༡. ས་ངྒྷ་བྷེ་ད་ཀ་སུ་ཏྟཾ

༢༤༣. ཨེ་ཀཾ ས་མ་ཡཾ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ ཨཱ་ན་ནྡཾ བྷ་ག་ཝཱ ཨེ་ཏ་ད་ཝོ་ཙ – ‘‘ཨ་པི ནུ ཏཾ, ཨཱ་ན་ནྡ, ཨ་དྷི་ཀ་ར་ཎཾ ཝཱུ་པ་ས་ནྟ’’ནྟི? ‘‘ཀུ་ཏོ ཏཾ, བྷ་ནྟེ, ཨ་དྷི་ཀ་ར་ཎཾ ཝཱུ་པ་ས་མི་སྶ་ཏི [ཝཱུ་པ་ས་མྨི་སྶ་ཏི (?)]! ཨཱ་ཡ་སྨ་ཏོ, བྷ་ནྟེ, ཨ་ནུ་རུ་དྡྷ་སྶ བཱ་ཧི་ཡོ ནཱ་མ ས་དྡྷི་ཝི་ཧཱ་རི་ཀོ ཀེ་ཝ་ལ་ཀ་པྤཾ ས་ངྒྷ་བྷེ་དཱ་ཡ ཋི་ཏོ. ཏ་ཏྲཱ་ཡ་སྨཱ ཨ་ནུ་རུ་དྡྷོ ན ཨེ་ཀ་ཝཱ་ཙི་ཀ་མྤི བྷ་ཎི་ཏ་བྦཾ མ་ཉྙ་ཏཱི’’ཏི.

‘‘ཀ་དཱ པ་ནཱ་ན་ནྡ, ཨ་ནུ་རུ་དྡྷོ ས་ངྒྷ་མ་ཛ྄ཛྷེ ཨ་དྷི་ཀ་ར་ཎེ་སུ [ཨ་དྷི་ཀ་ར་ཎེ་སུ ཏེ་སུ (ཀ.)] ཝོ་ཡུ་ཉྫ་ཏི! ན་ནུ, ཨཱ་ན་ནྡ, ཡཱ་ནི ཀཱ་ནི་ཙི ཨ་དྷི་ཀ་ར་ཎཱ་ནི ཨུ་པྤ་ཛྫ་ནྟི, ས་བྦཱ་ནི ཏཱ་ནི ཏུ་མྷེ ཙེ་ཝ ཝཱུ་པ་ས་མེ་ཐ སཱ་རི་པུ་ཏྟ་མོ་གྒ་ལླཱ་ནཱ ཙ.

‘‘ཙ་ཏྟཱ་རོ་མེ, ཨཱ་ན་ནྡ, ཨ་ཏྠ་ཝ་སེ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི. ཀ་ཏ་མེ ཙ་ཏྟཱ་རོ? ཨི་དྷཱ་ན་ནྡ, པཱ་པ་བྷི་ཀྑུ དུ་སྶཱི་ལོ ཧོ་ཏི པཱ་པ་དྷ་མྨོ ཨ་སུ་ཙི ས་ངྐ་སྶ་ར་ས་མཱ་ཙཱ་རོ པ་ཊི་ཙྪ་ནྣ་ཀ་མྨ་ནྟོ ཨ་སྶ་མ་ཎོ ས་མ་ཎ་པ་ཊི་ཉྙོ ཨ་བྲ་ཧྨ་ཙཱ་རཱི བྲ་ཧྨ་ཙཱ་རི་པ་ཊི་ཉྙོ ཨ་ནྟོ་པཱུ་ཏི ཨ་ཝ་སྶུ་ཏོ ཀ་ས་མྦུ་ཛཱ་ཏོ. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – དུ་སྶཱི་ལོ པཱ་པ་དྷ་མྨོ ཨ་སུ་ཙི ས་ངྐ་སྶ་ར་ས་མཱ་ཙཱ་རོ པ་ཊི་ཙྪ་ནྣ་ཀ་མྨ་ནྟོ ཨ་སྶ་མ་ཎོ ས་མ་ཎ་པ་ཊི་ཉྙོ ཨ་བྲ་ཧྨ་ཙཱ་རཱི བྲ་ཧྨ་ཙཱ་རི་པ་ཊི་ཉྙོ ཨ་ནྟོ་པཱུ་ཏི ཨ་ཝ་སྶུ་ཏོ ཀ་ས་མྦུ་ཛཱ་ཏོ་ཏི, ས་མ་གྒཱ མཾ ས་ནྟཱ ནཱ་སེ་སྶ་ནྟི; ཝ་གྒཱ པ་ན མཾ ན ནཱ་སེ་སྶ་ནྟཱི’ཏི. ཨི་དཾ, ཨཱ་ན་ནྡ, པ་ཋ་མཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི.

‘‘པུ་ན ཙ་པ་རཾ, ཨཱ་ན་ནྡ, པཱ་པ་བྷི་ཀྑུ མི་ཙྪཱ་དི་ཊྛི་ཀོ ཧོ་ཏི, ཨ་ནྟ་གྒཱ་ཧི་ཀཱ་ཡ དི་ཊྛི་ཡཱ ས་མ་ནྣཱ་ག་ཏོ. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – མི་ཙྪཱ་དི་ཊྛི་ཀོ ཨ་ནྟ་གྒཱ་ཧི་ཀཱ་ཡ དི་ཊྛི་ཡཱ ས་མ་ནྣཱ་ག་ཏོ་ཏི, ས་མ་གྒཱ མཾ ས་ནྟཱ ནཱ་སེ་སྶ་ནྟི; ཝ་གྒཱ པ་ན མཾ ན ནཱ་སེ་སྶ་ནྟཱི’ཏི. ཨི་དཾ, ཨཱ་ན་ནྡ, དུ་ཏི་ཡཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི.

‘‘པུ་ན ཙ་པ་རཾ, ཨཱ་ན་ནྡ, པཱ་པ་བྷི་ཀྑུ མི་ཙྪཱ་ཨཱ་ཛཱི་ཝོ ཧོ་ཏི, མི་ཙྪཱ་ཨཱ་ཛཱི་ཝེ་ན ཛཱི་ཝི་ཀཾ [ཛཱི་ཝི་ཏཾ (སྱཱ. ཀཾ. པཱི. ཀ.)] ཀ་པྤེ་ཏི. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – མི་ཙྪཱ་ཨཱ་ཛཱི་ཝོ མི་ཙྪཱ་ཨཱ་ཛཱི་ཝེ་ན ཛཱི་ཝི་ཀཾ ཀ་པྤེ་ཏཱི་ཏི, ས་མ་གྒཱ མཾ ས་ནྟཱ ནཱ་སེ་སྶ་ནྟི; ཝ་གྒཱ པ་ན མཾ ན ནཱ་སེ་སྶ་ནྟཱི’ཏི. ཨི་དཾ, ཨཱ་ན་ནྡ, ཏ་ཏི་ཡཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི.

‘‘པུ་ན ཙ་པ་རཾ, ཨཱ་ན་ནྡ, པཱ་པ་བྷི་ཀྑུ ལཱ་བྷ་ཀཱ་མོ ཧོ་ཏི ས་ཀྐཱ་ར་ཀཱ་མོ ཨ་ན་ཝ་ཉྙ་ཏྟི་ཀཱ་མོ. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – ལཱ་བྷ་ཀཱ་མོ ས་ཀྐཱ་ར་ཀཱ་མོ ཨ་ན་ཝ་ཉྙ་ཏྟི་ཀཱ་མོ་ཏི, ས་མ་གྒཱ མཾ ས་ནྟཱ ན ས་ཀྐ་རི་སྶ་ནྟི ན ག་རུཾ ཀ་རི་སྶ་ནྟི ན མཱ་ནེ་སྶ་ནྟི ན པཱུ་ཛེ་སྶ་ནྟི; ཝ་གྒཱ པ་ན མཾ ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟཱི’ཏི. ཨི་དཾ, ཨཱ་ན་ནྡ, ཙ་ཏུ་ཏྠཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི. ཨི་མེ ཁོ, ཨཱ་ན་ནྡ, ཙ་ཏྟཱ་རོ ཨ་ཏྠ་ཝ་སེ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏཱི’’ཏི. པ་ཋ་མཾ.