༨. ནི་ཀ་ཊྛ་སུ་ཏྟཾ

༡༣༨. ‘‘ཙ་ཏྟཱ་རོ་མེ, བྷི་ཀྑ་ཝེ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? ནི་ཀ་ཊྛ་ཀཱ་ཡོ ཨ་ནི་ཀ་ཊྛ་ཙི་ཏྟོ, ཨ་ནི་ཀ་ཊྛ་ཀཱ་ཡོ ནི་ཀ་ཊྛ་ཙི་ཏྟོ, ཨ་ནི་ཀ་ཊྛ་ཀཱ་ཡོ ཙ ཨ་ནི་ཀ་ཊྛ་ཙི་ཏྟོ ཙ, ནི་ཀ་ཊྛ་ཀཱ་ཡོ ཙ ནི་ཀ་ཊྛ་ཙི་ཏྟོ ཙ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ནི་ཀ་ཊྛ་ཀཱ་ཡོ ཧོ་ཏི ཨ་ནི་ཀ་ཊྛ་ཙི་ཏྟོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨ་ར་ཉྙ་ཝ་ན་པ་ཏྠཱ་ནི [ཨ་ར་ཉྙེ ཝ་ན་པ་ཏྠཱ་ནི (སཱི. པཱི.)] པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ཏི. སོ ཏ་ཏྠ ཀཱ་མ་ཝི་ཏ་ཀྐ་མྤི ཝི་ཏ་ཀྐེ་ཏི བྱཱ་པཱ་ད་ཝི་ཏ་ཀྐ་མྤི ཝི་ཏ་ཀྐེ་ཏི ཝི་ཧིཾ་སཱ་ཝི་ཏ་ཀྐ་མྤི ཝི་ཏ་ཀྐེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ནི་ཀ་ཊྛ་ཀཱ་ཡོ ཧོ་ཏི ཨ་ནི་ཀ་ཊྛ་ཙི་ཏྟོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨ་ནི་ཀ་ཊྛ་ཀཱ་ཡོ ཧོ་ཏི ནི་ཀ་ཊྛ་ཙི་ཏྟོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ན་ཧེ་ཝ ཁོ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ཏི. སོ ཏ་ཏྠ ནེ་ཀྑ་མྨ་ཝི་ཏ་ཀྐ་མྤི ཝི་ཏ་ཀྐེ་ཏི ཨ་བྱཱ་པཱ་ད་ཝི་ཏ་ཀྐ་མྤི ཝི་ཏ་ཀྐེ་ཏི ཨ་ཝི་ཧིཾ་སཱ་ཝི་ཏ་ཀྐ་མྤི ཝི་ཏ་ཀྐེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨ་ནི་ཀ་ཊྛ་ཀཱ་ཡོ ཧོ་ཏི ནི་ཀ་ཊྛ་ཙི་ཏྟོ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཨ་ནི་ཀ་ཊྛ་ཀཱ་ཡོ ཙ ཧོ་ཏི ཨ་ནི་ཀ་ཊྛ་ཙི་ཏྟོ ཙ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ན་ཧེ་ཝ ཁོ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ཏི. སོ ཏ་ཏྠ ཀཱ་མ་ཝི་ཏ་ཀྐ་མྤི ཝི་ཏ་ཀྐེ་ཏི བྱཱ་པཱ་ད་ཝི་ཏ་ཀྐ་མྤི ཝི་ཏ་ཀྐེ་ཏི ཝི་ཧིཾ་སཱ་ཝི་ཏ་ཀྐ་མྤི ཝི་ཏ་ཀྐེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཨ་ནི་ཀ་ཊྛ་ཀཱ་ཡོ ཙ ཧོ་ཏི ཨ་ནི་ཀ་ཊྛ་ཙི་ཏྟོ ཙ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ནི་ཀ་ཊྛ་ཀཱ་ཡོ ཙ ཧོ་ཏི ནི་ཀ་ཊྛ་ཙི་ཏྟོ ཙ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ཏི. སོ ཏ་ཏྠ ནེ་ཀྑ་མྨ་ཝི་ཏ་ཀྐ་མྤི ཝི་ཏ་ཀྐེ་ཏི ཨ་བྱཱ་པཱ་ད་ཝི་ཏ་ཀྐ་མྤི ཝི་ཏ་ཀྐེ་ཏི ཨ་ཝི་ཧིཾ་སཱ་ཝི་ཏ་ཀྐ་མྤི ཝི་ཏ་ཀྐེ་ཏི. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ནི་ཀ་ཊྛ་ཀཱ་ཡོ ཙ ཧོ་ཏི ནི་ཀ་ཊྛ་ཙི་ཏྟོ ཙ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི. ཨ་ཊྛ་མཾ.