༢. ཨ་ནུ་ས་ཡ་ཝ་གྒོ

༡. པ་ཋ་མ་ཨ་ནུ་ས་ཡ་སུ་ཏྟཾ

༡༡. ‘‘ས་ཏྟི་མེ, བྷི་ཀྑ་ཝེ, ཨ་ནུ་ས་ཡཱ. ཀ་ཏ་མེ ས་ཏྟ? ཀཱ་མ་རཱ་གཱ་ནུ་ས་ཡོ, པ་ཊི་གྷཱ་ནུ་ས་ཡོ, དི་ཊྛཱ་ནུ་ས་ཡོ, ཝི་ཙི་ཀི་ཙྪཱ་ནུ་ས་ཡོ, མཱ་ནཱ་ནུ་ས་ཡོ, བྷ་ཝ་རཱ་གཱ་ནུ་ས་ཡོ, ཨ་ཝི་ཛྫཱ་ནུ་ས་ཡོ. ཨི་མེ ཁོ, བྷི་ཀྑ་ཝེ, ས་ཏྟ ཨ་ནུ་ས་ཡཱ’’ཏི. པ་ཋ་མཾ.

༢. དུ་ཏི་ཡ་ཨ་ནུ་ས་ཡ་སུ་ཏྟཾ

༡༢. ‘‘ས་ཏྟ་ནྣཾ, བྷི་ཀྑ་ཝེ, ཨ་ནུ་ས་ཡཱ་ནཾ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི. ཀ་ཏ་མེ་སཾ ས་ཏྟ་ནྣཾ? ཀཱ་མ་རཱ་གཱ་ནུ་ས་ཡ་སྶ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི, པ་ཊི་གྷཱ་ནུ་ས་ཡ་སྶ…པེ… དི་ཊྛཱ་ནུ་ས་ཡ་སྶ… ཝི་ཙི་ཀི་ཙྪཱ་ནུ་ས་ཡ་སྶ… མཱ་ནཱ་ནུ་ས་ཡ་སྶ… བྷ་ཝ་རཱ་གཱ་ནུ་ས་ཡ་སྶ… ཨ་ཝི་ཛྫཱ་ནུ་ས་ཡ་སྶ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི. ཨི་མེ་སཾ ཁོ, བྷི་ཀྑ་ཝེ, ས་ཏྟ་ནྣཾ ཨ་ནུ་ས་ཡཱ་ནཾ པ་ཧཱ་ནཱ་ཡ ས་མུ་ཙྪེ་དཱ་ཡ བྲ་ཧྨ་ཙ་རི་ཡཾ ཝུ་སྶ་ཏི.

‘‘ཡ་ཏོ ཙ ཁོ, བྷི་ཀྑ་ཝེ, བྷི་ཀྑུ་ནོ ཀཱ་མ་རཱ་གཱ་ནུ་ས་ཡོ པ་ཧཱི་ནོ ཧོ་ཏི ཨུ་ཙྪི་ནྣ་མཱུ་ལོ ཏཱ་ལཱ་ཝ་ཏྠུ་ཀ་ཏོ ཨ་ན་བྷཱ་ཝཾ་ཀ་ཏོ ཨཱ་ཡ་ཏིཾ ཨ་ནུ་པྤཱ་ད་དྷ་མྨོ. པ་ཊི་གྷཱ་ནུ་ས་ཡོ…པེ… དི་ཊྛཱ་ནུ་ས་ཡོ… ཝི་ཙི་ཀི་ཙྪཱ་ནུ་ས་ཡོ… མཱ་ནཱ་ནུ་ས་ཡོ… བྷ་ཝ་རཱ་གཱ་ནུ་ས་ཡོ… ཨ་ཝི་ཛྫཱ་ནུ་ས་ཡོ པ་ཧཱི་ནོ ཧོ་ཏི ཨུ་ཙྪི་ནྣ་མཱུ་ལོ ཏཱ་ལཱ་ཝ་ཏྠུ་ཀ་ཏོ ཨ་ན་བྷཱ་ཝཾ་ཀ་ཏོ ཨཱ་ཡ་ཏིཾ ཨ་ནུ་པྤཱ་ད་དྷ་མྨོ. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ཨ་ཙྪེ་ཙྪི ཏ་ཎྷཾ, ཝི་ཝ་ཏྟ་ཡི སཾ་ཡོ་ཛ་ནཾ, ས་མྨཱ མཱ་ནཱ་བྷི་ས་མ་ཡཱ ཨ་ནྟ་མ་ཀཱ་སི དུ་ཀྑ་སྶཱ’’ཏི. དུ་ཏི་ཡཾ.

༣. ཀུ་ལ་སུ་ཏྟཾ

༡༣. ‘‘ས་ཏྟ་ཧི, བྷི་ཀྑ་ཝེ, ཨ་ངྒེ་ཧི ས་མ་ནྣཱ་ག་ཏཾ ཀུ་ལཾ ཨ་ནུ་པ་ག་ནྟྭཱ ཝཱ ནཱ་ལཾ ཨུ་པ་ག་ནྟུཾ, ཨུ་པ་ག་ནྟྭཱ ཝཱ ནཱ་ལཾ ཨུ་པ་ནི་སཱི་དི་ཏུཾ. ཀ་ཏ་མེ་ཧི ས་ཏྟ་ཧི? ན མ་ནཱ་པེ་ན པ་ཙྩུ་ཊྛེ་ནྟི, ན མ་ནཱ་པེ་ན ཨ་བྷི་ཝཱ་དེ་ནྟི, ན མ་ནཱ་པེ་ན ཨཱ་ས་ནཾ དེ་ནྟི, ས་ནྟ་མ་སྶ པ་རི་གུ་ཧ་ནྟི, བ་ཧུ་ཀ་མྤི ཐོ་ཀཾ དེ་ནྟི, པ་ཎཱི་ཏ་མྤི ལཱུ་ཁཾ དེ་ནྟི, ཨ་ས་ཀྐ་ཙྩཾ དེ་ནྟི ནོ ས་ཀྐ་ཙྩཾ. ཨི་མེ་ཧི ཁོ, བྷི་ཀྑ་ཝེ, ས་ཏྟ་ཧི ཨ་ངྒེ་ཧི ས་མ་ནྣཱ་ག་ཏཾ ཀུ་ལཾ ཨ་ནུ་པ་ག་ནྟྭཱ ཝཱ ནཱ་ལཾ ཨུ་པ་ག་ནྟུཾ, ཨུ་པ་ག་ནྟྭཱ ཝཱ ནཱ་ལཾ ཨུ་པ་ནི་སཱི་དི་ཏུཾ.

‘‘ས་ཏྟ་ཧི, བྷི་ཀྑ་ཝེ, ཨ་ངྒེ་ཧི ས་མ་ནྣཱ་ག་ཏཾ ཀུ་ལཾ ཨ་ནུ་པ་ག་ནྟྭཱ ཝཱ ཨ་ལཾ ཨུ་པ་ག་ནྟུཾ, ཨུ་པ་ག་ནྟྭཱ ཝཱ ཨ་ལཾ ཨུ་པ་ནི་སཱི་དི་ཏུཾ. ཀ་ཏ་མེ་ཧི ས་ཏྟ་ཧི? མ་ནཱ་པེ་ན པ་ཙྩུ་ཊྛེ་ནྟི, མ་ནཱ་པེ་ན ཨ་བྷི་ཝཱ་དེ་ནྟི, མ་ནཱ་པེ་ན ཨཱ་ས་ནཾ དེ་ནྟི, ས་ནྟ་མ་སྶ ན པ་རི་གུ་ཧ་ནྟི, བ་ཧུ་ཀ་མྤི བ་ཧུ་ཀཾ དེ་ནྟི, པ་ཎཱི་ཏ་མྤི པ་ཎཱི་ཏཾ དེ་ནྟི, ས་ཀྐ་ཙྩཾ དེ་ནྟི ནོ ཨ་ས་ཀྐ་ཙྩཾ. ཨི་མེ་ཧི ཁོ, བྷི་ཀྑ་ཝེ, ས་ཏྟ་ཧི ཨ་ངྒེ་ཧི ས་མ་ནྣཱ་ག་ཏཾ ཀུ་ལཾ ཨ་ནུ་པ་ག་ནྟྭཱ ཝཱ ཨ་ལཾ ཨུ་པ་ག་ནྟུཾ, ཨུ་པ་ག་ནྟྭཱ ཝཱ ཨ་ལཾ ཨུ་པ་ནི་སཱི་དི་ཏུ’’ནྟི. ཏ་ཏི་ཡཾ.

༤. པུ་གྒ་ལ་སུ་ཏྟཾ

༡༤. ‘‘ས་ཏྟི་མེ, བྷི་ཀྑ་ཝེ, པུ་གྒ་ལཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཀ་ཏ་མེ ས་ཏྟ? ཨུ་བྷ་ཏོ་བྷཱ་ག་ཝི་མུ་ཏྟོ, པ་ཉྙཱ་ཝི་མུ་ཏྟོ, ཀཱ་ཡ་ས་ཀྑཱི, དི་ཊྛི་པྤ་ཏྟོ [དི་ཊྛ་པྤ་ཏྟོ (ཀ.)], ས་དྡྷཱ་ཝི་མུ་ཏྟོ, དྷ་མྨཱ་ནུ་སཱ་རཱི, ས་དྡྷཱ་ནུ་སཱ་རཱི. ཨི་མེ ཁོ, བྷི་ཀྑ་ཝེ, ས་ཏྟ པུ་གྒ་ལཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’’ཏི. ཙ་ཏུ་ཏྠཾ.

༥. ཨུ་ད་ཀཱུ་པ་མཱ་སུ་ཏྟཾ

༡༥. ‘‘ས་ཏྟི་མེ, བྷི་ཀྑ་ཝེ, ཨུ་ད་ཀཱུ་པ་མཱ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ས་ཏྟ? [པུ. པ. ༢༠༣; ཀ་ཐཱ. ༨༥༢] ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ས་ཀིཾ ནི་མུ་གྒོ ནི་མུ་གྒོ་ཝ ཧོ་ཏི; ཨི་དྷ པ་ན, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫི་ཏྭཱ ནི་མུ་ཛྫ་ཏི; ཨི་དྷ པ་ན, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫི་ཏྭཱ ཋི་ཏོ ཧོ་ཏི; ཨི་དྷ པ་ན, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫི་ཏྭཱ ཝི་པ་སྶ་ཏི ཝི་ལོ་ཀེ་ཏི; ཨི་དྷ པ་ན, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫི་ཏྭཱ པ་ཏ་ར་ཏི; ཨི་དྷ པ་ན, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫི་ཏྭཱ པ་ཏི་གཱ་དྷ་པྤ་ཏྟོ ཧོ་ཏི; ཨི་དྷ པ་ན, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫི་ཏྭཱ ཏི་ཎྞོ ཧོ་ཏི པཱ་ར་ངྒ་ཏོ [པཱ་ར་ག་ཏོ (སཱི. སྱཱ. ཀཾ.)] ཐ་ལེ ཏི་ཊྛ་ཏི བྲཱ་ཧྨ་ཎོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ས་ཀིཾ ནི་མུ་གྒོ ནི་མུ་གྒོ་ཝ ཧོ་ཏི? ཨི་དྷ བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ས་མ་ནྣཱ་ག་ཏོ ཧོ་ཏི ཨེ་ཀ་ནྟ་ཀཱ་ལ༹་ཀེ་ཧི ཨ་ཀུ་ས་ལེ་ཧི དྷ་མྨེ་ཧི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ས་ཀིཾ ནི་མུ་གྒོ ནི་མུ་གྒོ་ཝ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ནི་མུ་ཛྫ་ཏི? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫ་ཏི སཱ་དྷུ ས་དྡྷཱ ཀུ་ས་ལེ་སུ དྷ་མྨེ་སུ, སཱ་དྷུ ཧི་རཱི…པེ… སཱ་དྷུ ཨོ་ཏྟ་པྤཾ… སཱ་དྷུ ཝཱི་རི་ཡཾ [ཝི་རི་ཡཾ (སཱི. སྱཱ. ཀཾ. པཱི.)] … སཱ་དྷུ པ་ཉྙཱ ཀུ་ས་ལེ་སུ དྷ་མྨེ་སཱུ་ཏི. ཏ་སྶ སཱ ས་དྡྷཱ ནེ་ཝ ཏི་ཊྛ་ཏི ནོ ཝ་ཌྜྷ་ཏི ཧཱ་ཡ་ཏི་ཡེ་ཝ, ཏ་སྶ སཱ ཧི་རཱི…པེ… ཏ་སྶ ཏཾ ཨོ་ཏྟ་པྤཾ… ཏ་སྶ ཏཾ ཝཱི་རི་ཡཾ… ཏ་སྶ སཱ པ་ཉྙཱ ནེ་ཝ ཏི་ཊྛ་ཏི ནོ ཝ་ཌྜྷ་ཏི ཧཱ་ཡ་ཏི་ཡེ་ཝ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ནི་མུ་ཛྫ་ཏི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ཋི་ཏོ ཧོ་ཏི? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫ་ཏི སཱ་དྷུ ས་དྡྷཱ ཀུ་ས་ལེ་སུ དྷ་མྨེ་སུ, སཱ་དྷུ ཧི་རཱི…པེ… སཱ་དྷུ ཨོ་ཏྟ་པྤཾ… སཱ་དྷུ ཝཱི་རི་ཡཾ… སཱ་དྷུ པ་ཉྙཱ ཀུ་ས་ལེ་སུ དྷ་མྨེ་སཱུ་ཏི. ཏ་སྶ སཱ ས་དྡྷཱ ནེ་ཝ ཧཱ་ཡ་ཏི ནོ ཝ་ཌྜྷ་ཏི ཋི་ཏཱ ཧོ་ཏི. ཏ་སྶ སཱ ཧི་རཱི…པེ… ཏ་སྶ ཏཾ ཨོ་ཏྟ་པྤཾ… ཏ་སྶ ཏཾ ཝཱི་རི་ཡཾ… ཏ་སྶ སཱ པ་ཉྙཱ ནེ་ཝ ཧཱ་ཡ་ཏི ནོ ཝ་ཌྜྷ་ཏི ཋི་ཏཱ ཧོ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ཋི་ཏོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ཝི་པ་སྶ་ཏི ཝི་ལོ་ཀེ་ཏི? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫ་ཏི སཱ་དྷུ ས་དྡྷཱ ཀུ་ས་ལེ་སུ དྷ་མྨེ་སུ, སཱ་དྷུ ཧི་རཱི…པེ… སཱ་དྷུ ཨོ་ཏྟ་པྤཾ… སཱ་དྷུ ཝཱི་རི་ཡཾ… སཱ་དྷུ པ་ཉྙཱ ཀུ་ས་ལེ་སུ དྷ་མྨེ་སཱུ་ཏི. སོ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ སོ་ཏཱ་པ་ནྣོ ཧོ་ཏི ཨ་ཝི་ནི་པཱ་ཏ་དྷ་མྨོ ནི་ཡ་ཏོ ས་མྦོ་དྷི་པ་རཱ་ཡ་ཎོ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ཝི་པ་སྶ་ཏི ཝི་ལོ་ཀེ་ཏི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ པ་ཏ་ར་ཏི? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫ་ཏི སཱ་དྷུ ས་དྡྷཱ ཀུ་ས་ལེ་སུ དྷ་མྨེ་སུ, སཱ་དྷུ ཧི་རཱི…པེ… སཱ་དྷུ ཨོ་ཏྟ་པྤཾ… སཱ་དྷུ ཝཱི་རི་ཡཾ… སཱ་དྷུ པ་ཉྙཱ ཀུ་ས་ལེ་སུ དྷ་མྨེ་སཱུ་ཏི. སོ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ རཱ་ག་དོ་ས་མོ་ཧཱ་ནཾ ཏ་ནུ་ཏྟཱ ས་ཀ་དཱ་གཱ་མཱི ཧོ་ཏི, ས་ཀི་དེ་ཝ [ས་ཀིཾ་དེ་ཝ (ཀ.)] ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རོ་ཏི [དུ་ཀྑ་སྶ་ནྟ་ཀ་རོ ཧོ་ཏི (ཀ.)]. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ པ་ཏ་ར་ཏི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ པ་ཏི་གཱ་དྷ་པྤ་ཏྟོ ཧོ་ཏི? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫ་ཏི སཱ་དྷུ ས་དྡྷཱ ཀུ་ས་ལེ་སུ དྷ་མྨེ་སུ, སཱ་དྷུ ཧི་རཱི…པེ… སཱ་དྷུ ཨོ་ཏྟ་པྤཾ… སཱ་དྷུ ཝཱི་རི་ཡཾ… སཱ་དྷུ པ་ཉྙཱ ཀུ་ས་ལེ་སུ དྷ་མྨེ་སཱུ་ཏི. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨོ་པ་པཱ་ཏི་ཀོ ཧོ་ཏི ཏ་ཏྠ པ་རི་ནི་བྦཱ་ཡཱི ཨ་ནཱ་ཝ་ཏྟི་དྷ་མྨོ ཏ་སྨཱ ལོ་ཀཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ པ་ཏི་གཱ་དྷ་པྤ་ཏྟོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ཏི་ཎྞོ ཧོ་ཏི པཱ་ར་ངྒ་ཏོ ཐ་ལེ ཏི་ཊྛ་ཏི བྲཱ་ཧྨ་ཎོ. ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨུ་མྨུ་ཛྫ་ཏི སཱ་དྷུ ས་དྡྷཱ ཀུ་ས་ལེ་སུ དྷ་མྨེ་སུ, སཱ་དྷུ ཧི་རཱི…པེ… སཱ་དྷུ ཨོ་ཏྟ་པྤཾ… སཱ་དྷུ ཝཱི་རི་ཡཾ… སཱ་དྷུ པ་ཉྙཱ ཀུ་ས་ལེ་སུ དྷ་མྨེ་སཱུ་ཏི. སོ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨུ་མྨུ་ཛྫི་ཏྭཱ ཏི་ཎྞོ ཧོ་ཏི པཱ་ར་ངྒ་ཏོ ཐ་ལེ ཏི་ཊྛ་ཏི བྲཱ་ཧྨ་ཎོ.

‘‘ཨི་མེ ཁོ, བྷི་ཀྑ་ཝེ, ས་ཏྟ ཨུ་ད་ཀཱུ་པ་མཱ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི. པ་ཉྩ་མཾ.

༦. ཨ་ནི་ཙྩཱ་ནུ་པ་སྶཱི་སུ་ཏྟཾ

༡༦. ‘‘ས་ཏྟི་མེ, བྷི་ཀྑ་ཝེ, པུ་གྒ་ལཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཀ་ཏ་མེ ས་ཏྟ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ས་བྦ་ས་ངྑཱ་རེ་སུ ཨ་ནི་ཙྩཱ་ནུ་པ་སྶཱི ཝི་ཧ་ར་ཏི, ཨ་ནི་ཙྩ་ས་ཉྙཱི, ཨ་ནི་ཙྩ་པ་ཊི་སཾ་ཝེ་དཱི ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ ཙེ་ཏ་སཱ ཨ་དྷི་མུ་ཙྩ་མཱ་ནོ པ་ཉྙཱ་ཡ པ་རི་ཡོ་གཱ་ཧ་མཱ་ནོ. སོ ཨཱ་ས་ཝཱ་ནཾ ཁ་ཡཱ…པེ… ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཨ་ཡཾ, བྷི་ཀྑ་ཝེ, པ་ཋ་མོ པུ་གྒ་ལོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ.

‘‘པུ་ན ཙ་པ་རཾ, བྷི་ཀྑ་ཝེ, ཨི་དྷེ་ཀ་ཙྩོ པུ་གྒ་ལོ ས་བྦ་ས་ངྑཱ་རེ་སུ ཨ་ནི་ཙྩཱ་ནུ་པ་སྶཱི ཝི་ཧ་ར་ཏི, ཨ་ནི་ཙྩ་ས་ཉྙཱི, ཨ་ནི་ཙྩ་པ་ཊི་སཾ་ཝེ་དཱི ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ ཙེ་ཏ་སཱ ཨ་དྷི་མུ་ཙྩ་མཱ་ནོ པ་ཉྙཱ་ཡ པ་རི་ཡོ་གཱ་ཧ་མཱ་ནོ. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི…པེ… ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི…པེ… ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི…པེ… ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི…པེ… ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི. ཨ་ཡཾ, བྷི་ཀྑ་ཝེ, ས་ཏྟ་མོ པུ་གྒ་ལོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཨི་མེ ཁོ, བྷི་ཀྑ་ཝེ, ས་ཏྟ པུ་གྒ་ལཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’’ཏི. ཚ་ཊྛཾ.

༧. དུ་ཀྑཱ་ནུ་པ་སྶཱི་སུ་ཏྟཾ

༡༧. ས་ཏྟི་མེ, བྷི་ཀྑ་ཝེ, པུ་གྒ་ལཱ ཨཱ་ཧུ་ནེ་ཡྻཱ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཀ་ཏ་མེ ས་ཏྟ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ས་བྦ་ས་ངྑཱ་རེ་སུ དུ་ཀྑཱ་ནུ་པ་སྶཱི ཝི་ཧ་ར་ཏི…པེ…. ས་ཏྟ་མཾ.

༨. ཨ་ན་ཏྟཱ་ནུ་པ་སྶཱི་སུ་ཏྟཾ

༡༨. ས་བྦེ་སུ དྷ་མྨེ་སུ ཨ་ན་ཏྟཱ་ནུ་པ་སྶཱི ཝི་ཧ་ར་ཏི…པེ…. ཨ་ཊྛ་མཾ.

༩. ནི་བྦཱ་ན་སུ་ཏྟཾ

༡༩. [ཀ་ཐཱ. ༥༤༧-༥༤༨] ‘‘ནི་བྦཱ་ནེ སུ་ཁཱ་ནུ་པ་སྶཱི ཝི་ཧ་ར་ཏི སུ་ཁ་ས་ཉྙཱི སུ་ཁ་པ་ཊི་སཾ་ཝེ་དཱི ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ ཙེ་ཏ་སཱ ཨ་དྷི་མུ་ཙྩ་མཱ་ནོ པ་ཉྙཱ་ཡ པ་རི་ཡོ་གཱ་ཧ་མཱ་ནོ. སོ ཨཱ་ས་ཝཱ་ནཾ ཁ་ཡཱ…པེ… ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཨ་ཡཾ བྷི་ཀྑ་ཝེ, པ་ཋ་མོ པུ་གྒ་ལོ ཨཱ་ཧུ་ནེ་ཡྻོ…པེ… པུ་ཉྙ་ཀྑེ་ཏྟཾ ལོ་ཀ་སྶ.

‘‘པུ་ན ཙ་པ་རཾ, བྷི་ཀྑ་ཝེ, ཨི་དྷེ་ཀ་ཙྩོ པུ་གྒ་ལོ ནི་བྦཱ་ནེ སུ་ཁཱ་ནུ་པ་སྶཱི ཝི་ཧ་ར་ཏི སུ་ཁ་ས་ཉྙཱི སུ་ཁ་པ་ཊི་སཾ་ཝེ་དཱི ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ ཙེ་ཏ་སཱ ཨ་དྷི་མུ་ཙྩ་མཱ་ནོ པ་ཉྙཱ་ཡ པ་རི་ཡོ་གཱ་ཧ་མཱ་ནོ. ཏ་སྶ ཨ་པུ་བྦཾ ཨ་ཙ་རི་མཾ ཨཱ་ས་ཝ་པ་རི་ཡཱ་དཱ་ན་ཉྩ ཧོ་ཏི ཛཱི་ཝི་ཏ་པ་རི་ཡཱ་དཱ་ན་ཉྩ. ཨ་ཡཾ, བྷི་ཀྑ་ཝེ, དུ་ཏི་ཡོ པུ་གྒ་ལོ ཨཱ་ཧུ་ནེ་ཡྻོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ.

‘‘པུ་ན ཙ་པ་རཾ, བྷི་ཀྑ་ཝེ, ཨི་དྷེ་ཀ་ཙྩོ པུ་གྒ་ལོ ནི་བྦཱ་ནེ སུ་ཁཱ་ནུ་པ་སྶཱི ཝི་ཧ་ར་ཏི སུ་ཁ་ས་ཉྙཱི སུ་ཁ་པ་ཊི་སཾ་ཝེ་དཱི ས་ཏ་ཏཾ ས་མི་ཏཾ ཨ་བྦོ་ཀི་ཎྞཾ ཙེ་ཏ་སཱ ཨ་དྷི་མུ་ཙྩ་མཱ་ནོ པ་ཉྙཱ་ཡ པ་རི་ཡོ་གཱ་ཧ་མཱ་ནོ. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི…པེ… ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི…པེ… ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི…པེ… ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི…པེ… ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི. ཨ་ཡཾ, བྷི་ཀྑ་ཝེ, ས་ཏྟ་མོ པུ་གྒ་ལོ ཨཱ་ཧུ་ནེ་ཡྻོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཨི་མེ ཁོ, བྷི་ཀྑ་ཝེ, ས་ཏྟ པུ་གྒ་ལཱ ཨཱ་ཧུ་ནེ་ཡྻཱ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’’ཏི. ན་ཝ་མཾ.

༡༠. ནི་དྡ་ས་ཝ་ཏྠུ་སུ་ཏྟཾ

༢༠. ‘‘ས་ཏྟི་མཱ་ནི, བྷི་ཀྑ་ཝེ, ནི་དྡ་ས་ཝ་ཏྠཱུ་ནི. ཀ་ཏ་མཱ་ནི ས་ཏྟ? ཨི་དྷ, བྷི་ཀྑ་ཝེ, བྷི་ཀྑུ སི་ཀྑཱ་ས་མཱ་དཱ་ནེ ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ སི་ཀྑཱ་ས་མཱ་དཱ་ནེ ཨ་ཝི་ག་ཏ་པེ་མོ [ཨ་དྷི་ག་ཏ་པེ་མོ (སྱཱ.) ཨ. ནི. ༧.༤༢; དཱི. ནི. ༣.༣༣༡], དྷ་མྨ་ནི་ས་ནྟི་ཡཱ ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ དྷ་མྨ་ནི་ས་ནྟི་ཡཱ ཨ་ཝི་ག་ཏ་པེ་མོ, ཨི་ཙྪཱ་ཝི་ན་ཡེ ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ ཨི་ཙྪཱ་ཝི་ན་ཡེ ཨ་ཝི་ག་ཏ་པེ་མོ, པ་ཊི་ས་ལླཱ་ནེ ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ པ་ཊི་ས་ལླཱ་ནེ ཨ་ཝི་ག་ཏ་པེ་མོ, ཝཱི་རི་ཡཱ་ར་མྦྷེ [ཝཱི་རི་ཡཱ་ར་བྦྷེ (ཀ.)] ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ ཝཱི་རི་ཡཱ་ར་མྦྷེ ཨ་ཝི་ག་ཏ་པེ་མོ, ས་ཏི་ནེ་པ་ཀྐེ ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ ས་ཏི་ནེ་པ་ཀྐེ ཨ་ཝི་ག་ཏ་པེ་མོ, དི་ཊྛི་པ་ཊི་ཝེ་དྷེ ཏི་བྦ་ཙྪ་ནྡོ ཧོ་ཏི ཨཱ་ཡ་ཏི་ཉྩ དི་ཊྛི་པ་ཊི་ཝེ་དྷེ ཨ་ཝི་ག་ཏ་པེ་མོ. ཨི་མཱ་ནི ཁོ, བྷི་ཀྑ་ཝེ, ས་ཏྟ ནི་དྡ་ས་ཝ་ཏྠཱུ་ནཱི’’ཏི. ད་ས་མཾ.

ཨ་ནུ་ས་ཡ་ཝ་གྒོ དུ་ཏི་ཡོ.