༥. ཙཱུ་ལ༹་ཝ་གྒོ
༡. ས་མྨུ་ཁཱི་བྷཱ་ཝ་སུ་ཏྟཾ
༤༡. ‘‘ཏི་ཎྞཾ, བྷི་ཀྑ་ཝེ, ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི. ཀ་ཏ་མེ་སཾ ཏི་ཎྞཾ? ས་དྡྷཱ་ཡ, བྷི་ཀྑ་ཝེ, ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི. དེ་ཡྻ་དྷ་མྨ་སྶ, བྷི་ཀྑ་ཝེ, ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི. ད་ཀྑི་ཎེ་ཡྻཱ་ནཾ, བྷི་ཀྑ་ཝེ, ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏི. ཨི་མེ་སཾ ཁོ, བྷི་ཀྑ་ཝེ, ཏི་ཎྞཾ ས་མྨུ་ཁཱི་བྷཱ་ཝཱ ས་དྡྷོ ཀུ་ལ་པུ་ཏྟོ བ་ཧུཾ པུ་ཉྙཾ པ་ས་ཝ་ཏཱི’’ཏི. པ་ཋ་མཾ.
༢. ཏི་ཋཱ་ན་སུ་ཏྟཾ
༤༢. ‘‘ཏཱི་ཧི, བྷི་ཀྑ་ཝེ, ཋཱ་ནེ་ཧི ས་དྡྷོ པ་ས་ནྣོ ཝེ་དི་ཏ་བྦོ. ཀ་ཏ་མེ་ཧི ཏཱི་ཧི? སཱི་ལ་ཝ་ནྟཱ་ནཾ ད་སྶ་ན་ཀཱ་མོ ཧོ་ཏི, ས་དྡྷ་མྨཾ སོ་ཏུ་ཀཱ་མོ ཧོ་ཏི, ཝི་ག་ཏ་མ་ལ་མ་ཙྪེ་རེ་ན ཙེ་ཏ་སཱ ཨ་གཱ་རཾ ཨ་ཛ྄ཛྷཱ་ཝ་ས་ཏི མུ་ཏྟ་ཙཱ་གོ པ་ཡ་ཏ་པཱ་ཎི ཝོ་སྶ་གྒ་ར་ཏོ ཡཱ་ཙ་ཡོ་གོ དཱ་ན་སཾ་ཝི་བྷཱ་ག་ར་ཏོ. ཨི་མེ་ཧི ཁོ, བྷི་ཀྑ་ཝེ, ཏཱི་ཧི ཋཱ་ནེ་ཧི ས་དྡྷོ པ་ས་ནྣོ ཝེ་དི་ཏ་བྦོ’’.
‘‘ད་སྶ་ན་ཀཱ་མོ སཱི་ལ་ཝ་ཏཾ, ས་དྡྷ་མྨཾ སོ་ཏུ་མི་ཙྪ་ཏི;
ཝི་ན་ཡེ མ་ཙྪེ་ར་མ་ལཾ, ས ཝེ ས་དྡྷོ་ཏི ཝུ་ཙྩ་ཏཱི’’ཏི. དུ་ཏི་ཡཾ;
༣. ཨ་ཏྠ་ཝ་ས་སུ་ཏྟཾ
༤༣. ‘‘ཏ་ཡོ, བྷི་ཀྑ་ཝེ, ཨ་ཏྠ་ཝ་སེ ས་མྤ་སྶ་མཱ་ནེ་ན ཨ་ལ་མེ་ཝ པ་རེ་སཾ དྷ་མྨཾ དེ་སེ་ཏུཾ. ཀ་ཏ་མེ ཏ་ཡོ? ཡོ དྷ་མྨཾ དེ་སེ་ཏི སོ ཨ་ཏྠ་པྤ་ཊི་སཾ་ཝེ་དཱི ཙ ཧོ་ཏི དྷ་མྨ་པྤ་ཊི་སཾ་ཝེ་དཱི ཙ. ཡོ དྷ་མྨཾ སུ་ཎཱ་ཏི སོ ཨ་ཏྠ་པྤ་ཊི་སཾ་ཝེ་དཱི ཙ ཧོ་ཏི དྷ་མྨ་པྤ་ཊི་སཾ་ཝེ་དཱི ཙ. ཡོ ཙེ་ཝ དྷ་མྨཾ དེ་སེ་ཏི ཡོ ཙ དྷ་མྨཾ སུ་ཎཱ་ཏི ཨུ་བྷོ ཨ་ཏྠ་པྤ་ཊི་སཾ་ཝེ་དི་ནོ ཙ ཧོ་ནྟི དྷ་མྨ་པྤ་ཊི་སཾ་ཝེ་དི་ནོ ཙ. ཨི་མེ ཁོ, བྷི་ཀྑ་ཝེ, ཏ་ཡོ ཨ་ཏྠ་ཝ་སེ ས་མྤ་སྶ་མཱ་ནེ་ན ཨ་ལ་མེ་ཝ པ་རེ་སཾ དྷ་མྨཾ དེ་སེ་ཏུ’’ནྟི. ཏ་ཏི་ཡཾ.
༤. ཀ་ཐཱ་པ་ཝ་ཏྟི་སུ་ཏྟཾ
༤༤. ‘‘ཏཱི་ཧི, བྷི་ཀྑ་ཝེ, ཋཱ་ནེ་ཧི ཀ་ཐཱ པ་ཝ་ཏྟི་ནཱི ཧོ་ཏི. ཀ་ཏ་མེ་ཧི ཏཱི་ཧི? ཡོ དྷ་མྨཾ དེ་སེ་ཏི སོ ཨ་ཏྠ་པྤ་ཊི་སཾ་ཝེ་དཱི ཙ ཧོ་ཏི དྷ་མྨ་པྤ་ཊི་སཾ་ཝེ་དཱི ཙ. ཡོ དྷ་མྨཾ སུ་ཎཱ་ཏི སོ ཨ་ཏྠ་པྤ་ཊི་སཾ་ཝེ་དཱི ཙ ཧོ་ཏི དྷ་མྨ་པྤ་ཊི་སཾ་ཝེ་དཱི ཙ. ཡོ ཙེ་ཝ དྷ་མྨཾ དེ་སེ་ཏི ཡོ ཙ དྷ་མྨཾ སུ་ཎཱ་ཏི ཨུ་བྷོ ཨ་ཏྠ་པྤ་ཊི་སཾ་ཝེ་དི་ནོ ཙ ཧོ་ནྟི དྷ་མྨ་པྤ་ཊི་སཾ་ཝེ་དི་ནོ ཙ. ཨི་མེ་ཧི ཁོ, བྷི་ཀྑ་ཝེ, ཏཱི་ཧི ཋཱ་ནེ་ཧི ཀ་ཐཱ པ་ཝ་ཏྟི་ནཱི ཧོ་ཏཱི’’ཏི. ཙ་ཏུ་ཏྠཾ.
༥. པ་ཎྜི་ཏ་སུ་ཏྟཾ
༤༥. ‘‘ཏཱི་ཎི་མཱ་ནི, བྷི་ཀྑ་ཝེ, པ་ཎྜི་ཏ་པ་ཉྙ་ཏྟཱ་ནི ས་པྤུ་རི་ས་པ་ཉྙ་ཏྟཱ་ནི. ཀ་ཏ་མཱ་ནི ཏཱི་ཎི? དཱ་ནཾ, བྷི་ཀྑ་ཝེ, པ་ཎྜི་ཏ་པ་ཉྙ་ཏྟཾ ས་པྤུ་རི་ས་པ་ཉྙ་ཏྟཾ. པ་བྦ་ཛྫཱ, བྷི་ཀྑ་ཝེ, པ་ཎྜི་ཏ་པ་ཉྙ་ཏྟཱ ས་པྤུ་རི་ས་པ་ཉྙ་ཏྟཱ. མཱ་ཏཱ་པི་ཏཱུ་ནཾ, བྷི་ཀྑ་ཝེ, ཨུ་པ་ཊྛཱ་ནཾ པ་ཎྜི་ཏ་པ་ཉྙ་ཏྟཾ ས་པྤུ་རི་ས་པ་ཉྙ་ཏྟཾ. ཨི་མཱ་ནི ཁོ, བྷི་ཀྑ་ཝེ, ཏཱི་ཎི པ་ཎྜི་ཏ་པ་ཉྙ་ཏྟཱ་ནི ས་པྤུ་རི་ས་པ་ཉྙ་ཏྟཱ་ནཱི’’ཏི.
‘‘ས་བྦྷི དཱ་ནཾ ཨུ་པ་ཉྙ་ཏྟཾ, ཨ་ཧིཾ་སཱ སཾ་ཡ་མོ ད་མོ;
མཱ་ཏཱ་པི་ཏུ ཨུ་པ་ཊྛཱ་ནཾ, ས་ནྟཱ་ནཾ བྲ་ཧྨ་ཙཱ་རི་ནཾ.
‘‘ས་ཏཾ ཨེ་ཏཱ་ནི ཋཱ་ནཱ་ནི, ཡཱ་ནི སེ་ཝེ་ཐ པ་ཎྜི་ཏོ;
ཨ་རི་ཡོ ད་སྶ་ན་ས་མྤ་ནྣོ, ས ལོ་ཀཾ བྷ་ཛ་ཏེ སི་ཝ’’ནྟི. པ་ཉྩ་མཾ;
༦. སཱི་ལ་ཝ་ནྟ་སུ་ཏྟཾ
༤༦. ‘‘ཡཾ, བྷི་ཀྑ་ཝེ, སཱི་ལ་ཝ་ནྟོ པ་བྦ་ཛི་ཏཱ གཱ་མཾ ཝཱ ནི་ག་མཾ ཝཱ ཨུ་པ་ནི་སྶཱ་ཡ ཝི་ཧ་ར་ནྟི. ཏ་ཏྠ མ་ནུ་སྶཱ ཏཱི་ཧི ཋཱ་ནེ་ཧི བ་ཧུཾ པུ་ཉྙཾ པ་ས་ཝ་ནྟི. ཀ་ཏ་མེ་ཧི ཏཱི་ཧི? ཀཱ་ཡེ་ན, ཝཱ་ཙཱ་ཡ, མ་ན་སཱ. ཡཾ, བྷི་ཀྑ་ཝེ, སཱི་ལ་ཝ་ནྟོ པ་བྦ་ཛི་ཏཱ གཱ་མཾ ཝཱ ནི་ག་མཾ ཝཱ ཨུ་པ་ནི་སྶཱ་ཡ ཝི་ཧ་ར་ནྟི. ཏ་ཏྠ མ་ནུ་སྶཱ ཨི་མེ་ཧི ཏཱི་ཧི ཋཱ་ནེ་ཧི བ་ཧུཾ པུ་ཉྙཾ པ་ས་ཝ་ནྟཱི’’ཏི. ཚ་ཊྛཾ.
༧. ས་ངྑ་ཏ་ལ་ཀྑ་ཎ་སུ་ཏྟཾ
༤༧. ‘‘ཏཱི་ཎི་མཱ་ནི, བྷི་ཀྑ་ཝེ, ས་ངྑ་ཏ་སྶ ས་ངྑ་ཏ་ལ་ཀྑ་ཎཱ་ནི. ཀ་ཏ་མཱ་ནི ཏཱི་ཎི? ཨུ་པྤཱ་དོ པ་ཉྙཱ་ཡ་ཏི, ཝ་ཡོ པ་ཉྙཱ་ཡ་ཏི, ཋི་ཏ་སྶ ཨ་ཉྙ་ཐ་ཏྟཾ པ་ཉྙཱ་ཡ་ཏི. ཨི་མཱ་ནི ཁོ, བྷི་ཀྑ་ཝེ, ཏཱི་ཎི ས་ངྑ་ཏ་སྶ ས་ངྑ་ཏ་ལ་ཀྑ་ཎཱ་ནཱི’’ཏི. ས་ཏྟ་མཾ.
༨. ཨ་ས་ངྑ་ཏ་ལ་ཀྑ་ཎ་སུ་ཏྟཾ
༤༨. ‘‘ཏཱི་ཎི་མཱ་ནི, བྷི་ཀྑ་ཝེ, ཨ་ས་ངྑ་ཏ་སྶ ཨ་ས་ངྑ་ཏ་ལ་ཀྑ་ཎཱ་ནི. ཀ་ཏ་མཱ་ནི ཏཱི་ཎི? ན ཨུ་པྤཱ་དོ པ་ཉྙཱ་ཡ་ཏི, ན ཝ་ཡོ པ་ཉྙཱ་ཡ་ཏི, ན ཋི་ཏ་སྶ ཨ་ཉྙ་ཐ་ཏྟཾ པ་ཉྙཱ་ཡ་ཏི. ཨི་མཱ་ནི ཁོ, བྷི་ཀྑ་ཝེ, ཏཱི་ཎི ཨ་ས་ངྑ་ཏ་སྶ ཨ་ས་ངྑ་ཏ་ལ་ཀྑ་ཎཱ་ནཱི’’ཏི. ཨ་ཊྛ་མཾ.
༩. པ་བྦ་ཏ་རཱ་ཛ་སུ་ཏྟཾ
༤༩. ‘‘ཧི་མ་ཝ་ནྟཾ, བྷི་ཀྑ་ཝེ, པ་བྦ་ཏ་རཱ་ཛཾ ནི་སྶཱ་ཡ མ་ཧཱ་སཱ་ལཱ ཏཱི་ཧི ཝ་ཌྜྷཱི་ཧི ཝ་ཌྜྷ་ནྟི. ཀ་ཏ་མཱ་ཧི ཏཱི་ཧི? སཱ་ཁཱ་པ་ཏྟ་པ་ལཱ་སེ་ན ཝ་ཌྜྷ་ནྟི, ཏ་ཙ་པ་པ་ཊི་ཀཱ་ཡ ཝ་ཌྜྷ་ནྟི, ཕེ་གྒུ་སཱ་རེ་ན ཝ་ཌྜྷ་ནྟི. ཧི་མ་ཝ་ནྟཾ, བྷི་ཀྑ་ཝེ, པ་བྦ་ཏ་རཱ་ཛཾ ནི་སྶཱ་ཡ མ་ཧཱ་སཱ་ལཱ ཨི་མཱ་ཧི ཏཱི་ཧི ཝ་ཌྜྷཱི་ཧི ཝ་ཌྜྷ་ནྟི.
‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ས་དྡྷཾ ཀུ་ལ་པ་ཏིཾ ནི་སྶཱ་ཡ ཨ་ནྟོ ཛ་ནོ ཏཱི་ཧི ཝ་ཌྜྷཱི་ཧི ཝ་ཌྜྷ་ཏི. ཀ་ཏ་མཱ་ཧི ཏཱི་ཧི? ས་དྡྷཱ་ཡ ཝ་ཌྜྷ་ཏི, སཱི་ལེ་ན ཝ་ཌྜྷ་ཏི, པ་ཉྙཱ་ཡ ཝ་ཌྜྷ་ཏི. ས་དྡྷཾ, བྷི་ཀྑ་ཝེ, ཀུ་ལ་པ་ཏིཾ ནི་སྶཱ་ཡ ཨ་ནྟོ ཛ་ནོ ཨི་མཱ་ཧི ཏཱི་ཧི ཝ་ཌྜྷཱི་ཧི ཝ་ཌྜྷ་ཏཱི’’ཏི.
‘‘ཡ་ཐཱ་པི པ་བྦ་ཏོ སེ་ལོ, ཨ་ར་ཉྙ་སྨིཾ བྲ་ཧཱ་ཝ་ནེ;
ཏཾ རུ་ཀྑཱ ཨུ་པ་ནི་སྶཱ་ཡ, ཝ་ཌྜྷ་ནྟེ ཏེ ཝ་ན་པྤ་ཏཱི.
‘‘ཏ་ཐེ་ཝ སཱི་ལ་ས་མྤ་ནྣཾ, ས་དྡྷཾ ཀུ་ལ་པ་ཏིཾ ཨི་དྷ;
ཨུ་པ་ནི་སྶཱ་ཡ ཝ་ཌྜྷ་ནྟི, པུ་ཏྟ་དཱ་རཱ ཙ བ་ནྡྷ་ཝཱ;
ཨ་མ་ཙྩཱ ཉཱ་ཏི་ས་ངྒྷཱ ཙ, ཡེ ཙ་སྶ ཨ་ནུ་ཛཱི་ཝི་ནོ.
‘‘ཏྱཱ་སྶ སཱི་ལ་ཝ་ཏོ སཱི་ལཾ, ཙཱ་གཾ སུ་ཙ་རི་ཏཱ་ནི ཙ;
པ་སྶ་མཱ་ནཱ་ནུ་ཀུ་བྦ་ནྟི, ཨ་ཏྟ་མ་ཏྠཾ [ཡེ བྷ་ཝ་ནྟི (སཱི. སྱཱ. ཀཾ. པཱི.)] ཝི་ཙ་ཀྑ་ཎཱ.
‘‘ཨི་དྷ དྷ་མྨཾ ཙ་རི་ཏྭཱ་ན, མ་གྒཾ སུ་ག་ཏི་གཱ་མི་ནཾ;
ན་ནྡི་ནོ དེ་ཝ་ལོ་ཀ་སྨིཾ, མོ་ད་ནྟི ཀཱ་མ་ཀཱ་མི་ནོ’’ཏི. ན་ཝ་མཾ;
༡༠. ཨཱ་ཏ་པྤ་ཀ་ར་ཎཱི་ཡ་སུ་ཏྟཾ
༥༠. ‘‘ཏཱི་ཧི, བྷི་ཀྑ་ཝེ, ཋཱ་ནེ་ཧི ཨཱ་ཏ་པྤཾ ཀ་ར་ཎཱི་ཡཾ. ཀ་ཏ་མེ་ཧི ཏཱི་ཧི? ཨ་ནུ་པྤ་ནྣཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨ་ནུ་པྤཱ་དཱ་ཡ ཨཱ་ཏ་པྤཾ ཀ་ར་ཎཱི་ཡཾ, ཨ་ནུ་པྤ་ནྣཱ་ནཾ ཀུ་ས་ལཱ་ནཾ དྷ་མྨཱ་ནཾ ཨུ་པྤཱ་དཱ་ཡ ཨཱ་ཏ་པྤཾ ཀ་ར་ཎཱི་ཡཾ, ཨུ་པྤ་ནྣཱ་ནཾ སཱ་རཱི་རི་ཀཱ་ནཾ ཝེ་ད་ནཱ་ནཾ དུ་ཀྑཱ་ནཾ ཏི་བྦཱ་ནཾ ཁ་རཱ་ནཾ ཀ་ཊུ་ཀཱ་ནཾ ཨ་སཱ་ཏཱ་ནཾ ཨ་མ་ནཱ་པཱ་ནཾ པཱ་ཎ་ཧ་རཱ་ནཾ ཨ་དྷི་ཝཱ་ས་ནཱ་ཡ ཨཱ་ཏ་པྤཾ ཀ་ར་ཎཱི་ཡཾ. ཨི་མེ་ཧི ཏཱི་ཧི, བྷི་ཀྑ་ཝེ, ཋཱ་ནེ་ཧི ཨཱ་ཏ་པྤཾ ཀ་ར་ཎཱི་ཡཾ.
‘‘ཡ་ཏོ ཁོ, བྷི་ཀྑ་ཝེ, བྷི་ཀྑུ ཨ་ནུ་པྤ་ནྣཱ་ནཾ པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ཨ་ནུ་པྤཱ་དཱ་ཡ ཨཱ་ཏ་པྤཾ ཀ་རོ་ཏི, ཨ་ནུ་པྤ་ནྣཱ་ནཾ ཀུ་ས་ལཱ་ནཾ དྷ་མྨཱ་ནཾ ཨུ་པྤཱ་དཱ་ཡ ཨཱ་ཏ་པྤཾ ཀ་རོ་ཏི, ཨུ་པྤ་ནྣཱ་ནཾ སཱ་རཱི་རི་ཀཱ་ནཾ ཝེ་ད་ནཱ་ནཾ དུ་ཀྑཱ་ནཾ ཏི་བྦཱ་ནཾ ཁ་རཱ་ནཾ ཀ་ཊུ་ཀཱ་ནཾ ཨ་སཱ་ཏཱ་ནཾ ཨ་མ་ནཱ་པཱ་ནཾ པཱ་ཎ་ཧ་རཱ་ནཾ ཨ་དྷི་ཝཱ་ས་ནཱ་ཡ ཨཱ་ཏ་པྤཾ ཀ་རོ་ཏི. ཨ་ཡཾ ཝུ་ཙྩ་ཏི, བྷི་ཀྑ་ཝེ, བྷི་ཀྑུ ཨཱ་ཏཱ་པཱི ནི་པ་ཀོ ས་ཏོ ས་མྨཱ དུ་ཀྑ་སྶ ཨ་ནྟ་ཀི་རི་ཡཱ་ཡཱ’’ཏི. ད་ས་མཾ.
༡༡. མ་ཧཱ་ཙོ་ར་སུ་ཏྟཾ
༥༡. ‘‘ཏཱི་ཧི, བྷི་ཀྑ་ཝེ, ཨ་ངྒེ་ཧི ས་མ་ནྣཱ་ག་ཏོ མ་ཧཱ་ཙོ་རོ ས་ནྡྷི་མྤི ཚི་ནྡ་ཏི, ནི་ལློ་པ་མྤི ཧ་ར་ཏི, ཨེ་ཀཱ་གཱ་རི་ཀ་མྤི ཀ་རོ་ཏི, པ་རི་པ་ནྠེ་པི ཏི་ཊྛ་ཏི. ཀ་ཏ་མེ་ཧི ཏཱི་ཧི? ཨི་དྷ, བྷི་ཀྑ་ཝེ, མ་ཧཱ་ཙོ་རོ ཝི་ས་མ་ནི་སྶི་ཏོ ཙ ཧོ་ཏི, ག་ཧ་ན་ནི་སྶི་ཏོ ཙ ཧོ་ཏི, བ་ལ་ཝ་ནི་སྶི་ཏོ ཙ ཧོ་ཏི. ཀ་ཐ་ཉྩ, བྷི་ཀྑ་ཝེ, མ་ཧཱ་ཙོ་རོ ཝི་ས་མ་ནི་སྶི་ཏོ ཧོ་ཏི? ཨི་དྷ, བྷི་ཀྑ་ཝེ, མ་ཧཱ་ཙོ་རོ ན་དཱི་ཝི་དུ་གྒཾ ཝཱ ནི་སྶི་ཏོ ཧོ་ཏི པ་བྦ་ཏ་ཝི་ས་མཾ ཝཱ. ཨེ་ཝཾ ཁོ, བྷི་ཀྑ་ཝེ, མ་ཧཱ་ཙོ་རོ ཝི་ས་མ་ནི་སྶི་ཏོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, མ་ཧཱ་ཙོ་རོ ག་ཧ་ན་ནི་སྶི་ཏོ ཧོ་ཏི? ཨི་དྷ, བྷི་ཀྑ་ཝེ, མ་ཧཱ་ཙོ་རོ ཏི་ཎ་ག་ཧ་ནཾ ཝཱ ནི་སྶི་ཏོ ཧོ་ཏི, རུ་ཀྑ་ག་ཧ་ནཾ ཝཱ རོ་དྷཾ [གེ་དྷཾ (སཱི. པཱི.)] ཝཱ མ་ཧཱ་ཝ་ན་ས་ཎྜཾ ཝཱ. ཨེ་ཝཾ ཁོ, བྷི་ཀྑ་ཝེ, མ་ཧཱ་ཙོ་རོ ག་ཧ་ན་ནི་སྶི་ཏོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, མ་ཧཱ་ཙོ་རོ བ་ལ་ཝ་ནི་སྶི་ཏོ ཧོ་ཏི? ཨི་དྷ, བྷི་ཀྑ་ཝེ, མ་ཧཱ་ཙོ་རོ རཱ་ཛཱ་ནཾ ཝཱ རཱ་ཛ་མ་ཧཱ་མ་ཏྟཱ་ནཾ ཝཱ ནི་སྶི་ཏོ ཧོ་ཏི. ཏ་སྶ ཨེ་ཝཾ ཧོ་ཏི – ‘ས་ཙེ མཾ ཀོ་ཙི ཀི་ཉྩི ཝ་ཀྑ་ཏི, ཨི་མེ མེ རཱ་ཛཱ་ནོ ཝཱ རཱ་ཛ་མ་ཧཱ་མ་ཏྟཱ ཝཱ པ་རི་ཡོ་དྷཱ་ཡ ཨ་ཏྠཾ བྷ་ཎི་སྶ་ནྟཱི’ཏི. ས་ཙེ ནཾ ཀོ་ཙི ཀི་ཉྩི ཨཱ་ཧ, ཏྱཱ་སྶ རཱ་ཛཱ་ནོ ཝཱ རཱ་ཛ་མ་ཧཱ་མ་ཏྟཱ ཝཱ པ་རི་ཡོ་དྷཱ་ཡ ཨ་ཏྠཾ བྷ་ཎ་ནྟི. ཨེ་ཝཾ ཁོ, བྷི་ཀྑ་ཝེ, མ་ཧཱ་ཙོ་རོ བ་ལ་ཝ་ནི་སྶི་ཏོ ཧོ་ཏི. ཨི་མེ ཁོ, བྷི་ཀྑ་ཝེ, ཏཱི་ཧི ཨ་ངྒེ་ཧི ས་མ་ནྣཱ་ག་ཏོ མ་ཧཱ་ཙོ་རོ ས་ནྡྷི་མྤི ཚི་ནྡ་ཏི, ནི་ལློ་པ་མྤི ཧ་ར་ཏི, ཨེ་ཀཱ་གཱ་རི་ཀ་མྤི ཀ་རོ་ཏི, པ་རི་པ་ནྠེ་པི ཏི་ཊྛ་ཏི.
‘‘ཨེ་ཝ་མེ་ཝཾ ཁོ, བྷི་ཀྑ་ཝེ, ཏཱི་ཧི ཨ་ངྒེ་ཧི ས་མ་ནྣཱ་ག་ཏོ པཱ་པ་བྷི་ཀྑུ ཁ་ཏཾ ཨུ་པ་ཧ་ཏཾ ཨ་ཏྟཱ་ནཾ པ་རི་ཧ་ར་ཏི, སཱ་ཝ་ཛྫོ ཙ ཧོ་ཏི སཱ་ནུ་ཝ་ཛྫོ ཙ ཝི་ཉྙཱུ་ནཾ, བ་ཧུ་ཉྩ ཨ་པུ་ཉྙཾ པ་ས་ཝ་ཏི. ཀ་ཏ་མེ་ཧི ཏཱི་ཧི? ཨི་དྷ, བྷི་ཀྑ་ཝེ, པཱ་པ་བྷི་ཀྑུ ཝི་ས་མ་ནི་སྶི་ཏོ ཙ ཧོ་ཏི ག་ཧ་ན་ནི་སྶི་ཏོ ཙ བ་ལ་ཝ་ནི་སྶི་ཏོ ཙ.
‘‘ཀ་ཐ་ཉྩ, བྷི་ཀྑ་ཝེ, པཱ་པ་བྷི་ཀྑུ ཝི་ས་མ་ནི་སྶི་ཏོ ཧོ་ཏི? ཨི་དྷ, བྷི་ཀྑ་ཝེ, པཱ་པ་བྷི་ཀྑུ ཝི་ས་མེ་ན ཀཱ་ཡ་ཀ་མྨེ་ན ས་མ་ནྣཱ་ག་ཏོ ཧོ་ཏི, ཝི་ས་མེ་ན ཝ་ཙཱི་ཀ་མྨེ་ན ས་མ་ནྣཱ་ག་ཏོ ཧོ་ཏི, ཝི་ས་མེ་ན མ་ནོ་ཀ་མྨེ་ན ས་མ་ནྣཱ་ག་ཏོ ཧོ་ཏི. ཨེ་ཝཾ ཁོ, བྷི་ཀྑ་ཝེ, པཱ་པ་བྷི་ཀྑུ ཝི་ས་མ་ནི་སྶི་ཏོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, པཱ་པ་བྷི་ཀྑུ ག་ཧ་ན་ནི་སྶི་ཏོ ཧོ་ཏི? ཨི་དྷ, བྷི་ཀྑ་ཝེ, པཱ་པ་བྷི་ཀྑུ མི་ཙྪཱ་དི་ཊྛི་ཀོ ཧོ་ཏི, ཨ་ནྟ་གྒཱ་ཧི་ཀཱ་ཡ དི་ཊྛི་ཡཱ ས་མ་ནྣཱ་ག་ཏོ ཧོ་ཏི. ཨེ་ཝཾ ཁོ, བྷི་ཀྑ་ཝེ, པཱ་པ་བྷི་ཀྑུ ག་ཧ་ན་ནི་སྶི་ཏོ ཧོ་ཏི.
‘‘ཀ་ཐ་ཉྩ, བྷི་ཀྑ་ཝེ, པཱ་པ་བྷི་ཀྑུ བ་ལ་ཝ་ནི་སྶི་ཏོ ཧོ་ཏི? ཨི་དྷ, བྷི་ཀྑ་ཝེ, པཱ་པ་བྷི་ཀྑུ རཱ་ཛཱ་ནཾ ཝཱ རཱ་ཛ་མ་ཧཱ་མ་ཏྟཱ་ནཾ ཝཱ ནི་སྶི་ཏོ ཧོ་ཏི. ཏ་སྶ ཨེ་ཝཾ ཧོ་ཏི – ‘ས་ཙེ མཾ ཀོ་ཙི ཀི་ཉྩི ཝ་ཀྑ་ཏི, ཨི་མེ མེ རཱ་ཛཱ་ནོ ཝཱ རཱ་ཛ་མ་ཧཱ་མ་ཏྟཱ ཝཱ པ་རི་ཡོ་དྷཱ་ཡ ཨ་ཏྠཾ བྷ་ཎི་སྶ་ནྟཱི’ཏི. ས་ཙེ ནཾ ཀོ་ཙི ཀི་ཉྩི ཨཱ་ཧ, ཏྱཱ་སྶ རཱ་ཛཱ་ནོ ཝཱ རཱ་ཛ་མ་ཧཱ་མ་ཏྟཱ ཝཱ པ་རི་ཡོ་དྷཱ་ཡ ཨ་ཏྠཾ བྷ་ཎ་ནྟི. ཨེ་ཝཾ ཁོ, བྷི་ཀྑ་ཝེ, པཱ་པ་བྷི་ཀྑུ བ་ལ་ཝ་ནི་སྶི་ཏོ ཧོ་ཏི. ཨི་མེ་ཧི ཁོ, བྷི་ཀྑ་ཝེ, ཏཱི་ཧི དྷ་མྨེ་ཧི ས་མ་ནྣཱ་ག་ཏོ པཱ་པ་བྷི་ཀྑུ ཁ་ཏཾ ཨུ་པ་ཧ་ཏཾ ཨ་ཏྟཱ་ནཾ པ་རི་ཧ་ར་ཏི, སཱ་ཝ་ཛྫོ ཙ ཧོ་ཏི སཱ་ནུ་ཝ་ཛྫོ ཙ ཝི་ཉྙཱུ་ནཾ, བ་ཧུ་ཉྩ ཨ་པུ་ཉྙཾ པ་ས་ཝ་ཏཱི’’ཏི. ཨེ་ཀཱ་ད་ས་མཾ.
ཙཱུ་ལ༹་ཝ་གྒོ པ་ཉྩ་མོ.