༥. ཨུ་པ་ཝཱ་ཎ་སུ་ཏྟཾ

༡༧༥. ཨ་ཐ ཁོ ཨཱ་ཡ་སྨཱ ཨུ་པ་ཝཱ་ཎོ ཡེ་ནཱ་ཡ་སྨཱ སཱ་རི་པུ་ཏྟོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ སཱ་རི་པུ་ཏྟེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་པ་ཝཱ་ཎོ ཨཱ་ཡ་སྨ་ནྟཾ སཱ་རི་པུ་ཏྟཾ ཨེ་ཏ་ད་ཝོ་ཙ –

‘‘ཀིཾ ནུ ཁོ, ཨཱ་ཝུ་སོ སཱ་རི་པུ་ཏྟ, ཝི་ཛྫཱ་ཡ་ནྟ་ཀ་རོ ཧོ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ སཱ་རི་པུ་ཏྟ, ཙ་ར་ཎེ་ན་ནྟ་ཀ་རོ ཧོ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ སཱ་རི་པུ་ཏྟ, ཝི་ཛྫཱ་ཙ་ར་ཎེ་ན་ནྟ་ཀ་རོ ཧོ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘ཀིཾ པ་ནཱ་ཝུ་སོ སཱ་རི་པུ་ཏྟ, ཨ་ཉྙ་ཏྲ ཝི་ཛྫཱ་ཙ་ར་ཎེ་ན་ནྟ་ཀ་རོ ཧོ་ཏཱི’’ཏི?

‘‘ནོ ཧི་དཾ, ཨཱ་ཝུ་སོ’’.

‘‘‘ཀིཾ ནུ ཁོ, ཨཱ་ཝུ་སོ སཱ་རི་པུ་ཏྟ, ཝི་ཛྫཱ་ཡ་ནྟ་ཀ་རོ ཧོ་ཏཱི’ཏི, ཨི་ཏི པུ་ཊྛོ ས་མཱ་ནོ – ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ པ་ནཱ་ཝུ་སོ སཱ་རི་པུ་ཏྟ, ཙ་ར་ཎེ་ན་ནྟ་ཀ་རོ ཧོ་ཏཱི’ཏི, ཨི་ཏི པུ་ཊྛོ ས་མཱ་ནོ – ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ པ་ནཱ་ཝུ་སོ སཱ་རི་པུ་ཏྟ, ཝི་ཛྫཱ་ཙ་ར་ཎེ་ན་ནྟ་ཀ་རོ ཧོ་ཏཱི’ཏི, ཨི་ཏི པུ་ཊྛོ ས་མཱ་ནོ – ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ‘ཀིཾ པ་ནཱ་ཝུ་སོ སཱ་རི་པུ་ཏྟ, ཨ་ཉྙ་ཏྲ ཝི་ཛྫཱ་ཙ་ར་ཎེ་ན་ནྟ་ཀ་རོ ཧོ་ཏཱི’ཏི, ཨི་ཏི པུ་ཊྛོ ས་མཱ་ནོ – ‘ནོ ཧི་དཾ, ཨཱ་ཝུ་སོ’ཏི ཝ་དེ་སི. ཡ་ཐཱ ཀ་ཐཾ པ་ནཱ་ཝུ་སོ, ཨ་ནྟ་ཀ་རོ ཧོ་ཏཱི’’ཏི?

‘‘ཝི་ཛྫཱ་ཡ ཙེ, ཨཱ་ཝུ་སོ, ཨ་ནྟ་ཀ་རོ ཨ་བྷ་ཝི་སྶ, ས་ཨུ་པཱ་དཱ་ནོ་ཝ ས་མཱ་ནོ ཨ་ནྟ་ཀ་རོ ཨ་བྷ་ཝི་སྶ. ཙ་ར་ཎེ་ན ཙེ, ཨཱ་ཝུ་སོ, ཨ་ནྟ་ཀ་རོ ཨ་བྷ་ཝི་སྶ, ས་ཨུ་པཱ་དཱ་ནོ་ཝ ས་མཱ་ནོ ཨ་ནྟ་ཀ་རོ ཨ་བྷ་ཝི་སྶ. ཝི་ཛྫཱ་ཙ་ར་ཎེ་ན ཙེ, ཨཱ་ཝུ་སོ, ཨ་ནྟ་ཀ་རོ ཨ་བྷ་ཝི་སྶ, ས་ཨུ་པཱ་དཱ་ནོ་ཝ ས་མཱ་ནོ ཨ་ནྟ་ཀ་རོ ཨ་བྷ་ཝི་སྶ. ཨ་ཉྙ་ཏྲ ཝི་ཛྫཱ་ཙ་ར་ཎེ་ན ཙེ, ཨཱ་ཝུ་སོ, ཨ་ནྟ་ཀ་རོ ཨ་བྷ་ཝི་སྶ, པུ་ཐུ་ཛྫ་ནོ ཨ་ནྟ་ཀ་རོ ཨ་བྷ་ཝི་སྶ. པུ་ཐུ་ཛྫ་ནོ ཧི, ཨཱ་ཝུ་སོ, ཨ་ཉྙ་ཏྲ ཝི་ཛྫཱ་ཙ་ར་ཎེ་ན. ཙ་ར་ཎ་ཝི་པ་ནྣོ ཁོ, ཨཱ་ཝུ་སོ, ཡ་ཐཱ་བྷཱུ་ཏཾ ན ཛཱ་ནཱ་ཏི ན པ་སྶ་ཏི. ཙ་ར་ཎ་ས་མྤ་ནྣོ ཡ་ཐཱ་བྷཱུ་ཏཾ ཛཱ་ནཱ་ཏི པ་སྶ་ཏི. ཡ་ཐཱ་བྷཱུ་ཏཾ ཛཱ་ནཾ པ་སྶཾ ཨ་ནྟ་ཀ་རོ ཧོ་ཏཱི’’ཏི. པ་ཉྩ་མཾ.