༩. པ་བྦ་ཏ་རཱ་ཛ་སུ་ཏྟཾ

༤༩. ‘‘ཧི་མ་ཝ་ནྟཾ, བྷི་ཀྑ་ཝེ, པ་བྦ་ཏ་རཱ་ཛཾ ནི་སྶཱ་ཡ མ་ཧཱ་སཱ་ལཱ ཏཱི་ཧི ཝ་ཌྜྷཱི་ཧི ཝ་ཌྜྷ་ནྟི. ཀ་ཏ་མཱ་ཧི ཏཱི་ཧི? སཱ་ཁཱ་པ་ཏྟ་པ་ལཱ་སེ་ན ཝ་ཌྜྷ་ནྟི, ཏ་ཙ་པ་པ་ཊི་ཀཱ་ཡ ཝ་ཌྜྷ་ནྟི, ཕེ་གྒུ་སཱ་རེ་ན ཝ་ཌྜྷ་ནྟི. ཧི་མ་ཝ་ནྟཾ, བྷི་ཀྑ་ཝེ, པ་བྦ་ཏ་རཱ་ཛཾ ནི་སྶཱ་ཡ མ་ཧཱ་སཱ་ལཱ ཨི་མཱ་ཧི ཏཱི་ཧི ཝ་ཌྜྷཱི་ཧི ཝ་ཌྜྷ་ནྟི.

‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ས་དྡྷཾ ཀུ་ལ་པ་ཏིཾ ནི་སྶཱ་ཡ ཨ་ནྟོ ཛ་ནོ ཏཱི་ཧི ཝ་ཌྜྷཱི་ཧི ཝ་ཌྜྷ་ཏི. ཀ་ཏ་མཱ་ཧི ཏཱི་ཧི? ས་དྡྷཱ་ཡ ཝ་ཌྜྷ་ཏི, སཱི་ལེ་ན ཝ་ཌྜྷ་ཏི, པ་ཉྙཱ་ཡ ཝ་ཌྜྷ་ཏི. ས་དྡྷཾ, བྷི་ཀྑ་ཝེ, ཀུ་ལ་པ་ཏིཾ ནི་སྶཱ་ཡ ཨ་ནྟོ ཛ་ནོ ཨི་མཱ་ཧི ཏཱི་ཧི ཝ་ཌྜྷཱི་ཧི ཝ་ཌྜྷ་ཏཱི’’ཏི.

‘‘ཡ་ཐཱ་པི པ་བྦ་ཏོ སེ་ལོ, ཨ་ར་ཉྙ་སྨིཾ བྲ་ཧཱ་ཝ་ནེ;

ཏཾ རུ་ཀྑཱ ཨུ་པ་ནི་སྶཱ་ཡ, ཝ་ཌྜྷ་ནྟེ ཏེ ཝ་ན་པྤ་ཏཱི.

‘‘ཏ་ཐེ་ཝ སཱི་ལ་ས་མྤ་ནྣཾ, ས་དྡྷཾ ཀུ་ལ་པ་ཏིཾ ཨི་དྷ;

ཨུ་པ་ནི་སྶཱ་ཡ ཝ་ཌྜྷ་ནྟི, པུ་ཏྟ་དཱ་རཱ ཙ བ་ནྡྷ་ཝཱ;

ཨ་མ་ཙྩཱ ཉཱ་ཏི་ས་ངྒྷཱ ཙ, ཡེ ཙ་སྶ ཨ་ནུ་ཛཱི་ཝི་ནོ.

‘‘ཏྱཱ་སྶ སཱི་ལ་ཝ་ཏོ སཱི་ལཾ, ཙཱ་གཾ སུ་ཙ་རི་ཏཱ་ནི ཙ;

པ་སྶ་མཱ་ནཱ་ནུ་ཀུ་བྦ་ནྟི, ཨ་ཏྟ་མ་ཏྠཾ [ཡེ བྷ་ཝ་ནྟི (སཱི. སྱཱ. ཀཾ. པཱི.)] ཝི་ཙ་ཀྑ་ཎཱ.

‘‘ཨི་དྷ དྷ་མྨཾ ཙ་རི་ཏྭཱ་ན, མ་གྒཾ སུ་ག་ཏི་གཱ་མི་ནཾ;

ན་ནྡི་ནོ དེ་ཝ་ལོ་ཀ་སྨིཾ, མོ་ད་ནྟི ཀཱ་མ་ཀཱ་མི་ནོ’’ཏི. ན་ཝ་མཾ;