༥. ནི་བྦུ་ཏ་སུ་ཏྟཾ

༥༦. ཨ་ཐ ཁོ ཛཱ་ཎུ་སྶོ་ཎི བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཛཱ་ཎུ་སྶོ་ཎི བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘‘ས་ནྡི་ཊྛི་ཀཾ ནི་བྦཱ་ནཾ ས་ནྡི་ཊྛི་ཀཾ ནི་བྦཱ་ན’ནྟི, བྷོ གོ་ཏ་མ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷོ གོ་ཏ་མ, ས་ནྡི་ཊྛི་ཀཾ ནི་བྦཱ་ནཾ ཧོ་ཏི ཨ་ཀཱ་ལི་ཀཾ ཨེ་ཧི་པ་སྶི་ཀཾ ཨོ་པ་ནེ་ཡྻི་ཀཾ པ་ཙྩ་ཏྟཾ ཝེ་དི་ཏ་བྦཾ ཝི་ཉྙཱུ་ཧཱི’’ཏི?

‘‘ར་ཏྟོ ཁོ, བྲཱ་ཧྨ་ཎ, རཱ་གེ་ན ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ ཨ་ཏྟ་བྱཱ་བཱ་དྷཱ་ཡ་པི ཙེ་ཏེ་ཏི, པ་ར་བྱཱ་བཱ་དྷཱ་ཡ་པི ཙེ་ཏེ་ཏི, ཨུ་བྷ་ཡ་བྱཱ་བཱ་དྷཱ་ཡ་པི ཙེ་ཏེ་ཏི, ཙེ་ཏ་སི་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. རཱ་གེ པ་ཧཱི་ནེ ནེ་ཝ་ཏྟ་བྱཱ་བཱ་དྷཱ་ཡ་པི ཙེ་ཏེ་ཏི, ན པ་ར་བྱཱ་བཱ་དྷཱ་ཡ་པི ཙེ་ཏེ་ཏི, ན ཨུ་བྷ་ཡ་བྱཱ་བཱ་དྷཱ་ཡ་པི ཙེ་ཏེ་ཏི, ན ཙེ་ཏ་སི་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. ཨེ་ཝ་མྤི ཁོ, བྲཱ་ཧྨ་ཎ, ས་ནྡི་ཊྛི་ཀཾ ནི་བྦཱ་ནཾ ཧོ་ཏི.

‘‘དུ་ཊྛོ ཁོ, བྲཱ་ཧྨ་ཎ…པེ… མཱུ་ལ༹ྷོ ཁོ, བྲཱ་ཧྨ་ཎ, མོ་ཧེ་ན ཨ་བྷི་བྷཱུ་ཏོ པ་རི་ཡཱ་དི་ནྣ་ཙི་ཏྟོ ཨ་ཏྟ་བྱཱ་བཱ་དྷཱ་ཡ་པི ཙེ་ཏེ་ཏི, པ་ར་བྱཱ་བཱ་དྷཱ་ཡ་པི ཙེ་ཏེ་ཏི, ཨུ་བྷ་ཡ་བྱཱ་བཱ་དྷཱ་ཡ་པི ཙེ་ཏེ་ཏི, ཙེ་ཏ་སི་ཀ་མྤི དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. མོ་ཧེ པ་ཧཱི་ནེ ནེ་ཝ་ཏྟ་བྱཱ་བཱ་དྷཱ་ཡ་པི ཙེ་ཏེ་ཏི, ན པ་ར་བྱཱ་བཱ་དྷཱ་ཡ་པི ཙེ་ཏེ་ཏི, ན ཨུ་བྷ་ཡ་བྱཱ་བཱ་དྷཱ་ཡ་པི ཙེ་ཏེ་ཏི, ན ཙེ་ཏ་སི་ཀཾ དུ་ཀྑཾ དོ་མ་ན་སྶཾ པ་ཊི་སཾ་ཝེ་དེ་ཏི. ཨེ་ཝ་མྤི ཁོ, བྲཱ་ཧྨ་ཎ, ས་ནྡི་ཊྛི་ཀཾ ནི་བྦཱ་ནཾ ཧོ་ཏི.

‘‘ཡ་ཏོ ཁོ ཨ་ཡཾ, བྲཱ་ཧྨ་ཎ [ཡ་ཏོ ཙ ཁོ ཨ་ཡཾ བྲཱ་ཧྨ་ཎ (སཱི.), ཡ་ཏོ ཁོ བྲཱ་ཧྨ་ཎ ཨ་ཀཱ་ལི་ཀཾ ཨེ་ཧི་པ་སྶི་ཀཾ ཨོ་པ་ནེ་ཡྻི་ཀཾ པ་ཙྩ་ཏྟཾ ཝེ་དི་ཏ་བྦཾ (ཀ.)], ཨ་ན་ཝ་སེ་སཾ རཱ་ག་ཀྑ་ཡཾ པ་ཊི་སཾ་ཝེ་དེ་ཏི, ཨ་ན་ཝ་སེ་སཾ དོ་ས་ཀྑ་ཡཾ པ་ཊི་སཾ་ཝེ་དེ་ཏི, ཨ་ན་ཝ་སེ་སཾ མོ་ཧ་ཀྑ་ཡཾ པ་ཊི་སཾ་ཝེ་དེ་ཏི; ཨེ་ཝཾ ཁོ, བྲཱ་ཧྨ་ཎ, ས་ནྡི་ཊྛི་ཀཾ ནི་བྦཱ་ནཾ ཧོ་ཏི ཨ་ཀཱ་ལི་ཀཾ ཨེ་ཧི་པ་སྶི་ཀཾ ཨོ་པ་ནེ་ཡྻི་ཀཾ པ་ཙྩ་ཏྟཾ ཝེ་དི་ཏ་བྦཾ ཝི་ཉྙཱུ་ཧཱི’’ཏི. ‘‘ཨ་བྷི་ཀྐ་ནྟཾ, བྷོ གོ་ཏ་མ…པེ… ཨུ་པཱ་ས་ཀཾ མཾ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. པ་ཉྩ་མཾ.