༤. ཝ་ཛྫི་པུ་ཏྟ་སུ་ཏྟཾ

༨༥. ཨེ་ཀཾ ས་མ་ཡཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཨ་ཐ ཁོ ཨ་ཉྙ་ཏ་རོ ཝ་ཛྫི་པུ་ཏྟ་ཀོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སོ ཝ་ཛྫི་པུ་ཏྟ་ཀོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སཱ་དྷི་ཀ་མི་དཾ, བྷ་ནྟེ, དི་ཡ་ཌྜྷ་སི་ཀྑཱ་པ་ད་ས་ཏཾ [དི་ཡ་ཌྜྷཾ སི་ཀྑཱ་པ་ད་ས་ཏཾ (སཱི.)] ཨ་ནྭ་དྡྷ་མཱ་སཾ ཨུ་དྡེ་སཾ ཨཱ་ག་ཙྪ་ཏི. ནཱ་ཧཾ, བྷ་ནྟེ, ཨེ་ཏྠ ས་ཀྐོ་མི སི་ཀྑི་ཏུ’’ནྟི. ‘‘ས་ཀྑི་སྶ་སི པ་ན ཏྭཾ, བྷི་ཀྑུ, ཏཱི་སུ སི་ཀྑཱ་སུ སི་ཀྑི་ཏུཾ – ཨ་དྷི་སཱི་ལ་སི་ཀྑཱ་ཡ, ཨ་དྷི་ཙི་ཏྟ་སི་ཀྑཱ་ཡ ཨ་དྷི་པ་ཉྙཱ་སི་ཀྑཱ་ཡཱ’’ཏི? ‘‘ས་ཀྐོ་མ་ཧཾ, བྷ་ནྟེ, ཏཱི་སུ སི་ཀྑཱ་སུ སི་ཀྑི་ཏུཾ – ཨ་དྷི་སཱི་ལ་སི་ཀྑཱ་ཡ, ཨ་དྷི་ཙི་ཏྟ་སི་ཀྑཱ་ཡ, ཨ་དྷི་པ་ཉྙཱ་སི་ཀྑཱ་ཡཱ’’ཏི. ‘‘ཏ་སྨཱ་ཏི་ཧ ཏྭཾ, བྷི་ཀྑུ, ཏཱི་སུ སི་ཀྑཱ་སུ སི་ཀྑ་སྶུ – ཨ་དྷི་སཱི་ལ་སི་ཀྑཱ་ཡ, ཨ་དྷི་ཙི་ཏྟ་སི་ཀྑཱ་ཡ, ཨ་དྷི་པ་ཉྙཱ་སི་ཀྑཱ་ཡ’’.

‘‘ཡ་ཏོ ཁོ ཏྭཾ, བྷི་ཀྑུ, ཨ་དྷི་སཱི་ལ་མྤི སི་ཀྑི་སྶ་སི, ཨ་དྷི་ཙི་ཏྟ་མྤི སི་ཀྑི་སྶ་སི, ཨ་དྷི་པ་ཉྙ་མྤི སི་ཀྑི་སྶ་སི, ཏ་སྶ ཏུ་ཡ྄ཧཾ བྷི་ཀྑུ ཨ་དྷི་སཱི་ལ་མྤི སི་ཀྑ་ཏོ ཨ་དྷི་ཙི་ཏྟ་མྤི སི་ཀྑ་ཏོ ཨ་དྷི་པ་ཉྙ་མྤི སི་ཀྑ་ཏོ རཱ་གོ པ་ཧཱི་ཡི་སྶ་ཏི, དོ་སོ པ་ཧཱི་ཡི་སྶ་ཏི, མོ་ཧོ པ་ཧཱི་ཡི་སྶ་ཏི. སོ ཏྭཾ རཱ་ག་སྶ པ་ཧཱ་ནཱ དོ་ས་སྶ པ་ཧཱ་ནཱ མོ་ཧ་སྶ པ་ཧཱ་ནཱ ཡཾ ཨ་ཀུ་ས་ལཾ ན ཏཾ ཀ་རི་སྶ་སི, ཡཾ པཱ་པཾ ན ཏཾ སེ་ཝི་སྶ་སཱི’’ཏི.

ཨ་ཐ ཁོ སོ བྷི་ཀྑུ ཨ་པ་རེ་ན ས་མ་ཡེ་ན ཨ་དྷི་སཱི་ལ་མྤི སི་ཀྑི, ཨ་དྷི་ཙི་ཏྟ་མྤི སི་ཀྑི, ཨ་དྷི་པ་ཉྙ་མྤི སི་ཀྑི. ཏ་སྶ ཨ་དྷི་སཱི་ལ་མྤི སི་ཀྑ་ཏོ ཨ་དྷི་ཙི་ཏྟ་མྤི སི་ཀྑ་ཏོ ཨ་དྷི་པ་ཉྙ་མྤི སི་ཀྑ་ཏོ རཱ་གོ པ་ཧཱི་ཡི, དོ་སོ པ་ཧཱི་ཡི, མོ་ཧོ པ་ཧཱི་ཡི. སོ རཱ་ག་སྶ པ་ཧཱ་ནཱ དོ་ས་སྶ པ་ཧཱ་ནཱ མོ་ཧ་སྶ པ་ཧཱ་ནཱ ཡཾ ཨ་ཀུ་ས་ལཾ ཏཾ ནཱ་ཀཱ་སི, ཡཾ པཱ་པཾ ཏཾ ན སེ་ཝཱི་ཏི. ཙ་ཏུ་ཏྠཾ.