༩. པུ་ཏྟ་སུ་ཏྟཾ
༣༩. ‘‘པ་ཉྩི་མཱ་ནི, བྷི་ཀྑ་ཝེ, ཋཱ་ནཱ་ནི ས་མྤ་སྶ་ནྟཱ མཱ་ཏཱ་པི་ཏ་རོ པུ་ཏྟཾ ཨི་ཙྪ་ནྟི ཀུ་ལེ ཛཱ་ཡ་མཱ་ནཾ. ཀ་ཏ་མཱ་ནི པ་ཉྩ? བྷ་ཏོ ཝཱ ནོ བྷ་རི་སྶ་ཏི; ཀི་ཙྩཾ ཝཱ ནོ ཀ་རི་སྶ་ཏི; ཀུ་ལ་ཝཾ་སོ ཙི་རཾ ཋ་སྶ་ཏི; དཱ་ཡ་ཛྫཾ པ་ཊི་པ་ཛྫི་སྶ་ཏི; ཨ་ཐ ཝཱ པ་ན པེ་ཏཱ་ནཾ ཀཱ་ལ་ངྐ་ཏཱ་ནཾ ད་ཀྑི་ཎཾ ཨ་ནུ་པྤ་ད་སྶ་ཏཱི་ཏི. ཨི་མཱ་ནི ཁོ, བྷི་ཀྑ་ཝེ, པ་ཉྩ ཋཱ་ནཱ་ནི ས་མྤ་སྶ་ནྟཱ མཱ་ཏཱ་པི་ཏ་རོ པུ་ཏྟཾ ཨི་ཙྪ་ནྟི ཀུ་ལེ ཛཱ་ཡ་མཱ་ན’’ནྟི.
[ཀ་ཐཱ. ༤༩༡] ‘‘པ་ཉྩ ཋཱ་ནཱ་ནི ས་མྤ་སྶཾ, པུ་ཏྟཾ ཨི་ཙྪ་ནྟི པ་ཎྜི་ཏཱ;
བྷ་ཏོ ཝཱ ནོ བྷ་རི་སྶ་ཏི, ཀི་ཙྩཾ ཝཱ ནོ ཀ་རི་སྶ་ཏི.
‘‘ཀུ་ལ་ཝཾ་སོ ཙི་རཾ ཏི་ཊྛེ, དཱ་ཡ་ཛྫཾ པ་ཊི་པ་ཛྫ་ཏི;
ཨ་ཐ ཝཱ པ་ན པེ་ཏཱ་ནཾ, ད་ཀྑི་ཎཾ ཨ་ནུ་པྤ་ད་སྶ་ཏི.
‘‘ཋཱ་ནཱ་ནེ་ཏཱ་ནི ས་མྤ་སྶཾ, པུ་ཏྟཾ ཨི་ཙྪ་ནྟི པ་ཎྜི་ཏཱ;
ཏ་སྨཱ ས་ནྟོ ས་པྤུ་རི་སཱ, ཀ་ཏ་ཉྙཱུ ཀ་ཏ་ཝེ་དི་ནོ.
‘‘བྷ་ར་ནྟི མཱ་ཏཱ་པི་ཏ་རོ, པུ་བྦེ ཀ་ཏ་མ་ནུ་སྶ་རཾ;
ཀ་རོ་ནྟི ནེ་སཾ ཀི་ཙྩཱ་ནི, ཡ་ཐཱ ཏཾ པུ་བྦ་ཀཱ་རི་ནཾ.
‘‘ཨོ་ཝཱ་ད་ཀཱ་རཱི བྷ་ཏ་པོ་སཱི, ཀུ་ལ་ཝཾ་སཾ ཨ་ཧཱ་པ་ཡཾ;
ས་དྡྷོ སཱི་ལེ་ན ས་མྤ་ནྣོ, པུ་ཏྟོ ཧོ་ཏི པ་སཾ་སི་ཡོ’’ཏི. ན་ཝ་མཾ;