༨. ཏ་ཏི་ཡ་སི་ཀྑཱ་སུ་ཏྟཾ
༨༩. ‘‘སཱ་དྷི་ཀ་མི་དཾ, བྷི་ཀྑ་ཝེ, དི་ཡ་ཌྜྷ་སི་ཀྑཱ་པ་ད་ས་ཏཾ ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏི ཡ་ཏྠ ཨ་ཏྟ་ཀཱ་མཱ ཀུ་ལ་པུ་ཏྟཱ སི་ཀྑ་ནྟི. ཏི་སྶོ ཨི་མཱ, བྷི་ཀྑ་ཝེ, སི་ཀྑཱ ཡ་ཏྠེ་ཏཾ ས་བྦཾ ས་མོ་དྷཱ་ནཾ ག་ཙྪ་ཏི. ཀ་ཏ་མཱ ཏི་སྶོ? ཨ་དྷི་སཱི་ལ་སི་ཀྑཱ, ཨ་དྷི་ཙི་ཏྟ་སི་ཀྑཱ, ཨ་དྷི་པ་ཉྙཱ་སི་ཀྑཱ – ཨི་མཱ ཁོ, བྷི་ཀྑ་ཝེ, ཏི་སྶོ སི་ཀྑཱ ཡ་ཏྠེ་ཏཾ ས་བྦཾ ས་མོ་དྷཱ་ནཾ ག་ཙྪ་ཏི.
‘‘ཨི་དྷ, བྷི་ཀྑ་ཝེ, བྷི་ཀྑུ སཱི་ལེ་སུ པ་རི་པཱུ་ར་ཀཱ་རཱི ཧོ་ཏི ས་མཱ་དྷི་སྨིཾ པ་རི་པཱུ་ར་ཀཱ་རཱི པ་ཉྙཱ་ཡ པ་རི་པཱུ་ར་ཀཱ་རཱི. སོ ཡཱ་ནི ཏཱ་ནི ཁུ་དྡཱ་ནུ་ཁུ་དྡ་ཀཱ་ནི སི་ཀྑཱ་པ་དཱ་ནི ཏཱ་ནི ཨཱ་པ་ཛྫ་ཏི་པི ཝུ་ཊྛཱ་ཏི་པི. ཏཾ ཀི་སྶ ཧེ་ཏུ? ན ཧི མེ་ཏྠ, བྷི་ཀྑ་ཝེ, ཨ་བྷ་བྦ་ཏཱ ཝུ་ཏྟཱ. ཡཱ་ནི ཙ ཁོ ཏཱ་ནི སི་ཀྑཱ་པ་དཱ་ནི ཨཱ་དི་བྲ་ཧྨ་ཙ་རི་ཡ་ཀཱ་ནི བྲ་ཧྨ་ཙ་རི་ཡ་སཱ་རུ་པྤཱ་ནི ཏ་ཏྠ དྷུ་ཝ་སཱི་ལོ ཙ ཧོ་ཏི ཋི་ཏ་སཱི་ལོ ཙ, ས་མཱ་དཱ་ཡ སི་ཀྑ་ཏི སི་ཀྑཱ་པ་དེ་སུ. སོ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ, རཱ་ག་དོ་ས་མོ་ཧཱ་ནཾ ཏ་ནུ་ཏྟཱ ས་ཀ་དཱ་གཱ་མཱི ཧོ་ཏི, ས་ཀི་དེ་ཝ ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨེ་ཀ་བཱི་ཛཱི ཧོ་ཏི, ཨེ་ཀཾ་ཡེ་ཝ མཱ་ནུ་ས་ཀཾ བྷ་ཝཾ ནི་བྦ་ཏྟེ་ཏྭཱ དུ་ཀྑ་སྶ་ནྟཾ ཀ་རོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཀོ་ལཾ་ཀོ་ལོ ཧོ་ཏི, དྭེ ཝཱ ཏཱི་ཎི ཝཱ ཀུ་ལཱ་ནི ས་ནྡྷཱ་ཝི་ཏྭཱ སཾ་ས་རི་ཏྭཱ དུ་ཀྑ་སྶ་ནྟཾ ཀ་རོ་ཏི. ཏཾ ཝཱ པ་ན ཨ་ན་བྷི་ས་མྦྷ་ཝཾ ཨ་པྤ་ཊི་ཝི་ཛ྄ཛྷཾ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ས་ཏྟ་ཀྑ་ཏྟུ་པ་ར་མོ ཧོ་ཏི, ས་ཏྟ་ཀྑ་ཏྟུ་པ་ར་མཾ དེ་ཝེ ཙ མ་ནུ་སྶེ ཙ ས་ནྡྷཱ་ཝི་ཏྭཱ སཾ་ས་རི་ཏྭཱ དུ་ཀྑ་སྶ་ནྟཾ ཀ་རོ་ཏི.
‘‘ཨི་ཏི ཁོ, བྷི་ཀྑ་ཝེ, པ་རི་པཱུ་རཾ པ་རི་པཱུ་ར་ཀཱ་རཱི ཨཱ་རཱ་དྷེ་ཏི པ་དེ་སཾ པ་དེ་ས་ཀཱ་རཱི. ཨ་ཝ་ཉྫྷཱ་ནི་ཏྭེ་ཝཱ་ཧཾ, བྷི་ཀྑ་ཝེ, སི་ཀྑཱ་པ་དཱ་ནི ཝ་དཱ་མཱི’’ཏི. ཨ་ཊྛ་མཾ.