༡. པ་ཋ་མ་ཝ་ལཱ་ཧ་ཀ་སུ་ཏྟཾ

༡༠༡. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –

‘‘ཙ་ཏྟཱ་རོ་མེ, བྷི་ཀྑ་ཝེ, ཝ་ལཱ་ཧ་ཀཱ. ཀ་ཏ་མེ ཙ་ཏྟཱ་རོ? ག་ཛྫི་ཏཱ ནོ ཝ་སྶི་ཏཱ, ཝ་སྶི་ཏཱ ནོ ག་ཛྫི་ཏཱ, ནེ་ཝ ག་ཛྫི་ཏཱ ནོ ཝ་སྶི་ཏཱ, ག་ཛྫི་ཏཱ ཙ ཝ་སྶི་ཏཱ ཙ. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཝ་ལཱ་ཧ་ཀཱ. ཨེ་ཝ་མེ་ཝཾ ཁོ, བྷི་ཀྑ་ཝེ, ཙ་ཏྟཱ་རོ ཝ་ལཱ་ཧ་ཀཱུ་པ་མཱ [པུ. པ. ༡༥༧] པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཙ་ཏྟཱ་རོ? ག་ཛྫི་ཏཱ ནོ ཝ་སྶི་ཏཱ, ཝ་སྶི་ཏཱ ནོ ག་ཛྫི་ཏཱ, ནེ་ཝ ག་ཛྫི་ཏཱ ནོ ཝ་སྶི་ཏཱ, ག་ཛྫི་ཏཱ ཙ ཝ་སྶི་ཏཱ ཙ.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ག་ཛྫི་ཏཱ ཧོ་ཏི ནོ ཝ་སྶི་ཏཱ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ བྷཱ་སི་ཏཱ ཧོ་ཏི, ནོ ཀ་ཏྟཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ག་ཛྫི་ཏཱ ཧོ་ཏི, ནོ ཝ་སྶི་ཏཱ. སེ་ཡྻ་ཐཱ་པི སོ, བྷི་ཀྑ་ཝེ, ཝ་ལཱ་ཧ་ཀོ ག་ཛྫི་ཏཱ, ནོ ཝ་སྶི་ཏཱ; ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ཝ་སྶི་ཏཱ ཧོ་ཏི, ནོ ག་ཛྫི་ཏཱ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ཀ་ཏྟཱ ཧོ་ཏི, ནོ བྷཱ་སི་ཏཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ཝ་སྶི་ཏཱ ཧོ་ཏི, ནོ ག་ཛྫི་ཏཱ. སེ་ཡྻ་ཐཱ་པི སོ, བྷི་ཀྑ་ཝེ, ཝ་ལཱ་ཧ་ཀོ ཝ་སྶི་ཏཱ, ནོ ག་ཛྫི་ཏཱ; ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ནེ་ཝ ག་ཛྫི་ཏཱ ཧོ་ཏི, ནོ ཝ་སྶི་ཏཱ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ནེ་ཝ བྷཱ་སི་ཏཱ ཧོ་ཏི, ནོ ཀ་ཏྟཱ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ནེ་ཝ ག་ཛྫི་ཏཱ ཧོ་ཏི, ནོ ཝ་སྶི་ཏཱ. སེ་ཡྻ་ཐཱ་པི སོ, བྷི་ཀྑ་ཝེ, ཝ་ལཱ་ཧ་ཀོ ནེ་ཝ ག་ཛྫི་ཏཱ [ནེ་ཝ ག་ཛྫི་ཏཱ ཧོ་ཏི (ཀ.)], ནོ ཝ་སྶི་ཏཱ; ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི.

‘‘ཀ་ཐ་ཉྩ, བྷི་ཀྑ་ཝེ, པུ་གྒ་ལོ ག་ཛྫི་ཏཱ ཙ ཧོ་ཏི ཝ་སྶི་ཏཱ ཙ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ བྷཱ་སི་ཏཱ ཙ ཧོ་ཏི ཀ་ཏྟཱ ཙ. ཨེ་ཝཾ ཁོ, བྷི་ཀྑ་ཝེ, པུ་གྒ་ལོ ག་ཛྫི་ཏཱ ཙ ཧོ་ཏི ཝ་སྶི་ཏཱ ཙ. སེ་ཡྻ་ཐཱ་པི སོ, བྷི་ཀྑ་ཝེ, ཝ་ལཱ་ཧ་ཀོ ག་ཛྫི་ཏཱ ཙ [ག་ཛྫི་ཏཱ ཙ ཧོ་ཏི (ཀ.)] ཝ་སྶི་ཏཱ ཙ; ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཨི་མེ ཁོ, བྷི་ཀྑ་ཝེ, ཙ་ཏྟཱ་རོ ཝ་ལཱ་ཧ་ཀཱུ་པ་མཱ པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨི’’ནྟི. པ་ཋ་མཾ.