༣. ཝ་ཛྫི་ས་ཏྟ་ཀ་ཝ་གྒོ

༡. སཱ་ར་ནྡ་ད་སུ་ཏྟཾ

༢༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི སཱ་ར་ནྡ་དེ ཙེ་ཏི་ཡེ. ཨ་ཐ ཁོ ས་མྦ་ཧུ་ལཱ ལི་ཙྪ་ཝཱི ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣེ ཁོ ཏེ ལི་ཙྪ་ཝཱི བྷ་ག་ཝཱ ཨེ་ཏ་ད་ཝོ་ཙ – ‘‘ས་ཏྟ ཝོ, ལི་ཙྪ་ཝཱི, ཨ་པ་རི་ཧཱ་ནི་ཡེ [ཨ་པ་རི་ཧཱ་ནཱི་ཡེ (ཀ.)] དྷ་མྨེ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ཏེ ལི་ཙྪ་ཝཱི བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –

‘‘ཀ་ཏ་མེ ཙ, ལི་ཙྪ་ཝཱི, ས་ཏྟ ཨ་པ་རི་ཧཱ་ནི་ཡཱ དྷ་མྨཱ? ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི ཨ་བྷི་ཎྷཾ ས་ནྣི་པཱ་ཏཱ བྷ་ཝི་སྶ་ནྟི ས་ནྣི་པཱ་ཏ་བ་ཧུ་ལཱ; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི ས་མ་གྒཱ ས་ནྣི་པ་ཏི་སྶ་ནྟི, ས་མ་གྒཱ ཝུ་ཊྛ་ཧི་སྶ་ནྟི, ས་མ་གྒཱ ཝ་ཛྫི་ཀ་ར་ཎཱི་ཡཱ་ནི ཀ་རི་སྶ་ནྟི; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི ཨ་པ་ཉྙ་ཏྟཾ ན པ་ཉྙཱ་པེ་སྶ་ནྟི, པ་ཉྙ་ཏྟཾ ན ས་མུ་ཙྪི་ནྡི་སྶ་ནྟི, ཡ་ཐཱ་པ་ཉྙ་ཏྟེ པོ་རཱ་ཎེ ཝ་ཛྫི་དྷ་མྨེ ས་མཱ་དཱ་ཡ ཝ་ཏྟི་སྶ་ནྟི; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི ཡེ ཏེ ཝ་ཛྫཱི་ནཾ ཝ་ཛྫི་མ་ཧ་ལླ་ཀཱ ཏེ ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟི, ཏེ་ས་ཉྩ སོ་ཏ་བྦཾ མ་ཉྙི་སྶ་ནྟི; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི ཡཱ ཏཱ ཀུ་ལི་ཏྠི་ཡོ ཀུ་ལ་ཀུ་མཱ་རི་ཡོ ཏཱ ན ཨོ་ཀ་སྶ པ་ས་ཡ྄ཧ ཝཱ་སེ་སྶ་ནྟི; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི ཡཱ་ནི ཏཱ་ནི ཝ་ཛྫཱི་ནཾ ཝ་ཛྫི་ཙེ་ཏི་ཡཱ་ནི ཨ་བྦྷ་ནྟ་རཱ་ནི ཙེ་ཝ བཱ་ཧི་རཱ་ནི ཙ ཏཱ་ནི ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟི, ཏེ་ས་ཉྩ དི་ནྣ་པུ་བྦཾ ཀ་ཏ་པུ་བྦཾ དྷ་མྨི་ཀཾ བ་ལིཾ ནོ པ་རི་ཧཱ་པེ་སྶ་ནྟི; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཝ་ཛྫཱི་ནཾ ཨ་ར་ཧ་ནྟེ་སུ དྷ་མྨི་ཀཱ ར་ཀྑཱ་ཝ་ར་ཎ་གུ་ཏྟི སུ་སཾ་ཝི་ཧི་ཏཱ བྷ་ཝི་སྶ་ཏི – ‘ཀི་ནྟི ཨ་ནཱ་ག་ཏཱ ཙ ཨ་ར་ཧ་ནྟོ ཝི་ཛི་ཏཾ ཨཱ་ག་ཙྪེ་ཡྻུཾ, ཨཱ་ག་ཏཱ ཙ ཨ་ར་ཧ་ནྟོ ཝི་ཛི་ཏེ ཕཱ་སུཾ ཝི་ཧ་རེ་ཡྻུ’ནྟི; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, ལི་ཙྪ་ཝཱི, ཨི་མེ ས་ཏྟ ཨ་པ་རི་ཧཱ་ནི་ཡཱ དྷ་མྨཱ ཝ་ཛྫཱི་སུ ཋ་སྶ་ནྟི [ཝ་ཏྟི་སྶ་ནྟི (ཀ.)], ཨི་མེ་སུ ཙ ས་ཏྟ་སུ ཨ་པ་རི་ཧཱ་ནི་ཡེ་སུ དྷ་མྨེ་སུ ཝ་ཛྫཱི ས་ནྡི་སྶི་སྶ་ནྟི [ས་ནྡི་སྶ་ནྟི (སཱི. པཱི. ཀ.)]; ཝུ་དྡྷི་ཡེ་ཝ, ལི་ཙྪ་ཝཱི, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི. པ་ཋ་མཾ.

༢. ཝ་སྶ་ཀཱ་ར་སུ་ཏྟཾ

༢༢. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཏེ་ན ཁོ པ་ན ས་མ་ཡེ་ན རཱ་ཛཱ མཱ་ག་དྷོ ཨ་ཛཱ་ཏ་ས་ཏྟུ ཝེ་དེ་ཧི་པུ་ཏྟོ ཝ་ཛྫཱི ཨ་བྷི་ཡཱ་ཏུ་ཀཱ་མོ ཧོ་ཏི. སོ ཨེ་ཝ་མཱ་ཧ – ‘‘ཨ་ཧཾ ཧི་མེ ཝ་ཛྫཱི ཨེ་ཝཾ་མ་ཧི་དྡྷི་ཀེ ཨེ་ཝཾ་མ་ཧཱ་ནུ་བྷཱ་ཝེ ཨུ་ཙྪེ་ཙྪཱ་མི [ཨུ་ཙྪེ་ཛྫི་སྶཱ་མི (སྱཱ.), ཨུ་ཙྪི་ཛྫི་སྶཱ་མི (ཀ.)], ཝ་ཛྫཱི ཝི་ནཱ་སེ་སྶཱ་མི, ཝ་ཛྫཱི ཨ་ན་ཡ་བྱ་ས་ནཾ ཨཱ་པཱ་དེ་སྶཱ་མཱི’’ཏི [ཨཱ་པཱ་དེ་སྶཱ་མི ཝ་ཛྫཱི་ཏི (ཀ.) དཱི. ནི. ༢.༡༣༡].

ཨ་ཐ ཁོ རཱ་ཛཱ མཱ་ག་དྷོ ཨ་ཛཱ་ཏ་ས་ཏྟུ ཝེ་དེ་ཧི་པུ་ཏྟོ ཝ་སྶ་ཀཱ་རཾ བྲཱ་ཧྨ་ཎཾ མཱ་ག་དྷ་མ་ཧཱ་མ་ཏྟཾ ཨཱ་མ་ནྟེ་སི – ‘‘ཨེ་ཧི ཏྭཾ, བྲཱ་ཧྨ་ཎ, ཡེ་ན བྷ་ག་ཝཱ ཏེ་ནུ་པ་ས་ངྐ་མ; ཨུ་པ་ས་ངྐ་མི་ཏྭཱ མ་མ ཝ་ཙ་ནེ་ན བྷ་ག་ཝ་ཏོ པཱ་དེ སི་ར་སཱ ཝ་ནྡཱ་ཧི, ཨ་པྤཱ་བཱ་དྷཾ ཨ་པྤཱ་ཏ་ངྐཾ ལ་ཧུ་ཊྛཱ་ནཾ བ་ལཾ ཕཱ་སུ་ཝི་ཧཱ་རཾ པུ་ཙྪ – ‘རཱ་ཛཱ, བྷ་ནྟེ, མཱ་ག་དྷོ ཨ་ཛཱ་ཏ་ས་ཏྟུ ཝེ་དེ་ཧི་པུ་ཏྟོ བྷ་ག་ཝ་ཏོ པཱ་དེ སི་ར་སཱ ཝ་ནྡ་ཏི, ཨ་པྤཱ་བཱ་དྷཾ ཨ་པྤཱ་ཏ་ངྐཾ ལ་ཧུ་ཊྛཱ་ནཾ བ་ལཾ ཕཱ་སུ་ཝི་ཧཱ་རཾ པུ་ཙྪ་ཏཱི’ཏི. ཨེ་ཝ་ཉྩ ཝ་དེ་ཧི – ‘རཱ་ཛཱ, བྷ་ནྟེ, མཱ་ག་དྷོ ཨ་ཛཱ་ཏ་ས་ཏྟུ ཝེ་དེ་ཧི་པུ་ཏྟོ ཝ་ཛྫཱི ཨ་བྷི་ཡཱ་ཏུ་ཀཱ་མོ. སོ ཨེ་ཝ་མཱ་ཧ – ‘ཨ་ཧཾ ཧི་མེ ཝ་ཛྫཱི ཨེ་ཝཾ་མ་ཧི་དྡྷི་ཀེ ཨེ་ཝཾ་མ་ཧཱ་ནུ་བྷཱ་ཝེ ཨུ་ཙྪེ་ཙྪཱ་མི, ཝ་ཛྫཱི ཝི་ནཱ་སེ་སྶཱ་མི, ཝ་ཛྫཱི ཨ་ན་ཡ་བྱ་ས་ནཾ ཨཱ་པཱ་དེ་སྶཱ་མཱི’ཏི. ཡ་ཐཱ ཏེ བྷ་ག་ཝཱ བྱཱ་ཀ་རོ་ཏི, ཏཾ སཱ་དྷུ་ཀཾ ཨུ་གྒ་ཧེ་ཏྭཱ མ་མ ཨཱ་རོ་ཙེ་ཡྻཱ་སི. ན ཧི ཏ་ཐཱ་ག་ཏཱ ཝི་ཏ་ཐཾ བྷ་ཎ་ནྟཱི’’ཏི.

‘‘ཨེ་ཝཾ, བྷོ’’ཏི ཁོ ཝ་སྶ་ཀཱ་རོ བྲཱ་ཧྨ་ཎོ མཱ་ག་དྷ་མ་ཧཱ་མ་ཏྟོ ར་ཉྙོ མཱ་ག་དྷ་སྶ ཨ་ཛཱ་ཏ་ས་ཏྟུ་སྶ ཝེ་དེ་ཧི་པུ་ཏྟ་སྶ པ་ཊི་སྶུ་ཏྭཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཝ་སྶ་ཀཱ་རོ བྲཱ་ཧྨ་ཎོ མཱ་ག་དྷ་མ་ཧཱ་མ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘རཱ་ཛཱ, བྷོ གོ་ཏ་མ, མཱ་ག་དྷོ ཨ་ཛཱ་ཏ་ས་ཏྟུ ཝེ་དེ་ཧི་པུ་ཏྟོ བྷོ་ཏོ གོ་ཏ་མ་སྶ པཱ་དེ སི་ར་སཱ ཝ་ནྡ་ཏི, ཨ་པྤཱ་བཱ་དྷཾ ཨ་པྤཱ་ཏ་ངྐཾ ལ་ཧུ་ཊྛཱ་ནཾ བ་ལཾ ཕཱ་སུ་ཝི་ཧཱ་རཾ པུ་ཙྪ་ཏི. རཱ་ཛཱ [ཨེ་ཝ་ཉྩ ཝ་དེ་ཏི རཱ་ཛཱ (སཱི. ཀ.)], བྷོ གོ་ཏ་མ, མཱ་ག་དྷོ ཨ་ཛཱ་ཏ་ས་ཏྟུ ཝེ་དེ་ཧི་པུ་ཏྟོ ཝ་ཛྫཱི ཨ་བྷི་ཡཱ་ཏུ་ཀཱ་མོ. སོ ཨེ་ཝ་མཱ་ཧ – ‘ཨ་ཧཾ ཧི་མེ ཝ་ཛྫཱི ཨེ་ཝཾ་མ་ཧི་དྡྷི་ཀེ ཨེ་ཝཾ་མ་ཧཱ་ནུ་བྷཱ་ཝེ ཨུ་ཙྪེ་ཙྪཱ་མི, ཝ་ཛྫཱི ཝི་ནཱ་སེ་སྶཱ་མི, ཝ་ཛྫཱི ཨ་ན་ཡ་བྱ་ས་ནཾ ཨཱ་པཱ་དེ་སྶཱ་མཱི’’’ཏི.

ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ པི་ཊྛི་ཏོ ཋི་ཏོ ཧོ་ཏི བྷ་ག་ཝ་ནྟཾ བཱི་ཛ་ཡ་མཱ་ནོ [ཝཱི་ཛ་མཱ་ནོ (སཱི. སྱཱ.)]. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨཱ་ན་ནྡཾ ཨཱ་མ་ནྟེ་སི – ‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི ཨ་བྷི་ཎྷཾ ས་ནྣི་པཱ་ཏཱ ས་ནྣི་པཱ་ཏ་བ་ཧུ་ལཱ’’’ཏི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི ཨ་བྷི་ཎྷཾ ས་ནྣི་པཱ་ཏཱ ས་ནྣི་པཱ་ཏ་བ་ཧུ་ལཱ’’’ཏི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི ཨ་བྷི་ཎྷཾ ས་ནྣི་པཱ་ཏཱ བྷ་ཝི་སྶ་ནྟི ས་ནྣི་པཱ་ཏ་བ་ཧུ་ལཱ; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི ས་མ་གྒཱ ས་ནྣི་པ་ཏ་ནྟི, ས་མ་གྒཱ ཝུ་ཊྛ་ཧ་ནྟི, ས་མ་གྒཱ ཝ་ཛྫི་ཀ་ར་ཎཱི་ཡཱ་ནི ཀ་རོ་ནྟཱི’’’ཏི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི ས་མ་གྒཱ ས་ནྣི་པ་ཏ་ནྟི, ས་མ་གྒཱ ཝུ་ཊྛ་ཧ་ནྟི, ས་མ་གྒཱ ཝ་ཛྫི་ཀ་ར་ཎཱི་ཡཱ་ནི ཀ་རོ་ནྟཱི’’’ཏི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི ས་མ་གྒཱ ས་ནྣི་པ་ཏི་སྶ་ནྟི, ས་མ་གྒཱ ཝུ་ཊྛ་ཧི་སྶ་ནྟི, ས་མ་གྒཱ ཝ་ཛྫི་ཀ་ར་ཎཱི་ཡཱ་ནི ཀ་རི་སྶ་ནྟི; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི ཨ་པ་ཉྙ་ཏྟཾ ན པ་ཉྙཱ་པེ་ནྟི, པ་ཉྙ་ཏྟཾ ན ས་མུ་ཙྪི་ནྡ་ནྟི, ཡ་ཐཱ་པ་ཉྙ་ཏྟེ པོ་རཱ་ཎེ ཝ་ཛྫི་དྷ་མྨེ ས་མཱ་དཱ་ཡ ཝ་ཏྟ་ནྟཱི’’’ཏི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི ཨ་པ་ཉྙ་ཏྟཾ ན པ་ཉྙཱ་པེ་ནྟི, པ་ཉྙ་ཏྟཾ ན ས་མུ་ཙྪི་ནྡ་ནྟི, ཡ་ཐཱ་པ་ཉྙ་ཏྟེ པོ་རཱ་ཎེ ཝ་ཛྫི་དྷ་མྨེ ས་མཱ་དཱ་ཡ ཝ་ཏྟ་ནྟཱི’’’ཏི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི ཨ་པ་ཉྙ་ཏྟཾ ན པ་ཉྙཱ་པེ་སྶ་ནྟི, པ་ཉྙ་ཏྟཾ ན ས་མུ་ཙྪི་ནྡི་སྶ་ནྟི, ཡ་ཐཱ་པ་ཉྙ་ཏྟེ པོ་རཱ་ཎེ ཝ་ཛྫི་དྷ་མྨེ ས་མཱ་དཱ་ཡ ཝ་ཏྟི་སྶ་ནྟི; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི ཡེ ཏེ ཝ་ཛྫཱི་ནཾ ཝ་ཛྫི་མ་ཧ་ལླ་ཀཱ ཏེ ས་ཀྐ་རོ་ནྟི ག་རུཾ ཀ་རོ་ནྟི མཱ་ནེ་ནྟི པཱུ་ཛེ་ནྟི, ཏེ་ས་ཉྩ སོ་ཏ་བྦཾ མ་ཉྙ་ནྟཱི’’’ཏི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི ཡེ ཏེ ཝ་ཛྫཱི་ནཾ ཝ་ཛྫི་མ་ཧ་ལླ་ཀཱ ཏེ ས་ཀྐ་རོ་ནྟི ག་རུཾ ཀ་རོ་ནྟི མཱ་ནེ་ནྟི པཱུ་ཛེ་ནྟི, ཏེ་ས་ཉྩ སོ་ཏ་བྦཾ མ་ཉྙ་ནྟཱི’’’ཏི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི ཡེ ཏེ ཝ་ཛྫཱི་ནཾ ཝ་ཛྫི་མ་ཧ་ལླ་ཀཱ ཏེ ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟི, ཏེ་ས་ཉྩ སོ་ཏ་བྦཾ མ་ཉྙི་སྶ་ནྟི; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི ཡཱ ཏཱ ཀུ་ལི་ཏྠི་ཡོ ཀུ་ལ་ཀུ་མཱ་རི་ཡོ ཏཱ ན ཨོ་ཀ་སྶ པ་ས་ཡ྄ཧ ཝཱ་སེ་ནྟཱི’’’ཏི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི ཡཱ ཏཱ ཀུ་ལི་ཏྠི་ཡོ ཀུ་ལ་ཀུ་མཱ་རི་ཡོ ཏཱ ན ཨོ་ཀ་སྶ པ་ས་ཡ྄ཧ ཝཱ་སེ་ནྟཱི’’’ཏི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི ཡཱ ཏཱ ཀུ་ལི་ཏྠི་ཡོ ཀུ་ལ་ཀུ་མཱ་རི་ཡོ ཏཱ ན ཨོ་ཀ་སྶ པ་ས་ཡ྄ཧ ཝཱ་སེ་སྶ་ནྟི; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི ཡཱ་ནི ཏཱ་ནི ཝ་ཛྫཱི་ནཾ ཝ་ཛྫི་ཙེ་ཏི་ཡཱ་ནི ཨ་བྦྷ་ནྟ་རཱ་ནི ཙེ་ཝ བཱ་ཧི་རཱ་ནི ཙ ཏཱ་ནི ས་ཀྐ་རོ་ནྟི ག་རུཾ ཀ་རོ་ནྟི མཱ་ནེ་ནྟི པཱུ་ཛེ་ནྟི, ཏེ་ས་ཉྩ དི་ནྣ་པུ་བྦཾ ཀ་ཏ་པུ་བྦཾ དྷ་མྨི་ཀཾ བ་ལིཾ ནོ པ་རི་ཧཱ་པེ་ནྟཱི’’’ཏི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི ཡཱ་ནི ཏཱ་ནི ཝ་ཛྫཱི་ནཾ ཝ་ཛྫི་ཙེ་ཏི་ཡཱ་ནི ཨ་བྦྷ་ནྟ་རཱ་ནི ཙེ་ཝ བཱ་ཧི་རཱ་ནི ཙ ཏཱ་ནི ས་ཀྐ་རོ་ནྟི ག་རུཾ ཀ་རོ་ནྟི མཱ་ནེ་ནྟི པཱུ་ཛེ་ནྟི, ཏེ་ས་ཉྩ དི་ནྣ་པུ་བྦཾ ཀ་ཏ་པུ་བྦཾ དྷ་མྨི་ཀཾ བ་ལིཾ ནོ པ་རི་ཧཱ་པེ་ནྟཱི’’’ཏི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི ཡཱ་ནི ཏཱ་ནི ཝ་ཛྫཱི་ནཾ ཝ་ཛྫི་ཙེ་ཏི་ཡཱ་ནི ཨ་བྦྷ་ནྟ་རཱ་ནི ཙེ་ཝ བཱ་ཧི་རཱ་ནི ཙ ཏཱ་ནི ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟི, ཏེ་ས་ཉྩ དི་ནྣ་པུ་བྦཾ ཀ་ཏ་པུ་བྦཾ དྷ་མྨི་ཀཾ བ་ལིཾ ནོ པ་རི་ཧཱ་པེ་སྶ་ནྟི; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཀི་ནྟི ཏེ, ཨཱ་ན་ནྡ, སུ་ཏཾ – ‘ཝ་ཛྫཱི་ནཾ ཨ་ར་ཧ་ནྟེ་སུ དྷ་མྨི་ཀཱ ར་ཀྑཱ་ཝ་ར་ཎ་གུ་ཏྟི སུ་སཾ་ཝི་ཧི་ཏཱ – ཀི་ནྟི ཨ་ནཱ་ག་ཏཱ ཙ ཨ་ར་ཧ་ནྟོ ཝི་ཛི་ཏཾ ཨཱ་ག་ཙྪེ་ཡྻུཾ, ཨཱ་ག་ཏཱ ཙ ཨ་ར་ཧ་ནྟོ ཝི་ཛི་ཏེ ཕཱ་སུཾ ཝི་ཧ་རེ་ཡྻུ’’’ནྟི? ‘‘སུ་ཏཾ མེ་ཏཾ, བྷ་ནྟེ – ‘ཝ་ཛྫཱི་ནཾ ཨ་ར་ཧ་ནྟེ་སུ དྷ་མྨི་ཀཱ ར་ཀྑཱ་ཝ་ར་ཎ་གུ་ཏྟི སུ་སཾ་ཝི་ཧི་ཏཱ བྷ་ཝི་སྶ་ཏི – ཀི་ནྟི ཨ་ནཱ་ག་ཏཱ ཙ ཨ་ར་ཧ་ནྟོ ཝི་ཛི་ཏཾ ཨཱ་ག་ཙྪེ་ཡྻུཾ, ཨཱ་ག་ཏཱ ཙ ཨ་ར་ཧ་ནྟོ ཝི་ཛི་ཏེ ཕཱ་སུཾ ཝི་ཧ་རེ་ཡྻུ’’’ནྟི. ‘‘ཡཱ་ཝ་ཀཱི་ཝ་ཉྩ, ཨཱ་ན་ནྡ, ཝ་ཛྫཱི་ནཾ ཨ་ར་ཧ་ནྟེ་སུ དྷ་མྨི་ཀཱ ར་ཀྑཱ་ཝ་ར་ཎ་གུ་ཏྟི སུ་སཾ་ཝི་ཧི་ཏཱ བྷ་ཝི་སྶ་ཏི – ‘ཀི་ནྟི ཨ་ནཱ་ག་ཏཱ ཙ ཨ་ར་ཧ་ནྟོ ཝི་ཛི་ཏཾ ཨཱ་ག་ཙྪེ་ཡྻུཾ, ཨཱ་ག་ཏཱ ཙ ཨ་ར་ཧ་ནྟོ ཝི་ཛི་ཏེ ཕཱ་སུཾ ཝི་ཧ་རེ་ཡྻུ’ནྟི; ཝུ་དྡྷི་ཡེ་ཝ, ཨཱ་ན་ནྡ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི.

ཨ་ཐ ཁོ བྷ་ག་ཝཱ ཝ་སྶ་ཀཱ་རཾ བྲཱ་ཧྨ་ཎཾ མཱ་ག་དྷ་མ་ཧཱ་མ་ཏྟཾ ཨཱ་མ་ནྟེ་སི – ‘‘ཨེ་ཀ་མི་དཱ་ཧཾ, བྲཱ་ཧྨ་ཎ, ས་མ་ཡཾ ཝེ་སཱ་ལི་ཡཾ ཝི་ཧ་རཱ་མི སཱ་ར་ནྡ་དེ ཙེ་ཏི་ཡེ. ཏ་ཏྲཱ་ཧཾ, བྲཱ་ཧྨ་ཎ, ཝ་ཛྫཱི་ནཾ ཨི་མེ ས་ཏྟ ཨ་པ་རི་ཧཱ་ནི་ཡེ དྷ་མྨེ དེ་སེ་སིཾ. ཡཱ་ཝ་ཀཱི་ཝ་ཉྩ, བྲཱ་ཧྨ་ཎ, ཨི་མེ ས་ཏྟ ཨ་པ་རི་ཧཱ་ནི་ཡཱ དྷ་མྨཱ ཝ་ཛྫཱི་སུ ཋ་སྶ་ནྟི, ཨི་མེ་སུ ཙ ས་ཏྟ་སུ ཨ་པ་རི་ཧཱ་ནི་ཡེ་སུ དྷ་མྨེ་སུ ཝ་ཛྫཱི ས་ནྡི་སྶི་སྶ་ནྟི; ཝུ་དྡྷི་ཡེ་ཝ, བྲཱ་ཧྨ་ཎ, ཝ་ཛྫཱི་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི.

‘‘ཨེ་ཀ་མེ་ཀེ་ན་པི [ཨེ་ཀ་མེ་ཀེ་ན་པི ཏེ་ན ཁོ (ཀ.) དཱི. ནི. ༢.༡༣༥] བྷོ, གོ་ཏ་མ, ཨ་པ་རི་ཧཱ་ནི་ཡེ་ན དྷ་མྨེ་ན ས་མ་ནྣཱ་ག་ཏཱ་ནཾ ཝ་ཛྫཱི་ནཾ ཝུ་དྡྷི་ཡེ་ཝ པཱ་ཊི་ཀ་ངྑཱ, ནོ པ་རི་ཧཱ་ནི; ཀོ པ་ན ཝཱ་དོ ས་ཏྟ་ཧི ཨ་པ་རི་ཧཱ་ནི་ཡེ་ཧི དྷ་མྨེ་ཧི! ཨ་ཀ་ར་ཎཱི་ཡཱ ཙ, བྷོ གོ་ཏ་མ, ཝ་ཛྫཱི ར་ཉྙཱ མཱ་ག་དྷེ་ན ཨ་ཛཱ་ཏ་ས་ཏྟུ་ནཱ ཝེ་དེ་ཧི་པུ་ཏྟེ་ན ཡ་དི་དཾ ཡུ་དྡྷ་སྶ, ཨ་ཉྙ་ཏྲ ཨུ་པ་ལཱ་པ་ནཱ་ཡ [ཨུ་པ་ལཱ་པ་ནཱ (ཀ. སཱི. ཀ.)], ཨ་ཉྙ་ཏྲ མི་ཐུ་བྷེ་དཱ. ཧ་ནྡ ཙ དཱ་ནི མ་ཡཾ, བྷོ གོ་ཏ་མ, ག་ཙྪཱ་མ, བ་ཧུ་ཀི་ཙྩཱ མ་ཡཾ བ་ཧུ་ཀ་ར་ཎཱི་ཡཱ’’ཏི. ‘‘ཡ་སྶ་དཱ་ནི ཏྭཾ, བྲཱ་ཧྨ་ཎ, ཀཱ་ལཾ མ་ཉྙ་སཱི’’ཏི. ཨ་ཐ ཁོ ཝ་སྶ་ཀཱ་རོ བྲཱ་ཧྨ་ཎོ མཱ་ག་དྷ་མ་ཧཱ་མ་ཏྟོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མཱི་ཏི. དུ་ཏི་ཡཾ.

༣. པ་ཋ་མ་ས་ཏྟ་ཀ་སུ་ཏྟཾ

༢༣. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ས་ཏྟ ཝོ, བྷི་ཀྑ་ཝེ, ཨ་པ་རི་ཧཱ་ནི་ཡེ དྷ་མྨེ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –

‘‘ཀ་ཏ་མེ ཙ, བྷི་ཀྑ་ཝེ, ས་ཏྟ ཨ་པ་རི་ཧཱ་ནི་ཡཱ དྷ་མྨཱ? ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཨ་བྷི་ཎྷཾ ས་ནྣི་པཱ་ཏཱ བྷ་ཝི་སྶ་ནྟི ས་ནྣི་པཱ་ཏ་བ་ཧུ་ལཱ; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ས་མ་གྒཱ ས་ནྣི་པ་ཏི་སྶ་ནྟི, ས་མ་གྒཱ ཝུ་ཊྛ་ཧི་སྶ་ནྟི, ས་མ་གྒཱ ས་ངྒྷ་ཀ་ར་ཎཱི་ཡཱ་ནི ཀ་རི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཨ་པ་ཉྙ་ཏྟཾ ན པ་ཉྙཱ་པེ་སྶ་ནྟི, པ་ཉྙ་ཏྟཾ ན ས་མུ་ཙྪི་ནྡི་སྶ་ནྟི, ཡ་ཐཱ་པ་ཉྙ་ཏྟེ་སུ སི་ཀྑཱ་པ་དེ་སུ ས་མཱ་དཱ་ཡ ཝ་ཏྟི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཡེ ཏེ བྷི་ཀྑཱུ ཐེ་རཱ ར་ཏྟ་ཉྙཱུ ཙི་ར་པ་བྦ་ཛི་ཏཱ ས་ངྒྷ་པི་ཏ་རོ ས་ངྒྷ་པ་རི་ཎཱ་ཡ་ཀཱ ཏེ ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟི, ཏེ་ས་ཉྩ སོ་ཏ་བྦཾ མ་ཉྙི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཨུ་པྤ་ནྣཱ་ཡ ཏ་ཎྷཱ་ཡ པོ་ནོ་བྷ་ཝི་ཀཱ་ཡ ན ཝ་སཾ ག་ཙྪི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཨཱ་ར་ཉྙ་ཀེ་སུ སེ་ནཱ་ས་ནེ་སུ སཱ་པེ་ཀྑཱ བྷ་ཝི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ པ་ཙྩ་ཏྟ་ཉྙེ་ཝ ས་ཏིཾ ཨུ་པ་ཊྛཱ་པེ་སྶ་ནྟི – ‘ཀི་ནྟི ཨ་ནཱ་ག་ཏཱ ཙ པེ་ས་ལཱ ས་བྲ་ཧྨ་ཙཱ་རཱི ཨཱ་ག་ཙྪེ་ཡྻུཾ, ཨཱ་ག་ཏཱ ཙ པེ་ས་ལཱ ས་བྲ་ཧྨ་ཙཱ་རཱི ཕཱ་སུཾ ཝི་ཧ་རེ་ཡྻུ’ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, ཨི་མེ ས་ཏྟ ཨ་པ་རི་ཧཱ་ནི་ཡཱ དྷ་མྨཱ བྷི་ཀྑཱུ་སུ ཋ་སྶ་ནྟི, ཨི་མེ་སུ ཙ ས་ཏྟ་སུ ཨ་པ་རི་ཧཱ་ནི་ཡེ་སུ དྷ་མྨེ་སུ བྷི་ཀྑཱུ ས་ནྡི་སྶི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི. ཏ་ཏི་ཡཾ.

༤. དུ་ཏི་ཡ་ས་ཏྟ་ཀ་སུ་ཏྟཾ

༢༤. [དཱི. ནི. ༢.༡༣༨] ‘‘ས་ཏྟ ཝོ, བྷི་ཀྑ་ཝེ, ཨ་པ་རི་ཧཱ་ནི་ཡེ དྷ་མྨེ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ…པེ… ཀ་ཏ་མེ ཙ, བྷི་ཀྑ་ཝེ, ས་ཏྟ ཨ་པ་རི་ཧཱ་ནི་ཡཱ དྷ་མྨཱ?

ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ན ཀ་མྨཱ་རཱ་མཱ བྷ་ཝི་སྶ་ནྟི, ན ཀ་མྨ་ར་ཏཱ, ན ཀ་མྨཱ་རཱ་མ་ཏཾ ཨ་ནུ་ཡུ་ཏྟཱ; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ན བྷ་སྶཱ་རཱ་མཱ བྷ་ཝི་སྶ་ནྟི…པེ… ན ནི་དྡཱ་རཱ་མཱ བྷ་ཝི་སྶ་ནྟི… ན ས་ངྒ་ཎི་ཀཱ་རཱ་མཱ བྷ་ཝི་སྶ་ནྟི… ན པཱ་པི་ཙྪཱ བྷ་ཝི་སྶ་ནྟི ན པཱ་པི་ཀཱ་ནཾ ཨི་ཙྪཱ་ནཾ ཝ་སཾ ག་ཏཱ… ན པཱ་པ་མི་ཏྟཱ བྷ་ཝི་སྶ་ནྟི ན པཱ་པ་ས་ཧཱ་ཡཱ ན པཱ་པ་ས་མྤ་ཝ་ངྐཱ… ན ཨོ་ར་མ་ཏྟ་ཀེ་ན ཝི་སེ་སཱ་དྷི་ག་མེ་ན ཨ་ནྟ་རཱ་ཝོ་སཱ་ནཾ ཨཱ་པ་ཛྫི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

༥. ཏ་ཏི་ཡ་ས་ཏྟ་ཀ་སུ་ཏྟཾ

༢༥. ‘‘ས་ཏྟ ཝོ, བྷི་ཀྑ་ཝེ, ཨ་པ་རི་ཧཱ་ནི་ཡེ དྷ་མྨེ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ…པེ… ཀ་ཏ་མེ ཙ, བྷི་ཀྑ་ཝེ, ས་ཏྟ ཨ་པ་རི་ཧཱ་ནི་ཡཱ དྷ་མྨཱ? ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ས་དྡྷཱ བྷ་ཝི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཧི་རི་མ་ནྟོ [ཧི་རཱི་མཱ (སཱི.), ཧི་རི་མ་ནཱ (དཱི. ནི. ༢.༡༣༨)] བྷ་ཝི་སྶ་ནྟི…པེ… ཨོ་ཏྟ་པྤི་ནོ [ཨོ་ཏྟཱ་པཱི་ནོ (སཱི.)] བྷ་ཝི་སྶ་ནྟི… བ་ཧུ་སྶུ་ཏཱ བྷ་ཝི་སྶ་ནྟི… ཨཱ་ར་དྡྷ་ཝཱི་རི་ཡཱ བྷ་ཝི་སྶ་ནྟི… ས་ཏི་མ་ནྟོ བྷ་ཝི་སྶ་ནྟི… པ་ཉྙ་ཝ་ནྟོ བྷ་ཝི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི. ‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, ཨི་མེ ས་ཏྟ ཨ་པ་རི་ཧཱ་ནི་ཡཱ དྷ་མྨཱ བྷི་ཀྑཱུ་སུ ཋ་སྶ་ནྟི, ཨི་མེ་སུ ཙ ས་ཏྟ་སུ ཨ་པ་རི་ཧཱ་ནི་ཡེ་སུ དྷ་མྨེ་སུ བྷི་ཀྑཱུ ས་ནྡི་སྶི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི. པ་ཉྩ་མཾ.

༦. བོ་ཛ྄ཛྷ་ངྒ་སུ་ཏྟཾ

༢༦. ‘‘ས་ཏྟ ཝོ, བྷི་ཀྑ་ཝེ, ཨ་པ་རི་ཧཱ་ནི་ཡེ དྷ་མྨེ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ…པེ… ཀ་ཏ་མེ ཙ, བྷི་ཀྑ་ཝེ, ས་ཏྟ ཨ་པ་རི་ཧཱ་ནི་ཡཱ དྷ་མྨཱ? ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི…པེ… ཝཱི་རི་ཡ་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི… པཱི་ཏི་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི… པ་སྶ་དྡྷི་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི… ས་མཱ་དྷི་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི… ཨུ་པེ་ཀྑཱ་ས་མྦོ་ཛ྄ཛྷ་ངྒཾ བྷཱ་ཝེ་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི. ‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, ཨི་མེ ས་ཏྟ ཨ་པ་རི་ཧཱ་ནི་ཡཱ དྷ་མྨཱ བྷི་ཀྑཱུ་སུ ཋ་སྶ་ནྟི, ཨི་མེ་སུ ཙ ས་ཏྟ་སུ ཨ་པ་རི་ཧཱ་ནི་ཡེ་སུ དྷ་མྨེ་སུ བྷི་ཀྑཱུ ས་ནྡི་སྶི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི. ཚ་ཊྛཾ.

༧. ས་ཉྙཱ་སུ་ཏྟཾ

༢༧. ‘‘ས་ཏྟ ཝོ, བྷི་ཀྑ་ཝེ, ཨ་པ་རི་ཧཱ་ནི་ཡེ དྷ་མྨེ དེ་སེ་སྶཱ་མི. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ…པེ…. ཀ་ཏ་མེ ཙ, བྷི་ཀྑ་ཝེ, ས་ཏྟ ཨ་པ་རི་ཧཱ་ནི་ཡཱ དྷ་མྨཱ? ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཨ་ནི་ཙྩ་ས་ཉྙཾ བྷཱ་ཝེ་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི.

‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, བྷི་ཀྑཱུ ཨ་ན་ཏྟ་ས་ཉྙཾ བྷཱ་ཝེ་སྶ་ནྟི…པེ… ཨ་སུ་བྷ་ས་ཉྙཾ བྷཱ་ཝེ་སྶ་ནྟི… ཨཱ་དཱི་ན་ཝ་ས་ཉྙཾ བྷཱ་ཝེ་སྶ་ནྟི… པ་ཧཱ་ན་ས་ཉྙཾ བྷཱ་ཝེ་སྶ་ནྟི… ཝི་རཱ་ག་ས་ཉྙཾ བྷཱ་ཝེ་སྶ་ནྟི… ནི་རོ་དྷ་ས་ཉྙཾ བྷཱ་ཝེ་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནི. ‘‘ཡཱ་ཝ་ཀཱི་ཝ་ཉྩ, བྷི་ཀྑ་ཝེ, ཨི་མེ ས་ཏྟ ཨ་པ་རི་ཧཱ་ནི་ཡཱ དྷ་མྨཱ བྷི་ཀྑཱུ་སུ ཋ་སྶ་ནྟི, ཨི་མེ་སུ ཙ ས་ཏྟ་སུ ཨ་པ་རི་ཧཱ་ནི་ཡེ་སུ དྷ་མྨེ་སུ, བྷི་ཀྑཱུ ས་ནྡི་སྶི་སྶ་ནྟི; ཝུ་དྡྷི་ཡེ་ཝ, བྷི་ཀྑ་ཝེ, བྷི་ཀྑཱུ་ནཾ པཱ་ཊི་ཀ་ངྑཱ, ནོ པ་རི་ཧཱ་ནཱི’’ཏི [དཱི. ནི. ༢.༡༣༨]. ས་ཏྟ་མཾ.

༨. པ་ཋ་མ་པ་རི་ཧཱ་ནི་སུ་ཏྟཾ

༢༨. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘ས་ཏྟི་མེ, བྷི་ཀྑ་ཝེ, དྷ་མྨཱ སེ་ཁ་སྶ བྷི་ཀྑུ་ནོ པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? ཀ་མྨཱ་རཱ་མ་ཏཱ, བྷ་སྶཱ་རཱ་མ་ཏཱ, ནི་དྡཱ་རཱ་མ་ཏཱ, ས་ངྒ་ཎི་ཀཱ་རཱ་མ་ཏཱ, ཨི་ནྡྲི་ཡེ་སུ ཨ་གུ་ཏྟ་དྭཱ་ར་ཏཱ, བྷོ་ཛ་ནེ ཨ་མ་ཏྟ་ཉྙུ་ཏཱ, ས་ནྟི ཁོ པ་ན ས་ངྒྷེ ས་ངྒྷ་ཀ་ར་ཎཱི་ཡཱ་ནི; ཏ་ཏྲ སེ་ཁོ བྷི་ཀྑུ [ཏ་ཏྲ བྷི་ཀྑུ (སཱི. སྱཱ.)] ཨི་ཏི པ་ཊི་ས་ཉྩི་ཀྑ་ཏི – ‘ས་ནྟི ཁོ པ་ན ས་ངྒྷེ ཐེ་རཱ [ཁོ སཾ་གྷ་ཏྠེ་རཱ (ཀ.)] ར་ཏྟ་ཉྙཱུ ཙི་ར་པ་བྦ་ཛི་ཏཱ བྷཱ་ར་ཝཱ་ཧི་ནོ, ཏེ [ན ཏེ (ཀ.)] ཏེ་ན པ་ཉྙཱ་ཡི་སྶ་ནྟཱི’ཏི ཨ་ཏྟ་ནཱ ཏེ་སུ ཡོ་གཾ [ཨ་ཏྟ་ནཱ ཝོ་ཡོ་གཾ (སཱི. སྱཱ.)] ཨཱ་པ་ཛྫ་ཏི. ཨི་མེ ཁོ, བྷི་ཀྑ་ཝེ, ས་ཏྟ དྷ་མྨཱ སེ་ཁ་སྶ བྷི་ཀྑུ་ནོ པ་རི་ཧཱ་ནཱ་ཡ སཾ་ཝ་ཏྟ་ནྟི.

‘‘ས་ཏྟི་མེ, བྷི་ཀྑ་ཝེ, དྷ་མྨཱ སེ་ཁ་སྶ བྷི་ཀྑུ་ནོ ཨ་པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? ན ཀ་མྨཱ་རཱ་མ་ཏཱ, ན བྷ་སྶཱ་རཱ་མ་ཏཱ, ན ནི་དྡཱ་རཱ་མ་ཏཱ, ན ས་ངྒ་ཎི་ཀཱ་རཱ་མ་ཏཱ, ཨི་ནྡྲི་ཡེ་སུ གུ་ཏྟ་དྭཱ་ར་ཏཱ, བྷོ་ཛ་ནེ མ་ཏྟ་ཉྙུ་ཏཱ, ས་ནྟི ཁོ པ་ན ས་ངྒྷེ ས་ངྒྷ་ཀ་ར་ཎཱི་ཡཱ་ནི; ཏ་ཏྲ སེ་ཁོ བྷི་ཀྑུ ཨི་ཏི པ་ཊི་ས་ཉྩི་ཀྑ་ཏི – ‘ས་ནྟི ཁོ པ་ན ས་ངྒྷེ ཐེ་རཱ ར་ཏྟ་ཉྙཱུ ཙི་ར་པ་བྦ་ཛི་ཏཱ བྷཱ་ར་ཝཱ་ཧི་ནོ, ཏེ ཏེ་ན པ་ཉྙཱ་ཡི་སྶ་ནྟཱི’ཏི ཨ་ཏྟ་ནཱ ན ཏེ་སུ ཡོ་གཾ ཨཱ་པ་ཛྫ་ཏི. ཨི་མེ ཁོ, བྷི་ཀྑ་ཝེ, ས་ཏྟ དྷ་མྨཱ སེ་ཁ་སྶ བྷི་ཀྑུ་ནོ ཨ་པ་རི་ཧཱ་ནཱ་ཡ སཾ་ཝ་ཏྟ་ནྟཱི’’ཏི. ཨ་ཊྛ་མཾ.

༩. དུ་ཏི་ཡ་པ་རི་ཧཱ་ནི་སུ་ཏྟཾ

༢༩. ‘‘ས་ཏྟི་མེ, བྷི་ཀྑ་ཝེ, དྷ་མྨཱ ཨུ་པཱ་ས་ཀ་སྶ པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? བྷི་ཀྑུ་ད་སྶ་ནཾ ཧཱ་པེ་ཏི, ས་དྡྷ་མྨ་སྶ་ཝ་ནཾ པ་མ་ཛྫ་ཏི, ཨ་དྷི་སཱི་ལེ ན སི་ཀྑ་ཏི, ཨ་པྤ་སཱ་ད་བ་ཧུ་ལོ ཧོ་ཏི, བྷི་ཀྑཱུ་སུ ཐེ་རེ་སུ ཙེ་ཝ ན་ཝེ་སུ ཙ མ་ཛ྄ཛྷི་མེ་སུ ཙ ཨུ་པཱ་ར་མྦྷ་ཙི་ཏྟོ དྷ་མྨཾ སུ་ཎཱ་ཏི ར་ནྡྷ་ག་ཝེ་སཱི, ཨི་ཏོ བ་ཧི་དྡྷཱ ད་ཀྑི་ཎེ་ཡྻཾ ག་ཝེ་ས་ཏི, ཏ་ཏྠ ཙ པུ་བྦ་ཀཱ་རཾ ཀ་རོ་ཏི. ཨི་མེ ཁོ, བྷི་ཀྑ་ཝེ, ས་ཏྟ དྷ་མྨཱ ཨུ་པཱ་ས་ཀ་སྶ པ་རི་ཧཱ་ནཱ་ཡ སཾ་ཝ་ཏྟ་ནྟི.

‘‘ས་ཏྟི་མེ, བྷི་ཀྑ་ཝེ, དྷ་མྨཱ ཨུ་པཱ་ས་ཀ་སྶ ཨ་པ་རི་ཧཱ་ནཱ་ཡ སཾ་ཝ་ཏྟ་ནྟི. ཀ་ཏ་མེ ས་ཏྟ? བྷི་ཀྑུ་ད་སྶ་ནཾ ན ཧཱ་པེ་ཏི, ས་དྡྷ་མྨ་སྶ་ཝ་ནཾ ན་པྤ་མ་ཛྫ་ཏི, ཨ་དྷི་སཱི་ལེ སི་ཀྑ་ཏི, པ་སཱ་ད་བ་ཧུ་ལོ ཧོ་ཏི, བྷི་ཀྑཱུ་སུ ཐེ་རེ་སུ ཙེ་ཝ ན་ཝེ་སུ ཙ མ་ཛ྄ཛྷི་མེ་སུ ཙ ཨ་ནུ་པཱ་ར་མྦྷ་ཙི་ཏྟོ དྷ་མྨཾ སུ་ཎཱ་ཏི ན ར་ནྡྷ་ག་ཝེ་སཱི, ན ཨི་ཏོ བ་ཧི་དྡྷཱ ད་ཀྑི་ཎེ་ཡྻཾ ག་ཝེ་ས་ཏི, ཨི་དྷ ཙ པུ་བྦ་ཀཱ་རཾ ཀ་རོ་ཏི. ཨི་མེ ཁོ, བྷི་ཀྑ་ཝེ, ས་ཏྟ དྷ་མྨཱ ཨུ་པཱ་ས་ཀ་སྶ ཨ་པ་རི་ཧཱ་ནཱ་ཡ སཾ་ཝ་ཏྟ་ནྟཱི’’ཏི. ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ་ན སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –

‘‘ད་སྶ་ནཾ བྷཱ་ཝི་ཏ་ཏྟཱ་ནཾ, ཡོ ཧཱ་པེ་ཏི ཨུ་པཱ་ས་ཀོ;

ས་ཝ་ན་ཉྩ ཨ་རི་ཡ་དྷ་མྨཱ་ནཾ, ཨ་དྷི་སཱི་ལེ ན སི་ཀྑ་ཏི.

‘‘ཨ་པྤ་སཱ་དོ ཙ བྷི་ཀྑཱུ་སུ, བྷི་ཡྻོ བྷི་ཡྻོ པ་ཝ་ཌྜྷ་ཏི;

ཨུ་པཱ་ར་མྦྷ་ཀ་ཙི་ཏྟོ ཙ, ས་དྡྷ་མྨཾ སོ་ཏུ་མི་ཙྪ་ཏི.

‘‘ཨི་ཏོ ཙ བ་ཧི་དྡྷཱ ཨ་ཉྙཾ, ད་ཀྑི་ཎེ་ཡྻཾ ག་ཝེ་ས་ཏི;

ཏ་ཏྠེ་ཝ ཙ པུ་བྦ་ཀཱ་རཾ, ཡོ ཀ་རོ་ཏི ཨུ་པཱ་ས་ཀོ.

‘‘ཨེ་ཏེ ཁོ པ་རི་ཧཱ་ནི་ཡེ, ས་ཏྟ དྷ་མྨེ སུ་དེ་སི་ཏེ;

ཨུ་པཱ་ས་ཀོ སེ་ཝ་མཱ་ནོ, ས་དྡྷ་མྨཱ པ་རི་ཧཱ་ཡ་ཏི.

‘‘ད་སྶ་ནཾ བྷཱ་ཝི་ཏ་ཏྟཱ་ནཾ, ཡོ ན ཧཱ་པེ་ཏི ཨུ་པཱ་ས་ཀོ;

ས་ཝ་ན་ཉྩ ཨ་རི་ཡ་དྷ་མྨཱ་ནཾ, ཨ་དྷི་སཱི་ལེ ཙ སི་ཀྑ་ཏི.

‘‘པ་སཱ་དོ ཙ་སྶ བྷི་ཀྑཱུ་སུ, བྷི་ཡྻོ བྷི་ཡྻོ པ་ཝ་ཌྜྷ་ཏི;

ཨ་ནུ་པཱ་ར་མྦྷ་ཙི་ཏྟོ ཙ, ས་དྡྷ་མྨཾ སོ་ཏུ་མི་ཙྪ་ཏི.

‘‘ན ཨི་ཏོ བ་ཧི་དྡྷཱ ཨ་ཉྙཾ, ད་ཀྑི་ཎེ་ཡྻཾ ག་ཝེ་ས་ཏི;

ཨི་དྷེ་ཝ ཙ པུ་བྦ་ཀཱ་རཾ, ཡོ ཀ་རོ་ཏི ཨུ་པཱ་ས་ཀོ.

‘‘ཨེ་ཏེ ཁོ ཨ་པ་རི་ཧཱ་ནི་ཡེ, ས་ཏྟ དྷ་མྨེ སུ་དེ་སི་ཏེ;

ཨུ་པཱ་ས་ཀོ སེ་ཝ་མཱ་ནོ, ས་དྡྷ་མྨཱ ན པ་རི་ཧཱ་ཡ་ཏཱི’’ཏི. ན་ཝ་མཾ;

༡༠. ཝི་པ་ཏྟི་སུ་ཏྟཾ

༣༠. ས་ཏྟི་མཱ, བྷི་ཀྑ་ཝེ, ཨུ་པཱ་ས་ཀ་སྶ ཝི་པ་ཏྟི་ཡོ…པེ… ས་ཏྟི་མཱ, བྷི་ཀྑ་ཝེ, ཨུ་པཱ་ས་ཀ་སྶ ས་མྤ་དཱ…པེ…. ད་ས་མཾ.

༡༡. པ་རཱ་བྷ་ཝ་སུ་ཏྟཾ

༣༡. ‘‘ས་ཏྟི་མེ, བྷི་ཀྑ་ཝེ, ཨུ་པཱ་ས་ཀ་སྶ པ་རཱ་བྷ་ཝཱ…པེ… ས་ཏྟི་མེ, བྷི་ཀྑ་ཝེ, ཨུ་པཱ་ས་ཀ་སྶ ས་མྦྷ་ཝཱ. ཀ་ཏ་མེ ས་ཏྟ? བྷི་ཀྑུ་ད་སྶ་ནཾ ན ཧཱ་པེ་ཏི, ས་དྡྷ་མྨ་སྶ་ཝ་ནཾ ན་པྤ་མ་ཛྫ་ཏི, ཨ་དྷི་སཱི་ལེ སི་ཀྑ་ཏི, པ་སཱ་ད་བ་ཧུ་ལོ ཧོ་ཏི, བྷི་ཀྑཱུ་སུ ཐེ་རེ་སུ ཙེ་ཝ ན་ཝེ་སུ ཙ མ་ཛ྄ཛྷི་མེ་སུ ཙ ཨ་ནུ་པཱ་ར་མྦྷ་ཙི་ཏྟོ དྷ་མྨཾ སུ་ཎཱ་ཏི ན ར་ནྡྷ་ག་ཝེ་སཱི, ན ཨི་ཏོ བ་ཧི་དྡྷཱ ད་ཀྑི་ཎེ་ཡྻཾ ག་ཝེ་ས་ཏི, ཨི་དྷ ཙ པུ་བྦ་ཀཱ་རཾ ཀ་རོ་ཏི. ཨི་མེ ཁོ, བྷི་ཀྑ་ཝེ, ས་ཏྟ ཨུ་པཱ་ས་ཀ་སྶ ས་མྦྷ་ཝཱ་ཏི.