༧. ས་མཱ་དྷི་སུ་ཏྟཾ

༢༧. ‘‘ས་མཱ་དྷིཾ, བྷི་ཀྑ་ཝེ, བྷཱ་ཝེ་ཐ ཨ་པྤ་མཱ་ཎཾ ནི་པ་ཀཱ པ་ཏི་སྶ་ཏཱ. ས་མཱ་དྷིཾ, བྷི་ཀྑ་ཝེ, བྷཱ་ཝ་ཡ་ཏཾ ཨ་པྤ་མཱ་ཎཾ ནི་པ་ཀཱ་ནཾ པ་ཏི་སྶ་ཏཱ་ནཾ པ་ཉྩ ཉཱ་ཎཱ་ནི པ་ཙྩ་ཏྟ་ཉྙེ་ཝ ཨུ་པྤ་ཛྫ་ནྟི. ཀ་ཏ་མཱ་ནི པ་ཉྩ? ‘ཨ་ཡཾ ས་མཱ་དྷི པ་ཙྩུ་པྤ་ནྣ་སུ་ཁོ ཙེ་ཝ ཨཱ་ཡ་ཏི་ཉྩ སུ་ཁ་ཝི་པཱ་ཀོ’ཏི པ་ཙྩ་ཏྟ་ཉྙེ་ཝ ཉཱ་ཎཾ ཨུ་པྤ་ཛྫ་ཏི, ‘ཨ་ཡཾ ས་མཱ་དྷི ཨ་རི་ཡོ ནི་རཱ་མི་སོ’ཏི པ་ཙྩ་ཏྟ་ཉྙེ་ཝ ཉཱ་ཎཾ ཨུ་པྤ་ཛྫ་ཏི, ‘ཨ་ཡཾ ས་མཱ་དྷི ཨ་ཀཱ་པུ་རི་ས་སེ་ཝི་ཏོ’ཏི [མ་ཧཱ་པུ་རི་ས་སེ་ཝི་ཏོ་ཏི (ཀ.)] པ་ཙྩ་ཏྟ་ཉྙེ་ཝ ཉཱ་ཎཾ ཨུ་པྤ་ཛྫ་ཏི, ‘ཨ་ཡཾ ས་མཱ་དྷི ས་ནྟོ པ་ཎཱི་ཏོ པ་ཊི་པྤ་སྶ་དྡྷ་ལ་དྡྷོ ཨེ་ཀོ་དི་བྷཱ་ཝཱ་དྷི་ག་ཏོ, ན ས་ངྑཱ་ར་ནི་གྒ་ཡ྄ཧ་ཝཱ་རི་ཏ་ག་ཏོ’ཏི [ན ཙ ས་ས་ངྑཱ་ར་ནི་གྒ་ཡ྄ཧ་ཝཱ་རི་ཏ་པྤ་ཏི་ཏོ་ཏི (སཱི.), ན ཙ ས་ས་ངྑཱ་ར་ནི་གྒ་ཡ྄ཧ་ཝཱ་རི་ཏ་པ་ཏྟོ་ཏི (སྱཱ.), ན ཙ ས་ས་ངྑཱ་ར་ནི་གྒ་ཡ྄ཧ་ཝཱ་རི་ཝཱ་ཝ་ཊོ་ཏི (ཀ.), ན ས་ས་ངྑཱ་ར་ནི་གྒ་ཡ྄ཧ་ཝཱ་རི་ཡཱ་དྷི་ག་ཏོ་ཏི (?) དཱི. ནི. ༣.༣༥༥; ཨ. ནི. ༣.༡༠༢; ༩.༢༧] པ་ཙྩ་ཏྟ་ཉྙེ་ཝ ཉཱ་ཎཾ ཨུ་པྤ་ཛྫ་ཏི, ‘ས་ཏོ ཁོ པ་ནཱ་ཧཾ ཨི་མཾ ས་མཱ་པ་ཛྫཱ་མི ས་ཏོ ཝུ་ཊྛ་ཧཱ་མཱི’ཏི [སོ ཁོ པ་ནཱ་ཧཾ ཨི་མཾ ས་མཱ་དྷིཾ ས་ཏོ་ཝ ས་མཱ་པ་ཛྫཱ་མི, ས་ཏོ ཨུ་ཊྛ་ཧཱ་མཱི་ཏི (སཱི. སྱཱ. ཀཾ.)] པ་ཙྩ་ཏྟ་ཉྙེ་ཝ ཉཱ་ཎཾ ཨུ་པྤ་ཛྫ་ཏི.

‘‘ས་མཱ་དྷིཾ, བྷི་ཀྑ་ཝེ, བྷཱ་ཝེ་ཐ ཨ་པྤ་མཱ་ཎཾ ནི་པ་ཀཱ པ་ཏི་སྶ་ཏཱ. ས་མཱ་དྷིཾ, བྷི་ཀྑ་ཝེ, བྷཱ་ཝ་ཡ་ཏཾ ཨ་པྤ་མཱ་ཎཾ ནི་པ་ཀཱ་ནཾ པ་ཏི་སྶ་ཏཱ་ནཾ ཨི་མཱ་ནི པ་ཉྩ ཉཱ་ཎཱ་ནི པ་ཙྩ་ཏྟ་ཉྙེ་ཝ ཨུ་པྤ་ཛྫ་ནྟཱི’’ཏི. ས་ཏྟ་མཾ.