༧. ཝ་སྶ་ཀཱ་ར་སུ་ཏྟཾ

༡༨༧. ཨེ་ཀཾ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཨ་ཐ ཁོ ཝ་སྶ་ཀཱ་རོ བྲཱ་ཧྨ་ཎོ མ་ག་དྷ་མ་ཧཱ་མ་ཏྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཝ་སྶ་ཀཱ་རོ བྲཱ་ཧྨ་ཎོ མ་ག་དྷ་མ་ཧཱ་མ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཛཱ་ནེ་ཡྻ ནུ ཁོ, བྷོ གོ་ཏ་མ, ཨ་ས་པྤུ་རི་སོ ཨ་ས་པྤུ་རི་སཾ – ‘ཨ་ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ཨ་ཊྛཱ་ནཾ ཁོ ཨེ་ཏཾ, བྲཱ་ཧྨ་ཎ, ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ‘ཨ་ས་པྤུ་རི་སོ ཨ་ཡཾ བྷ་ཝ’’’ནྟི. ‘‘ཛཱ་ནེ་ཡྻ པ་ན, བྷོ གོ་ཏ་མ, ཨ་ས་པྤུ་རི་སོ ས་པྤུ་རི་སཾ – ‘ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ཨེ་ཏ་མྤི ཁོ, བྲཱ་ཧྨ་ཎ, ཨ་ཊྛཱ་ནཾ ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ‘ས་པྤུ་རི་སོ ཨ་ཡཾ བྷ་ཝ’’’ནྟི. ‘‘ཛཱ་ནེ་ཡྻ ནུ ཁོ, བྷོ གོ་ཏ་མ, ས་པྤུ་རི་སོ ས་པྤུ་རི་སཾ – ‘ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ཋཱ་ནཾ ཁོ ཨེ་ཏཾ, བྲཱ་ཧྨ་ཎ, ཝི་ཛྫ་ཏི ཡཾ ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ‘ས་པྤུ་རི་སོ ཨ་ཡཾ བྷ་ཝ’’’ནྟི. ‘‘ཛཱ་ནེ་ཡྻ པ་ན, བྷོ གོ་ཏ་མ, ས་པྤུ་རི་སོ ཨ་ས་པྤུ་རི་སཾ – ‘ཨ་ས་པྤུ་རི་སོ ཨ་ཡཾ བྷ་ཝ’’’ནྟི? ‘‘ཨེ་ཏ་མྤི ཁོ, བྲཱ་ཧྨ་ཎ, ཋཱ་ནཾ ཝི་ཛྫ་ཏི ཡཾ ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ‘ཨ་ས་པྤུ་རི་སོ ཨ་ཡཾ བྷ་ཝ’’’ནྟི.

‘‘ཨ་ཙྪ་རི་ཡཾ, བྷོ གོ་ཏ་མ, ཨ་བྦྷུ་ཏཾ, བྷོ གོ་ཏ་མ! ཡཱ་ཝ སུ་བྷཱ་སི་ཏཾ ཙི་དཾ, བྷོ་ཏཱ གོ་ཏ་མེ་ན – ‘ཨ་ཊྛཱ་ནཾ ཁོ ཨེ་ཏཾ, བྲཱ་ཧྨ་ཎ, ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ཨ་ས་པྤུ་རི་སོ ཨ་ཡཾ བྷ་ཝ་ནྟི. ཨེ་ཏ་མྤི ཁོ, བྲཱ་ཧྨ་ཎ, ཨ་ཊྛཱ་ནཾ ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ས་པྤུ་རི་སོ ཨ་ཡཾ བྷ་ཝ་ནྟི. ཋཱ་ནཾ ཁོ ཨེ་ཏཾ, བྲཱ་ཧྨ་ཎ, ཝི་ཛྫ་ཏི ཡཾ ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ས་པྤུ་རི་སོ ཨ་ཡཾ བྷ་ཝ་ནྟི. ཨེ་ཏ་མྤི ཁོ, བྲཱ་ཧྨ་ཎ, ཋཱ་ནཾ ཝི་ཛྫ་ཏི ཡཾ ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ཨ་ས་པྤུ་རི་སོ ཨ་ཡཾ བྷ་ཝ’’’ནྟི.

‘‘ཨེ་ཀ་མི་དཾ, བྷོ གོ་ཏ་མ, ས་མ་ཡཾ ཏོ་དེ་ཡྻ་སྶ བྲཱ་ཧྨ་ཎ་སྶ པ་རི་ས་ཏི པ་རཱུ་པཱ་ར་མྦྷཾ ཝ་ཏྟེ་ནྟི – ‘བཱ་ལོ ཨ་ཡཾ རཱ་ཛཱ ཨེ་ལེ༹་ཡྻོ ས་མ་ཎེ རཱ་མ་པུ་ཏྟེ ཨ་བྷི་པྤ་ས་ནྣོ, ས་མ་ཎེ ཙ པ་ན རཱ་མ་པུ་ཏྟེ ཨེ་ཝ་རཱུ་པཾ པ་ར་མ་ནི་པ་ཙྩ་ཀཱ་རཾ ཀ་རོ་ཏི, ཡ་དི་དཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨ’ནྟི. ཨི་མེ་པི ར་ཉྙོ ཨེ་ལེ༹་ཡྻ་སྶ པ་རི་ཧཱ་ར་ཀཱ བཱ་ལཱ – ཡ་མ་ཀོ མོ་གྒ་ལློ [པུ་གྒ་ལོ (ཀ.)] ཨུ་གྒོ ནཱ་ཝི་ནྡ་ཀཱི ག་ནྡྷ་བྦོ ཨ་གྒི་ཝེ་སྶོ, ཡེ ས་མ་ཎེ རཱ་མ་པུ་ཏྟེ ཨ་བྷི་པྤ་ས་ནྣཱ, ས་མ་ཎེ ཙ པ་ན རཱ་མ་པུ་ཏྟེ ཨེ་ཝ་རཱུ་པཾ པ་ར་མ་ནི་པ་ཙྩ་ཀཱ་རཾ ཀ་རོ་ནྟི, ཡ་དི་དཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨ་ནྟི. ཏྱཱ་སྶུ་དཾ ཏོ་དེ་ཡྻོ བྲཱ་ཧྨ་ཎོ ཨི་མི་ནཱ ན་ཡེ་ན ནེ་ཏི. ཏཾ ཀིཾ མ་ཉྙ་ནྟི, བྷོ་ནྟོ, པ་ཎྜི་ཏོ རཱ་ཛཱ ཨེ་ལེ༹་ཡྻོ ཀ་ར་ཎཱི་ཡཱ་དྷི་ཀ་ར་ཎཱི་ཡེ་སུ ཝ་ཙ་ནཱི་ཡཱ་དྷི་ཝ་ཙ་ནཱི་ཡེ་སུ ཨ་ལ་མ་ཏྠ་ད་ས་ཏ་རེ་ཧི ཨ་ལ་མ་ཏྠ་ད་ས་ཏ་རོ’ཏི? ‘ཨེ་ཝཾ, བྷོ, པ་ཎྜི་ཏོ རཱ་ཛཱ ཨེ་ལེ༹་ཡྻོ ཀ་ར་ཎཱི་ཡཱ་དྷི་ཀ་ར་ཎཱི་ཡེ་སུ ཝ་ཙ་ནཱི་ཡཱ་དྷི་ཝ་ཙ་ནཱི་ཡེ་སུ ཨ་ལ་མ་ཏྠ་ད་ས་ཏ་རེ་ཧི ཨ་ལ་མ་ཏྠ་ད་ས་ཏ་རོ’’’ཏི.

‘‘ཡ་སྨཱ ཙ ཁོ, བྷོ, ས་མ་ཎོ རཱ་མ་པུ་ཏྟོ ར་ཉྙཱ ཨེ་ལེ༹་ཡྻེ་ན པ་ཎྜི་ཏེ་ན པ་ཎྜི་ཏ་ཏ་རོ ཀ་ར་ཎཱི་ཡཱ་དྷི་ཀ་ར་ཎཱི་ཡེ་སུ ཝ་ཙ་ནཱི་ཡཱ་དྷི་ཝ་ཙ་ནཱི་ཡེ་སུ ཨ་ལ་མ་ཏྠ་ད་ས་ཏ་རེ་ན ཨ་ལ་མ་ཏྠ་ད་ས་ཏ་རོ, ཏ་སྨཱ རཱ་ཛཱ ཨེ་ལེ༹་ཡྻོ ས་མ་ཎེ རཱ་མ་པུ་ཏྟེ ཨ་བྷི་པྤ་ས་ནྣོ, ས་མ་ཎེ ཙ པ་ན རཱ་མ་པུ་ཏྟེ ཨེ་ཝ་རཱུ་པཾ པ་ར་མ་ནི་པ་ཙྩ་ཀཱ་རཾ ཀ་རོ་ཏི, ཡ་དི་དཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨཾ’’.

‘‘ཏཾ ཀིཾ མ་ཉྙ་ནྟི, བྷོ་ནྟོ, པ་ཎྜི་ཏཱ ར་ཉྙོ ཨེ་ལེ༹་ཡྻ་སྶ པ་རི་ཧཱ་ར་ཀཱ – ཡ་མ་ཀོ མོ་གྒ་ལློ ཨུ་གྒོ ནཱ་ཝི་ནྡ་ཀཱི ག་ནྡྷ་བྦོ ཨ་གྒི་ཝེ་སྶོ, ཀ་ར་ཎཱི་ཡཱ་དྷི་ཀ་ར་ཎཱི་ཡེ་སུ ཝ་ཙ་ནཱི་ཡཱ་དྷི་ཝ་ཙ་ནཱི་ཡེ་སུ ཨ་ལ་མ་ཏྠ་ད་ས་ཏ་རེ་ཧི ཨ་ལ་མ་ཏྠ་ད་ས་ཏ་རཱ་ཏི? ‘ཨེ་ཝཾ, བྷོ, པ་ཎྜི་ཏཱ ར་ཉྙོ ཨེ་ལེ༹་ཡྻ་སྶ པ་རི་ཧཱ་ར་ཀཱ – ཡ་མ་ཀོ མོ་གྒ་ལློ ཨུ་གྒོ ནཱ་ཝི་ནྡ་ཀཱི ག་ནྡྷ་བྦོ ཨ་གྒི་ཝེ་སྶོ, ཀ་ར་ཎཱི་ཡཱ་དྷི་ཀ་ར་ཎཱི་ཡེ་སུ ཝ་ཙ་ནཱི་ཡཱ་དྷི་ཝ་ཙ་ནཱི་ཡེ་སུ ཨ་ལ་མ་ཏྠ་ད་ས་ཏ་རེ་ཧི ཨ་ལ་མ་ཏྠ་ད་ས་ཏ་རཱ’’’ཏི.

‘‘ཡ་སྨཱ ཙ ཁོ, བྷོ, ས་མ་ཎོ རཱ་མ་པུ་ཏྟོ ར་ཉྙོ ཨེ་ལེ༹་ཡྻ་སྶ པ་རི་ཧཱ་ར་ཀེ་ཧི པ་ཎྜི་ཏེ་ཧི པ་ཎྜི་ཏ་ཏ་རོ ཀ་ར་ཎཱི་ཡཱ་དྷི་ཀ་ར་ཎཱི་ཡེ་སུ ཝ་ཙ་ནཱི་ཡཱ་དྷི་ཝ་ཙ་ནཱི་ཡེ་སུ ཨ་ལ་མ་ཏྠ་ད་ས་ཏ་རེ་ཧི ཨ་ལ་མ་ཏྠ་ད་ས་ཏ་རོ, ཏ་སྨཱ ར་ཉྙོ ཨེ་ལེ༹་ཡྻ་སྶ པ་རི་ཧཱ་ར་ཀཱ ས་མ་ཎེ རཱ་མ་པུ་ཏྟེ ཨ་བྷི་པྤ་ས་ནྣཱ; ས་མ་ཎེ ཙ པ་ན རཱ་མ་པུ་ཏྟེ ཨེ་ཝ་རཱུ་པཾ པ་ར་མ་ནི་པ་ཙྩ་ཀཱ་རཾ ཀ་རོ་ནྟི, ཡ་དི་དཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨ’’ནྟི.

‘‘ཨ་ཙྪ་རི་ཡཾ, བྷོ, གོ་ཏ་མ, ཨ་བྦྷུ་ཏཾ, བྷོ གོ་ཏ་མ! ཡཱ་ཝ སུ་བྷཱ་སི་ཏཾ ཙི་དཾ བྷོ་ཏཱ གོ་ཏ་མེ་ན – ‘ཨ་ཊྛཱ་ནཾ ཁོ ཨེ་ཏཾ, བྲཱ་ཧྨ་ཎ, ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ཨ་ས་པྤུ་རི་སོ ཨ་ཡཾ བྷ་ཝ་ནྟི. ཨེ་ཏ་མྤི ཁོ, བྲཱ་ཧྨ་ཎ, ཨ་ཊྛཱ་ནཾ ཨ་ན་ཝ་ཀཱ་སོ ཡཾ ཨ་ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ས་པྤུ་རི་སོ ཨ་ཡཾ བྷ་ཝ་ནྟི. ཋཱ་ནཾ ཁོ ཨེ་ཏཾ, བྲཱ་ཧྨ་ཎ, ཝི་ཛྫ་ཏི ཡཾ ས་པྤུ་རི་སོ ས་པྤུ་རི་སཾ ཛཱ་ནེ་ཡྻ – ས་པྤུ་རི་སོ ཨ་ཡཾ བྷ་ཝ་ནྟི. ཨེ་ཏ་མྤི ཁོ, བྲཱ་ཧྨ་ཎ, ཋཱ་ནཾ ཝི་ཛྫ་ཏི ཡཾ ས་པྤུ་རི་སོ ཨ་ས་པྤུ་རི་སཾ ཛཱ་ནེ་ཡྻ – ཨ་ས་པྤུ་རི་སོ ཨ་ཡཾ བྷ་ཝ’ནྟི. ཧ་ནྡ ཙ དཱ་ནི མ་ཡཾ, བྷོ གོ་ཏ་མ, ག་ཙྪཱ་མ. བ་ཧུ་ཀི་ཙྩཱ མ་ཡཾ བ་ཧུ་ཀ་ར་ཎཱི་ཡཱ’’ཏི. ‘‘ཡ་སྶ་དཱ་ནི ཏྭཾ, བྲཱ་ཧྨ་ཎ, ཀཱ་ལཾ མ་ཉྙ་སཱི’’ཏི. ཨ་ཐ ཁོ ཝ་སྶ་ཀཱ་རོ བྲཱ་ཧྨ་ཎོ མ་ག་དྷ་མ་ཧཱ་མ་ཏྟོ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡི་ཏྭཱ ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མཱི་ཏི. ས་ཏྟ་མཾ.