༢. པ་ཝི་ཝེ་ཀ་སུ་ཏྟཾ
༩༤. ‘‘ཏཱི་ཎི་མཱ་ནི, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ པ་ཝི་ཝེ་ཀཱ་ནི པ་ཉྙཱ་པེ་ནྟི. ཀ་ཏ་མཱ་ནི ཏཱི་ཎི? ཙཱི་ཝ་ར་པ་ཝི་ཝེ་ཀཾ, པི་ཎྜ་པཱ་ཏ་པ་ཝི་ཝེ་ཀཾ, སེ་ནཱ་ས་ན་པ་ཝི་ཝེ་ཀཾ.
‘‘ཏ་ཏྲི་དཾ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཙཱི་ཝ་ར་པ་ཝི་ཝེ་ཀ་སྨིཾ པ་ཉྙཱ་པེ་ནྟི, སཱ་ཎཱ་ནི་པི དྷཱ་རེ་ནྟི, མ་སཱ་ཎཱ་ནི་པི དྷཱ་རེ་ནྟི, ཚ་ཝ་དུ་སྶཱ་ནི་པི དྷཱ་རེ་ནྟི, པཾ་སུ་ཀཱུ་ལཱ་ནི་པི དྷཱ་རེ་ནྟི, ཏི་རཱི་ཊཱ་ནི་པི དྷཱ་རེ་ནྟི, ཨ་ཛི་ན་མྤི དྷཱ་རེ་ནྟི, ཨ་ཛི་ན་ཀྑི་པ་མྤི དྷཱ་རེ་ནྟི, ཀུ་ས་ཙཱི་ར་མྤི དྷཱ་རེ་ནྟི, ཝཱ་ཀ་ཙཱི་ར་མྤི དྷཱ་རེ་ནྟི, ཕ་ལ་ཀ་ཙཱི་ར་མྤི དྷཱ་རེ་ནྟི, ཀེ་ས་ཀ་མྦ་ལ་མྤི དྷཱ་རེ་ནྟི, ཝཱ་ལ་ཀ་མྦ་ལ་མྤི དྷཱ་རེ་ནྟི, ཨུ་ལཱུ་ཀ་པ་ཀྑི་ཀ་མྤི དྷཱ་རེ་ནྟི. ཨི་དཾ ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ ཙཱི་ཝ་ར་པ་ཝི་ཝེ་ཀ་སྨིཾ པ་ཉྙཱ་པེ་ནྟི.
‘‘ཏ་ཏྲི་དཾ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ པི་ཎྜ་པཱ་ཏ་པ་ཝི་ཝེ་ཀ་སྨིཾ པ་ཉྙཱ་པེ་ནྟི. སཱ་ཀ་བྷ་ཀྑཱ་པི ཧོ་ནྟི, སཱ་མཱ་ཀ་བྷ་ཀྑཱ་པི ཧོ་ནྟི, ནཱི་ཝཱ་ར་བྷ་ཀྑཱ་པི ཧོ་ནྟི, ད་དྡུ་ལ་བྷ་ཀྑཱ་པི ཧོ་ནྟི, ཧ་ཊ་བྷ་ཀྑཱ་པི ཧོ་ནྟི, ཀ་ཎ་བྷ་ཀྑཱ་པི ཧོ་ནྟི, ཨཱ་ཙཱ་མ་བྷ་ཀྑཱ་པི ཧོ་ནྟི, པི་ཉྙཱ་ཀ་བྷ་ཀྑཱ་པི ཧོ་ནྟི, ཏི་ཎ་བྷ་ཀྑཱ་པི ཧོ་ནྟི, གོ་མ་ཡ་བྷ་ཀྑཱ་པི ཧོ་ནྟི, ཝ་ན་མཱུ་ལ་ཕ་ལཱ་ཧཱ་རཱ ཡཱ་པེ་ནྟི པ་ཝ་ཏྟ་ཕ་ལ་བྷོ་ཛཱི. ཨི་དཾ ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ པི་ཎྜ་པཱ་ཏ་པ་ཝི་ཝེ་ཀ་སྨིཾ པ་ཉྙཱ་པེ་ནྟི.
‘‘ཏ་ཏྲི་དཾ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ སེ་ནཱ་ས་ན་པ་ཝི་ཝེ་ཀ་སྨིཾ པ་ཉྙཱ་པེ་ནྟི ཨ་ར་ཉྙཾ རུ་ཀྑ་མཱུ་ལཾ སུ་སཱ་ནཾ [རུ་ཀྑ་མཱུ་ལཾ བྷུ་སཱ་གཱ་རཾ སུ་སཱ་ནཾ (ཀ.)] ཝ་ན་པ་ཏྠཾ ཨ་བྦྷོ་ཀཱ་སཾ པ་ལཱ་ལ་པུ་ཉྫཾ བྷུ་སཱ་གཱ་རཾ [སུ་ཉྙཱ་གཱ་རཾ (ཀ.)]. ཨི་དཾ ཁོ, བྷི་ཀྑ་ཝེ, ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ སེ་ནཱ་ས་ན་པ་ཝི་ཝེ་ཀ་སྨིཾ པ་ཉྙཱ་པེ་ནྟི. ཨི་མཱ་ནི ཁོ, བྷི་ཀྑ་ཝེ, ཏཱི་ཎི ཨ་ཉྙ་ཏི་ཏྠི་ཡཱ པ་རི་བྦཱ་ཛ་ཀཱ པ་ཝི་ཝེ་ཀཱ་ནི པ་ཉྙཱ་པེ་ནྟི.
‘‘ཏཱི་ཎི ཁོ པ་ནི་མཱ་ནི, བྷི་ཀྑ་ཝེ, ཨི་མ་སྨིཾ དྷ་མྨ་ཝི་ན་ཡེ བྷི་ཀྑུ་ནོ པ་ཝི་ཝེ་ཀཱ་ནི. ཀ་ཏ་མཱ་ནི ཏཱི་ཎི? ཨི་དྷ, བྷི་ཀྑ་ཝེ, བྷི་ཀྑུ སཱི་ལ་ཝཱ ཙ ཧོ་ཏི, དུ་སྶཱི་ལྱ་ཉྩ་སྶ པ་ཧཱི་ནཾ ཧོ་ཏི, ཏེ་ན ཙ ཝི་ཝི་ཏྟོ ཧོ་ཏི; ས་མྨཱ་དི་ཊྛི་ཀོ ཙ ཧོ་ཏི, མི་ཙྪཱ་དི་ཊྛི ཙ་སྶ པ་ཧཱི་ནཱ ཧོ་ཏི, ཏཱ་ཡ ཙ ཝི་ཝི་ཏྟོ ཧོ་ཏི; ཁཱི་ཎཱ་ས་ཝོ ཙ ཧོ་ཏི, ཨཱ་ས་ཝཱ ཙ་སྶ པ་ཧཱི་ནཱ ཧོ་ནྟི, ཏེ་ཧི ཙ ཝི་ཝི་ཏྟོ ཧོ་ཏི. ཡ་ཏོ ཁོ, བྷི་ཀྑ་ཝེ, བྷི་ཀྑུ སཱི་ལ་ཝཱ ཧོ་ཏི, དུ་སྶཱི་ལྱ་ཉྩ་སྶ པ་ཧཱི་ནཾ ཧོ་ཏི, ཏེ་ན ཙ ཝི་ཝི་ཏྟོ ཧོ་ཏི; ས་མྨཱ་དི་ཊྛི་ཀོ ཙ ཧོ་ཏི, མི་ཙྪཱ་དི་ཊྛི ཙ་སྶ པ་ཧཱི་ནཱ ཧོ་ཏི, ཏཱ་ཡ ཙ ཝི་ཝི་ཏྟོ ཧོ་ཏི; ཁཱི་ཎཱ་ས་ཝོ ཙ ཧོ་ཏི, ཨཱ་ས་ཝཱ ཙ་སྶ པ་ཧཱི་ནཱ ཧོ་ནྟི, ཏེ་ཧི ཙ ཝི་ཝི་ཏྟོ ཧོ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘བྷི་ཀྑུ ཨ་གྒ་པྤ་ཏྟོ སཱ་ར་པྤ་ཏྟོ སུ་དྡྷོ སཱ་རེ པ་ཏི་ཊྛི་ཏོ’’’.
‘‘སེ་ཡྻ་ཐཱ་པི, བྷི་ཀྑ་ཝེ, ཀ་སྶ་ཀ་སྶ ག་ཧ་པ་ཏི་སྶ ས་མྤ་ནྣཾ སཱ་ལི་ཀྑེ་ཏྟཾ. ཏ་མེ་ནཾ ཀ་སྶ་ཀོ ག་ཧ་པ་ཏི སཱི་གྷཾ སཱི་གྷཾ [སཱི་གྷ་སཱི་གྷཾ (སཱི. སྱཱ. ཀཾ. པཱི.)] ལ་ཝཱ་པེ་ཡྻ. སཱི་གྷཾ སཱི་གྷཾ ལ་ཝཱ་པེ་ཏྭཱ སཱི་གྷཾ སཱི་གྷཾ ས་ངྒྷ་རཱ་པེ་ཡྻ. སཱི་གྷཾ སཱི་གྷཾ ས་ངྒྷ་རཱ་པེ་ཏྭཱ སཱི་གྷཾ སཱི་གྷཾ ཨུ་བྦ་ཧཱ་པེ་ཡྻ [ཨུ་བྦཱ་ཧཱ་པེ་ཡྻ (སྱཱ. ཀཾ.)]. སཱི་གྷཾ སཱི་གྷཾ ཨུ་བྦ་ཧཱ་པེ་ཏྭཱ སཱི་གྷཾ སཱི་གྷཾ པུ་ཉྫཾ ཀཱ་རཱ་པེ་ཡྻ. སཱི་གྷཾ སཱི་གྷཾ པུ་ཉྫཾ ཀཱ་རཱ་པེ་ཏྭཱ སཱི་གྷཾ སཱི་གྷཾ མ་དྡཱ་པེ་ཡྻ. སཱི་གྷཾ སཱི་གྷཾ མ་དྡཱ་པེ་ཏྭཱ སཱི་གྷཾ སཱི་གྷཾ པ་ལཱ་ལཱ་ནི ཨུ་དྡྷ་རཱ་པེ་ཡྻ. སཱི་གྷཾ སཱི་གྷཾ པ་ལཱ་ལཱ་ནི ཨུ་དྡྷ་རཱ་པེ་ཏྭཱ སཱི་གྷཾ སཱི་གྷཾ བྷུ་སི་ཀཾ ཨུ་དྡྷ་རཱ་པེ་ཡྻ. སཱི་གྷཾ སཱི་གྷཾ བྷུ་སི་ཀཾ ཨུ་དྡྷ་རཱ་པེ་ཏྭཱ སཱི་གྷཾ སཱི་གྷཾ ཨོ་པུ་ནཱ་པེ་ཡྻ. སཱི་གྷཾ སཱི་གྷཾ ཨོ་པུ་ནཱ་པེ་ཏྭཱ སཱི་གྷཾ སཱི་གྷཾ ཨ་ཏི་ཧ་རཱ་པེ་ཡྻ. སཱི་གྷཾ སཱི་གྷཾ ཨ་ཏི་ཧ་རཱ་པེ་ཏྭཱ སཱི་གྷཾ སཱི་གྷཾ ཀོ་ཊྚཱ་པེ་ཡྻ. སཱི་གྷཾ སཱི་གྷཾ ཀོ་ཊྚཱ་པེ་ཏྭཱ སཱི་གྷཾ སཱི་གྷཾ ཐུ་སཱ་ནི ཨུ་དྡྷ་རཱ་པེ་ཡྻ. ཨེ་ཝ་མ་སྶུ [ཨེ་ཝ་སྶུ (ཀ.)] ཏཱ་ནི, བྷི་ཀྑ་ཝེ, ཀ་སྶ་ཀ་སྶ ག་ཧ་པ་ཏི་སྶ དྷ་ཉྙཱ་ནི ཨ་གྒ་པྤ་ཏྟཱ་ནི སཱ་ར་པྤ་ཏྟཱ་ནི སུ་དྡྷཱ་ནི སཱ་རེ པ་ཏི་ཊྛི་ཏཱ་ནི.
‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ཡ་ཏོ བྷི་ཀྑུ སཱི་ལ་ཝཱ ཙ ཧོ་ཏི, དུ་སྶཱི་ལྱ་ཉྩ་སྶ པ་ཧཱི་ནཾ ཧོ་ཏི, ཏེ་ན ཙ ཝི་ཝི་ཏྟོ ཧོ་ཏི; ས་མྨཱ་དི་ཊྛི་ཀོ ཙ ཧོ་ཏི, མི་ཙྪཱ་དི་ཊྛི ཙ་སྶ པ་ཧཱི་ནཱ ཧོ་ཏི, ཏཱ་ཡ ཙ ཝི་ཝི་ཏྟོ ཧོ་ཏི; ཁཱི་ཎཱ་ས་ཝོ ཙ ཧོ་ཏི, ཨཱ་ས་ཝཱ ཙ་སྶ པ་ཧཱི་ནཱ ཧོ་ནྟི, ཏེ་ཧི ཙ ཝི་ཝི་ཏྟོ ཧོ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, ‘བྷི་ཀྑུ ཨ་གྒ་པྤ་ཏྟོ སཱ་ར་པྤ་ཏྟོ སུ་དྡྷོ སཱ་རེ པ་ཏི་ཊྛི་ཏོ’’’ཏི. དུ་ཏི་ཡཾ.