. ཏཾ ཀི་སྶ ཧེ་ཏུ? མཱ་ཡི་མཾ དྷ་མྨ་པ་རི་ཡཱ་ཡཾ སུ་ཏྭཱ པ་མཱ་དཾ ཨཱ་ཧ་རིཾ་སཱུ་ཏི [ཨཱ་ཧ་རིཾ་སུ (སཱི. པཱི.)]. ཨ་པི ཙ མ་ཡཱ [ཨ་པི ཙཱ་ཡཾ (?)], སཱ་རི་པུ་ཏྟ, དྷ་མྨ་པ་རི་ཡཱ་ཡོ པ་ཉྷཱ་དྷི་པྤཱ་ཡེ་ན བྷཱ་སི་ཏོ’’ཏི. དུ་ཏི་ཡཾ.