༡. པ་ཋ་མ་དྭེ་བྲཱ་ཧྨ་ཎ་སུ་ཏྟཾ

༥༢. ཨ་ཐ ཁོ དྭེ བྲཱ་ཧྨ་ཎཱ ཛི་ཎྞཱ ཝུ་དྡྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཝཱི་ས་ཝ་སྶ་ས་ཏི་ཀཱ ཛཱ་ཏི་ཡཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དིཾ་སུ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྲཱ་ཧྨ་ཎཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘མ་ཡ་མ་སྶུ, བྷོ གོ་ཏ་མ, བྲཱ་ཧྨ་ཎཱ ཛི་ཎྞཱ ཝུ་དྡྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཝཱི་ས་ཝ་སྶ་ས་ཏི་ཀཱ ཛཱ་ཏི་ཡཱ; ཏེ ཙ་མྷཱ ཨ་ཀ་ཏ་ཀ་ལྱཱ་ཎཱ ཨ་ཀ་ཏ་ཀུ་ས་ལཱ ཨ་ཀ་ཏ་བྷཱི་རུ་ཏྟཱ་ཎཱ. ཨོ་ཝ་ད་ཏུ ནོ བྷ་ཝཾ གོ་ཏ་མོ, ཨ་ནུ་སཱ་ས་ཏུ ནོ བྷ་ཝཾ གོ་ཏ་མོ ཡཾ ཨ་མྷཱ་ཀཾ ཨ་སྶ དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡཱ’’ཏི.

‘‘ཏ་གྒྷ ཏུ་མྷེ, བྲཱ་ཧྨ་ཎཱ, ཛི་ཎྞཱ ཝུ་དྡྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཝཱི་ས་ཝ་སྶ་ས་ཏི་ཀཱ ཛཱ་ཏི་ཡཱ; ཏེ ཙ་ཏྠ ཨ་ཀ་ཏ་ཀ་ལྱཱ་ཎཱ ཨ་ཀ་ཏ་ཀུ་ས་ལཱ ཨ་ཀ་ཏ་བྷཱི་རུ་ཏྟཱ་ཎཱ. ཨུ་པ་ནཱི་ཡ་ཏི ཁོ ཨ་ཡཾ, བྲཱ་ཧྨ་ཎཱ, ལོ་ཀོ ཛ་རཱ་ཡ བྱཱ་དྷི་ནཱ མ་ར་ཎེ་ན. ཨེ་ཝཾ ཨུ་པ་ནཱི་ཡ་མཱ་ནེ ཁོ, བྲཱ་ཧྨ་ཎཱ, ལོ་ཀེ ཛ་རཱ་ཡ བྱཱ་དྷི་ནཱ མ་ར་ཎེ་ན, ཡོ ཨི་དྷ ཀཱ་ཡེ་ན སཾ་ཡ་མོ ཝཱ་ཙཱ་ཡ སཾ་ཡ་མོ མ་ན་སཱ སཾ་ཡ་མོ, ཏཾ ཏ་སྶ པེ་ཏ་སྶ ཏཱ་ཎ་ཉྩ ལེ་ཎ་ཉྩ དཱི་པ་ཉྩ ས་ར་ཎ་ཉྩ པ་རཱ་ཡ་ཎ་ཉྩཱ’’ཏི.

‘‘ཨུ་པ་ནཱི་ཡ་ཏི ཛཱི་ཝི་ཏ་མ་པྤ་མཱ་ཡུ,

ཛ་རཱུ་པ་ནཱི་ཏ་སྶ ན ས་ནྟི ཏཱ་ཎཱ;

ཨེ་ཏཾ བྷ་ཡཾ མ་ར་ཎེ པེ་ཀྑ་མཱ་ནོ,

པུ་ཉྙཱ་ནི ཀ་ཡི་རཱ་ཐ སུ་ཁཱ་ཝ་ཧཱ་ནི.

‘‘ཡོ་དྷ ཀཱ་ཡེ་ན སཾ་ཡ་མོ, ཝཱ་ཙཱ་ཡ ཨུ་ད ཙེ་ཏ་སཱ;

ཏཾ ཏ་སྶ པེ་ཏ་སྶ སུ་ཁཱ་ཡ ཧོ་ཏི,

ཡཾ ཛཱི་ཝ་མཱ་ནོ པ་ཀ་རོ་ཏི པུ་ཉྙ’’ནྟི. [སཾ. ནི. ༡.༡༠༠] པ་ཋ་མཾ;