༡. ཙ་ཀྐ་སུ་ཏྟཾ

༣༡. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཙ་ཀྐཱ་ནི, ཡེ་ཧི ས་མ་ནྣཱ་ག་ཏཱ་ནཾ དེ་ཝ་མ་ནུ་སྶཱ་ནཾ ཙ་ཏུ་ཙ་ཀྐཾ ཝ་ཏྟ་ཏི, ཡེ་ཧི ས་མ་ནྣཱ་ག་ཏཱ དེ་ཝ་མ་ནུ་སྶཱ ན་ཙི་ར་སྶེ་ཝ མ་ཧ་ནྟ་ཏྟཾ ཝེ་པུ་ལླ་ཏྟཾ པཱ་པུ་ཎ་ནྟི བྷོ་གེ་སུ. ཀ་ཏ་མཱ་ནི ཙ་ཏྟཱ་རི? པ་ཏི་རཱུ་པ་དེ་ས་ཝཱ་སོ, ས་པྤུ་རི་སཱ་ཝ་སྶ་ཡོ [ས་པྤུ་རི་སཱུ་པ་སྶ་ཡོ (སཱི. སྱཱ. ཀཾ. པཱི.)], ཨ་ཏྟ་ས་མྨཱ་པ་ཎི་དྷི, པུ་བྦེ ཙ ཀ་ཏ་པུ་ཉྙ་ཏཱ – ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི ཙ་ཀྐཱ་ནི, ཡེ་ཧི ས་མ་ནྣཱ་ག་ཏཱ་ནཾ དེ་ཝ་མ་ནུ་སྶཱ་ནཾ ཙ་ཏུ་ཙ་ཀྐཾ ཝ་ཏྟ་ཏི, ཡེ་ཧི ས་མ་ནྣཱ་ག་ཏཱ དེ་ཝ་མ་ནུ་སྶཱ ན་ཙི་ར་སྶེ་ཝ མ་ཧ་ནྟ་ཏྟཾ ཝེ་པུ་ལླ་ཏྟཾ པཱ་པུ་ཎ་ནྟི བྷོ་གེ་སཱུ’’ཏི.

‘‘པ་ཏི་རཱུ་པེ ཝ་སེ དེ་སེ, ཨ་རི་ཡ་མི་ཏྟ་ཀ་རོ སི་ཡཱ;

ས་མྨཱ་པ་ཎི་དྷི་ས་མྤ་ནྣོ, པུ་བྦེ པུ་ཉྙ་ཀ་ཏོ ན་རོ;

དྷ་ཉྙཾ དྷ་ནཾ ཡ་སོ ཀི་ཏྟི, སུ་ཁ་ཉྩེ་ཏཾ་དྷི་ཝ་ཏྟ་ཏཱི’’ཏི. པ་ཋ་མཾ;