(༡༥) ༥. ཨཱ་བྷཱ་ཝ་གྒོ
༡. ཨཱ་བྷཱ་སུ་ཏྟཾ
༡༤༡. ‘‘ཙ་ཏ་སྶོ ཨི་མཱ, བྷི་ཀྑ་ཝེ, ཨཱ་བྷཱ. ཀ་ཏ་མཱ ཙ་ཏ་སྶོ? ཙ་ནྡཱ་བྷཱ, སཱུ་རི་ཡཱ་བྷཱ, ཨ་གྒཱ་བྷཱ, པ་ཉྙཱ་བྷཱ – ཨི་མཱ ཁོ, བྷི་ཀྑ་ཝེ, ཙ་ཏ་སྶོ ཨཱ་བྷཱ. ཨེ་ཏ་ད་གྒཾ, བྷི་ཀྑ་ཝེ, ཨི་མཱ་སཾ ཙ་ཏུ་ནྣཾ [ཙ་ཏ་སྶ་ནྣཾ (སྱཱ. ཀཾ.) ས་དྡ་ནཱི་ཏི་པ་ད་མཱ་ལཱ པ་སྶི་ཏ་བྦཱ] ཨཱ་བྷཱ་ནཾ ཡ་དི་དཾ པ་ཉྙཱ་བྷཱ’’ཏི. པ་ཋ་མཾ.
༢. པ་བྷཱ་སུ་ཏྟཾ
༡༤༢. ‘‘ཙ་ཏ་སྶོ ཨི་མཱ, བྷི་ཀྑ་ཝེ, པ་བྷཱ. ཀ་ཏ་མཱ ཙ་ཏ་སྶོ? ཙ་ནྡ་པྤ་བྷཱ, སཱུ་རི་ཡ་པྤ་བྷཱ, ཨ་གྒི་པྤ་བྷཱ, པ་ཉྙཱ་པ་བྷཱ – ཨི་མཱ ཁོ, བྷི་ཀྑ་ཝེ, ཙ་ཏ་སྶོ པ་བྷཱ. ཨེ་ཏ་ད་གྒཾ, བྷི་ཀྑ་ཝེ, ཨི་མཱ་སཾ ཙ་ཏུ་ནྣཾ པ་བྷཱ་ནཾ ཡ་དི་དཾ པ་ཉྙཱ་པ་བྷཱ’’ཏི. དུ་ཏི་ཡཾ.
༣. ཨཱ་ལོ་ཀ་སུ་ཏྟཾ
༡༤༣. ‘‘ཙ་ཏྟཱ་རོ་མེ, བྷི་ཀྑ་ཝེ, ཨཱ་ལོ་ཀཱ. ཀ་ཏ་མེ ཙ་ཏྟཱ་རོ? ཙ་ནྡཱ་ལོ་ཀོ, སཱུ་རི་ཡཱ་ལོ་ཀོ, ཨ་གྒཱ་ལོ་ཀོ, པ་ཉྙཱ་ལོ་ཀོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨཱ་ལོ་ཀཱ. ཨེ་ཏ་ད་གྒཾ, བྷི་ཀྑ་ཝེ, ཨི་མེ་སཾ ཙ་ཏུ་ནྣཾ ཨཱ་ལོ་ཀཱ་ནཾ ཡ་དི་དཾ པ་ཉྙཱ་ལོ་ཀོ’’ཏི. ཏ་ཏི་ཡཾ.
༤. ཨོ་བྷཱ་ས་སུ་ཏྟཾ
༡༤༤. ‘‘ཙ་ཏྟཱ་རོ་མེ, བྷི་ཀྑ་ཝེ, ཨོ་བྷཱ་སཱ. ཀ་ཏ་མེ ཙ་ཏྟཱ་རོ? ཙ་ནྡོ་བྷཱ་སོ, སཱུ་རི་ཡོ་བྷཱ་སོ, ཨ་གྒོ་བྷཱ་སོ, པ་ཉྙོ་བྷཱ་སོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཨོ་བྷཱ་སཱ. ཨེ་ཏ་ད་གྒཾ, བྷི་ཀྑ་ཝེ, ཨི་མེ་སཾ ཙ་ཏུ་ནྣཾ ཨོ་བྷཱ་སཱ་ནཾ ཡ་དི་དཾ པ་ཉྙོ་བྷཱ་སོ’’ཏི. ཙ་ཏུ་ཏྠཾ.
༥. པ་ཛྫོ་ཏ་སུ་ཏྟཾ
༡༤༥. ‘‘ཙ་ཏྟཱ་རོ་མེ, བྷི་ཀྑ་ཝེ, པ་ཛྫོ་ཏཱ. ཀ་ཏ་མེ ཙ་ཏྟཱ་རོ? ཙ་ནྡ་པ་ཛྫོ་ཏོ, སཱུ་རི་ཡ་པ་ཛྫོ་ཏོ, ཨ་གྒི་པ་ཛྫོ་ཏོ, པ་ཉྙཱ་པ་ཛྫོ་ཏོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པ་ཛྫོ་ཏཱ. ཨེ་ཏ་ད་གྒཾ, བྷི་ཀྑ་ཝེ, ཨི་མེ་སཾ ཙ་ཏུ་ནྣཾ པ་ཛྫོ་ཏཱ་ནཾ ཡ་དི་དཾ པ་ཉྙཱ་པ་ཛྫོ་ཏོ’’ཏི. པ་ཉྩ་མཾ.
༦. པ་ཋ་མ་ཀཱ་ལ་སུ་ཏྟཾ
༡༤༦. ‘‘ཙ་ཏྟཱ་རོ་མེ, བྷི་ཀྑ་ཝེ, ཀཱ་ལཱ. ཀ་ཏ་མེ ཙ་ཏྟཱ་རོ? ཀཱ་ལེ་ན དྷ་མྨ་སྶ་ཝ་ནཾ, ཀཱ་ལེ་ན དྷ་མྨ་སཱ་ཀ་ཙྪཱ, ཀཱ་ལེ་ན ས་མྨ་ས་ནཱ [ཀཱ་ལེ་ན ས་མ་ཐོ (སཱི. སྱཱ. ཀཾ. པཱི.)], ཀཱ་ལེ་ན ཝི་པ་སྶ་ནཱ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཀཱ་ལཱ’’ཏི. ཚ་ཊྛཾ.
༧. དུ་ཏི་ཡ་ཀཱ་ལ་སུ་ཏྟཾ
༡༤༧. ‘‘ཙ་ཏྟཱ་རོ་མེ, བྷི་ཀྑ་ཝེ, ཀཱ་ལཱ ས་མྨཱ བྷཱ་ཝི་ཡ་མཱ་ནཱ ས་མྨཱ ཨ་ནུ་པ་རི་ཝ་ཏྟི་ཡ་མཱ་ནཱ ཨ་ནུ་པུ་བྦེ་ན ཨཱ་ས་ཝཱ་ནཾ ཁ་ཡཾ པཱ་པེ་ནྟི. ཀ་ཏ་མེ ཙ་ཏྟཱ་རོ? ཀཱ་ལེ་ན དྷ་མྨ་སྶ་ཝ་ནཾ, ཀཱ་ལེ་ན དྷ་མྨ་སཱ་ཀ་ཙྪཱ, ཀཱ་ལེ་ན ས་མྨ་ས་ནཱ, ཀཱ་ལེ་ན ཝི་པ་སྶ་ནཱ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཀཱ་ལཱ ས་མྨཱ བྷཱ་ཝི་ཡ་མཱ་ནཱ ས་མྨཱ ཨ་ནུ་པ་རི་ཝ་ཏྟི་ཡ་མཱ་ནཱ ཨ་ནུ་པུ་བྦེ་ན ཨཱ་ས་ཝཱ་ནཾ ཁ་ཡཾ པཱ་པེ་ནྟི.
‘‘སེ་ཡྻ་ཐཱ་པི, བྷི་ཀྑ་ཝེ, ཨུ་པ་རི་པ་བྦ་ཏེ ཐུ་ལླ་ཕུ་སི་ཏ་ཀེ དེ་ཝེ ཝ་སྶ་ནྟེ ཏཾ ཨུ་ད་ཀཾ ཡ་ཐཱ་ནི་ནྣཾ པ་ཝ་ཏྟ་མཱ་ནཾ པ་བྦ་ཏ་ཀ་ནྡ་ར་པ་ད་ར་སཱ་ཁཱ པ་རི་པཱུ་རེ་ཏི; པ་བྦ་ཏ་ཀ་ནྡ་ར་པ་ད་ར་སཱ་ཁཱ པ་རི་པཱུ་རཱ ཀུ་སོ་བྦྷེ པ་རི་པཱུ་རེ་ནྟི; ཀུ་སོ་བྦྷཱ པ་རི་པཱུ་རཱ མ་ཧཱ་སོ་བྦྷེ པ་རི་པཱུ་རེ་ནྟི; མ་ཧཱ་སོ་བྦྷཱ པ་རི་པཱུ་རཱ ཀུ་ནྣ་དི་ཡོ པ་རི་པཱུ་རེ་ནྟི; ཀུ་ནྣ་དི་ཡོ པ་རི་པཱུ་རཱ མ་ཧཱ་ན་དི་ཡོ པ་རི་པཱུ་རེ་ནྟི; མ་ཧཱ་ན་དི་ཡོ པ་རི་པཱུ་རཱ ས་མུ་དྡཾ [ས་མུ་དྡཾ སཱ་ག་རཾ (སཱི. པཱི. ཀ.), ས་མུ་དྡ་སཱ་ག་རཾ (སྱཱ. ཀཾ.)] པ་རི་པཱུ་རེ་ནྟི. ཨེ་ཝ་མེ་ཝཾ ཁོ, བྷི་ཀྑ་ཝེ, ཨི་མེ ཙ་ཏྟཱ་རོ ཀཱ་ལཱ ས་མྨཱ བྷཱ་ཝི་ཡ་མཱ་ནཱ ས་མྨཱ ཨ་ནུ་པ་རི་ཝ་ཏྟི་ཡ་མཱ་ནཱ ཨ་ནུ་པུ་བྦེ་ན ཨཱ་ས་ཝཱ་ནཾ ཁ་ཡཾ པཱ་པེ་ནྟཱི’’ཏི. ས་ཏྟ་མཾ.
༨. དུ་ཙྩ་རི་ཏ་སུ་ཏྟཾ
༡༤༨. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཝ་ཙཱི་དུ་ཙྩ་རི་ཏཱ་ནི. ཀ་ཏ་མཱ་ནི ཙ་ཏྟཱ་རི? མུ་སཱ་ཝཱ་དོ, པི་སུ་ཎཱ ཝཱ་ཙཱ, ཕ་རུ་སཱ ཝཱ་ཙཱ, ས་མྥ་པྤ་ལཱ་པོ – ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི ཝ་ཙཱི་དུ་ཙྩ་རི་ཏཱ་ནཱི’’ཏི. ཨ་ཊྛ་མཾ.
༩. སུ་ཙ་རི་ཏ་སུ་ཏྟཾ
༡༤༩. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཝ་ཙཱི་སུ་ཙ་རི་ཏཱ་ནི. ཀ་ཏ་མཱ་ནི ཙ་ཏྟཱ་རི? ས་ཙྩ་ཝཱ་ཙཱ, ཨ་པི་སུ་ཎཱ ཝཱ་ཙཱ, ས་ཎྷཱ ཝཱ་ཙཱ, མ་ནྟ་བྷཱ་སཱ – ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི ཝ་ཙཱི་སུ་ཙ་རི་ཏཱ་ནཱི’’ཏི. ན་ཝ་མཾ.
༡༠. སཱ་ར་སུ་ཏྟཾ
༡༥༠. ‘‘ཙ་ཏྟཱ་རོ་མེ, བྷི་ཀྑ་ཝེ, སཱ་རཱ. ཀ་ཏ་མེ ཙ་ཏྟཱ་རོ? སཱི་ལ་སཱ་རོ, ས་མཱ་དྷི་སཱ་རོ, པ་ཉྙཱ་སཱ་རོ, ཝི་མུ་ཏྟི་སཱ་རོ – ཨི་མེ ཁོ, བྷི་ཀྑ་ཝེ, ཙ་ཏྟཱ་རོ སཱ་རཱ’’ཏི. ད་ས་མཾ.
ཨཱ་བྷཱ་ཝ་གྒོ པ་ཉྩ་མོ.