༨. པོ་ཏྠ་ཀ་སུ་ཏྟཾ
༡༠༠. ‘‘ན་ཝོ་པི, བྷི་ཀྑ་ཝེ, པོ་ཏྠ་ཀོ དུ་བྦ་ཎྞོ ཙ ཧོ་ཏི དུ་ཀྑ་ས་མྥ་སྶོ ཙ ཨ་པྤ་གྒྷོ ཙ; མ་ཛ྄ཛྷི་མོ་པི, བྷི་ཀྑ་ཝེ, པོ་ཏྠ་ཀོ དུ་བྦ་ཎྞོ ཙ ཧོ་ཏི དུ་ཀྑ་ས་མྥ་སྶོ ཙ ཨ་པྤ་གྒྷོ ཙ; ཛི་ཎྞོ་པི, བྷི་ཀྑ་ཝེ, པོ་ཏྠ་ཀོ དུ་བྦ་ཎྞོ ཙ ཧོ་ཏི དུ་ཀྑ་ས་མྥ་སྶོ ཙ ཨ་པྤ་གྒྷོ ཙ. ཛི་ཎྞ་མྤི, བྷི་ཀྑ་ཝེ, པོ་ཏྠ་ཀཾ ཨུ་ཀྑ་ལི་པ་རི་མ་ཛྫ་ནཾ ཝཱ ཀ་རོ་ནྟི ས་ངྐཱ་ར་ཀཱུ་ཊེ ཝཱ ནཾ [ཏཾ (སཱི.), ཋཱ་ནེ (ཀ.)] ཚ་ཌྜེ་ནྟི.
‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ན་ཝོ ཙེ་པི བྷི་ཀྑུ ཧོ་ཏི དུ་སྶཱི་ལོ པཱ་པ་དྷ་མྨོ. ཨི་ད་མ་སྶ དུ་བྦ་ཎྞ་ཏཱ་ཡ ཝ་དཱ་མི. སེ་ཡྻ་ཐཱ་པི སོ, བྷི་ཀྑ་ཝེ, པོ་ཏྠ་ཀོ དུ་བྦ་ཎྞོ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཡེ ཁོ པ་ན་སྶ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི དི་ཊྛཱ་ནུ་ག་ཏིཾ ཨཱ་པ་ཛྫ་ནྟི, ཏེ་སཾ ཏཾ ཧོ་ཏི དཱི་གྷ་ར་ཏྟཾ ཨ་ཧི་ཏཱ་ཡ དུ་ཀྑཱ་ཡ. ཨི་ད་མ་སྶ དུ་ཀྑ་ས་མྥ་སྶ་ཏཱ་ཡ ཝ་དཱ་མི. སེ་ཡྻ་ཐཱ་པི སོ, བྷི་ཀྑ་ཝེ, པོ་ཏྠ་ཀོ དུ་ཀྑ་ས་མྥ་སྶོ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཡེ་སཾ ཁོ པ་ན སོ [ཡེ་སཾ ཁོ པ་ན (སཱི. སྱཱ. ཀཾ. པཱི.), ཡེ་སཾ སོ (ཀ.) པུ. པ. ༡༡༦ པ་སྶི་ཏ་བྦཾ] པ་ཊི་གྒ་ཎྷཱ་ཏི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཾ, ཏེ་སཾ ཏཾ ན མ་ཧ་པྥ་ལཾ ཧོ་ཏི ན མ་ཧཱ་ནི་སཾ་སཾ. ཨི་ད་མ་སྶ ཨ་པྤ་གྒྷ་ཏཱ་ཡ ཝ་དཱ་མི. སེ་ཡྻ་ཐཱ་པི སོ, བྷི་ཀྑ་ཝེ, པོ་ཏྠ་ཀོ ཨ་པྤ་གྒྷོ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. མ་ཛ྄ཛྷི་མོ ཙེ་པི, བྷི་ཀྑ་ཝེ, བྷི་ཀྑུ ཧོ་ཏི…པེ… ཐེ་རོ ཙེ་པི, བྷི་ཀྑ་ཝེ, བྷི་ཀྑུ ཧོ་ཏི དུ་སྶཱི་ལོ པཱ་པ་དྷ་མྨོ, ཨི་ད་མ་སྶ དུ་བྦ་ཎྞ་ཏཱ་ཡ ཝ་དཱ་མི. སེ་ཡྻ་ཐཱ་པི སོ, བྷི་ཀྑ་ཝེ, པོ་ཏྠ་ཀོ དུ་བྦ་ཎྞོ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཡེ ཁོ པ་ན་སྶ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི དི་ཊྛཱ་ནུ་ག་ཏིཾ ཨཱ་པ་ཛྫ་ནྟི, ཏེ་སཾ ཏཾ ཧོ་ཏི དཱི་གྷ་ར་ཏྟཾ ཨ་ཧི་ཏཱ་ཡ དུ་ཀྑཱ་ཡ. ཨི་ད་མ་སྶ དུ་ཀྑ་ས་མྥ་སྶ་ཏཱ་ཡ ཝ་དཱ་མི. སེ་ཡྻ་ཐཱ་པི སོ, བྷི་ཀྑ་ཝེ, པོ་ཏྠ་ཀོ དུ་ཀྑ་ས་མྥ་སྶོ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཡེ་སཾ ཁོ པ་ན སོ པ་ཊི་གྒ་ཎྷཱ་ཏི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཾ, ཏེ་སཾ ཏཾ ན མ་ཧ་པྥ་ལཾ ཧོ་ཏི ན མ་ཧཱ་ནི་སཾ་སཾ. ཨི་ད་མ་སྶ ཨ་པྤ་གྒྷ་ཏཱ་ཡ ཝ་དཱ་མི. སེ་ཡྻ་ཐཱ་པི སོ, བྷི་ཀྑ་ཝེ, པོ་ཏྠ་ཀོ ཨ་པྤ་གྒྷོ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི.
‘‘ཨེ་ཝ་རཱུ་པོ ཙཱ་ཡཾ, བྷི་ཀྑ་ཝེ, ཐེ་རོ བྷི་ཀྑུ ས་ངྒྷ་མ་ཛ྄ཛྷེ བྷ་ཎ་ཏི. ཏ་མེ་ནཾ བྷི་ཀྑཱུ ཨེ་ཝ་མཱ་ཧཾ་སུ – ‘ཀིཾ ནུ ཁོ ཏུ་ཡ྄ཧཾ བཱ་ལ་སྶ ཨ་བྱ་ཏྟ་སྶ བྷ་ཎི་ཏེ་ན, ཏྭ་མྤི ནཱ་མ བྷ་ཎི་ཏ་བྦཾ མ་ཉྙ་སཱི’ཏི! སོ ཀུ་པི་ཏོ ཨ་ན་ཏྟ་མ་ནོ ཏ་ཐཱ་རཱུ་པིཾ ཝཱ་ཙཾ ནི་ཙྪཱ་རེ་ཏི ཡ་ཐཱ་རཱུ་པཱ་ཡ ཝཱ་ཙཱ་ཡ ས་ངྒྷོ ཏཾ ཨུ་ཀྑི་པ་ཏི, ས་ངྐཱ་ར་ཀཱུ་ཊེ་ཝ ནཾ པོ་ཏྠ་ཀཾ.
‘‘ན་ཝ་མྤི, བྷི་ཀྑ་ཝེ, ཀཱ་སི་ཀཾ ཝ་ཏྠཾ ཝ་ཎྞ་ཝ་ནྟ་ཉྩེ་ཝ ཧོ་ཏི སུ་ཁ་ས་མྥ་སྶ་ཉྩ མ་ཧ་གྒྷ་ཉྩ; མ་ཛ྄ཛྷི་མ་མྤི, བྷི་ཀྑ་ཝེ, ཀཱ་སི་ཀཾ ཝ་ཏྠཾ ཝ་ཎྞ་ཝ་ནྟ་ཉྩེ་ཝ ཧོ་ཏི སུ་ཁ་ས་མྥ་སྶ་ཉྩ མ་ཧ་གྒྷ་ཉྩ; ཛི་ཎྞ་མྤི, བྷི་ཀྑ་ཝེ, ཀཱ་སི་ཀཾ ཝ་ཏྠཾ ཝ་ཎྞ་ཝ་ནྟ་ཉྩེ་ཝ ཧོ་ཏི སུ་ཁ་ས་མྥ་སྶ་ཉྩ མ་ཧ་གྒྷ་ཉྩ. ཛི་ཎྞ་མྤི, བྷི་ཀྑ་ཝེ, ཀཱ་སི་ཀཾ ཝ་ཏྠཾ ར་ཏ་ན་པ་ལི་ཝེ་ཋ་ནཾ ཝཱ ཀ་རོ་ཏི ག་ནྡྷ་ཀ་ར་ཎྜ་ཀེ ཝཱ ནཾ པ་ཀྑི་པ་ནྟི.
‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ན་ཝོ ཙེ་པི བྷི་ཀྑུ ཧོ་ཏི སཱི་ལ་ཝཱ ཀ་ལྱཱ་ཎ་དྷ་མྨོ, ཨི་ད་མ་སྶ སུ་ཝ་ཎྞ་ཏཱ་ཡ ཝ་དཱ་མི. སེ་ཡྻ་ཐཱ་པི ཏཾ, བྷི་ཀྑ་ཝེ, ཀཱ་སི་ཀཾ ཝ་ཏྠཾ ཝ་ཎྞ་ཝ་ནྟཾ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཡེ ཁོ པ་ན་སྶ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི དི་ཊྛཱ་ནུ་ག་ཏིཾ ཨཱ་པ་ཛྫ་ནྟི, ཏེ་སཾ ཏཾ ཧོ་ཏི དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡ. ཨི་ད་མ་སྶ སུ་ཁ་ས་མྥ་སྶ་ཏཱ་ཡ ཝ་དཱ་མི. སེ་ཡྻ་ཐཱ་པི ཏཾ, བྷི་ཀྑ་ཝེ, ཀཱ་སི་ཀཾ ཝ་ཏྠཾ སུ་ཁ་ས་མྥ་སྶཾ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. ཡེ་སཾ ཁོ པ་ན སོ པ་ཊི་གྒ་ཎྷཱ་ཏི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པྤ་ཙྩ་ཡ་བྷེ་ས་ཛྫ་པ་རི་ཀྑཱ་རཾ, ཏེ་སཾ ཏཾ མ་ཧ་པྥ་ལཾ ཧོ་ཏི མ་ཧཱ་ནི་སཾ་སཾ. ཨི་ད་མ་སྶ མ་ཧ་གྒྷ་ཏཱ་ཡ ཝ་དཱ་མི. སེ་ཡྻ་ཐཱ་པི ཏཾ, བྷི་ཀྑ་ཝེ, ཀཱ་སི་ཀཾ ཝ་ཏྠཾ མ་ཧ་གྒྷཾ ཏ་ཐཱུ་པ་མཱ་ཧཾ, བྷི་ཀྑ་ཝེ, ཨི་མཾ པུ་གྒ་ལཾ ཝ་དཱ་མི. མ་ཛ྄ཛྷི་མོ ཙེ་པི, བྷི་ཀྑ་ཝེ, བྷི་ཀྑུ ཧོ་ཏི…པེ… ཐེ་རོ ཙེ་པི, བྷི་ཀྑ་ཝེ, བྷི་ཀྑུ ཧོ་ཏི…པེ… པུ་གྒ་ལཾ ཝ་དཱ་མི.
‘‘ཨེ་ཝ་རཱུ་པོ ཙཱ་ཡཾ, བྷི་ཀྑ་ཝེ, ཐེ་རོ བྷི་ཀྑུ ས་ངྒྷ་མ་ཛ྄ཛྷེ བྷ་ཎ་ཏི. ཏ་མེ་ནཾ བྷི་ཀྑཱུ ཨེ་ཝ་མཱ་ཧཾ་སུ – ‘ཨ་པྤ་ས་དྡཱ ཨཱ་ཡ་སྨ་ནྟོ ཧོ་ཐ, ཐེ་རོ བྷི་ཀྑུ དྷ་མྨ་ཉྩ ཝི་ན་ཡ་ཉྩ བྷ་ཎ་ཏཱི’ཏི. ཏ་སྨཱ་ཏི་ཧ, བྷི་ཀྑ་ཝེ, ཨེ་ཝཾ སི་ཀྑི་ཏ་བྦཾ – ‘ཀཱ་སི་ཀ་ཝ་ཏྠཱུ་པ་མཱ བྷ་ཝི་སྶཱ་མ, ན པོ་ཏྠ་ཀཱུ་པ་མཱ’ཏི [ཀཱ་སི་ཀཾ ཝ་ཏྠཾ ཏ་ཐཱུ་པ་མཱ་ཧཾ བྷ་ཝི་སྶཱ་མི, ན པོ་ཏྠ་ཀཱུ་པ་མཱ་ཧ་ནྟི (ཀ.)]. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. ཨ་ཊྛ་མཾ.