༣. མེ་གྷི་ཡ་སུ་ཏྟཾ

༣. ཨེ་ཀཾ ས་མ་ཡཾ བྷ་ག་ཝཱ ཙཱ་ལི་ཀཱ་ཡཾ ཝི་ཧ་ར་ཏི ཙཱ་ལི་ཀཱ་པ་བྦ་ཏེ. ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ མེ་གྷི་ཡོ བྷ་ག་ཝ་ཏོ ཨུ་པ་ཊྛཱ་ཀོ ཧོ་ཏི. ཨ་ཐ ཁོ ཨཱ་ཡ་སྨཱ མེ་གྷི་ཡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ ཨཱ་ཡ་སྨཱ མེ་གྷི་ཡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, བྷ་ནྟེ, ཛ་ནྟུ་གཱ་མཾ [ཛ་ཏུ་གཱ་མཾ (སཱི. ཨ་ཊྛ., སྱཱ. ཨ་ཊྛ.), ཛ་ཏྟུ་གཱ་མཾ (ཀ. ཨ་ཊྛ་ཀ་ཐཱ་ཡ་མྤི པཱ་ཋ་ནྟ་རཾ)] པི་ཎྜཱ་ཡ པ་ཝི་སི་ཏུ’’ནྟི. ‘‘ཡ་སྶ དཱ་ནི ཏྭཾ, མེ་གྷི་ཡ, ཀཱ་ལཾ མ་ཉྙ་སཱི’’ཏི.

ཨ་ཐ ཁོ ཨཱ་ཡ་སྨཱ མེ་གྷི་ཡོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཛ་ནྟུ་གཱ་མཾ པི་ཎྜཱ་ཡ པཱ་ཝི་སི. ཛ་ནྟུ་གཱ་མེ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཡེ་ན ཀི་མི་ཀཱ་ལཱ༹་ཡ ན་དི་ཡཱ ཏཱི་རཾ ཏེ་ནུ་པ་ས་ངྐ་མི. ཨ་དྡ་སཱ ཁོ ཨཱ་ཡ་སྨཱ མེ་གྷི་ཡོ ཀི་མི་ཀཱ་ལཱ༹་ཡ ན་དི་ཡཱ ཏཱི་རེ ཛ་ངྒྷཱ་ཝི་ཧཱ་རཾ [ཛ་ངྒྷ་ཝི་ཧཱ་རཾ (སྱཱ. ཀ.)] ཨ་ནུ་ཙ་ངྐ་མ་མཱ་ནོ ཨ་ནུ་ཝི་ཙ་ར་མཱ་ནོ ཨ་མྦ་ཝ་ནཾ པཱ་སཱ་དི་ཀཾ ར་མ་ཎཱི་ཡཾ. དི་སྭཱ་ན་སྶ ཨེ་ཏ་ད་ཧོ་སི – ‘‘པཱ་སཱ་དི་ཀཾ ཝ་ཏི་དཾ ཨ་མྦ་ཝ་ནཾ ར་མ་ཎཱི་ཡཾ, ཨ་ལཾ ཝ་ཏི་དཾ ཀུ་ལ་པུ་ཏྟ་སྶ པ་དྷཱ་ན་ཏྠི་ཀ་སྶ པ་དྷཱ་ནཱ་ཡ. ས་ཙེ མཾ བྷ་ག་ཝཱ ཨ་ནུ་ཛཱ་ནེ་ཡྻ, ཨཱ་ག་ཙྪེ་ཡྻཱ་ཧཾ ཨི་མཾ ཨ་མྦ་ཝ་ནཾ པ་དྷཱ་ནཱ་ཡཱ’’ཏི.

ཨ་ཐ ཁོ ཨཱ་ཡ་སྨཱ མེ་གྷི་ཡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ མེ་གྷི་ཡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་དྷཱ་ཧཾ, བྷ་ནྟེ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཛ་ནྟུ་གཱ་མཾ པི་ཎྜཱ་ཡ པཱ་ཝི་སིཾ. ཛ་ནྟུ་གཱ་མེ པི་ཎྜཱ་ཡ ཙ་རི་ཏྭཱ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཡེ་ན ཀི་མི་ཀཱ་ལཱ༹་ཡ ན་དི་ཡཱ ཏཱི་རཾ ཏེ་ནུ་པ་ས་ངྐ་མིཾ. ཨ་དྡ་སཾ ཁོ ཨ་ཧཾ, བྷ་ནྟེ, ཀི་མི་ཀཱ་ལཱ༹་ཡ ན་དི་ཡཱ ཏཱི་རེ ཛ་ངྒྷཱ་ཝི་ཧཱ་རཾ ཨ་ནུ་ཙ་ངྐ་མ་མཱ་ནོ ཨ་ནུ་ཝི་ཙ་ར་མཱ་ནོ ཨ་མྦ་ཝ་ནཾ པཱ་སཱ་དི་ཀཾ ར་མ་ཎཱི་ཡཾ. དི་སྭཱ་ན མེ ཨེ་ཏ་ད་ཧོ་སི – ‘པཱ་སཱ་དི་ཀཾ ཝ་ཏི་དཾ ཨ་མྦ་ཝ་ནཾ ར་མ་ཎཱི་ཡཾ. ཨ་ལཾ ཝ་ཏི་དཾ ཀུ་ལ་པུ་ཏྟ་སྶ པ་དྷཱ་ན་ཏྠི་ཀ་སྶ པ་དྷཱ་ནཱ་ཡ. ས་ཙེ མཾ བྷ་ག་ཝཱ ཨ་ནུ་ཛཱ་ནེ་ཡྻ, ཨཱ་ག་ཙྪེ་ཡྻཱ་ཧཾ ཨི་མཾ ཨ་མྦ་ཝ་ནཾ པ་དྷཱ་ནཱ་ཡཱ’ཏི. ས་ཙེ མཾ བྷ་ག་ཝཱ ཨ་ནུ་ཛཱ་ནེ་ཡྻ, ག་ཙྪེ་ཡྻཱ་ཧཾ ཏཾ ཨ་མྦ་ཝ་ནཾ པ་དྷཱ་ནཱ་ཡཱ’’ཏི. ‘‘ཨཱ་ག་མེ་ཧི ཏཱ་ཝ, མེ་གྷི་ཡ! ཨེ་ཀ་ཀ་མྷི [ཨེ་ཀ་ཀ་མྷཱ (སཱི. པཱི.)] ཏཱ་ཝ [ཝ་ཏ (ཀ.)] ཡཱ་ཝ ཨ་ཉྙོ་པི ཀོ་ཙི བྷི་ཀྑུ ཨཱ་ག་ཙྪ་ཏཱི’’ཏི [དི་སྶ་ཏཱུ་ཏི (ས་བྦ་ཏྠ, ཊཱི་ཀཱ་ཡ་མྤི པཱ་ཋ་ནྟ་རཾ), ཨཱ་ག་ཙྪ་ཏཱུ་ཏི, དི་སྶ་ཏཱི་ཏི (ཊཱི་ཀཱ་ཡཾ པཱ་ཋ་ནྟ་རཱ་ནི)].

དུ་ཏི་ཡ་མྤི ཁོ ཨཱ་ཡ་སྨཱ མེ་གྷི་ཡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘བྷ་ག་ཝ་ཏོ, བྷ་ནྟེ, ན་ཏྠི ཀི་ཉྩི ཨུ་ཏྟ་རི ཀ་ར་ཎཱི་ཡཾ, ན་ཏྠི ཀ་ཏ་སྶ པ་ཊི་ཙ་ཡོ. མ་ཡ྄ཧཾ ཁོ པ་ན, བྷ་ནྟེ, ཨ་ཏྠི ཨུ་ཏྟ་རི ཀ་ར་ཎཱི་ཡཾ, ཨ་ཏྠི ཀ་ཏ་སྶ པ་ཊི་ཙ་ཡོ. ས་ཙེ མཾ བྷ་ག་ཝཱ ཨ་ནུ་ཛཱ་ནེ་ཡྻ, ག་ཙྪེ་ཡྻཱ་ཧཾ ཏཾ ཨ་མྦ་ཝ་ནཾ པ་དྷཱ་ནཱ་ཡཱ’’ཏི. ‘‘ཨཱ་ག་མེ་ཧི ཏཱ་ཝ, མེ་གྷི་ཡ, ཨེ་ཀ་ཀ་མྷི ཏཱ་ཝ ཡཱ་ཝ ཨ་ཉྙོ་པི ཀོ་ཙི བྷི་ཀྑུ ཨཱ་ག་ཙྪ་ཏཱི’’ཏི.

ཏ་ཏི་ཡ་མྤི ཁོ ཨཱ་ཡ་སྨཱ མེ་གྷི་ཡོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘བྷ་ག་ཝ་ཏོ, བྷ་ནྟེ, ན་ཏྠི ཀི་ཉྩི ཨུ་ཏྟ་རི ཀ་ར་ཎཱི་ཡཾ, ན་ཏྠི ཀ་ཏ་སྶ པ་ཊི་ཙ་ཡོ. མ་ཡ྄ཧཾ ཁོ པ་ན, བྷ་ནྟེ, ཨ་ཏྠི ཨུ་ཏྟ་རི ཀ་ར་ཎཱི་ཡཾ, ཨ་ཏྠི ཀ་ཏ་སྶ པ་ཊི་ཙ་ཡོ. ས་ཙེ མཾ བྷ་ག་ཝཱ ཨ་ནུ་ཛཱ་ནེ་ཡྻ, ག་ཙྪེ་ཡྻཱ་ཧཾ ཏཾ ཨ་མྦ་ཝ་ནཾ པ་དྷཱ་ནཱ་ཡཱ’’ཏི. ‘‘པ་དྷཱ་ན་ནྟི ཁོ, མེ་གྷི་ཡ, ཝ་ད་མཱ་ནཾ ཀི་ནྟི ཝ་དེ་ཡྻཱ་མ! ཡ་སྶ དཱ་ནི ཏྭཾ, མེ་གྷི་ཡ, ཀཱ་ལཾ མ་ཉྙ་སཱི’’ཏི.

ཨ་ཐ ཁོ ཨཱ་ཡ་སྨཱ མེ་གྷི་ཡོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ ཡེ་ན ཏཾ ཨ་མྦ་ཝ་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ ཨ་མྦ་ཝ་ནཾ ཨ་ཛ྄ཛྷོ་གཱ་ཧེ་ཏྭཱ ཨ་ཉྙ་ཏ་ར་སྨིཾ རུ་ཀྑ་མཱུ་ལེ དི་ཝཱ་ཝི་ཧཱ་རཾ ནི་སཱི་དི. ཨ་ཐ ཁོ ཨཱ་ཡ་སྨ་ཏོ མེ་གྷི་ཡ་སྶ ཏ་སྨིཾ ཨ་མྦ་ཝ་ནེ ཝི་ཧ་ར་ནྟ་སྶ ཡེ་བྷུ་ཡྻེ་ན ཏ་ཡོ པཱ་པ་ཀཱ ཨ་ཀུ་ས་ལཱ ཝི་ཏ་ཀྐཱ ས་མུ་དཱ་ཙ་ར་ནྟི, སེ་ཡྻ་ཐི་དཾ – ཀཱ་མ་ཝི་ཏ་ཀྐོ, བྱཱ་པཱ་ད་ཝི་ཏ་ཀྐོ, ཝི་ཧིཾ་སཱ་ཝི་ཏ་ཀྐོ. ཨ་ཐ ཁོ ཨཱ་ཡ་སྨ་ཏོ མེ་གྷི་ཡ་སྶ ཨེ་ཏ་ད་ཧོ་སི – ‘‘ཨ་ཙྪ་རི་ཡཾ ཝ་ཏ བྷོ, ཨ་བྦྷུ་ཏཾ ཝ་ཏ བྷོ! ས་དྡྷཱ་ཡ ཙ ཝ་ཏ་མྷཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏཱ; ཨ་ཐ ཙ པ་ནི་མེ་ཧི ཏཱི་ཧི པཱ་པ་ཀེ་ཧི ཨ་ཀུ་ས་ལེ་ཧི ཝི་ཏ་ཀྐེ་ཧི ཨ་ནྭཱ་ས་ཏྟཱ – ཀཱ་མ་ཝི་ཏ་ཀྐེ་ན, བྱཱ་པཱ་ད་ཝི་ཏ་ཀྐེ་ན, ཝི་ཧིཾ་སཱ་ཝི་ཏ་ཀྐེ་ནཱ’’ཏི.

‘‘ཨི་དྷ མ་ཡ྄ཧཾ, བྷ་ནྟེ, ཏ་སྨིཾ ཨ་མྦ་ཝ་ནེ ཝི་ཧ་ར་ནྟ་སྶ ཡེ་བྷུ་ཡྻེ་ན ཏ་ཡོ པཱ་པ་ཀཱ ཨ་ཀུ་ས་ལཱ ཝི་ཏ་ཀྐཱ ས་མུ་དཱ་ཙ་ར་ནྟི, སེ་ཡྻ་ཐི་དཾ – ཀཱ་མ་ཝི་ཏ་ཀྐོ, བྱཱ་པཱ་ད་ཝི་ཏ་ཀྐོ, ཝི་ཧིཾ་སཱ་ཝི་ཏ་ཀྐོ. ཏ་སྶ མ་ཡ྄ཧཾ, བྷ་ནྟེ, ཨེ་ཏ་ད་ཧོ་སི – ‘ཨ་ཙྪ་རི་ཡཾ ཝ་ཏ བྷོ, ཨ་བྦྷུ་ཏཾ ཝ་ཏ བྷོ! ས་དྡྷཱ་ཡ ཙ ཝ་ཏ་མྷཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛི་ཏཱ; ཨ་ཐ ཙ པ་ནི་མེ་ཧི ཏཱི་ཧི པཱ་པ་ཀེ་ཧི ཨ་ཀུ་ས་ལེ་ཧི ཝི་ཏ་ཀྐེ་ཧི ཨ་ནྭཱ་ས་ཏྟཱ – ཀཱ་མ་ཝི་ཏ་ཀྐེ་ན, བྱཱ་པཱ་ད་ཝི་ཏ་ཀྐེ་ན, ཝི་ཧིཾ་སཱ་ཝི་ཏ་ཀྐེ་ནཱ་ཏི’’’.

‘‘ཨ་པ་རི་པ་ཀྐཱ་ཡ, མེ་གྷི་ཡ, ཙེ་ཏོ་ཝི་མུ་ཏྟི་ཡཱ པ་ཉྩ དྷ་མྨཱ པ་རི་པ་ཀྐཱ་ཡ སཾ་ཝ་ཏྟ་ནྟི. ཀ་ཏ་མེ པ་ཉྩ? ཨི་དྷ, མེ་གྷི་ཡ, བྷི་ཀྑུ ཀ་ལྱཱ་ཎ་མི་ཏྟོ ཧོ་ཏི ཀ་ལྱཱ་ཎ་ས་ཧཱ་ཡོ ཀ་ལྱཱ་ཎ་ས་མྤ་ཝ་ངྐོ. ཨ་པ་རི་པ་ཀྐཱ་ཡ, མེ་གྷི་ཡ, ཙེ་ཏོ་ཝི་མུ་ཏྟི་ཡཱ ཨ་ཡཾ པ་ཋ་མོ དྷ་མྨོ པ་རི་པ་ཀྐཱ་ཡ སཾ་ཝ་ཏྟ་ཏི.

‘‘པུ་ན ཙ་པ་རཾ, མེ་གྷི་ཡ, བྷི་ཀྑུ སཱི་ལ་ཝཱ ཧོ་ཏི, པཱ་ཏི་མོ་ཀྑ་སཾ་ཝ་ར་སཾ་ཝུ་ཏོ ཝི་ཧ་ར་ཏི ཨཱ་ཙཱ་ར་གོ་ཙ་ར་ས་མྤ་ནྣོ ཨ་ཎུ་མ་ཏྟེ་སུ ཝ་ཛྫེ་སུ བྷ་ཡ་ད་སྶཱ་ཝཱི, ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ. ཨ་པ་རི་པ་ཀྐཱ་ཡ, མེ་གྷི་ཡ, ཙེ་ཏོ་ཝི་མུ་ཏྟི་ཡཱ ཨ་ཡཾ དུ་ཏི་ཡོ དྷ་མྨོ པ་རི་པ་ཀྐཱ་ཡ སཾ་ཝ་ཏྟ་ཏི.

‘‘པུ་ན ཙ་པ་རཾ, མེ་གྷི་ཡ, ཡཱ་ཡཾ ཀ་ཐཱ ཨ་བྷི་ས་ལླེ་ཁི་ཀཱ ཙེ་ཏོ་ཝི་ཝ་ར་ཎ་ས་པྤཱ་ཡཱ, སེ་ཡྻ་ཐི་དཾ – ཨ་པྤི་ཙྪ་ཀ་ཐཱ ས་ནྟུ་ཊྛི་ཀ་ཐཱ པ་ཝི་ཝེ་ཀ་ཀ་ཐཱ ཨ་སཾ་ས་གྒ་ཀ་ཐཱ ཝཱི་རི་ཡཱ་ར་མྦྷ་ཀ་ཐཱ སཱི་ལ་ཀ་ཐཱ ས་མཱ་དྷི་ཀ་ཐཱ པ་ཉྙཱ་ཀ་ཐཱ ཝི་མུ་ཏྟི་ཀ་ཐཱ ཝི་མུ་ཏྟི་ཉཱ་ཎ་ད་སྶ་ན་ཀ་ཐཱ, ཨེ་ཝ་རཱུ་པི་ཡཱ ཀ་ཐཱ་ཡ ནི་ཀཱ་མ་ལཱ་བྷཱི ཧོ་ཏི ཨ་ཀི་ཙྪ་ལཱ་བྷཱི ཨ་ཀ་སི་ར་ལཱ་བྷཱི. ཨ་པ་རི་པ་ཀྐཱ་ཡ, མེ་གྷི་ཡ, ཙེ་ཏོ་ཝི་མུ་ཏྟི་ཡཱ ཨ་ཡཾ ཏ་ཏི་ཡོ དྷ་མྨོ པ་རི་པ་ཀྐཱ་ཡ སཾ་ཝ་ཏྟ་ཏི.

‘‘པུ་ན ཙ་པ་རཾ, མེ་གྷི་ཡ, བྷི་ཀྑུ ཨཱ་ར་དྡྷ་ཝཱི་རི་ཡོ ཝི་ཧ་ར་ཏི ཨ་ཀུ་ས་ལཱ་ནཾ དྷ་མྨཱ་ནཾ པ་ཧཱ་ནཱ་ཡ, ཀུ་ས་ལཱ་ནཾ དྷ་མྨཱ་ནཾ ཨུ་པ་ས་མྤ་དཱ་ཡ, ཐཱ་མ་ཝཱ ད་ལ༹ྷ་པ་ར་ཀྐ་མོ ཨ་ནི་ཀྑི་ཏྟ་དྷུ་རོ ཀུ་ས་ལེ་སུ དྷ་མྨེ་སུ. ཨ་པ་རི་པ་ཀྐཱ་ཡ, མེ་གྷི་ཡ, ཙེ་ཏོ་ཝི་མུ་ཏྟི་ཡཱ ཨ་ཡཾ ཙ་ཏུ་ཏྠོ དྷ་མྨོ པ་རི་པ་ཀྐཱ་ཡ སཾ་ཝ་ཏྟ་ཏི.

‘‘པུ་ན ཙ་པ་རཾ, མེ་གྷི་ཡ, བྷི་ཀྑུ པ་ཉྙ་ཝཱ ཧོ་ཏི ཨུ་ད་ཡ་ཏྠ་གཱ་མི་ནི་ཡཱ པ་ཉྙཱ་ཡ ས་མ་ནྣཱ་ག་ཏོ ཨ་རི་ཡཱ་ཡ ནི་བྦེ་དྷི་ཀཱ་ཡ ས་མྨཱ དུ་ཀྑ་ཀྑ་ཡ་གཱ་མི་ནི་ཡཱ. ཨ་པ་རི་པ་ཀྐཱ་ཡ, མེ་གྷི་ཡ, ཙེ་ཏོ་ཝི་མུ་ཏྟི་ཡཱ ཨ་ཡཾ པ་ཉྩ་མོ དྷ་མྨོ པ་རི་པ་ཀྐཱ་ཡ སཾ་ཝ་ཏྟ་ཏི.

‘‘ཀ་ལྱཱ་ཎ་མི་ཏྟ་སྶེ་ཏཾ, མེ་གྷི་ཡ, བྷི་ཀྑུ་ནོ པཱ་ཊི་ཀ་ངྑཾ ཀ་ལྱཱ་ཎ་ས་ཧཱ་ཡ་སྶ ཀ་ལྱཱ་ཎ་ས་མྤ་ཝ་ངྐ་སྶ – ‘སཱི་ལ་ཝཱ བྷ་ཝི་སྶ་ཏི…པེ. … ས་མཱ་དཱ་ཡ སི་ཀྑི་སྶ་ཏི སི་ཀྑཱ་པ་དེ་སུ’’’.

‘‘ཀ་ལྱཱ་ཎ་མི་ཏྟ་སྶེ་ཏཾ, མེ་གྷི་ཡ, བྷི་ཀྑུ་ནོ པཱ་ཊི་ཀ་ངྑཾ ཀ་ལྱཱ་ཎ་ས་ཧཱ་ཡ་སྶ ཀ་ལྱཱ་ཎ་ས་མྤ་ཝ་ངྐ་སྶ – ‘ཡཱ་ཡཾ ཀ་ཐཱ ཨ་བྷི་ས་ལླེ་ཁི་ཀཱ ཙེ་ཏོ་ཝི་ཝ་ར་ཎ་ས་པྤཱ་ཡཱ, སེ་ཡྻ་ཐི་དཾ – ཨ་པྤི་ཙྪ་ཀ་ཐཱ…པེ… ཝི་མུ་ཏྟི་ཉཱ་ཎ་ད་སྶ་ན་ཀ་ཐཱ, ཨེ་ཝ་རཱུ་པི་ཡཱ ཀ་ཐཱ་ཡ ནི་ཀཱ་མ་ལཱ་བྷཱི བྷ་ཝི་སྶ་ཏི ཨ་ཀི་ཙྪ་ལཱ་བྷཱི ཨ་ཀ་སི་ར་ལཱ་བྷཱི’’’.

‘‘ཀ་ལྱཱ་ཎ་མི་ཏྟ་སྶེ་ཏཾ, མེ་གྷི་ཡ, བྷི་ཀྑུ་ནོ པཱ་ཊི་ཀ་ངྑཾ ཀ་ལྱཱ་ཎ་ས་ཧཱ་ཡ་སྶ ཀ་ལྱཱ་ཎ་ས་མྤ་ཝ་ངྐ་སྶ – ‘ཨཱ་ར་དྡྷ་ཝཱི་རི་ཡོ ཝི་ཧ་རི་སྶ་ཏི…པེ… ཨ་ནི་ཀྑི་ཏྟ་དྷུ་རོ ཀུ་ས་ལེ་སུ དྷ་མྨེ་སུ’’’.

‘‘ཀ་ལྱཱ་ཎ་མི་ཏྟ་སྶེ་ཏཾ, མེ་གྷི་ཡ, བྷི་ཀྑུ་ནོ པཱ་ཊི་ཀ་ངྑཾ ཀ་ལྱཱ་ཎ་ས་ཧཱ་ཡ་སྶ ཀ་ལྱཱ་ཎ་ས་མྤ་ཝ་ངྐ་སྶ – ‘པ་ཉྙ་ཝཱ བྷ་ཝི་སྶ་ཏི…པེ… ས་མྨཱ་དུ་ཀྑ་ཀྑ་ཡ་གཱ་མི་ནི་ཡཱ’’’.

‘‘ཏེ་ན ཙ པ་ན, མེ་གྷི་ཡ, བྷི་ཀྑུ་ནཱ ཨི་མེ་སུ པ་ཉྩ་སུ དྷ་མྨེ་སུ པ་ཏི་ཊྛཱ་ཡ ཙ་ཏྟཱ་རོ དྷ་མྨཱ ཨུ་ཏྟ་རི བྷཱ་ཝེ་ཏ་བྦཱ – ཨ་སུ་བྷཱ བྷཱ་ཝེ་ཏ་བྦཱ རཱ་ག་སྶ པ་ཧཱ་ནཱ་ཡ, མེ་ཏྟཱ བྷཱ་ཝེ་ཏ་བྦཱ བྱཱ་པཱ་ད་སྶ པ་ཧཱ་ནཱ་ཡ, ཨཱ་ནཱ་པཱ་ན་སྶ་ཏི བྷཱ་ཝེ་ཏ་བྦཱ ཝི་ཏ་ཀྐུ་པ་ཙྪེ་དཱ་ཡ, ཨ་ནི་ཙྩ་ས་ཉྙཱ བྷཱ་ཝེ་ཏ་བྦཱ ཨ་སྨི་མཱ་ན་ས་མུ་གྒྷཱ་ཏཱ་ཡ. ཨ་ནི་ཙྩ་ས་ཉྙི་ནོ, མེ་གྷི་ཡ, ཨ་ན་ཏྟ་ས་ཉྙཱ ས་ཎྛཱ་ཏི. ཨ་ན་ཏྟ་ས་ཉྙཱི ཨ་སྨི་མཱ་ན་ས་མུ་གྒྷཱ་ཏཾ པཱ་པུ་ཎཱ་ཏི དི་ཊྛེ་ཝ དྷ་མྨེ ནི་བྦཱ་ན’’ནྟི. ཏ་ཏི་ཡཾ.