༨. པ་ཋ་མ་པ་རི་ཧཱ་ནི་སུ་ཏྟཾ

༢༨. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ས་ཏྟི་མེ, བྷི་ཀྑ་ཝེ, དྷ་མྨཱ སེ་ཁ་སྶ བྷི་ཀྑུ་ནོ པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? ཀ་མྨཱ་རཱ་མ་ཏཱ, བྷ་སྶཱ་རཱ་མ་ཏཱ, ནི་དྡཱ་རཱ་མ་ཏཱ, ས་ངྒ་ཎི་ཀཱ་རཱ་མ་ཏཱ, ཨི་ནྡྲི་ཡེ་སུ ཨ་གུ་ཏྟ་དྭཱ་ར་ཏཱ, བྷོ་ཛ་ནེ ཨ་མ་ཏྟ་ཉྙུ་ཏཱ, ས་ནྟི ཁོ པ་ན ས་ངྒྷེ ས་ངྒྷ་ཀ་ར་ཎཱི་ཡཱ་ནི; ཏ་ཏྲ སེ་ཁོ བྷི་ཀྑུ [ཏ་ཏྲ བྷི་ཀྑུ (སཱི. སྱཱ.)] ཨི་ཏི པ་ཊི་ས་ཉྩི་ཀྑ་ཏི – ‘ས་ནྟི ཁོ པ་ན ས་ངྒྷེ ཐེ་རཱ [ཁོ སཾ་གྷ་ཏྠེ་རཱ (ཀ.)] ར་ཏྟ་ཉྙཱུ ཙི་ར་པ་བྦ་ཛི་ཏཱ བྷཱ་ར་ཝཱ་ཧི་ནོ, ཏེ [ན ཏེ (ཀ.)] ཏེ་ན པ་ཉྙཱ་ཡི་སྶ་ནྟཱི’ཏི ཨ་ཏྟ་ནཱ ཏེ་སུ ཡོ་གཾ [ཨ་ཏྟ་ནཱ ཝོ་ཡོ་གཾ (སཱི. སྱཱ.)] ཨཱ་པ་ཛྫ་ཏི. ཨི་མེ ཁོ, བྷི་ཀྑ་ཝེ, ས་ཏྟ དྷ་མྨཱ སེ་ཁ་སྶ བྷི་ཀྑུ་ནོ པ་རི་ཧཱ་ནཱ་ཡ སཾ་ཝ་ཏྟ་ནྟི.

‘‘ས་ཏྟི་མེ, བྷི་ཀྑ་ཝེ, དྷ་མྨཱ སེ་ཁ་སྶ བྷི་ཀྑུ་ནོ ཨ་པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? ན ཀ་མྨཱ་རཱ་མ་ཏཱ, ན བྷ་སྶཱ་རཱ་མ་ཏཱ, ན ནི་དྡཱ་རཱ་མ་ཏཱ, ན ས་ངྒ་ཎི་ཀཱ་རཱ་མ་ཏཱ, ཨི་ནྡྲི་ཡེ་སུ གུ་ཏྟ་དྭཱ་ར་ཏཱ, བྷོ་ཛ་ནེ མ་ཏྟ་ཉྙུ་ཏཱ, ས་ནྟི ཁོ པ་ན ས་ངྒྷེ ས་ངྒྷ་ཀ་ར་ཎཱི་ཡཱ་ནི; ཏ་ཏྲ སེ་ཁོ བྷི་ཀྑུ ཨི་ཏི པ་ཊི་ས་ཉྩི་ཀྑ་ཏི – ‘ས་ནྟི ཁོ པ་ན ས་ངྒྷེ ཐེ་རཱ ར་ཏྟ་ཉྙཱུ ཙི་ར་པ་བྦ་ཛི་ཏཱ བྷཱ་ར་ཝཱ་ཧི་ནོ, ཏེ ཏེ་ན པ་ཉྙཱ་ཡི་སྶ་ནྟཱི’ཏི ཨ་ཏྟ་ནཱ ན ཏེ་སུ ཡོ་གཾ ཨཱ་པ་ཛྫ་ཏི. ཨི་མེ ཁོ, བྷི་ཀྑ་ཝེ, ས་ཏྟ དྷ་མྨཱ སེ་ཁ་སྶ བྷི་ཀྑུ་ནོ ཨ་པ་རི་ཧཱ་ནཱ་ཡ སཾ་ཝ་ཏྟ་ནྟཱི’’ཏི. ཨ་ཊྛ་མཾ.