༢. ལ་ཀྑ་ཎ་སུ་ཏྟཾ

༢. ‘‘ཀ་མྨ་ལ་ཀྑ་ཎོ, བྷི་ཀྑ་ཝེ, བཱ་ལོ, ཀ་མྨ་ལ་ཀྑ་ཎོ པ་ཎྜི་ཏོ, ཨ་པ་དཱ་ན་སོ་བྷ་ནཱི [ཨ་པ་དཱ་ནེ སོ་བྷ་ཏི (སྱཱ. ཀཾ. པཱི.)] པ་ཉྙཱ་ཏི [པ་ཉྙ་ཏྟི (?)]. ཏཱི་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ བཱ་ལོ ཝེ་དི་ཏ་བྦོ. ཀ་ཏ་མེ་ཧི ཏཱི་ཧི? ཀཱ་ཡ་དུ་ཙྩ་རི་ཏེ་ན, ཝ་ཙཱི་དུ་ཙྩ་རི་ཏེ་ན, མ་ནོ་དུ་ཙྩ་རི་ཏེ་ན. ཨི་མེ་ཧི ཁོ, བྷི་ཀྑ་ཝེ, ཏཱི་ཧི དྷ་མྨེ་ཧི ས་མ་ནྣཱ་ག་ཏོ བཱ་ལོ ཝེ་དི་ཏ་བྦོ.

‘‘ཏཱི་ཧི, བྷི་ཀྑ་ཝེ, དྷ་མྨེ་ཧི ས་མ་ནྣཱ་ག་ཏོ པ་ཎྜི་ཏོ ཝེ་དི་ཏ་བྦོ. ཀ་ཏ་མེ་ཧི ཏཱི་ཧི? ཀཱ་ཡ་སུ་ཙ་རི་ཏེ་ན, ཝ་ཙཱི་སུ་ཙ་རི་ཏེ་ན, མ་ནོ་སུ་ཙ་རི་ཏེ་ན. ཨི་མེ་ཧི ཁོ, བྷི་ཀྑ་ཝེ, ཏཱི་ཧི དྷ་མྨེ་ཧི ས་མ་ནྣཱ་ག་ཏོ པ་ཎྜི་ཏོ ཝེ་དི་ཏ་བྦོ.

‘‘ཏ་སྨཱ་ཏི་ཧ, བྷི་ཀྑ་ཝེ, ཨེ་ཝཾ སི་ཀྑི་ཏ་བྦཾ – ‘ཡེ་ཧི ཏཱི་ཧི དྷ་མྨེ་ཧི ས་མ་ནྣཱ་ག་ཏོ བཱ་ལོ ཝེ་དི་ཏ་བྦོ ཏེ ཏ་ཡོ དྷ་མྨེ ཨ་བྷི་ནི་ཝ་ཛྫེ་ཏྭཱ, ཡེ་ཧི ཏཱི་ཧི དྷ་མྨེ་ཧི ས་མ་ནྣཱ་ག་ཏོ པ་ཎྜི་ཏོ ཝེ་དི་ཏ་བྦོ ཏེ ཏ་ཡོ དྷ་མྨེ ས་མཱ་དཱ་ཡ ཝ་ཏྟི་སྶཱ་མཱ’ཏི. ཨེ་ཝ་ཉྷི ཝོ, བྷི་ཀྑ་ཝེ, སི་ཀྑི་ཏ་བྦ’’ནྟི. དུ་ཏི་ཡཾ.