༨. ས་པྤུ་རི་ས་དཱ་ན་སུ་ཏྟཾ

༡༤༨. ‘‘པ་ཉྩི་མཱ་ནི, བྷི་ཀྑ་ཝེ, ས་པྤུ་རི་ས་དཱ་ནཱ་ནི. ཀ་ཏ་མཱ་ནི པ་ཉྩ? ས་དྡྷཱ་ཡ དཱ་ནཾ དེ་ཏི, ས་ཀྐ་ཙྩཾ དཱ་ནཾ དེ་ཏི, ཀཱ་ལེ་ན དཱ་ནཾ དེ་ཏི, ཨ་ནུ་གྒ་ཧི་ཏ་ཙི་ཏྟོ [ཨ་ན་གྒ་ཧི་ཏ་ཙི་ཏྟོ (སཱི.)] དཱ་ནཾ དེ་ཏི, ཨ་ཏྟཱ་ན་ཉྩ པ་ར་ཉྩ ཨ་ནུ་པ་ཧ་ཙྩ དཱ་ནཾ དེ་ཏི.

‘‘ས་དྡྷཱ་ཡ ཁོ པ་ན, བྷི་ཀྑ་ཝེ, དཱ་ནཾ ད་ཏྭཱ ཡ་ཏྠ ཡ་ཏྠ ཏ་སྶ དཱ་ན་སྶ ཝི་པཱ་ཀོ ནི་བྦ་ཏྟ་ཏི, ཨ་ཌྜྷོ ཙ ཧོ་ཏི མ་ཧ་དྡྷ་ནོ མ་ཧཱ་བྷོ་གོ, ཨ་བྷི་རཱུ་པོ ཙ ཧོ་ཏི ད་སྶ་ནཱི་ཡོ པཱ་སཱ་དི་ཀོ པ་ར་མཱ་ཡ ཝ་ཎྞ་པོ་ཀྑ་ར་ཏཱ་ཡ ས་མ་ནྣཱ་ག་ཏོ.

‘‘ས་ཀྐ་ཙྩཾ ཁོ པ་ན, བྷི་ཀྑ་ཝེ, དཱ་ནཾ ད་ཏྭཱ ཡ་ཏྠ ཡ་ཏྠ ཏ་སྶ དཱ་ན་སྶ ཝི་པཱ་ཀོ ནི་བྦ་ཏྟ་ཏི, ཨ་ཌྜྷོ ཙ ཧོ་ཏི མ་ཧ་དྡྷ་ནོ མ་ཧཱ་བྷོ་གོ. ཡེ་པི་སྶ ཏེ ཧོ་ནྟི པུ་ཏྟཱ་ཏི ཝཱ དཱ་རཱ་ཏི ཝཱ དཱ་སཱ་ཏི ཝཱ པེ་སྶཱ་ཏི ཝཱ ཀ་མྨ་ཀ་རཱ་ཏི [ཀ་མྨ་ཀཱ་རཱ་ཏི (ཀ.)] ཝཱ, ཏེ་པི སུ་སྶཱུ་ས་ནྟི སོ་ཏཾ ཨོ་ད་ཧ་ནྟི ཨ་ཉྙཱ ཙི་ཏྟཾ ཨུ་པ་ཊྛ་པེ་ནྟི.

‘‘ཀཱ་ལེ་ན ཁོ པ་ན, བྷི་ཀྑ་ཝེ, དཱ་ནཾ ད་ཏྭཱ ཡ་ཏྠ ཡ་ཏྠ ཏ་སྶ དཱ་ན་སྶ ཝི་པཱ་ཀོ ནི་བྦ་ཏྟ་ཏི, ཨ་ཌྜྷོ ཙ ཧོ་ཏི མ་ཧ་དྡྷ་ནོ མ་ཧཱ་བྷོ་གོ; ཀཱ་ལཱ་ག་ཏཱ ཙ་སྶ ཨ་ཏྠཱ པ་ཙུ་རཱ ཧོ་ནྟི.

‘‘ཨ་ནུ་གྒ་ཧི་ཏ་ཙི་ཏྟོ ཁོ པ་ན, བྷི་ཀྑ་ཝེ, དཱ་ནཾ ད་ཏྭཱ ཡ་ཏྠ ཡ་ཏྠ ཏ་སྶ དཱ་ན་སྶ ཝི་པཱ་ཀོ ནི་བྦ་ཏྟ་ཏི, ཨ་ཌྜྷོ ཙ ཧོ་ཏི མ་ཧ་དྡྷ་ནོ མ་ཧཱ་བྷོ་གོ; ཨུ་ལཱ༹་རེ་སུ ཙ པ་ཉྩ་སུ ཀཱ་མ་གུ་ཎེ་སུ བྷོ་གཱ་ཡ ཙི་ཏྟཾ ན་མ་ཏི.

‘‘ཨ་ཏྟཱ་ན་ཉྩ པ་ར་ཉྩ ཨ་ནུ་པ་ཧ་ཙྩ ཁོ པ་ན, བྷི་ཀྑ་ཝེ, དཱ་ནཾ ད་ཏྭཱ ཡ་ཏྠ ཡ་ཏྠ ཏ་སྶ དཱ་ན་སྶ ཝི་པཱ་ཀོ ནི་བྦ་ཏྟ་ཏི, ཨ་ཌྜྷོ ཙ ཧོ་ཏི མ་ཧ་དྡྷ་ནོ མ་ཧཱ་བྷོ་གོ; ན ཙ་སྶ ཀུ་ཏོ་ཙི བྷོ་གཱ་ནཾ ཨུ་པ་གྷཱ་ཏོ ཨཱ་ག་ཙྪ་ཏི ཨ་གྒི་ཏོ ཝཱ ཨུ་ད་ཀ་ཏོ ཝཱ རཱ་ཛ་ཏོ ཝཱ ཙོ་ར་ཏོ ཝཱ ཨ་པྤི་ཡ་ཏོ ཝཱ དཱ་ཡཱ་ད་ཏོ ཝཱ [ཨ་པྤི་ཡ་ཏོ ཝཱ དཱ་ཡཱ་ད་ཏོ ཝཱ (སཱི. སྱཱ. ཀཾ. པཱི.), ཨ་པྤི་ཡ་དཱ་ཡཱ་ད་ཏོ ཝཱ (ཀ.)]. ཨི་མཱ་ནི ཁོ, བྷི་ཀྑ་ཝེ, པ་ཉྩ ས་པྤུ་རི་ས་དཱ་ནཱ་ནཱི’’ཏི. ཨ་ཊྛ་མཾ.