(༢༦) ༦. ཨ་བྷི་ཉྙཱ་ཝ་གྒོ

༡. ཨ་བྷི་ཉྙཱ་སུ་ཏྟཾ

༢༥༤. ‘‘ཙ་ཏྟཱ་རོ་མེ, བྷི་ཀྑ་ཝེ, དྷ་མྨཱ. ཀ་ཏ་མེ ཙ་ཏྟཱ་རོ? ཨ་ཏྠི, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ; ཨ་ཏྠི, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ; ཨ་ཏྠི, བྷི་ཀྑ་ཝེ, དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ; ཨ་ཏྠི, བྷི་ཀྑ་ཝེ, དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ.

‘‘ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ? པ་ཉྩུ་པཱ་དཱ་ན་ཀྑ་ནྡྷཱ [པ་ཉྩུ་པཱ་དཱ་ན་ཀྑ་ནྡྷཱ་ཏི་སྶ ཝ་ཙ་ནཱི་ཡཾ (ཀ.)] – ཨི་མེ ཝུ་ཙྩ་ནྟི, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་རི་ཉྙེ་ཡྻཱ.

‘‘ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ? ཨ་ཝི་ཛྫཱ ཙ བྷ་ཝ་ཏ་ཎྷཱ ཙ – ཨི་མེ ཝུ་ཙྩ་ནྟི, བྷི་ཀྑ་ཝེ, དྷ་མྨཱ ཨ་བྷི་ཉྙཱ པ་ཧཱ་ཏ་བྦཱ.

‘‘ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ? ས་མ་ཐོ ཙ ཝི་པ་སྶ་ནཱ ཙ – ཨི་མེ ཝུ་ཙྩ་ནྟི, བྷི་ཀྑ་ཝེ, དྷ་མྨཱ ཨ་བྷི་ཉྙཱ བྷཱ་ཝེ་ཏ་བྦཱ.

‘‘ཀ་ཏ་མེ ཙ, བྷི་ཀྑ་ཝེ, དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ? ཝི་ཛྫཱ ཙ ཝི་མུ་ཏྟི ཙ – ཨི་མེ ཝུ་ཙྩ་ནྟི, བྷི་ཀྑ་ཝེ, དྷ་མྨཱ ཨ་བྷི་ཉྙཱ ས་ཙྪི་ཀཱ་ཏ་བྦཱ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ དྷ་མྨཱ’’ཏི. པ་ཋ་མཾ.

༢. པ་རི་ཡེ་ས་ནཱ་སུ་ཏྟཾ

༢༥༥. ‘‘ཙ་ཏ་སྶོ ཨི་མཱ, བྷི་ཀྑ་ཝེ, ཨ་ན་རི་ཡ་པ་རི་ཡེ་ས་ནཱ. ཀ་ཏ་མཱ ཙ་ཏ་སྶོ? ཨི་དྷ, བྷི་ཀྑ་ཝེ, ཨེ་ཀ་ཙྩོ ཨ་ཏྟ་ནཱ ཛ་རཱ་དྷ་མྨོ ས་མཱ་ནོ ཛ་རཱ་དྷ་མྨཾ་ཡེ་ཝ པ་རི་ཡེ་ས་ཏི; ཨ་ཏྟ་ནཱ བྱཱ་དྷི་དྷ་མྨོ ས་མཱ་ནོ བྱཱ་དྷི་དྷ་མྨཾ་ཡེ་ཝ པ་རི་ཡེ་ས་ཏི; ཨ་ཏྟ་ནཱ མ་ར་ཎ་དྷ་མྨོ ས་མཱ་ནོ མ་ར་ཎ་དྷ་མྨཾ་ཡེ་ཝ པ་རི་ཡེ་ས་ཏི; ཨ་ཏྟ་ནཱ སཾ་ཀི་ལེ་ས་དྷ་མྨོ ས་མཱ་ནོ སཾ་ཀི་ལེ་ས་དྷ་མྨཾ་ཡེ་ཝ པ་རི་ཡེ་ས་ཏི. ཨི་མཱ ཁོ, བྷི་ཀྑ་ཝེ, ཙ་ཏ་སྶོ ཨ་ན་རི་ཡ་པ་རི་ཡེ་ས་ནཱ.

‘‘ཙ་ཏ་སྶོ ཨི་མཱ, བྷི་ཀྑ་ཝེ, ཨ་རི་ཡ་པ་རི་ཡེ་ས་ནཱ. ཀ་ཏ་མཱ ཙ་ཏ་སྶོ? ཨི་དྷ, བྷི་ཀྑ་ཝེ, ཨེ་ཀ་ཙྩོ ཨ་ཏྟ་ནཱ ཛ་རཱ་དྷ་མྨོ ས་མཱ་ནོ ཛ་རཱ་དྷ་མྨེ ཨཱ་དཱི་ན་ཝཾ ཝི་དི་ཏྭཱ ཨ་ཛ་རཾ ཨ་ནུ་ཏྟ་རཾ ཡོ་ག་ཀྑེ་མཾ ནི་བྦཱ་ནཾ པ་རི་ཡེ་ས་ཏི; ཨ་ཏྟ་ནཱ བྱཱ་དྷི་དྷ་མྨོ ས་མཱ་ནོ བྱཱ་དྷི་དྷ་མྨེ ཨཱ་དཱི་ན་ཝཾ ཝི་དི་ཏྭཱ ཨ་བྱཱ་དྷིཾ ཨ་ནུ་ཏྟ་རཾ ཡོ་ག་ཀྑེ་མཾ ནི་བྦཱ་ནཾ པ་རི་ཡེ་ས་ཏི; ཨ་ཏྟ་ནཱ མ་ར་ཎ་དྷ་མྨོ ས་མཱ་ནོ མ་ར་ཎ་དྷ་མྨེ ཨཱ་དཱི་ན་ཝཾ ཝི་དི་ཏྭཱ ཨ་མ་ཏཾ ཨ་ནུ་ཏྟ་རཾ ཡོ་ག་ཀྑེ་མཾ ནི་བྦཱ་ནཾ པ་རི་ཡེ་ས་ཏི; ཨ་ཏྟ་ནཱ སཾ་ཀི་ལེ་ས་དྷ་མྨོ ས་མཱ་ནོ སཾ་ཀི་ལེ་ས་དྷ་མྨེ ཨཱ་དཱི་ན་ཝཾ ཝི་དི་ཏྭཱ ཨ་སཾ་ཀི་ལི་ཊྛཾ ཨ་ནུ་ཏྟ་རཾ ཡོ་ག་ཀྑེ་མཾ ནི་བྦཱ་ནཾ པ་རི་ཡེ་ས་ཏི. ཨི་མཱ ཁོ, བྷི་ཀྑ་ཝེ, ཙ་ཏ་སྶོ ཨ་རི་ཡ་པ་རི་ཡེ་ས་ནཱ’’ཏི. དུ་ཏི་ཡཾ.

༣. ས་ངྒ་ཧ་ཝ་ཏྠུ་སུ་ཏྟཾ

༢༥༦. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ས་ངྒ་ཧ་ཝ་ཏྠཱུ་ནི. ཀ་ཏ་མཱ་ནི ཙ་ཏྟཱ་རི? དཱ་ནཾ, པེ་ཡྻ་ཝ་ཛྫཾ [པི་ཡ་ཝཱ་ཙཱ (ཀ.) ཨ. ནི. ༤.༣༢ པ་སྶི་ཏ་བྦཾ], ཨ་ཏྠ་ཙ་རི་ཡཱ, ས་མཱ་ན་ཏྟ་ཏཱ – ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི ས་ངྒ་ཧ་ཝ་ཏྠཱུ་ནཱི’’ཏི.

༤. མཱ་ལུ་ཀྱ་པུ་ཏྟ་སུ་ཏྟཾ

༢༥༧. ཨ་ཐ ཁོ ཨཱ་ཡ་སྨཱ མཱ་ལུ་ཀྱ་པུ་ཏྟོ [མཱ་ལུ་ངྐྱ་པུ་ཏྟོ (སཱི. སྱཱ. ཀཾ. པཱི.)] ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ མཱ་ལུ་ཀྱ་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘སཱ་དྷུ མེ, བྷ་ནྟེ, བྷ་ག་ཝཱ སཾ་ཁི་ཏྟེ་ན དྷ་མྨཾ དེ་སེ་ཏུ, ཡ་མ་ཧཾ བྷ་ག་ཝ་ཏོ དྷ་མྨཾ སུ་ཏྭཱ ཨེ་ཀོ ཝཱུ་པ་ཀ་ཊྛོ ཨ་པྤ་མ་ཏྟོ ཨཱ་ཏཱ་པཱི པ་ཧི་ཏ་ཏྟོ ཝི་ཧ་རེ་ཡྻ’’ནྟི. ‘‘ཨེ་ཏྠ ཨི་དཱ་ནི, མཱ་ལུ་ཀྱ་པུ་ཏྟ, ཀིཾ ད་ཧ་རེ བྷི་ཀྑཱུ ཝ་ཀྑཱ་མ; ཡ་ཏྲ ཧི ནཱ་མ ཏྭཾ ཛི་ཎྞོ ཝུ་དྡྷོ མ་ཧ་ལླ་ཀོ ཏ་ཐཱ་ག་ཏ་སྶ སཾ་ཁི་ཏྟེ་ན ཨོ་ཝཱ་དཾ ཡཱ་ཙ་སཱི’’ཏི! ‘‘དེ་སེ་ཏུ མེ, བྷ་ནྟེ, བྷ་ག་ཝཱ སཾ་ཁི་ཏྟེ་ན དྷ་མྨཾ; དེ་སེ་ཏུ སུ་ག་ཏོ སཾ་ཁི་ཏྟེ་ན དྷ་མྨཾ. ཨ་པྤེ་ཝ ནཱ་མཱ་ཧཾ བྷ་ག་ཝ་ཏོ བྷཱ་སི་ཏ་སྶ ཨ་ཏྠཾ ཨཱ་ཛཱ་ནེ་ཡྻཾ; ཨ་པྤེ་ཝ ནཱ་མཱ་ཧཾ བྷ་ག་ཝ་ཏོ བྷཱ་སི་ཏ་སྶ དཱ་ཡཱ་དོ [བྷ་ག་ཝ་ཏོ སཱ་ཝ་ཀོ (ཀ.)] ཨ་སྶ’’ནྟི.

‘‘ཙ་ཏྟཱ་རོ་མེ, མཱ་ལུ་ཀྱ་པུ་ཏྟ, ཏ་ཎྷུ་པྤཱ་དཱ ཡ་ཏྠ བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི. ཀ་ཏ་མེ ཙ་ཏྟཱ་རོ? ཙཱི་ཝ་ར་ཧེ་ཏུ ཝཱ, མཱ་ལུ་ཀྱ་པུ་ཏྟ, བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི. པི་ཎྜ་པཱ་ཏ་ཧེ་ཏུ ཝཱ, མཱ་ལུ་ཀྱ་པུ་ཏྟ, བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི. སེ་ནཱ་ས་ན་ཧེ་ཏུ ཝཱ, མཱ་ལུ་ཀྱ་པུ་ཏྟ, བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི. ཨི་ཏི་བྷ་ཝཱ་བྷ་ཝ་ཧེ་ཏུ ཝཱ, མཱ་ལུ་ཀྱ་པུ་ཏྟ, བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི. ཨི་མེ ཁོ, མཱ་ལུ་ཀྱ་པུ་ཏྟ, ཙ་ཏྟཱ་རོ ཏ་ཎྷུ་པྤཱ་དཱ ཡ་ཏྠ བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི. ཡ་ཏོ ཁོ, མཱ་ལུ་ཀྱ་པུ་ཏྟ, བྷི་ཀྑུ་ནོ ཏ་ཎྷཱ པ་ཧཱི་ནཱ ཧོ་ཏི ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ, ཨ་ཡཾ ཝུ་ཙྩ་ཏི, མཱ་ལུ་ཀྱ་པུ་ཏྟ, ‘བྷི་ཀྑུ ཨ་ཙྪེ་ཙྪི ཏ་ཎྷཾ, ཝི་ཝ་ཏྟ་ཡི སཾ་ཡོ་ཛ་ནཾ, ས་མྨཱ མཱ་ནཱ་བྷི་ས་མ་ཡཱ ཨ་ནྟ་མ་ཀཱ་སི དུ་ཀྑ་སྶཱ’’’ཏི.

ཨ་ཐ ཁོ ཨཱ་ཡ་སྨཱ མཱ་ལུ་ཀྱ་པུ་ཏྟོ བྷ་ག་ཝ་ཏཱ ཨི་མི་ནཱ ཨོ་ཝཱ་དེ་ན ཨོ་ཝ་དི་ཏོ ཨུ་ཊྛཱ་ཡཱ་ས་ནཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ ཨཱ་ཡ་སྨཱ མཱ་ལུ་ཀྱ་པུ་ཏྟོ ཨེ་ཀོ ཝཱུ་པ་ཀ་ཊྛོ ཨ་པྤ་མ་ཏྟོ ཨཱ་ཏཱ་པཱི པ་ཧི་ཏ་ཏྟོ ཝི་ཧ་ར་ནྟོ ན་ཙི་ར་སྶེ་ཝ – ཡ་སྶ་ཏྠཱ་ཡ ཀུ་ལ་པུ་ཏྟཱ ས་མྨ་དེ་ཝ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་ནྟི, ཏ་ད་ནུ་ཏྟ་རཾ – བྲ་ཧྨ་ཙ་རི་ཡ་པ་རི་ཡོ་སཱ་ནཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧཱ་སི. ‘‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ’’ཏི ཨ་བྦྷ་ཉྙཱ་སི. ཨ་ཉྙ་ཏ་རོ ཙ པ་ནཱ་ཡ་སྨཱ མཱ་ལུ་ཀྱ་པུ་ཏྟོ ཨ་ར་ཧ་ཏཾ ཨ་ཧོ་སཱི་ཏི. ཙ་ཏུ་ཏྠཾ.

༥. ཀུ་ལ་སུ་ཏྟཾ

༢༥༨. ‘‘ཡཱ་ནི ཀཱ་ནི་ཙི, བྷི་ཀྑ་ཝེ, ཀུ་ལཱ་ནི བྷོ་གེ་སུ མ་ཧ་ཏྟཾ པ་ཏྟཱ་ནི ན ཙི་ར་ཊྛི་ཏི་ཀཱ་ནི བྷ་ཝ་ནྟི, ས་བྦཱ་ནི ཏཱ་ནི ཙ་ཏཱུ་ཧི ཋཱ་ནེ་ཧི, ཨེ་ཏེ་སཾ ཝཱ ཨ་ཉྙ་ཏ་རེ་ན. ཀ་ཏ་མེ་ཧི ཙ་ཏཱུ་ཧི? ན་ཊྛཾ ན ག་ཝེ་ས་ནྟི, ཛི་ཎྞཾ ན པ་ཊི་ས་ངྑ་རོ་ནྟི, ཨ་པ་རི་མི་ཏ་པཱ་ན་བྷོ་ཛ་ནཱ ཧོ་ནྟི, དུ་སྶཱི་ལཾ ཨི་ཏྠིཾ ཝཱ པུ་རི་སཾ ཝཱ ཨཱ་དྷི་པ་ཙྩེ ཋ་པེ་ནྟི. ཡཱ་ནི ཀཱ་ནི་ཙི, བྷི་ཀྑ་ཝེ, ཀུ་ལཱ་ནི བྷོ་གེ་སུ མ་ཧ་ཏྟཾ པ་ཏྟཱ་ནི ན ཙི་ར་ཊྛི་ཏི་ཀཱ་ནི བྷ་ཝ་ནྟི, ས་བྦཱ་ནི ཏཱ་ནི ཨི་མེ་ཧི ཙ་ཏཱུ་ཧི ཋཱ་ནེ་ཧི, ཨེ་ཏེ་སཾ ཝཱ ཨ་ཉྙ་ཏ་རེ་ན.

‘‘ཡཱ་ནི ཀཱ་ནི་ཙི, བྷི་ཀྑ་ཝེ, ཀུ་ལཱ་ནི བྷོ་གེ་སུ མ་ཧ་ཏྟཾ པ་ཏྟཱ་ནི ཙི་ར་ཊྛི་ཏི་ཀཱ་ནི བྷ་ཝ་ནྟི, ས་བྦཱ་ནི ཏཱ་ནི ཙ་ཏཱུ་ཧི ཋཱ་ནེ་ཧི, ཨེ་ཏེ་སཾ ཝཱ ཨ་ཉྙ་ཏ་རེ་ན. ཀ་ཏ་མེ་ཧི ཙ་ཏཱུ་ཧི? ན་ཊྛཾ ག་ཝེ་ས་ནྟི, ཛི་ཎྞཾ པ་ཊི་ས་ངྑ་རོ་ནྟི, པ་རི་མི་ཏ་པཱ་ན་བྷོ་ཛ་ནཱ ཧོ་ནྟི, སཱི་ལ་ཝ་ནྟཾ ཨི་ཏྠིཾ ཝཱ པུ་རི་སཾ ཝཱ ཨཱ་དྷི་པ་ཙྩེ ཋ་པེ་ནྟི. ཡཱ་ནི ཀཱ་ནི་ཙི, བྷི་ཀྑ་ཝེ, ཀུ་ལཱ་ནི བྷོ་གེ་སུ མ་ཧ་ཏྟཾ པ་ཏྟཱ་ནི ཙི་ར་ཊྛི་ཏི་ཀཱ་ནི བྷ་ཝ་ནྟི, ས་བྦཱ་ནི ཏཱ་ནི ཨི་མེ་ཧི ཙ་ཏཱུ་ཧི ཋཱ་ནེ་ཧི, ཨེ་ཏེ་སཾ ཝཱ ཨ་ཉྙ་ཏ་རེ་ནཱ’’ཏི. པ་ཉྩ་མཾ.

༦. པ་ཋ་མ་ཨཱ་ཛཱ་ནཱི་ཡ་སུ་ཏྟཾ

༢༥༩. ‘‘ཙ་ཏཱུ་ཧི, བྷི་ཀྑ་ཝེ, ཨ་ངྒེ་ཧི ས་མ་ནྣཱ་ག་ཏོ ར་ཉྙོ བྷ་དྲོ ཨ་སྶཱ་ཛཱ་ནཱི་ཡོ རཱ་ཛཱ་ར་ཧོ ཧོ་ཏི རཱ་ཛ་བྷོ་གྒོ, ར་ཉྙོ ཨ་ངྒ་ནྟེ་ཝ ས་ངྑཾ ག་ཙྪ་ཏི. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, ར་ཉྙོ བྷ་དྲོ ཨ་སྶཱ་ཛཱ་ནཱི་ཡོ ཝ་ཎྞ་ས་མྤ་ནྣོ ཙ ཧོ་ཏི བ་ལ་ས་མྤ་ནྣོ ཙ ཛ་ཝ་ས་མྤ་ནྣོ ཙ ཨཱ་རོ་ཧ་པ་རི་ཎཱ་ཧ་ས་མྤ་ནྣོ ཙ. ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི ཨ་ངྒེ་ཧི ས་མ་ནྣཱ་ག་ཏོ ར་ཉྙོ བྷ་དྲོ ཨ་སྶཱ་ཛཱ་ནཱི་ཡོ རཱ་ཛཱ་ར་ཧོ ཧོ་ཏི རཱ་ཛ་བྷོ་གྒོ, ར་ཉྙོ ཨ་ངྒ་ནྟེ་ཝ ས་ངྑཾ ག་ཙྪ་ཏི.

‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ཨཱ་ཧུ་ནེ་ཡྻོ ཧོ་ཏི…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, བྷི་ཀྑུ ཝ་ཎྞ་ས་མྤ་ནྣོ ཙ ཧོ་ཏི བ་ལ་ས་མྤ་ནྣོ ཙ ཛ་ཝ་ས་མྤ་ནྣོ ཙ ཨཱ་རོ་ཧ་པ་རི་ཎཱ་ཧ་ས་མྤ་ནྣོ ཙ.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ཝ་ཎྞ་ས་མྤ་ནྣོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ སཱི་ལ་ཝཱ ཧོ་ཏི…པེ… ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཝ་ཎྞ་ས་མྤ་ནྣོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ བ་ལ་ས་མྤ་ནྣོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ཨཱ་ར་དྡྷ་ཝཱི་རི་ཡོ ཝི་ཧ་ར་ཏི ཨ་ཀུ་ས་ལཱ་ནཾ དྷ་མྨཱ་ནཾ པ་ཧཱ་ནཱ་ཡ, ཀུ་ས་ལཱ་ནཾ དྷ་མྨཱ་ནཾ ཨུ་པ་ས་མྤ་དཱ་ཡ, ཐཱ་མ་ཝཱ ད་ལ༹ྷ་པ་ར་ཀྐ་མོ ཨ་ནི་ཀྑི་ཏྟ་དྷུ་རོ ཀུ་ས་ལེ་སུ དྷ་མྨེ་སུ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ བ་ལ་ས་མྤ་ནྣོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ཛ་ཝ་ས་མྤ་ནྣོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ‘ཨི་དཾ དུ་ཀྑ’ནྟི ཡ་ཐཱ་བྷཱུ་ཏཾ པ་ཛཱ་ནཱ་ཏི…པེ… ‘ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ’ཏི ཡ་ཐཱ་བྷཱུ་ཏཾ པ་ཛཱ་ནཱ་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཛ་ཝ་ས་མྤ་ནྣོ ཧོ་ཏི.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ཨཱ་རོ་ཧ་པ་རི་ཎཱ་ཧ་ས་མྤ་ནྣོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ལཱ་བྷཱི ཧོ་ཏི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ནཾ. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཨཱ་རོ་ཧ་པ་རི་ཎཱ་ཧ་ས་མྤ་ནྣོ ཧོ་ཏི.

‘‘ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ཨཱ་ཧུ་ནེ་ཡྻོ ཧོ་ཏི…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’’ཏི. ཚ་ཊྛཾ.

༧. དུ་ཏི་ཡ་ཨཱ་ཛཱ་ནཱི་ཡ་སུ་ཏྟཾ

༢༦༠. ‘‘ཙ་ཏཱུ་ཧི, བྷི་ཀྑ་ཝེ, ཨ་ངྒེ་ཧི ས་མ་ནྣཱ་ག་ཏོ ར་ཉྙོ བྷ་དྲོ ཨ་སྶཱ་ཛཱ་ནཱི་ཡོ རཱ་ཛཱ་ར་ཧོ ཧོ་ཏི རཱ་ཛ་བྷོ་གྒོ, ར་ཉྙོ ཨ་ངྒ་ནྟེ་ཝ ས་ངྑཾ ག་ཙྪ་ཏི. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, ར་ཉྙོ བྷ་དྲོ ཨ་སྶཱ་ཛཱ་ནཱི་ཡོ ཝ་ཎྞ་ས་མྤ་ནྣོ ཙ ཧོ་ཏི, བ་ལ་ས་མྤ་ནྣོ ཙ, ཛ་ཝ་ས་མྤ་ནྣོ ཙ, ཨཱ་རོ་ཧ་པ་རི་ཎཱ་ཧ་ས་མྤ་ནྣོ ཙ. ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི ཨ་ངྒེ་ཧི ས་མ་ནྣཱ་ག་ཏོ ར་ཉྙོ བྷ་དྲོ ཨ་སྶཱ་ཛཱ་ནཱི་ཡོ རཱ་ཛཱ་ར་ཧོ ཧོ་ཏི རཱ་ཛ་བྷོ་གྒོ, ར་ཉྙོ ཨ་ངྒ་ནྟེ་ཝ ས་ངྑཾ ག་ཙྪ་ཏི.

‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ཨཱ་ཧུ་ནེ་ཡྻོ ཧོ་ཏི…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ. ཀ་ཏ་མེ་ཧི ཙ་ཏཱུ་ཧི? ཨི་དྷ, བྷི་ཀྑ་ཝེ, བྷི་ཀྑུ ཝ་ཎྞ་ས་མྤ་ནྣོ ཙ ཧོ་ཏི, བ་ལ་ས་མྤ་ནྣོ ཙ, ཛ་ཝ་ས་མྤ་ནྣོ ཙ, ཨཱ་རོ་ཧ་པ་རི་ཎཱ་ཧ་ས་མྤ་ནྣོ ཙ.

‘‘ཀ་ཐ་ཉྩ, བྷི་ཀྑ་ཝེ, བྷི་ཀྑུ ཛ་ཝ་ས་མྤ་ནྣོ ཧོ་ཏི? ཨི་དྷ, བྷི་ཀྑ་ཝེ, བྷི་ཀྑུ ཨཱ་ས་ཝཱ་ནཾ ཁ་ཡཱ…པེ… ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཝཾ ཁོ, བྷི་ཀྑ་ཝེ, བྷི་ཀྑུ ཛ་ཝ་ས་མྤ་ནྣོ ཧོ་ཏི.

‘‘ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ཨཱ་ཧུ་ནེ་ཡྻོ ཧོ་ཏི…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ’’ཏི. ས་ཏྟ་མཾ.

༨. བ་ལ་སུ་ཏྟཾ

༢༦༡. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, བ་ལཱ་ནི. ཀ་ཏ་མཱ་ནི ཙ་ཏྟཱ་རི? ཝཱི་རི་ཡ་བ་ལཾ, ས་ཏི་བ་ལཾ, ས་མཱ་དྷི་བ་ལཾ, པ་ཉྙཱ་བ་ལཾ – ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི བ་ལཱ་ནཱི’’ཏི. ཨ་ཊྛ་མཾ.

༩. ཨ་ར་ཉྙ་སུ་ཏྟཾ

༢༦༢. ‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ནཱ་ལཾ ཨ་ར་ཉྙ་ཝ་ན་པྤ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་ཏུཾ. ཀ་ཏ་མེ་ཧི ཙ་ཏཱུ་ཧི? ཀཱ་མ་ཝི་ཏ་ཀྐེ་ན, བྱཱ་པཱ་ད་ཝི་ཏ་ཀྐེ་ན, ཝི་ཧིཾ་སཱ་ཝི་ཏ་ཀྐེ་ན, དུ་པྤ་ཉྙོ ཧོ་ཏི ཛ་ལོ༹ ཨེ་ལ་མཱུ་གོ – ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ནཱ་ལཾ ཨ་ར་ཉྙ་ཝ་ན་པྤ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་ཏུཾ.

‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ཨ་ལཾ ཨ་ར་ཉྙ་ཝ་ན་པྤ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་ཏུཾ. ཀ་ཏ་མེ་ཧི ཙ་ཏཱུ་ཧི? ནེ་ཀྑ་མྨ་ཝི་ཏ་ཀྐེ་ན, ཨ་བྱཱ་པཱ་ད་ཝི་ཏ་ཀྐེ་ན, ཨ་ཝི་ཧིཾ་སཱ་ཝི་ཏ་ཀྐེ་ན, པ་ཉྙ་ཝཱ ཧོ་ཏི ཨ་ཛ་ལོ༹ ཨ་ནེ་ལ་མཱུ་གོ – ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བྷི་ཀྑུ ཨ་ལཾ ཨ་ར་ཉྙ་ཝ་ན་པྤ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་ཏུ’’ནྟི. ན་ཝ་མཾ.

༡༠. ཀ་མྨ་སུ་ཏྟཾ

༢༦༣. ‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ བཱ་ལོ ཨ་བྱ་ཏྟོ ཨ་ས་པྤུ་རི་སོ ཁ་ཏཾ ཨུ་པ་ཧ་ཏཾ ཨ་ཏྟཱ་ནཾ པ་རི་ཧ་ར་ཏི, སཱ་ཝ་ཛྫོ ཙ ཧོ་ཏི སཱ་ནུ་ཝ་ཛྫོ ཝི་ཉྙཱུ་ནཾ, བ་ཧུ་ཉྩ ཨ་པུ་ཉྙཾ པ་ས་ཝ་ཏི. ཀ་ཏ་མེ་ཧི ཙ་ཏཱུ་ཧི? སཱ་ཝ་ཛྫེ་ན ཀཱ་ཡ་ཀ་མྨེ་ན, སཱ་ཝ་ཛྫེ་ན ཝ་ཙཱི་ཀ་མྨེ་ན, སཱ་ཝ་ཛྫེ་ན མ་ནོ་ཀ་མྨེ་ན, སཱ་ཝ་ཛྫཱ་ཡ དི་ཊྛི་ཡཱ – ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ བཱ་ལོ ཨ་བྱ་ཏྟོ ཨ་ས་པྤུ་རི་སོ ཁ་ཏཾ ཨུ་པ་ཧ་ཏཾ ཨ་ཏྟཱ་ནཾ པ་རི་ཧ་ར་ཏི, སཱ་ཝ་ཛྫོ ཙ ཧོ་ཏི སཱ་ནུ་ཝ་ཛྫོ ཝི་ཉྙཱུ་ནཾ, བ་ཧུ་ཉྩ ཨ་པུ་ཉྙཾ པ་ས་ཝ་ཏི.

‘‘ཙ་ཏཱུ་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ པ་ཎྜི་ཏོ ཝི་ཡ་ཏྟོ ས་པྤུ་རི་སོ ཨ་ཀྑ་ཏཾ ཨ་ནུ་པ་ཧ་ཏཾ ཨ་ཏྟཱ་ནཾ པ་རི་ཧ་ར་ཏི, ཨ་ན་ཝ་ཛྫོ ཙ ཧོ་ཏི ཨ་ན་ནུ་ཝ་ཛྫོ ཝི་ཉྙཱུ་ནཾ, བ་ཧུ་ཉྩ པུ་ཉྙཾ པ་ས་ཝ་ཏི. ཀ་ཏ་མེ་ཧི ཙ་ཏཱུ་ཧི? ཨ་ན་ཝ་ཛྫེ་ན ཀཱ་ཡ་ཀ་མྨེ་ན, ཨ་ན་ཝ་ཛྫེ་ན ཝ་ཙཱི་ཀ་མྨེ་ན, ཨ་ན་ཝ་ཛྫེ་ན མ་ནོ་ཀ་མྨེ་ན, ཨ་ན་ཝ་ཛྫཱ་ཡ དི་ཊྛི་ཡཱ – ཨི་མེ་ཧི ཁོ, བྷི་ཀྑ་ཝེ, ཙ་ཏཱུ་ཧི དྷ་མྨེ་ཧི ས་མ་ནྣཱ་ག་ཏོ པ་ཎྜི་ཏོ ཝི་ཡ་ཏྟོ ས་པྤུ་རི་སོ ཨ་ཀྑ་ཏཾ ཨ་ནུ་པ་ཧ་ཏཾ ཨ་ཏྟཱ་ནཾ པ་རི་ཧ་ར་ཏི, ཨ་ན་ཝ་ཛྫོ ཙ ཧོ་ཏི ཨ་ན་ནུ་ཝ་ཛྫོ ཝི་ཉྙཱུ་ནཾ, བ་ཧུ་ཉྩ པུ་ཉྙཾ པ་ས་ཝ་ཏཱི’’ཏི. ད་ས་མཾ.

ཨ་བྷི་ཉྙཱ་ཝ་གྒོ ཚ་ཊྛོ.