༦. པ་ལོ་ཀ་སུ་ཏྟཾ
༥༧. ཨ་ཐ ཁོ ཨ་ཉྙ་ཏ་རོ བྲཱ་ཧྨ་ཎ་མ་ཧཱ་སཱ་ལོ ཡེ་ན བྷ་ག་ཝཱ ཏེ་ནུ་པ་ས་ངྐ་མི…པེ… ཨེ་ཀ་མ་ནྟཾ ནི་སི་ནྣོ ཁོ སོ བྲཱ་ཧྨ་ཎ་མ་ཧཱ་སཱ་ལོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སུ་ཏཾ མེ་ཏཾ, བྷོ གོ་ཏ་མ, པུ་བྦ་ཀཱ་ནཾ བྲཱ་ཧྨ་ཎཱ་ནཾ ཝུ་དྡྷཱ་ནཾ མ་ཧ་ལླ་ཀཱ་ནཾ ཨཱ་ཙ་རི་ཡ་པཱ་ཙ་རི་ཡཱ་ནཾ བྷཱ་ས་མཱ་ནཱ་ནཾ – ‘པུ་བྦེ སུ་དཾ [པུ་བྦ་སྶུ་དཾ (སཱི. སྱཱ. ཀཾ. པཱི.)] ཨ་ཡཾ ལོ་ཀོ ཨ་ཝཱི་ཙི མ་ཉྙེ ཕུ་ཊོ ཨ་ཧོ་སི མ་ནུ་སྶེ་ཧི, ཀུ་ཀྐུ་ཊ་སཾ་པཱ་ཏི་ཀཱ གཱ་མ་ནི་ག་མ་རཱ་ཛ་དྷཱ་ནི་ཡོ’ཏི. ཀོ ནུ ཁོ, བྷོ གོ་ཏ་མ, ཧེ་ཏུ ཀོ པ་ཙྩ་ཡོ ཡེ་ནེ་ཏ་ར་ཧི མ་ནུ་སྶཱ་ནཾ ཁ་ཡོ ཧོ་ཏི, ཏ་ནུ་ཏྟཾ པ་ཉྙཱ་ཡ་ཏི, གཱ་མཱ་པི ཨ་གཱ་མཱ ཧོ་ནྟི, ནི་ག་མཱ་པི ཨ་ནི་ག་མཱ ཧོ་ནྟི, ན་ག་རཱ་པི ཨ་ན་ག་རཱ ཧོ་ནྟི, ཛ་ན་པ་དཱ་པི ཨ་ཛ་ན་པ་དཱ ཧོ་ནྟཱི’’ཏི?
‘‘ཨེ་ཏ་ར་ཧི, བྲཱ་ཧྨ་ཎ, མ་ནུ་སྶཱ ཨ་དྷ་མྨ་རཱ་ག་ར་ཏྟཱ ཝི་ས་མ་ལོ་བྷཱ་བྷི་བྷཱུ་ཏཱ མི་ཙྪཱ་དྷ་མྨ་པ་རེ་ཏཱ. ཏེ ཨ་དྷ་མྨ་རཱ་ག་ར་ཏྟཱ ཝི་ས་མ་ལོ་བྷཱ་བྷི་བྷཱུ་ཏཱ མི་ཙྪཱ་དྷ་མྨ་པ་རེ་ཏཱ ཏི་ཎྷཱ་ནི ས་ཏྠཱ་ནི ག་ཧེ་ཏྭཱ ཨ་ཉྙ་མ་ཉྙཾ [ཨ་ཉྙ་མ་ཉྙ་སྶ (ས་བྦ་ཏྠ)] ཛཱི་ཝི་ཏཱ ཝོ་རོ་པེ་ནྟི, ཏེ་ན བ་ཧཱུ མ་ནུ་སྶཱ ཀཱ་ལཾ ཀ་རོ་ནྟི. ཨ་ཡ་མྤི ཁོ, བྲཱ་ཧྨ་ཎ, ཧེ་ཏུ ཨ་ཡཾ པ་ཙྩ་ཡོ ཡེ་ནེ་ཏ་ར་ཧི མ་ནུ་སྶཱ་ནཾ ཁ་ཡོ ཧོ་ཏི, ཏ་ནུ་ཏྟཾ པ་ཉྙཱ་ཡ་ཏི, གཱ་མཱ་པི ཨ་གཱ་མཱ ཧོ་ནྟི, ནི་ག་མཱ་པི ཨ་ནི་ག་མཱ ཧོ་ནྟི, ན་ག་རཱ་པི ཨ་ན་ག་རཱ ཧོ་ནྟི, ཛ་ན་པ་དཱ་པི ཨ་ཛ་ན་པ་དཱ ཧོ་ནྟི.
‘‘པུ་ན ཙ་པ་རཾ, བྲཱ་ཧྨ་ཎ, ཨེ་ཏ་ར་ཧི མ་ནུ་སྶཱ ཨ་དྷ་མྨ་རཱ་ག་ར་ཏྟཱ ཝི་ས་མ་ལོ་བྷཱ་བྷི་བྷཱུ་ཏཱ མི་ཙྪཱ་དྷ་མྨ་པ་རེ་ཏཱ. ཏེ་སཾ ཨ་དྷ་མྨ་རཱ་ག་ར་ཏྟཱ་ནཾ ཝི་ས་མ་ལོ་བྷཱ་བྷི་བྷཱུ་ཏཱ་ནཾ མི་ཙྪཱ་དྷ་མྨ་པ་རེ་ཏཱ་ནཾ དེ་ཝོ ན ས་མྨཱ་དྷཱ་རཾ ཨ་ནུ་པྤ་ཝེ་ཙྪ་ཏི. ཏེ་ན དུ་བྦྷི་ཀྑཾ ཧོ་ཏི དུ་སྶ་སྶཾ སེ་ཏ་ཊྛི་ཀཾ ས་ལཱ་ཀཱ་ཝུ་ཏྟཾ. ཏེ་ན བ་ཧཱུ མ་ནུ་སྶཱ ཀཱ་ལཾ ཀ་རོ་ནྟི. ཨ་ཡ་མྤི ཁོ, བྲཱ་ཧྨ་ཎ, ཧེ་ཏུ ཨ་ཡཾ པ་ཙྩ་ཡོ ཡེ་ནེ་ཏ་ར་ཧི མ་ནུ་སྶཱ་ནཾ ཁ་ཡོ ཧོ་ཏི, ཏ་ནུ་ཏྟཾ པ་ཉྙཱ་ཡ་ཏི, གཱ་མཱ་པི ཨ་གཱ་མཱ ཧོ་ནྟི, ནི་ག་མཱ་པི ཨ་ནི་ག་མཱ ཧོ་ནྟི, ན་ག་རཱ་པི ཨ་ན་ག་རཱ ཧོ་ནྟི, ཛ་ན་པ་དཱ་པི ཨ་ཛ་ན་པ་དཱ ཧོ་ནྟི.
‘‘པུ་ན ཙ་པ་རཾ, བྲཱ་ཧྨ་ཎ, ཨེ་ཏ་ར་ཧི མ་ནུ་སྶཱ ཨ་དྷ་མྨ་རཱ་ག་ར་ཏྟཱ ཝི་ས་མ་ལོ་བྷཱ་བྷི་བྷཱུ་ཏཱ མི་ཙྪཱ་དྷ་མྨ་པ་རེ་ཏཱ. ཏེ་སཾ ཨ་དྷ་མྨ་རཱ་ག་ར་ཏྟཱ་ནཾ ཝི་ས་མ་ལོ་བྷཱ་བྷི་བྷཱུ་ཏཱ་ནཾ མི་ཙྪཱ་དྷ་མྨ་པ་རེ་ཏཱ་ནཾ ཡ་ཀྑཱ ཝཱ་ལེ༹ ཨ་མ་ནུ་སྶེ ཨོ་སྶ་ཛྫ་ནྟི [ཨོ་སྶ་ཛ་ནྟི (སཱི.)], ཏེ་ན བ་ཧཱུ མ་ནུ་སྶཱ ཀཱ་ལཾ ཀ་རོ་ནྟི. ཨ་ཡ་མྤི ཁོ, བྲཱ་ཧྨ་ཎ, ཧེ་ཏུ ཨ་ཡཾ པ་ཙྩ་ཡོ ཡེ་ནེ་ཏ་ར་ཧི མ་ནུ་སྶཱ་ནཾ ཁ་ཡོ ཧོ་ཏི, ཏ་ནུ་ཏྟཾ པ་ཉྙཱ་ཡ་ཏི, གཱ་མཱ་པི ཨ་གཱ་མཱ ཧོ་ནྟི, ནི་ག་མཱ་པི ཨ་ནི་ག་མཱ ཧོ་ནྟི, ན་ག་རཱ་པི ཨ་ན་ག་རཱ ཧོ་ནྟི, ཛ་ན་པ་དཱ་པི ཨ་ཛ་ན་པ་དཱ ཧོ་ནྟཱི’’ཏི.
‘‘ཨ་བྷི་ཀྐ་ནྟཾ, བྷོ གོ་ཏ་མ…པེ… ཨུ་པཱ་ས་ཀཾ མཾ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. ཚ་ཊྛཾ.