༢. དུ་ཏི་ཡ་དྭེ་བྲཱ་ཧྨ་ཎ་སུ་ཏྟཾ

༥༣. ཨ་ཐ ཁོ དྭེ བྲཱ་ཧྨ་ཎཱ ཛི་ཎྞཱ ཝུ་དྡྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཝཱི་ས་ཝ་སྶ་ས་ཏི་ཀཱ ཛཱ་ཏི་ཡཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྲཱ་ཧྨ་ཎཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘མ་ཡ་མ་སྶུ, བྷོ གོ་ཏ་མ, བྲཱ་ཧྨ་ཎཱ ཛི་ཎྞཱ ཝུ་དྡྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཝཱི་ས་ཝ་སྶ་ས་ཏི་ཀཱ ཛཱ་ཏི་ཡཱ; ཏེ ཙ་མྷཱ ཨ་ཀ་ཏ་ཀ་ལྱཱ་ཎཱ ཨ་ཀ་ཏ་ཀུ་ས་ལཱ ཨ་ཀ་ཏ་བྷཱི་རུ་ཏྟཱ་ཎཱ. ཨོ་ཝ་ད་ཏུ ནོ བྷ་ཝཾ གོ་ཏ་མོ, ཨ་ནུ་སཱ་ས་ཏུ ནོ བྷ་ཝཾ གོ་ཏ་མོ ཡཾ ཨ་མྷཱ་ཀཾ ཨ་སྶ དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡཱ’’ཏི.

‘‘ཏ་གྒྷ ཏུ་མྷེ, བྲཱ་ཧྨ་ཎཱ, ཛི་ཎྞཱ ཝུ་དྡྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཝཱི་ས་ཝ་སྶ་ས་ཏི་ཀཱ ཛཱ་ཏི་ཡཱ; ཏེ ཙ་ཏྠ ཨ་ཀ་ཏ་ཀ་ལྱཱ་ཎཱ ཨ་ཀ་ཏ་ཀུ་ས་ལཱ ཨ་ཀ་ཏ་བྷཱི་རུ་ཏྟཱ་ཎཱ. ཨཱ་དི་ཏྟོ ཁོ ཨ་ཡཾ, བྲཱ་ཧྨ་ཎཱ, ལོ་ཀོ ཛ་རཱ་ཡ བྱཱ་དྷི་ནཱ མ་ར་ཎེ་ན. ཨེ་ཝཾ ཨཱ་དི་ཏྟེ ཁོ, བྲཱ་ཧྨ་ཎཱ, ལོ་ཀེ ཛ་རཱ་ཡ བྱཱ་དྷི་ནཱ མ་ར་ཎེ་ན, ཡོ ཨི་དྷ ཀཱ་ཡེ་ན སཾ་ཡ་མོ ཝཱ་ཙཱ་ཡ སཾ་ཡ་མོ མ་ན་སཱ སཾ་ཡ་མོ, ཏཾ ཏ་སྶ པེ་ཏ་སྶ ཏཱ་ཎ་ཉྩ ལེ་ཎ་ཉྩ དཱི་པ་ཉྩ ས་ར་ཎ་ཉྩ པ་རཱ་ཡ་ཎ་ཉྩཱ’’ཏི.

‘‘ཨཱ་དི་ཏྟ་སྨིཾ ཨ་གཱ་ར་སྨིཾ, ཡཾ ནཱི་ཧ་ར་ཏི བྷཱ་ཛ་ནཾ;

ཏཾ ཏ་སྶ ཧོ་ཏི ཨ་ཏྠཱ་ཡ, ནོ ཙ ཡཾ ཏ་ཏྠ ཌ་ཡ྄ཧ་ཏི.

‘‘ཨེ་ཝཾ ཨཱ་དི་ཏྟོ ཁོ [ཨེ་ཝཾ ཨཱ་དཱི་ཝི་ཏོ (སཱི. པཱི.), ཨེ་ཝཾ ཨཱ་དི་ཏྟ་ཀོ (སྱཱ. ཀཾ.) སཾ. ནི. ༡.༤༡] ལོ་ཀོ, ཛ་རཱ་ཡ མ་ར་ཎེ་ན ཙ;

ནཱི་ཧ་རེ་ཐེ་ཝ དཱ་ནེ་ན, དི་ནྣཾ ཧོ་ཏི སུ་ནཱི་ཧ་ཏཾ [སུ་ནི་བྦྷ་ཏཾ (ཀ.)].

‘‘ཡོ་དྷ ཀཱ་ཡེ་ན སཾ་ཡ་མོ, ཝཱ་ཙཱ་ཡ ཨུ་ད ཙེ་ཏ་སཱ;

ཏཾ ཏ་སྶ པེ་ཏ་སྶ སུ་ཁཱ་ཡ ཧོ་ཏི,

ཡཾ ཛཱི་ཝ་མཱ་ནོ པ་ཀ་རོ་ཏི པུ་ཉྙ’’ནྟི. དུ་ཏི་ཡཾ;