(༢༥) ༥. ཨཱ་པ་ཏྟི་བྷ་ཡ་ཝ་གྒོ
༡. ས་ངྒྷ་བྷེ་ད་ཀ་སུ་ཏྟཾ
༢༤༣. ཨེ་ཀཾ ས་མ་ཡཾ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨཱ་ཡ་སྨ་ནྟཾ ཨཱ་ན་ནྡཾ བྷ་ག་ཝཱ ཨེ་ཏ་ད་ཝོ་ཙ – ‘‘ཨ་པི ནུ ཏཾ, ཨཱ་ན་ནྡ, ཨ་དྷི་ཀ་ར་ཎཾ ཝཱུ་པ་ས་ནྟ’’ནྟི? ‘‘ཀུ་ཏོ ཏཾ, བྷ་ནྟེ, ཨ་དྷི་ཀ་ར་ཎཾ ཝཱུ་པ་ས་མི་སྶ་ཏི [ཝཱུ་པ་ས་མྨི་སྶ་ཏི (?)]! ཨཱ་ཡ་སྨ་ཏོ, བྷ་ནྟེ, ཨ་ནུ་རུ་དྡྷ་སྶ བཱ་ཧི་ཡོ ནཱ་མ ས་དྡྷི་ཝི་ཧཱ་རི་ཀོ ཀེ་ཝ་ལ་ཀ་པྤཾ ས་ངྒྷ་བྷེ་དཱ་ཡ ཋི་ཏོ. ཏ་ཏྲཱ་ཡ་སྨཱ ཨ་ནུ་རུ་དྡྷོ ན ཨེ་ཀ་ཝཱ་ཙི་ཀ་མྤི བྷ་ཎི་ཏ་བྦཾ མ་ཉྙ་ཏཱི’’ཏི.
‘‘ཀ་དཱ པ་ནཱ་ན་ནྡ, ཨ་ནུ་རུ་དྡྷོ ས་ངྒྷ་མ་ཛ྄ཛྷེ ཨ་དྷི་ཀ་ར་ཎེ་སུ [ཨ་དྷི་ཀ་ར་ཎེ་སུ ཏེ་སུ (ཀ.)] ཝོ་ཡུ་ཉྫ་ཏི! ན་ནུ, ཨཱ་ན་ནྡ, ཡཱ་ནི ཀཱ་ནི་ཙི ཨ་དྷི་ཀ་ར་ཎཱ་ནི ཨུ་པྤ་ཛྫ་ནྟི, ས་བྦཱ་ནི ཏཱ་ནི ཏུ་མྷེ ཙེ་ཝ ཝཱུ་པ་ས་མེ་ཐ སཱ་རི་པུ་ཏྟ་མོ་གྒ་ལླཱ་ནཱ ཙ.
‘‘ཙ་ཏྟཱ་རོ་མེ, ཨཱ་ན་ནྡ, ཨ་ཏྠ་ཝ་སེ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི. ཀ་ཏ་མེ ཙ་ཏྟཱ་རོ? ཨི་དྷཱ་ན་ནྡ, པཱ་པ་བྷི་ཀྑུ དུ་སྶཱི་ལོ ཧོ་ཏི པཱ་པ་དྷ་མྨོ ཨ་སུ་ཙི ས་ངྐ་སྶ་ར་ས་མཱ་ཙཱ་རོ པ་ཊི་ཙྪ་ནྣ་ཀ་མྨ་ནྟོ ཨ་སྶ་མ་ཎོ ས་མ་ཎ་པ་ཊི་ཉྙོ ཨ་བྲ་ཧྨ་ཙཱ་རཱི བྲ་ཧྨ་ཙཱ་རི་པ་ཊི་ཉྙོ ཨ་ནྟོ་པཱུ་ཏི ཨ་ཝ་སྶུ་ཏོ ཀ་ས་མྦུ་ཛཱ་ཏོ. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – དུ་སྶཱི་ལོ པཱ་པ་དྷ་མྨོ ཨ་སུ་ཙི ས་ངྐ་སྶ་ར་ས་མཱ་ཙཱ་རོ པ་ཊི་ཙྪ་ནྣ་ཀ་མྨ་ནྟོ ཨ་སྶ་མ་ཎོ ས་མ་ཎ་པ་ཊི་ཉྙོ ཨ་བྲ་ཧྨ་ཙཱ་རཱི བྲ་ཧྨ་ཙཱ་རི་པ་ཊི་ཉྙོ ཨ་ནྟོ་པཱུ་ཏི ཨ་ཝ་སྶུ་ཏོ ཀ་ས་མྦུ་ཛཱ་ཏོ་ཏི, ས་མ་གྒཱ མཾ ས་ནྟཱ ནཱ་སེ་སྶ་ནྟི; ཝ་གྒཱ པ་ན མཾ ན ནཱ་སེ་སྶ་ནྟཱི’ཏི. ཨི་དཾ, ཨཱ་ན་ནྡ, པ་ཋ་མཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི.
‘‘པུ་ན ཙ་པ་རཾ, ཨཱ་ན་ནྡ, པཱ་པ་བྷི་ཀྑུ མི་ཙྪཱ་དི་ཊྛི་ཀོ ཧོ་ཏི, ཨ་ནྟ་གྒཱ་ཧི་ཀཱ་ཡ དི་ཊྛི་ཡཱ ས་མ་ནྣཱ་ག་ཏོ. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – མི་ཙྪཱ་དི་ཊྛི་ཀོ ཨ་ནྟ་གྒཱ་ཧི་ཀཱ་ཡ དི་ཊྛི་ཡཱ ས་མ་ནྣཱ་ག་ཏོ་ཏི, ས་མ་གྒཱ མཾ ས་ནྟཱ ནཱ་སེ་སྶ་ནྟི; ཝ་གྒཱ པ་ན མཾ ན ནཱ་སེ་སྶ་ནྟཱི’ཏི. ཨི་དཾ, ཨཱ་ན་ནྡ, དུ་ཏི་ཡཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི.
‘‘པུ་ན ཙ་པ་རཾ, ཨཱ་ན་ནྡ, པཱ་པ་བྷི་ཀྑུ མི་ཙྪཱ་ཨཱ་ཛཱི་ཝོ ཧོ་ཏི, མི་ཙྪཱ་ཨཱ་ཛཱི་ཝེ་ན ཛཱི་ཝི་ཀཾ [ཛཱི་ཝི་ཏཾ (སྱཱ. ཀཾ. པཱི. ཀ.)] ཀ་པྤེ་ཏི. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – མི་ཙྪཱ་ཨཱ་ཛཱི་ཝོ མི་ཙྪཱ་ཨཱ་ཛཱི་ཝེ་ན ཛཱི་ཝི་ཀཾ ཀ་པྤེ་ཏཱི་ཏི, ས་མ་གྒཱ མཾ ས་ནྟཱ ནཱ་སེ་སྶ་ནྟི; ཝ་གྒཱ པ་ན མཾ ན ནཱ་སེ་སྶ་ནྟཱི’ཏི. ཨི་དཾ, ཨཱ་ན་ནྡ, ཏ་ཏི་ཡཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི.
‘‘པུ་ན ཙ་པ་རཾ, ཨཱ་ན་ནྡ, པཱ་པ་བྷི་ཀྑུ ལཱ་བྷ་ཀཱ་མོ ཧོ་ཏི ས་ཀྐཱ་ར་ཀཱ་མོ ཨ་ན་ཝ་ཉྙ་ཏྟི་ཀཱ་མོ. ཏ་སྶ ཨེ་ཝཾ ཧོ་ཏི – ‘ས་ཙེ ཁོ མཾ བྷི་ཀྑཱུ ཛཱ་ནི་སྶ་ནྟི – ལཱ་བྷ་ཀཱ་མོ ས་ཀྐཱ་ར་ཀཱ་མོ ཨ་ན་ཝ་ཉྙ་ཏྟི་ཀཱ་མོ་ཏི, ས་མ་གྒཱ མཾ ས་ནྟཱ ན ས་ཀྐ་རི་སྶ་ནྟི ན ག་རུཾ ཀ་རི་སྶ་ནྟི ན མཱ་ནེ་སྶ་ནྟི ན པཱུ་ཛེ་སྶ་ནྟི; ཝ་གྒཱ པ་ན མཾ ས་ཀྐ་རི་སྶ་ནྟི ག་རུཾ ཀ་རི་སྶ་ནྟི མཱ་ནེ་སྶ་ནྟི པཱུ་ཛེ་སྶ་ནྟཱི’ཏི. ཨི་དཾ, ཨཱ་ན་ནྡ, ཙ་ཏུ་ཏྠཾ ཨ་ཏྠ་ཝ་སཾ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏི. ཨི་མེ ཁོ, ཨཱ་ན་ནྡ, ཙ་ཏྟཱ་རོ ཨ་ཏྠ་ཝ་སེ ས་མྤ་སྶ་མཱ་ནོ པཱ་པ་བྷི་ཀྑུ ས་ངྒྷ་བྷེ་དེ་ན ན་ནྡ་ཏཱི’’ཏི. པ་ཋ་མཾ.
༢. ཨཱ་པ་ཏྟི་བྷ་ཡ་སུ་ཏྟཾ
༢༤༤. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཨཱ་པ་ཏྟི་བྷ་ཡཱ་ནི. ཀ་ཏ་མཱ་ནི ཙ་ཏྟཱ་རི? སེ་ཡྻ་ཐཱ་པི, བྷི་ཀྑ་ཝེ, ཙོ་རཾ ཨཱ་གུ་ཙཱ་རིཾ ག་ཧེ་ཏྭཱ ར་ཉྙོ ད་སྶེ་ཡྻུཾ – ‘ཨ་ཡཾ ཏེ, དེ་ཝ, ཙོ་རོ ཨཱ་གུ་ཙཱ་རཱི. ཨི་མ་སྶ དེ་ཝོ ད་ཎྜཾ པ་ཎེ་ཏཱུ’ཏི. ཏ་མེ་ནཾ རཱ་ཛཱ ཨེ་ཝཾ ཝ་དེ་ཡྻ – ‘ག་ཙྪ་ཐ, བྷོ, ཨི་མཾ པུ་རི་སཾ ད་ལ༹ྷཱ་ཡ ར་ཛྫུ་ཡཱ པ་ཙྪཱ་བཱ་ཧཾ གཱ་ལ༹ྷ་བ་ནྡྷ་ནཾ བ་ནྡྷི་ཏྭཱ ཁུ་ར་མུ་ཎྜཾ ཀ་རི་ཏྭཱ ཁ་ར་སྶ་རེ་ན པ་ཎ་ཝེ་ན ར་ཐི་ཀཱ་ཡ ར་ཐི་ཀཾ སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ པ་རི་ནེ་ཏྭཱ ད་ཀྑི་ཎེ་ན དྭཱ་རེ་ན ནི་ཀྑཱ་མེ་ཏྭཱ ད་ཀྑི་ཎ་ཏོ ན་ག་ར་སྶ སཱི་སཾ ཚི་ནྡ་ཐཱ’ཏི. ཏ་མེ་ནཾ ར་ཉྙོ པུ་རི་སཱ ད་ལ༹ྷཱ་ཡ ར་ཛྫུ་ཡཱ པ་ཙྪཱ་བཱ་ཧཾ གཱ་ལ༹ྷ་བ་ནྡྷ་ནཾ བ་ནྡྷི་ཏྭཱ ཁུ་ར་མུ་ཎྜཾ ཀ་རི་ཏྭཱ ཁ་ར་སྶ་རེ་ན པ་ཎ་ཝེ་ན ར་ཐི་ཀཱ་ཡ ར་ཐི་ཀཾ སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ པ་རི་ནེ་ཏྭཱ ད་ཀྑི་ཎེ་ན དྭཱ་རེ་ན ནི་ཀྑཱ་མེ་ཏྭཱ ད་ཀྑི་ཎ་ཏོ ན་ག་ར་སྶ སཱི་སཾ ཚི་ནྡེ་ཡྻུཾ. ཏ་ཏྲ་ཉྙ་ཏ་ར་སྶ ཐ་ལ་ཊྛ་སྶ པུ་རི་ས་སྶ ཨེ་ཝ་མ་སྶ – ‘པཱ་པ་ཀཾ ཝ་ཏ, བྷོ, ཨ་ཡཾ པུ་རི་སོ ཀ་མྨཾ ཨ་ཀཱ་སི གཱ་ར་ཡ྄ཧཾ སཱི་ས་ཙྪེ་ཛྫཾ. ཡ་ཏྲ ཧི ནཱ་མ ར་ཉྙོ པུ་རི་སཱ ད་ལ༹ྷཱ་ཡ ར་ཛྫུ་ཡཱ པ་ཙྪཱ་བཱ་ཧཾ གཱ་ལ༹ྷ་བ་ནྡྷ་ནཾ བ་ནྡྷི་ཏྭཱ ཁུ་ར་མུ་ཎྜཾ ཀ་རི་ཏྭཱ ཁ་ར་སྶ་རེ་ན པ་ཎ་ཝེ་ན ར་ཐི་ཀཱ་ཡ ར་ཐི་ཀཾ སི་ངྒྷཱ་ཊ་ཀེ་ན སི་ངྒྷཱ་ཊ་ཀཾ པ་རི་ནེ་ཏྭཱ ད་ཀྑི་ཎེ་ན དྭཱ་རེ་ན ནི་ཀྑཱ་མེ་ཏྭཱ ད་ཀྑི་ཎ་ཏོ ན་ག་ར་སྶ སཱི་སཾ ཚི་ནྡི་སྶ་ནྟི! སོ ཝ་ཏ་སྶཱ་ཧཾ [སོ ཝ་ཏ་སྶཱ་ཡཾ (སཱི.)] ཨེ་ཝ་རཱུ་པཾ པཱ་པ་ཀ་མྨཾ [པཱ་པཾ ཀ་མྨཾ (སཱི. པཱི.)] ན ཀ་རེ་ཡྻཾ [ན ཀ་རེ་ཡྻ (སཱི.) དཱི. ནི. ༡.༡༨༣ པཱ་ལི༹་ཡཱ ཏ་ད་ཊྛ་ཀ་ཐཱ་ཡ ཙ སཾ་ས་ནྡེ་ཏ་བྦཾ] གཱ་ར་ཡ྄ཧཾ སཱི་ས་ཙྪེ་ཛྫ’ནྟི. ཨེ་ཝ་མེ་ཝཾ ཁོ, བྷི་ཀྑ་ཝེ, ཡ་སྶ ཀ་སྶ་ཙི བྷི་ཀྑུ་སྶ ཝཱ བྷི་ཀྑུ་ནི་ཡཱ ཝཱ ཨེ་ཝཾ ཏི་བྦཱ བྷ་ཡ་ས་ཉྙཱ པ་ཙྩུ་པ་ཊྛི་ཏཱ ཧོ་ཏི པཱ་རཱ་ཛི་ཀེ་སུ དྷ་མྨེ་སུ. ཏ་སྶེ་ཏཾ པཱ་ཊི་ཀ་ངྑཾ – ཨ་ནཱ་པ་ནྣོ ཝཱ པཱ་རཱ་ཛི་ཀཾ དྷ་མྨཾ ན ཨཱ་པ་ཛྫི་སྶ་ཏི, ཨཱ་པ་ནྣོ ཝཱ པཱ་རཱ་ཛི་ཀཾ དྷ་མྨཾ ཡ་ཐཱ་དྷ་མྨཾ པ་ཊི་ཀ་རི་སྶ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ ཀཱ་ལ༹་ཝ་ཏྠཾ [ཀཱ་ལ༹་ཀཾ ཝ་ཏྠཾ (སཱི. སྱཱ. ཀཾ. པཱི.)] པ་རི་དྷཱ་ཡ ཀེ་སེ པ་ཀི་རི་ཏྭཱ མུ་ས་ལཾ ཁ་ནྡྷེ ཨཱ་རོ་པེ་ཏྭཱ མ་ཧཱ་ཛ་ན་ཀཱ་ཡཾ ཨུ་པ་ས་ངྐ་མི་ཏྭཱ ཨེ་ཝཾ ཝ་དེ་ཡྻ – ‘ཨ་ཧཾ, བྷ་ནྟེ, པཱ་པ་ཀ་མྨཾ ཨ་ཀཱ་སིཾ གཱ་ར་ཡ྄ཧཾ མོ་ས་ལླཾ, ཡེ་ན མེ ཨཱ་ཡ་སྨ་ནྟོ ཨ་ཏྟ་མ་ནཱ ཧོ་ནྟི ཏཾ ཀ་རོ་མཱི’ཏི. ཏ་ཏྲ་ཉྙ་ཏ་ར་སྶ ཐ་ལ་ཊྛ་སྶ པུ་རི་ས་སྶ ཨེ་ཝ་མ་སྶ – ‘པཱ་པ་ཀཾ ཝ་ཏ, བྷོ, ཨ་ཡཾ པུ་རི་སོ ཀ་མྨཾ ཨ་ཀཱ་སི གཱ་ར་ཡ྄ཧཾ མོ་ས་ལླཾ. ཡ་ཏྲ ཧི ནཱ་མ ཀཱ་ལ༹་ཝ་ཏྠཾ པ་རི་དྷཱ་ཡ ཀེ་སེ པ་ཀི་རི་ཏྭཱ མུ་ས་ལཾ ཁ་ནྡྷེ ཨཱ་རོ་པེ་ཏྭཱ མ་ཧཱ་ཛ་ན་ཀཱ་ཡཾ ཨུ་པ་ས་ངྐ་མི་ཏྭཱ ཨེ་ཝཾ ཝ་ཀྑ་ཏི – ‘ཨ་ཧཾ, བྷ་ནྟེ, པཱ་པ་ཀ་མྨཾ ཨ་ཀཱ་སིཾ གཱ་ར་ཡ྄ཧཾ མོ་ས་ལླཾ, ཡེ་ན མེ ཨཱ་ཡ་སྨ་ནྟོ ཨ་ཏྟ་མ་ནཱ ཧོ་ནྟི ཏཾ ཀ་རོ་མཱི་ཏི. སོ ཝ་ཏ་སྶཱ་ཧཾ ཨེ་ཝ་རཱུ་པཾ པཱ་པ་ཀ་མྨཾ ན ཀ་རེ་ཡྻཾ གཱ་ར་ཡ྄ཧཾ མོ་ས་ལླ’ནྟི. ཨེ་ཝ་མེ་ཝཾ ཁོ, བྷི་ཀྑ་ཝེ, ཡ་སྶ ཀ་སྶ་ཙི བྷི་ཀྑུ་སྶ ཝཱ བྷི་ཀྑུ་ནི་ཡཱ ཝཱ ཨེ་ཝཾ ཏི་བྦཱ བྷ་ཡ་ས་ཉྙཱ པ་ཙྩུ་པ་ཊྛི་ཏཱ ཧོ་ཏི ས་ངྒྷཱ་དི་སེ་སེ་སུ དྷ་མྨེ་སུ, ཏ་སྶེ་ཏཾ པཱ་ཊི་ཀ་ངྑཾ – ཨ་ནཱ་པ་ནྣོ ཝཱ ས་ངྒྷཱ་དི་སེ་སཾ དྷ་མྨཾ ན ཨཱ་པ་ཛྫི་སྶ་ཏི, ཨཱ་པ་ནྣོ ཝཱ ས་ངྒྷཱ་དི་སེ་སཾ དྷ་མྨཾ ཡ་ཐཱ་དྷ་མྨཾ པ་ཊི་ཀ་རི་སྶ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ ཀཱ་ལ༹་ཝ་ཏྠཾ པ་རི་དྷཱ་ཡ ཀེ་སེ པ་ཀི་རི་ཏྭཱ བྷ་སྨ་པུ་ཊཾ [ཨ་སྶ་པུ་ཊཾ (སཱི. སྱཱ. ཀཾ. པཱི.)] ཁ་ནྡྷེ ཨཱ་རོ་པེ་ཏྭཱ མ་ཧཱ་ཛ་ན་ཀཱ་ཡཾ ཨུ་པ་ས་ངྐ་མི་ཏྭཱ ཨེ་ཝཾ ཝ་དེ་ཡྻ – ‘ཨ་ཧཾ, བྷ་ནྟེ, པཱ་པ་ཀ་མྨཾ ཨ་ཀཱ་སིཾ གཱ་ར་ཡ྄ཧཾ བྷ་སྨ་པུ་ཊཾ. ཡེ་ན མེ ཨཱ་ཡ་སྨ་ནྟོ ཨ་ཏྟ་མ་ནཱ ཧོ་ནྟི ཏཾ ཀ་རོ་མཱི’ཏི. ཏ་ཏྲ་ཉྙ་ཏ་ར་སྶ ཐ་ལ་ཊྛ་སྶ པུ་རི་ས་སྶ ཨེ་ཝ་མ་སྶ – ‘པཱ་པ་ཀཾ ཝ་ཏ, བྷོ, ཨ་ཡཾ པུ་རི་སོ ཀ་མྨཾ ཨ་ཀཱ་སི གཱ་ར་ཡ྄ཧཾ བྷ་སྨ་པུ་ཊཾ. ཡ་ཏྲ ཧི ནཱ་མ ཀཱ་ལ༹་ཝ་ཏྠཾ པ་རི་དྷཱ་ཡ ཀེ་སེ པ་ཀི་རི་ཏྭཱ བྷ་སྨ་པུ་ཊཾ ཁ་ནྡྷེ ཨཱ་རོ་པེ་ཏྭཱ མ་ཧཱ་ཛ་ན་ཀཱ་ཡཾ ཨུ་པ་ས་ངྐ་མི་ཏྭཱ ཨེ་ཝཾ ཝ་ཀྑ་ཏི – ཨ་ཧཾ, བྷ་ནྟེ, པཱ་པ་ཀ་མྨཾ ཨ་ཀཱ་སིཾ གཱ་ར་ཡ྄ཧཾ བྷ་སྨ་པུ་ཊཾ; ཡེ་ན མེ ཨཱ་ཡ་སྨ་ནྟོ ཨ་ཏྟ་མ་ནཱ ཧོ་ནྟི ཏཾ ཀ་རོ་མཱི་ཏི. སོ ཝ་ཏ་སྶཱ་ཧཾ ཨེ་ཝ་རཱུ་པཾ པཱ་པ་ཀ་མྨཾ ན ཀ་རེ་ཡྻཾ གཱ་ར་ཡ྄ཧཾ བྷ་སྨ་པུ་ཊ’ནྟི. ཨེ་ཝ་མེ་ཝཾ ཁོ, བྷི་ཀྑ་ཝེ, ཡ་སྶ ཀ་སྶ་ཙི བྷི་ཀྑུ་སྶ ཝཱ བྷི་ཀྑུ་ནི་ཡཱ ཝཱ ཨེ་ཝཾ ཏི་བྦཱ བྷ་ཡ་ས་ཉྙཱ པ་ཙྩུ་པ་ཊྛི་ཏཱ ཧོ་ཏི པཱ་ཙི་ཏྟི་ཡེ་སུ དྷ་མྨེ་སུ, ཏ་སྶེ་ཏཾ པཱ་ཊི་ཀ་ངྑཾ – ཨ་ནཱ་པ་ནྣོ ཝཱ པཱ་ཙི་ཏྟི་ཡཾ དྷ་མྨཾ ན ཨཱ་པ་ཛྫི་སྶ་ཏི, ཨཱ་པ་ནྣོ ཝཱ པཱ་ཙི་ཏྟི་ཡཾ དྷ་མྨཾ ཡ་ཐཱ་དྷ་མྨཾ པ་ཊི་ཀ་རི་སྶ་ཏི.
‘‘སེ་ཡྻ་ཐཱ་པི, བྷི་ཀྑ་ཝེ, པུ་རི་སོ ཀཱ་ལ༹་ཝ་ཏྠཾ པ་རི་དྷཱ་ཡ ཀེ་སེ པ་ཀི་རི་ཏྭཱ མ་ཧཱ་ཛ་ན་ཀཱ་ཡཾ ཨུ་པ་ས་ངྐ་མི་ཏྭཱ ཨེ་ཝཾ ཝ་དེ་ཡྻ – ‘ཨ་ཧཾ, བྷ་ནྟེ, པཱ་པ་ཀ་མྨཾ ཨ་ཀཱ་སིཾ གཱ་ར་ཡ྄ཧཾ ཨུ་པ་ཝ་ཛྫཾ. ཡེ་ན མེ ཨཱ་ཡ་སྨ་ནྟོ ཨ་ཏྟ་མ་ནཱ ཧོ་ནྟི ཏཾ ཀ་རོ་མཱི’ཏི. ཏ་ཏྲ་ཉྙ་ཏ་ར་སྶ ཐ་ལ་ཊྛ་སྶ པུ་རི་ས་སྶ ཨེ་ཝ་མ་སྶ – ‘པཱ་པ་ཀཾ ཝ་ཏ, བྷོ, ཨ་ཡཾ པུ་རི་སོ ཀ་མྨཾ ཨ་ཀཱ་སི གཱ་ར་ཡ྄ཧཾ ཨུ་པ་ཝ་ཛྫཾ. ཡ་ཏྲ ཧི ནཱ་མ ཀཱ་ལ༹་ཝ་ཏྠཾ པ་རི་དྷཱ་ཡ ཀེ་སེ པ་ཀི་རི་ཏྭཱ མ་ཧཱ་ཛ་ན་ཀཱ་ཡཾ ཨུ་པ་ས་ངྐ་མི་ཏྭཱ ཨེ་ཝཾ ཝ་ཀྑ་ཏི – ཨ་ཧཾ, བྷ་ནྟེ, པཱ་པ་ཀ་མྨཾ ཨ་ཀཱ་སིཾ གཱ་ར་ཡ྄ཧཾ ཨུ་པ་ཝ་ཛྫཾ; ཡེ་ན མེ ཨཱ་ཡ་སྨ་ནྟོ ཨ་ཏྟ་མ་ནཱ ཧོ་ནྟི ཏཾ ཀ་རོ་མཱི་ཏི. སོ ཝ་ཏ་སྶཱ་ཧཾ ཨེ་ཝ་རཱུ་པཾ པཱ་པ་ཀ་མྨཾ ན ཀ་རེ་ཡྻཾ གཱ་ར་ཡ྄ཧཾ ཨུ་པ་ཝ་ཛྫ’ནྟི. ཨེ་ཝ་མེ་ཝཾ ཁོ, བྷི་ཀྑ་ཝེ, ཡ་སྶ ཀ་སྶ་ཙི བྷི་ཀྑུ་སྶ ཝཱ བྷི་ཀྑུ་ནི་ཡཱ ཝཱ ཨེ་ཝཾ ཏི་བྦཱ བྷ་ཡ་ས་ཉྙཱ པ་ཙྩུ་པ་ཊྛི་ཏཱ ཧོ་ཏི པཱ་ཊི་དེ་ས་ནཱི་ཡེ་སུ དྷ་མྨེ་སུ, ཏ་སྶེ་ཏཾ པཱ་ཊི་ཀ་ངྑཾ – ཨ་ནཱ་པ་ནྣོ ཝཱ པཱ་ཊི་དེ་ས་ནཱི་ཡཾ དྷ་མྨཾ ན ཨཱ་པ་ཛྫི་སྶ་ཏི, ཨཱ་པ་ནྣོ ཝཱ པཱ་ཊི་དེ་ས་ནཱི་ཡཾ དྷ་མྨཾ ཡ་ཐཱ་དྷ་མྨཾ པ་ཊི་ཀ་རི་སྶ་ཏི. ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི ཨཱ་པ་ཏྟི་བྷ་ཡཱ་ནཱི’’ཏི. དུ་ཏི་ཡཾ.
༣. སི་ཀྑཱ་ནི་སཾ་ས་སུ་ཏྟཾ
༢༤༥. ‘‘སི་ཀྑཱ་ནི་སཾ་ས་མི་དཾ, བྷི་ཀྑ་ཝེ, བྲ་ཧྨ་ཙ་རི་ཡཾ ཝུ་སྶ་ཏི པ་ཉྙུ་ཏྟ་རཾ ཝི་མུ་ཏྟི་སཱ་རཾ ས་ཏཱ་དྷི་པ་ཏེ་ཡྻཾ. ཀ་ཐ་ཉྩ, བྷི་ཀྑ་ཝེ, སི་ཀྑཱ་ནི་སཾ་སཾ ཧོ་ཏི? ཨི་དྷ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ ཨཱ་བྷི་ས་མཱ་ཙཱ་རི་ཀཱ སི་ཀྑཱ པ་ཉྙ་ཏྟཱ ཨ་པྤ་ས་ནྣཱ་ནཾ པ་སཱ་དཱ་ཡ པ་ས་ནྣཱ་ནཾ བྷི་ཡྻོ་བྷཱ་ཝཱ་ཡ. ཡ་ཐཱ ཡ་ཐཱ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ ཨཱ་བྷི་ས་མཱ་ཙཱ་རི་ཀཱ སི་ཀྑཱ པ་ཉྙ་ཏྟཱ ཨ་པྤ་ས་ནྣཱ་ནཾ པ་སཱ་དཱ་ཡ པ་ས་ནྣཱ་ནཾ བྷི་ཡྻོ་བྷཱ་ཝཱ་ཡ ཏ་ཐཱ ཏ་ཐཱ སོ ཏ་སྶཱ སི་ཀྑཱ་ཡ ཨ་ཁ་ཎྜ་ཀཱ་རཱི ཧོ་ཏི ཨ་ཙྪི་དྡ་ཀཱ་རཱི ཨ་ས་བ་ལ་ཀཱ་རཱི ཨ་ཀ་མྨཱ་ས་ཀཱ་རཱི, ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ.
‘‘པུ་ན ཙ་པ་རཾ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ ཨཱ་དི་བྲ་ཧྨ་ཙ་རི་ཡི་ཀཱ སི་ཀྑཱ པ་ཉྙ་ཏྟཱ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ. ཡ་ཐཱ ཡ་ཐཱ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ ཨཱ་དི་བྲ་ཧྨ་ཙ་རི་ཡི་ཀཱ སི་ཀྑཱ པ་ཉྙ་ཏྟཱ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ ཏ་ཐཱ ཏ་ཐཱ སོ ཏ་སྶཱ སི་ཀྑཱ་ཡ ཨ་ཁ་ཎྜ་ཀཱ་རཱི ཧོ་ཏི ཨ་ཙྪི་དྡ་ཀཱ་རཱི ཨ་ས་བ་ལ་ཀཱ་རཱི ཨ་ཀ་མྨཱ་ས་ཀཱ་རཱི, ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ. ཨེ་ཝཾ ཁོ, བྷི་ཀྑ་ཝེ, སི་ཀྑཱ་ནི་སཾ་སཾ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, པ་ཉྙུ་ཏྟ་རཾ ཧོ་ཏི? ཨི་དྷ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ དྷ་མྨཱ དེ་སི་ཏཱ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ. ཡ་ཐཱ ཡ་ཐཱ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ དྷ་མྨཱ དེ་སི་ཏཱ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ ཏ་ཐཱ ཏ་ཐཱ་སྶ ཏེ དྷ་མྨཱ པ་ཉྙཱ་ཡ ས་མ་ཝེ་ཀྑི་ཏཱ ཧོ་ནྟི. ཨེ་ཝཾ ཁོ, བྷི་ཀྑ་ཝེ, པ་ཉྙུ་ཏྟ་རཾ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ཝི་མུ་ཏྟི་སཱ་རཾ ཧོ་ཏི? ཨི་དྷ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ དྷ་མྨཱ དེ་སི་ཏཱ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ. ཡ་ཐཱ ཡ་ཐཱ, བྷི་ཀྑ་ཝེ, མ་ཡཱ སཱ་ཝ་ཀཱ་ནཾ དྷ་མྨཱ དེ་སི་ཏཱ ས་བྦ་སོ ས་མྨཱ དུ་ཀྑ་ཀྑ་ཡཱ་ཡ ཏ་ཐཱ ཏ་ཐཱ་སྶ ཏེ དྷ་མྨཱ ཝི་མུ་ཏྟི་ཡཱ ཕུ་སི་ཏཱ ཧོ་ནྟི. ཨེ་ཝཾ ཁོ, བྷི་ཀྑ་ཝེ, ཝི་མུ་ཏྟི་སཱ་རཾ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, ས་ཏཱ་དྷི་པ་ཏེ་ཡྻཾ ཧོ་ཏི? ‘ཨི་ཏི ཨ་པ་རི་པཱུ་རཾ ཝཱ ཨཱ་བྷི་ས་མཱ་ཙཱ་རི་ཀཾ སི་ཀྑཾ པ་རི་པཱུ་རེ་སྶཱ་མི, པ་རི་པཱུ་རཾ ཝཱ ཨཱ་བྷི་ས་མཱ་ཙཱ་རི་ཀཾ སི་ཀྑཾ ཏ་ཏྠ ཏ་ཏྠ པ་ཉྙཱ་ཡ ཨ་ནུ་གྒ་ཧེ་སྶཱ་མཱི’ཏི – ཨ་ཛ྄ཛྷ་ཏྟཾ་ཡེ་ཝ ས་ཏི སཱུ་པ་ཊྛི་ཏཱ ཧོ་ཏི. ‘ཨི་ཏི ཨ་པ་རི་པཱུ་རཾ ཝཱ ཨཱ་དི་བྲ་ཧྨ་ཙ་རི་ཡི་ཀཾ སི་ཀྑཾ པ་རི་པཱུ་རེ་སྶཱ་མི, པ་རི་པཱུ་རཾ ཝཱ ཨཱ་དི་བྲ་ཧྨ་ཙ་རི་ཡི་ཀཾ སི་ཀྑཾ ཏ་ཏྠ ཏ་ཏྠ པ་ཉྙཱ་ཡ ཨ་ནུ་གྒ་ཧེ་སྶཱ་མཱི’ཏི – ཨ་ཛ྄ཛྷ་ཏྟཾ་ཡེ་ཝ ས་ཏི སཱུ་པ་ཊྛི་ཏཱ ཧོ་ཏི. ‘ཨི་ཏི ཨ་ས་མ་ཝེ་ཀྑི་ཏཾ ཝཱ དྷ་མྨཾ པ་ཉྙཱ་ཡ ས་མ་ཝེ་ཀྑི་སྶཱ་མི, ས་མ་ཝེ་ཀྑི་ཏཾ ཝཱ དྷ་མྨཾ ཏ་ཏྠ ཏ་ཏྠ པ་ཉྙཱ་ཡ ཨ་ནུ་གྒ་ཧེ་སྶཱ་མཱི’ཏི – ཨ་ཛ྄ཛྷ་ཏྟཾ་ཡེ་ཝ ས་ཏི སཱུ་པ་ཊྛི་ཏཱ ཧོ་ཏི. ‘ཨི་ཏི ཨ་ཕུ་སི་ཏཾ ཝཱ དྷ་མྨཾ ཝི་མུ་ཏྟི་ཡཱ ཕུ་སི་སྶཱ་མི, ཕུ་སི་ཏཾ ཝཱ དྷ་མྨཾ ཏ་ཏྠ ཏ་ཏྠ པ་ཉྙཱ་ཡ ཨ་ནུ་གྒ་ཧེ་སྶཱ་མཱི’ཏི – ཨ་ཛ྄ཛྷ་ཏྟཾ་ཡེ་ཝ ས་ཏི སཱུ་པ་ཊྛི་ཏཱ ཧོ་ཏི. ཨེ་ཝཾ ཁོ, བྷི་ཀྑ་ཝེ, ས་ཏཱ་དྷི་པ་ཏེ་ཡྻཾ ཧོ་ཏི. ‘སི་ཀྑཱ་ནི་སཾ་ས་མི་དཾ, བྷི་ཀྑ་ཝེ, བྲ་ཧྨ་ཙ་རི་ཡཾ ཝུ་སྶ་ཏི པ་ཉྙུ་ཏྟ་རཾ ཝི་མུ་ཏྟི་སཱ་རཾ ས་ཏཱ་དྷི་པ་ཏེ་ཡྻ’ནྟི, ཨི་ཏི ཡཾ ཏཾ ཝུ་ཏྟཾ ཨི་ད་མེ་ཏཾ པ་ཊི་ཙྩ ཝུ་ཏྟ’’ནྟི. ཏ་ཏི་ཡཾ.
༤. སེ་ཡྻཱ་སུ་ཏྟཾ
༢༤༦. ‘‘ཙ་ཏ་སྶོ ཨི་མཱ, བྷི་ཀྑ་ཝེ, སེ་ཡྻཱ. ཀ་ཏ་མཱ ཙ་ཏ་སྶོ? པེ་ཏ་སེ་ཡྻཱ, ཀཱ་མ་བྷོ་གི་སེ་ཡྻཱ, སཱི་ཧ་སེ་ཡྻཱ, ཏ་ཐཱ་ག་ཏ་སེ་ཡྻཱ. ཀ་ཏ་མཱ ཙ, བྷི་ཀྑ་ཝེ, པེ་ཏ་སེ་ཡྻཱ? ཡེ་བྷུ་ཡྻེ་ན, བྷི་ཀྑ་ཝེ, པེ་ཏཱ ཨུ་ཏྟཱ་ནཱ སེ་ནྟི; ཨ་ཡཾ ཝུ་ཙྩ་ཏི, བྷི་ཀྑ་ཝེ, པེ་ཏ་སེ་ཡྻཱ.
‘‘ཀ་ཏ་མཱ ཙ, བྷི་ཀྑ་ཝེ, ཀཱ་མ་བྷོ་གི་སེ་ཡྻཱ? ཡེ་བྷུ་ཡྻེ་ན, བྷི་ཀྑ་ཝེ, ཀཱ་མ་བྷོ་གཱི ཝཱ་མེ་ན པ་སྶེ་ན སེ་ནྟི; ཨ་ཡཾ ཝུ་ཙྩ་ཏི, བྷི་ཀྑ་ཝེ, ཀཱ་མ་བྷོ་གི་སེ་ཡྻཱ.
‘‘ཀ་ཏ་མཱ ཙ, བྷི་ཀྑ་ཝེ, སཱི་ཧ་སེ་ཡྻཱ? སཱི་ཧོ, བྷི་ཀྑ་ཝེ, མི་ག་རཱ་ཛཱ ད་ཀྑི་ཎེ་ན པ་སྶེ་ན སེ་ཡྻཾ ཀ་པྤེ་ཏི, པཱ་དེ པཱ་དཾ ཨ་ཙྩཱ་དྷཱ་ཡ, ཨ་ནྟ་ར་ས་ཏྠི་མྷི ན་ངྒུ་ཊྛཾ ཨ་ནུ་པ་ཀྑི་པི་ཏྭཱ. སོ པ་ཊི་བུ་ཛ྄ཛྷི་ཏྭཱ པུ་རི་མཾ ཀཱ་ཡཾ ཨ་བྦྷུ་ནྣཱ་མེ་ཏྭཱ པ་ཙྪི་མཾ ཀཱ་ཡཾ ཨ་ནུ་ཝི་ལོ་ཀེ་ཏི. ས་ཙེ, བྷི་ཀྑ་ཝེ, སཱི་ཧོ མི་ག་རཱ་ཛཱ ཀི་ཉྩི པ་སྶ་ཏི ཀཱ་ཡ་སྶ ཝི་ཀྑི་ཏྟཾ ཝཱ ཝི་ས་ཊཾ ཝཱ, ཏེ་ན, བྷི་ཀྑ་ཝེ, སཱི་ཧོ མི་ག་རཱ་ཛཱ ཨ་ན་ཏྟ་མ་ནོ ཧོ་ཏི. ས་ཙེ པ་ན, བྷི་ཀྑ་ཝེ, སཱི་ཧོ མི་ག་རཱ་ཛཱ ན ཀི་ཉྩི པ་སྶ་ཏི ཀཱ་ཡ་སྶ ཝི་ཀྑི་ཏྟཾ ཝཱ ཝི་ས་ཊཾ ཝཱ, ཏེ་ན, བྷི་ཀྑ་ཝེ, སཱི་ཧོ མི་ག་རཱ་ཛཱ ཨ་ཏྟ་མ་ནོ ཧོ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, སཱི་ཧ་སེ་ཡྻཱ.
‘‘ཀ་ཏ་མཱ ཙ, བྷི་ཀྑ་ཝེ, ཏ་ཐཱ་ག་ཏ་སེ་ཡྻཱ? ཨི་དྷ, བྷི་ཀྑ་ཝེ, ཏ་ཐཱ་ག་ཏོ ཝི་ཝི་ཙྩེ་ཝ ཀཱ་མེ་ཧི…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ཏ་ཐཱ་ག་ཏ་སེ་ཡྻཱ. ཨི་མཱ ཁོ, བྷི་ཀྑ་ཝེ, ཙ་ཏ་སྶོ སེ་ཡྻཱ’’ཏི. ཙ་ཏུ་ཏྠཾ.
༥. ཐཱུ་པཱ་ར་ཧ་སུ་ཏྟཾ
༢༤༧. ‘‘ཙ་ཏྟཱ་རོ་མེ, བྷི་ཀྑ་ཝེ, ཐཱུ་པཱ་ར་ཧཱ. ཀ་ཏ་མེ ཙ་ཏྟཱ་རོ? ཏ་ཐཱ་ག་ཏོ ཨ་ར་ཧཾ ས་མྨཱ་ས་མྦུ་དྡྷོ ཐཱུ་པཱ་ར་ཧོ, པ་ཙྩེ་ཀ་བུ་དྡྷོ ཐཱུ་པཱ་ར་ཧོ, ཏ་ཐཱ་ག་ཏ་སཱ་ཝ་ཀོ ཐཱུ་པཱ་ར་ཧོ, རཱ་ཛཱ ཙ་ཀྐ་ཝ་ཏྟཱི ཐཱུ་པཱ་ར་ཧོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཐཱུ་པཱ་ར་ཧཱ’’ཏི. པ་ཉྩ་མཾ.
༦. པ་ཉྙཱ་ཝུ་དྡྷི་སུ་ཏྟཾ
༢༤༨. ‘‘ཙ་ཏྟཱ་རོ་མེ, བྷི་ཀྑ་ཝེ, དྷ་མྨཱ པ་ཉྙཱ་ཝུ་དྡྷི་ཡཱ སཾ་ཝ་ཏྟ་ནྟི. ཀ་ཏ་མེ ཙ་ཏྟཱ་རོ? ས་པྤུ་རི་ས་སཾ་སེ་ཝོ, ས་དྡྷ་མྨ་ས་ཝ་ནཾ, ཡོ་ནི་སོ་མ་ན་སི་ཀཱ་རོ, དྷ་མྨཱ་ནུ་དྷ་མྨ་པྤ་ཊི་པ་ཏྟི – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ དྷ་མྨཱ པ་ཉྙཱ་ཝུ་དྡྷི་ཡཱ སཾ་ཝ་ཏྟ་ནྟཱི’’ཏི. ཚ་ཊྛཾ.
༧. བ་ཧུ་ཀཱ་ར་སུ་ཏྟཾ
༢༤༩. ‘‘ཙ་ཏྟཱ་རོ་མེ, བྷི་ཀྑ་ཝེ, དྷ་མྨཱ མ་ནུ་སྶ་བྷཱུ་ཏ་སྶ བ་ཧུ་ཀཱ་རཱ ཧོ་ནྟི. ཀ་ཏ་མེ ཙ་ཏྟཱ་རོ? ས་པྤུ་རི་ས་སཾ་སེ་ཝོ, ས་དྡྷ་མྨ་ས་ཝ་ནཾ, ཡོ་ནི་སོ་མ་ན་སི་ཀཱ་རོ, དྷ་མྨཱ་ནུ་དྷ་མྨ་པྤ་ཊི་པ་ཏྟི – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ དྷ་མྨཱ མ་ནུ་སྶ་བྷཱུ་ཏ་སྶ བ་ཧུ་ཀཱ་རཱ ཧོ་ནྟཱི’’ཏི. ས་ཏྟ་མཾ.
༨. པ་ཋ་མ་ཝོ་ཧཱ་ར་སུ་ཏྟཾ
༢༥༠. ‘‘ཙ་ཏྟཱ་རོ་མེ, བྷི་ཀྑ་ཝེ, ཨ་ན་རི་ཡ་ཝོ་ཧཱ་རཱ. ཀ་ཏ་མེ ཙ་ཏྟཱ་རོ? ཨ་དི་ཊྛེ དི་ཊྛ་ཝཱ་དི་ཏཱ, ཨ་སུ་ཏེ སུ་ཏ་ཝཱ་དི་ཏཱ, ཨ་མུ་ཏེ མུ་ཏ་ཝཱ་དི་ཏཱ, ཨ་ཝི་ཉྙཱ་ཏེ ཝི་ཉྙཱ་ཏ་ཝཱ་དི་ཏཱ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ’’ཏི. ཨ་ཊྛ་མཾ.
༩. དུ་ཏི་ཡ་ཝོ་ཧཱ་ར་སུ་ཏྟཾ
༢༥༡. ‘‘ཙ་ཏྟཱ་རོ་མེ, བྷི་ཀྑ་ཝེ, ཨ་རི་ཡ་ཝོ་ཧཱ་རཱ. ཀ་ཏ་མེ ཙ་ཏྟཱ་རོ? ཨ་དི་ཊྛེ ཨ་དི་ཊྛ་ཝཱ་དི་ཏཱ, ཨ་སུ་ཏེ ཨ་སུ་ཏ་ཝཱ་དི་ཏཱ, ཨ་མུ་ཏེ ཨ་མུ་ཏ་ཝཱ་དི་ཏཱ, ཨ་ཝི་ཉྙཱ་ཏེ ཨ་ཝི་ཉྙཱ་ཏ་ཝཱ་དི་ཏཱ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨ་རི་ཡ་ཝོ་ཧཱ་རཱ’’ཏི. ན་ཝ་མཾ.
༡༠. ཏ་ཏི་ཡ་ཝོ་ཧཱ་ར་སུ་ཏྟཾ
༢༥༢. ‘‘ཙ་ཏྟཱ་རོ་མེ, བྷི་ཀྑ་ཝེ, ཨ་ན་རི་ཡ་ཝོ་ཧཱ་རཱ. ཀ་ཏ་མེ ཙ་ཏྟཱ་རོ? དི་ཊྛེ ཨ་དི་ཊྛ་ཝཱ་དི་ཏཱ, སུ་ཏེ ཨ་སུ་ཏ་ཝཱ་དི་ཏཱ, མུ་ཏེ ཨ་མུ་ཏ་ཝཱ་དི་ཏཱ, ཝི་ཉྙཱ་ཏེ ཨ་ཝི་ཉྙཱ་ཏ་ཝཱ་དི་ཏཱ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ’’ཏི. ད་ས་མཾ.
༡༡. ཙ་ཏུ་ཏྠ་ཝོ་ཧཱ་ར་སུ་ཏྟཾ
༢༥༣. ‘‘ཙ་ཏྟཱ་རོ་མེ, བྷི་ཀྑ་ཝེ, ཨ་རི་ཡ་ཝོ་ཧཱ་རཱ. ཀ་ཏ་མེ ཙ་ཏྟཱ་རོ? དི་ཊྛེ དི་ཊྛ་ཝཱ་དི་ཏཱ, སུ་ཏེ སུ་ཏ་ཝཱ་དི་ཏཱ, མུ་ཏེ མུ་ཏ་ཝཱ་དི་ཏཱ, ཝི་ཉྙཱ་ཏེ ཝི་ཉྙཱ་ཏ་ཝཱ་དི་ཏཱ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨ་རི་ཡ་ཝོ་ཧཱ་རཱ’’ཏི. ཨེ་ཀཱ་ད་ས་མཾ.
ཨཱ་པ་ཏྟི་བྷ་ཡ་ཝ་གྒོ པ་ཉྩ་མོ.