༧. ཝ་ཙྪ་གོ་ཏྟ་སུ་ཏྟཾ
༥༨. ཨ་ཐ ཁོ ཝ་ཙྪ་གོ་ཏྟོ [ཝ་ཙྪ་པུ་ཏྟོ (ཀ.)] པ་རི་བྦཱ་ཛ་ཀོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཝ་ཙྪ་གོ་ཏྟོ པ་རི་བྦཱ་ཛ་ཀོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སུ་ཏཾ མེ་ཏཾ, བྷོ གོ་ཏ་མ, ས་མ་ཎོ གོ་ཏ་མོ ཨེ་ཝ་མཱ་ཧ – ‘མ་ཡ྄ཧ་མེ་ཝ དཱ་ནཾ དཱ་ཏ་བྦཾ, ནཱ་ཉྙེ་སཾ དཱ་ནཾ དཱ་ཏ་བྦཾ; མ་ཡ྄ཧ་མེ་ཝ སཱ་ཝ་ཀཱ་ནཾ དཱ་ནཾ དཱ་ཏ་བྦཾ, ནཱ་ཉྙེ་སཾ སཱ་ཝ་ཀཱ་ནཾ དཱ་ནཾ དཱ་ཏ་བྦཾ; མ་ཡ྄ཧ་མེ་ཝ དི་ནྣཾ མ་ཧ་པྥ་ལཾ, ནཱ་ཉྙེ་སཾ དི་ནྣཾ མ་ཧ་པྥ་ལཾ; མ་ཡ྄ཧ་མེ་ཝ སཱ་ཝ་ཀཱ་ནཾ དི་ནྣཾ མ་ཧ་པྥ་ལཾ, ནཱ་ཉྙེ་སཾ སཱ་ཝ་ཀཱ་ནཾ དི་ནྣཾ མ་ཧ་པྥ་ལ’ནྟི. ཡེ ཏེ, བྷོ གོ་ཏ་མ, ཨེ་ཝ་མཱ་ཧཾ་སུ ‘ས་མ་ཎོ གོ་ཏ་མོ ཨེ་ཝ་མཱ་ཧ མ་ཡ྄ཧ་མེ་ཝ དཱ་ནཾ དཱ་ཏ་བྦཾ, ནཱ་ཉྙེ་སཾ དཱ་ནཾ དཱ་ཏ་བྦཾ. མ་ཡ྄ཧ་མེ་ཝ སཱ་ཝ་ཀཱ་ནཾ དཱ་ནཾ དཱ་ཏ་བྦཾ, ནཱ་ཉྙེ་སཾ སཱ་ཝ་ཀཱ་ནཾ དཱ་ནཾ དཱ་ཏ་བྦཾ. མ་ཡ྄ཧ་མེ་ཝ དི་ནྣཾ མ་ཧ་པྥ་ལཾ, ནཱ་ཉྙེ་སཾ དི་ནྣཾ མ་ཧ་པྥ་ལཾ. མ་ཡ྄ཧ་མེ་ཝ སཱ་ཝ་ཀཱ་ནཾ དི་ནྣཾ མ་ཧ་པྥ་ལཾ, ནཱ་ཉྙེ་སཾ སཱ་ཝ་ཀཱ་ནཾ དི་ནྣཾ མ་ཧ་པྥ་ལ’ནྟི. ཀ་ཙྩི ཏེ བྷོ་ཏོ གོ་ཏ་མ་སྶ ཝུ་ཏྟ་ཝཱ་དི་ནོ ཙ བྷ་ཝ་ནྟཾ གོ་ཏ་མཾ ཨ་བྷཱུ་ཏེ་ན ཨ་བྦྷཱ་ཙི་ཀྑ་ནྟི, དྷ་མྨ་སྶ ཙཱ་ནུ་དྷ་མྨཾ བྱཱ་ཀ་རོ་ནྟི, ན ཙ ཀོ་ཙི ས་ཧ་དྷ་མྨི་ཀོ ཝཱ་དཱ་ནུ་པཱ་ཏོ [ཝཱ་དཱ་ནུ་ཝཱ་དོ (ཀ.)] གཱ་ར་ཡ྄ཧཾ ཋཱ་ནཾ ཨཱ་ག་ཙྪ་ཏི? ཨ་ན་བྦྷ་ཀྑཱ་ཏུ་ཀཱ་མཱ ཧི མ་ཡཾ བྷ་ཝ་ནྟཾ གོ་ཏ་མ’’ནྟི.
‘‘ཡེ ཏེ, ཝ་ཙྪ, ཨེ་ཝ་མཱ་ཧཾ་སུ – ‘ས་མ་ཎོ གོ་ཏ་མོ ཨེ་ཝ་མཱ་ཧ – མ་ཡ྄ཧ་མེ་ཝ དཱ་ནཾ དཱ་ཏ་བྦཾ…པེ… ནཱ་ཉྙེ་སཾ སཱ་ཝ་ཀཱ་ནཾ དི་ནྣཾ མ་ཧ་པྥ་ལ’ནྟི ན མེ ཏེ ཝུ་ཏྟ་ཝཱ་དི་ནོ. ཨ་བྦྷཱ་ཙི་ཀྑ་ནྟི ཙ པ་ན མཾ [ཙ པ་ན མཾ ཏེ (སཱི. སྱཱ. ཀཾ. པཱི.)] ཨ་ས་ཏཱ ཨ་བྷཱུ་ཏེ་ན. ཡོ ཁོ, ཝ་ཙྪ, པ་རཾ དཱ་ནཾ ད་ད་ནྟཾ ཝཱ་རེ་ཏི སོ ཏི་ཎྞཾ ཨ་ནྟ་རཱ་ཡ་ཀ་རོ ཧོ་ཏི, ཏི་ཎྞཾ པཱ་རི་པ་ནྠི་ཀོ. ཀ་ཏ་མེ་སཾ ཏི་ཎྞཾ? དཱ་ཡ་ཀ་སྶ པུ་ཉྙ་ནྟ་རཱ་ཡ་ཀ་རོ ཧོ་ཏི, པ་ཊི་གྒཱ་ཧ་ཀཱ་ནཾ ལཱ་བྷ་ནྟ་རཱ་ཡ་ཀ་རོ ཧོ་ཏི, པུ་བྦེ་ཝ ཁོ པ་ན་སྶ ཨ་ཏྟཱ ཁ་ཏོ ཙ ཧོ་ཏི ཨུ་པ་ཧ་ཏོ ཙ. ཡོ ཁོ, ཝ་ཙྪ, པ་རཾ དཱ་ནཾ ད་ད་ནྟཾ ཝཱ་རེ་ཏི སོ ཨི་མེ་སཾ ཏི་ཎྞཾ ཨ་ནྟ་རཱ་ཡ་ཀ་རོ ཧོ་ཏི, ཏི་ཎྞཾ པཱ་རི་པ་ནྠི་ཀོ.
‘‘ཨ་ཧཾ ཁོ པ་ན, ཝ་ཙྪ, ཨེ་ཝཾ ཝ་དཱ་མི – ཡེ ཧི ཏེ ཙ་ནྡ་ནི་ཀཱ་ཡ ཝཱ ཨོ་ལི་ག་ལླེ ཝཱ པཱ་ཎཱ, ཏ་ཏྲ་པི ཡོ ཐཱ་ལི་དྷོ་ཝ་ནཾ [ཐཱ་ལ་ཀ་དྷོ་ཝ་ནཾ (ཀ.)] ཝཱ ས་རཱ་ཝ་དྷོ་ཝ་ནཾ ཝཱ ཚ་ཌྜེ་ཏི – ཡེ ཏ་ཏྠ པཱ་ཎཱ ཏེ ཏེ་ན ཡཱ་པེ་ནྟཱུ་ཏི, ཏ་ཏོ ནི་དཱ་ན་མྤཱ་ཧཾ, ཝ་ཙྪ, པུ་ཉྙ་སྶ ཨཱ་ག་མཾ ཝ་དཱ་མི. ཀོ པ་ན ཝཱ་དོ མ་ནུ་སྶ་བྷཱུ་ཏེ! ཨ་པི ཙཱ་ཧཾ, ཝ་ཙྪ, སཱི་ལ་ཝ་ཏོ དི་ནྣཾ མ་ཧ་པྥ་ལཾ ཝ་དཱ་མི, ནོ ཏ་ཐཱ དུ་སྶཱི་ལ་སྶ, སོ ཙ ཧོ་ཏི པ་ཉྩ་ངྒ་ཝི་པྤ་ཧཱི་ནོ པ་ཉྩ་ངྒ་ས་མ་ནྣཱ་ག་ཏོ.
‘‘ཀ་ཏ་མཱ་ནི པ་ཉྩ་ངྒཱ་ནི པ་ཧཱི་ནཱ་ནི ཧོ་ནྟི? ཀཱ་མ་ཙྪ་ནྡོ པ་ཧཱི་ནོ ཧོ་ཏི, བྱཱ་པཱ་དོ པ་ཧཱི་ནོ ཧོ་ཏི, ཐི་ན་མི་དྡྷཾ པ་ཧཱི་ནཾ ཧོ་ཏི, ཨུ་དྡྷ་ཙྩ་ཀུ་ཀྐུ་ཙྩཾ པ་ཧཱི་ནཾ ཧོ་ཏི, ཝི་ཙི་ཀི་ཙྪཱ པ་ཧཱི་ནཱ ཧོ་ཏི. ཨི་མཱ་ནི པ་ཉྩ་ངྒཱ་ནི ཝི་པྤ་ཧཱི་ནཱ་ནི ཧོ་ནྟི.
‘‘ཀ་ཏ་མེ་ཧི པ་ཉྩ་ཧི ཨ་ངྒེ་ཧི ས་མ་ནྣཱ་ག་ཏོ ཧོ་ཏི? ཨ་སེ་ཀྑེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི, ཨ་སེ་ཀྑེ་ན ས་མཱ་དྷི་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི, ཨ་སེ་ཀྑེ་ན པ་ཉྙཱ་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི, ཨ་སེ་ཀྑེ་ན ཝི་མུ་ཏྟི་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི, ཨ་སེ་ཀྑེ་ན ཝི་མུ་ཏྟི་ཉཱ་ཎ་ད་སྶ་ན་ཀྑ་ནྡྷེ་ན ས་མ་ནྣཱ་ག་ཏོ ཧོ་ཏི; ཨི་མེ་ཧི པ་ཉྩ་ཧི ཨ་ངྒེ་ཧི ས་མ་ནྣཱ་ག་ཏོ ཧོ་ཏི. ཨི་ཏི པ་ཉྩ་ངྒ་ཝི་པྤ་ཧཱི་ནེ པ་ཉྩ་ངྒ་ས་མ་ནྣཱ་ག་ཏེ དི་ནྣཾ མ་ཧ་པྥ་ལ་ནྟི ཝ་དཱ་མཱི’’ཏི.
‘‘ཨི་ཏི ཀ་ཎྷཱ་སུ སེ་ཏཱ་སུ, རོ་ཧི་ཎཱི་སུ ཧ་རཱི་སུ ཝཱ;
ཀ་མྨཱ་སཱ་སུ ས་རཱུ་པཱ་སུ, གོ་སུ པཱ་རེ་ཝ་ཏཱ་སུ ཝཱ.
‘‘ཡཱ་སུ ཀཱ་སུ་ཙི ཨེ་ཏཱ་སུ, ད་ནྟོ ཛཱ་ཡ་ཏི པུ་ངྒ་ཝོ;
དྷོ་ར་ཡ྄ཧོ བ་ལ་ས་མྤ་ནྣོ, ཀ་ལྱཱ་ཎ་ཛ་ཝ་ནི་ཀྐ་མོ;
ཏ་མེ་ཝ བྷཱ་རེ ཡུ་ཉྫ་ནྟི, ནཱ་སྶ ཝ་ཎྞཾ པ་རི་ཀྑ་རེ.
‘‘ཨེ་ཝ་མེ་ཝཾ མ་ནུ་སྶེ་སུ, ཡ་སྨིཾ ཀ་སྨི་ཉྩི ཛཱ་ཏི་ཡེ;
ཁ་ཏྟི་ཡེ བྲཱ་ཧྨ་ཎེ ཝེ་སྶེ, སུ་དྡེ ཙ་ཎྜཱ་ལ་པུ་ཀྐུ་སེ.
‘‘ཡཱ་སུ ཀཱ་སུ་ཙི ཨེ་ཏཱ་སུ, ད་ནྟོ ཛཱ་ཡ་ཏི སུ་བྦ་ཏོ;
དྷ་མྨ་ཊྛོ སཱི་ལ་ས་མྤ་ནྣོ, ས་ཙྩ་ཝཱ་དཱི ཧི་རཱི་མ་ནོ.
‘‘པ་ཧཱི་ན་ཛཱ་ཏི་མ་ར་ཎོ, བྲ་ཧྨ་ཙ་རི་ཡ་སྶ ཀེ་ཝ་ལཱི;
པ་ནྣ་བྷཱ་རོ ཝི་སཾ་ཡུ་ཏྟོ, ཀ་ཏ་ཀི་ཙྩོ ཨ་ནཱ་ས་ཝོ.
‘‘པཱ་ར་གཱུ ས་བྦ་དྷ་མྨཱ་ནཾ, ཨ་ནུ་པཱ་དཱ་ཡ ནི་བྦུ་ཏོ;
ཏ་སྨིཾ་ཡེ་ཝ [ཏ་སྨིཾ ཝེ (སྱཱ. ཀཾ.)] ཝི་ར་ཛེ ཁེ་ཏྟེ, ཝི་པུ་ལཱ ཧོ་ཏི ད་ཀྑི་ཎཱ.
‘‘བཱ་ལཱ ཙ ཨ་ཝི་ཛཱ་ན་ནྟཱ, དུ་མྨེ་དྷཱ ཨ་སྶུ་ཏཱ་ཝི་ནོ;
བ་ཧི་དྡྷཱ དེ་ནྟི དཱ་ནཱ་ནི, ན ཧི ས་ནྟེ ཨུ་པཱ་ས་རེ.
‘‘ཡེ ཙ ས་ནྟེ ཨུ་པཱ་ས་ནྟི, ས་པྤ་ཉྙེ དྷཱི་ར་ས་མྨ་ཏེ;
ས་དྡྷཱ ཙ ནེ་སཾ སུ་ག་ཏེ, མཱུ་ལ་ཛཱ་ཏཱ པ་ཏི་ཊྛི་ཏཱ.
‘‘དེ་ཝ་ལོ་ཀ་ཉྩ ཏེ ཡ་ནྟི, ཀུ་ལེ ཝཱ ཨི་དྷ ཛཱ་ཡ་རེ;
ཨ་ནུ་པུ་བྦེ་ན ནི་བྦཱ་ནཾ, ཨ་དྷི་ག་ཙྪ་ནྟི པ་ཎྜི་ཏཱ’’ཏི. ས་ཏྟ་མཾ;