༩. ཨུ་པཱ་ལི་སུ་ཏྟཾ

༩༩. ཨ་ཐ ཁོ ཨཱ་ཡ་སྨཱ ཨུ་པཱ་ལི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་པཱ་ལི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, བྷ་ནྟེ, ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་ཏུ’’ནྟི.

‘‘དུ་ར་བྷི་ས་མྦྷ་ཝཱ་ནི ཧི ཁོ [དུ་ར་བྷི་ས་མྦྷ་ཝཱ་ནི ཁོ (སཱི. པཱི.)], ཨུ་པཱ་ལི, ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི. དུ་ཀྐ་རཾ པ་ཝི་ཝེ་ཀཾ དུ་ར་བྷི་ར་མཾ. ཨེ་ཀ་ཏྟེ ཧ་ར་ནྟི མ་ཉྙེ མ་ནོ ཝ་ནཱ་ནི ས་མཱ་དྷིཾ ཨ་ལ་བྷ་མཱ་ན་སྶ བྷི་ཀྑུ་ནོ. ཡོ ཁོ, ཨུ་པཱ་ལི, ཨེ་ཝཾ ཝ་དེ་ཡྻ – ‘ཨ་ཧཾ ས་མཱ་དྷིཾ ཨ་ལ་བྷ་མཱ་ནོ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་སྶཱ་མཱི’ཏི, ཏ་སྶེ་ཏཾ པཱ་ཊི་ཀ་ངྑཾ – ‘སཾ་སཱི་དི་སྶ་ཏི ཝཱ ཨུ་པླ་ཝི་སྶ་ཏི ཝཱ’ཏི [ཨུ་པྤི་ལ་ཝི་སྶ་ཏི ཝཱ (སཱི. སྱཱ. པཱི.)].

‘‘སེ་ཡྻ་ཐཱ་པི, ཨུ་པཱ་ལི, མ་ཧཱ་ཨུ་ད་ཀ་ར་ཧ་དོ. ཨ་ཐ ཨཱ་ག་ཙྪེ་ཡྻ ཧ་ཏྠི་ནཱ་གོ ས་ཏྟ་ར་ཏ་ནོ ཝཱ ཨ་ཌྜྷ་ཊྛ་ར་ཏ་ནོ [ཨ་ཊྛ་ར་ཏ་ནོ (སཱི. པཱི.)] ཝཱ. ཏ་སྶ ཨེ་ཝ་མ་སྶ – ‘ཡཾ་ནཱུ་ནཱ་ཧཾ ཨི་མཾ ཨུ་ད་ཀ་ར་ཧ་དཾ ཨོ་གཱ་ཧེ་ཏྭཱ ཀ་ཎྞ་སཾ་དྷོ་ཝི་ཀ་མྤི ཁི་ཌྜཾ ཀཱི་ལེ༹་ཡྻཾ པི་ཊྛི་སཾ་དྷོ་ཝི་ཀ་མྤི ཁི་ཌྜཾ ཀཱི་ལེ༹་ཡྻཾ. ཀ་ཎྞ་སཾ་དྷོ་ཝི་ཀ་མྤི ཁི་ཌྜཾ ཀཱི་ལི༹་ཏྭཱ པི་ཊྛི་སཾ་དྷོ་ཝི་ཀ་མྤི ཁི་ཌྜཾ ཀཱི་ལི༹་ཏྭཱ ནྷ་ཏྭཱ [ན་ཧཱ་ཏྭཱ (སཱི. པཱི.), ནྷཱ་ཏྭཱ (སྱཱ.)] ཙ པི་ཝི་ཏྭཱ ཙ པ་ཙྩུ་ཏྟ་རི་ཏྭཱ ཡེ་ན ཀཱ་མཾ པ་ཀྐ་མེ་ཡྻ’ནྟི. སོ ཏཾ ཨུ་ད་ཀ་ར་ཧ་དཾ ཨོ་གཱ་ཧེ་ཏྭཱ ཀ་ཎྞ་སཾ་དྷོ་ཝི་ཀ་མྤི ཁི་ཌྜཾ ཀཱི་ལེ༹་ཡྻ པི་ཊྛི་སཾ་དྷོ་ཝི་ཀ་མྤི ཁི་ཌྜཾ ཀཱི་ལེ༹་ཡྻ; ཀ་ཎྞ་སཾ་དྷོ་ཝི་ཀ་མྤི ཁི་ཌྜཾ ཀཱི་ལི༹་ཏྭཱ པི་ཊྛི་སཾ་དྷོ་ཝི་ཀ་མྤི ཁི་ཌྜཾ ཀཱི་ལི༹་ཏྭཱ ནྷ་ཏྭཱ ཙ པི་ཝི་ཏྭཱ ཙ པ་ཙྩུ་ཏྟ་རི་ཏྭཱ ཡེ་ན ཀཱ་མཾ པ་ཀྐ་མེ་ཡྻ. ཏཾ ཀི་སྶ ཧེ་ཏུ? མ་ཧཱ, ཨུ་པཱ་ལི [མ་ཧཱ ཧུ་པཱ་ལི (སཱི. པཱི.)], ཨ་ཏྟ་བྷཱ་ཝོ ག་མྦྷཱི་རེ གཱ་དྷཾ ཝི་ནྡ་ཏི.

‘‘ཨ་ཐ ཨཱ་ག་ཙྪེ་ཡྻ ས་སོ ཝཱ བི་ལཱ༹་རོ ཝཱ. ཏ་སྶ ཨེ་ཝ་མ་སྶ – ‘ཀོ ཙཱ་ཧཾ, ཀོ ཙ ཧ་ཏྠི་ནཱ་གོ! ཡཾ་ནཱུ་ནཱ་ཧཾ ཨི་མཾ ཨུ་ད་ཀ་ར་ཧ་དཾ ཨོ་གཱ་ཧེ་ཏྭཱ ཀ་ཎྞ་སཾ་དྷོ་ཝི་ཀ་མྤི ཁི་ཌྜཾ ཀཱི་ལེ༹་ཡྻཾ པི་ཊྛི་སཾ་དྷོ་ཝི་ཀ་མྤི ཁི་ཌྜཾ ཀཱི་ལེ༹་ཡྻཾ; ཀ་ཎྞ་སཾ་དྷོ་ཝི་ཀ་མྤི ཁི་ཌྜཾ ཀཱི་ལི༹་ཏྭཱ པི་ཊྛི་སཾ་དྷོ་ཝི་ཀ་མྤི ཁི་ཌྜཾ ཀཱི་ལི༹་ཏྭཱ ནྷ་ཏྭཱ ཙ པི་ཝི་ཏྭཱ ཙ པ་ཙྩུ་ཏྟ་རི་ཏྭཱ ཡེ་ན ཀཱ་མཾ པ་ཀྐ་མེ་ཡྻ’ནྟི. སོ ཏཾ ཨུ་ད་ཀ་ར་ཧ་དཾ ས་ཧ་སཱ ཨ་པྤ་ཊི་ས་ངྑཱ པ་ཀྑ་ནྡེ་ཡྻ. ཏ་སྶེ་ཏཾ པཱ་ཊི་ཀ་ངྑཾ – ‘སཾ་སཱི་དི་སྶ་ཏི ཝཱ ཨུ་པླ་ཝི་སྶ་ཏི ཝཱ’ཏི. ཏཾ ཀི་སྶ ཧེ་ཏུ? པ་རི་ཏྟོ, ཨུ་པཱ་ལི, ཨ་ཏྟ་བྷཱ་ཝོ ག་མྦྷཱི་རེ གཱ་དྷཾ ན ཝི་ནྡ་ཏི. ཨེ་ཝ་མེ་ཝཾ ཁོ, ཨུ་པཱ་ལི, ཡོ ཨེ་ཝཾ ཝ་དེ་ཡྻ – ‘ཨ་ཧཾ ས་མཱ་དྷིཾ ཨ་ལ་བྷ་མཱ་ནོ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝི་སྶཱ་མཱི’ཏི, ཏ་སྶེ་ཏཾ པཱ་ཊི་ཀ་ངྑཾ – ‘སཾ་སཱི་དི་སྶ་ཏི ཝཱ ཨུ་པླ་ཝི་སྶ་ཏི ཝཱ’ཏི.

‘‘སེ་ཡྻ་ཐཱ་པི, ཨུ་པཱ་ལི, ད་ཧ་རོ ཀུ་མཱ་རོ མ་ནྡོ ཨུ་ཏྟཱ་ན་སེ་ཡྻ་ཀོ ས་ཀེ་ན མུ་ཏྟ་ཀ་རཱི་སེ་ན ཀཱི་ལ༹་ཏི. ཏཾ ཀིཾ མ་ཉྙ་སི, ཨུ་པཱ་ལི, ན་ནྭཱ་ཡཾ ཀེ་ཝ་ལཱ པ་རི་པཱུ་རཱ བཱ་ལ་ཁི་ཌྜཱ’’ཏི? ‘‘ཨེ་ཝཾ, བྷ་ནྟེ’’.

‘‘ས ཁོ སོ, ཨུ་པཱ་ལི, ཀུ་མཱ་རོ ཨ་པ་རེ་ན ས་མ་ཡེ་ན ཝུ་དྡྷི་མ་ནྭཱ་ཡ ཨི་ནྡྲི་ཡཱ་ནཾ པ་རི་པཱ་ཀ་མ་ནྭཱ་ཡ ཡཱ་ནི ཀཱ་ནི་ཙི ཀུ་མཱ་ར་ཀཱ་ནཾ ཀཱི་ལཱ༹་པ་ན་ཀཱ་ནི བྷ་ཝ་ནྟི, སེ་ཡྻ་ཐི་དཾ – ཝ་ངྐ་ཀཾ [ཝ་ངྐཾ (སཱི. པཱི.)] གྷ་ཊི་ཀཾ མོ་ཀྑ་ཙི་ཀཾ ཙི་ངྒུ་ལ་ཀཾ [པི་ངྒུ་ལི་ཀཾ (སྱཱ.), ཙི་ངྐུ་ལ་ཀཾ (ཀ.)] པ་ཏྟཱ་ལ༹ྷ་ཀཾ ར་ཐ་ཀཾ དྷ་ནུ་ཀཾ, ཏེ་ཧི ཀཱི་ལ༹་ཏི. ཏཾ ཀིཾ མ་ཉྙ་སི, ཨུ་པཱ་ལི, ན་ནྭཱ་ཡཾ ཁི་ཌྜཱ པུ་རི་མཱ་ཡ ཁི་ཌྜཱ་ཡ ཨ་བྷི་ཀྐ་ནྟ་ཏ་རཱ ཙ པ་ཎཱི་ཏ་ཏ་རཱ ཙཱ’’ཏི? ‘‘ཨེ་ཝཾ, བྷ་ནྟེ’’.

‘‘ས ཁོ སོ, ཨུ་པཱ་ལི, ཀུ་མཱ་རོ ཨ་པ་རེ་ན ས་མ་ཡེ་ན ཝུ་དྡྷི་མ་ནྭཱ་ཡ ཨི་ནྡྲི་ཡཱ་ནཾ པ་རི་པཱ་ཀ་མ་ནྭཱ་ཡ པ་ཉྩ་ཧི ཀཱ་མ་གུ་ཎེ་ཧི ས་མ་པྤི་ཏོ ས་མ་ངྒི་བྷཱུ་ཏོ པ་རི་ཙཱ་རེ་ཏི ཙ་ཀྑུ་ཝི་ཉྙེ་ཡྻེ་ཧི རཱུ་པེ་ཧི ཨི་ཊྛེ་ཧི ཀ་ནྟེ་ཧི མ་ནཱ་པེ་ཧི པི་ཡ་རཱུ་པེ་ཧི ཀཱ་མཱུ་པ་སཾ་ཧི་ཏེ་ཧི ར་ཛ་ནཱི་ཡེ་ཧི, སོ་ཏ་ཝི་ཉྙེ་ཡྻེ་ཧི ས་དྡེ་ཧི… གྷཱ་ན་ཝི་ཉྙེ་ཡྻེ་ཧི ག་ནྡྷེ་ཧི… ཛི་ཝ྄ཧཱ་ཝི་ཉྙེ་ཡྻེ་ཧི ར་སེ་ཧི… ཀཱ་ཡ་ཝི་ཉྙེ་ཡྻེ་ཧི ཕོ་ཊྛ་བྦེ་ཧི ཨི་ཊྛེ་ཧི ཀ་ནྟེ་ཧི མ་ནཱ་པེ་ཧི པི་ཡ་རཱུ་པེ་ཧི ཀཱ་མཱུ་པ་སཾ་ཧི་ཏེ་ཧི ར་ཛ་ནཱི་ཡེ་ཧི. ཏཾ ཀིཾ མ་ཉྙ་སི, ཨུ་པཱ་ལི, ན་ནྭཱ་ཡཾ ཁི་ཌྜཱ པུ་རི་མཱ་ཧི ཁི་ཌྜཱ་ཧི ཨ་བྷི་ཀྐ་ནྟ་ཏ་རཱ ཙ པ་ཎཱི་ཏ་ཏ་རཱ ཙཱ’’ཏི? ‘‘ཨེ་ཝཾ, བྷ་ནྟེ’’.

[དཱི. ནི. ༡.༡༩༠; མ. ནི. ༢.༢༣༣] ‘‘ཨི་དྷ ཁོ པ་ན ཝོ [ཝོ་ཏི ནི་པཱ་ཏ་མ་ཏྟཾ (ཨ་ཊྛ.)], ཨུ་པཱ་ལི, ཏ་ཐཱ་ག་ཏོ ལོ་ཀེ ཨུ་པྤ་ཛྫ་ཏི ཨ་ར་ཧཾ ས་མྨཱ་ས་མྦུ་དྡྷོ ཝི་ཛྫཱ་ཙ་ར་ཎ་ས་མྤ་ནྣོ སུ་ག་ཏོ ལོ་ཀ་ཝི་དཱུ ཨ་ནུ་ཏྟ་རོ པུ་རི་ས་ད་མྨ་སཱ་ར་ཐི ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ. སོ ཨི་མཾ ལོ་ཀཾ ས་དེ་ཝ་ཀཾ ས་མཱ་ར་ཀཾ ས་བྲ་ཧྨ་ཀཾ ས་སྶ་མ་ཎ་བྲཱ་ཧྨ་ཎིཾ པ་ཛཾ ས་དེ་ཝ་མ་ནུ་སྶཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ཏི. སོ དྷ་མྨཾ དེ་སེ་ཏི ཨཱ་དི་ཀ་ལྱཱ་ཎཾ མ་ཛ྄ཛྷེ་ཀ་ལྱཱ་ཎཾ པ་རི་ཡོ་སཱ་ན་ཀ་ལྱཱ་ཎཾ སཱ་ཏྠཾ ས་བྱ་ཉྫ་ནཾ, ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ པ་ཀཱ་སེ་ཏི.

‘‘ཏཾ དྷ་མྨཾ སུ་ཎཱ་ཏི ག་ཧ་པ་ཏི ཝཱ ག་ཧ་པ་ཏི་པུ་ཏྟོ ཝཱ ཨ་ཉྙ་ཏ་ར་སྨིཾ ཝཱ ཀུ་ལེ པ་ཙྩཱ་ཛཱ་ཏོ. སོ ཏཾ དྷ་མྨཾ སུ་ཏྭཱ ཏ་ཐཱ་ག་ཏེ ས་དྡྷཾ པ་ཊི་ལ་བྷ་ཏི. སོ ཏེ་ན ས་དྡྷཱ་པ་ཊི་ལཱ་བྷེ་ན ས་མ་ནྣཱ་ག་ཏོ ཨི་ཏི པ་ཊི་ས་ཉྩི་ཀྑ་ཏི – ‘ས་མྦཱ་དྷོ གྷ་རཱ་ཝཱ་སོ ར་ཛཱ་པ་ཐོ, ཨ་བྦྷོ་ཀཱ་སོ པ་བྦ་ཛྫཱ. ན་ཡི་དཾ སུ་ཀ་རཾ ཨ་གཱ་རཾ ཨ་ཛ྄ཛྷཱ་ཝ་ས་ཏཱ ཨེ་ཀ་ནྟ་པ་རི་པུ་ཎྞཾ ཨེ་ཀ་ནྟ་པ་རི་སུ་དྡྷཾ ས་ངྑ་ལི་ཁི་ཏཾ བྲ་ཧྨ་ཙ་རི་ཡཾ ཙ་རི་ཏུཾ. ཡཾ་ནཱུ་ནཱ་ཧཾ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛེ་ཡྻ’ནྟི.

‘‘སོ ཨ་པ་རེ་ན ས་མ་ཡེ་ན ཨ་པྤཾ ཝཱ བྷོ་ག་ཀྑ་ནྡྷཾ པ་ཧཱ་ཡ མ་ཧ་ནྟཾ ཝཱ བྷོ་ག་ཀྑ་ནྡྷཾ པ་ཧཱ་ཡ ཨ་པྤཾ ཝཱ ཉཱ་ཏི་པ་རི་ཝ་ཊྚཾ པ་ཧཱ་ཡ མ་ཧ་ནྟཾ ཝཱ ཉཱ་ཏི་པ་རི་ཝ་ཊྚཾ པ་ཧཱ་ཡ ཀེ་ས་མ་སྶུཾ ཨོ་ཧཱ་རེ་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཨ་གཱ་ར་སྨཱ ཨ་ན་གཱ་རི་ཡཾ པ་བྦ་ཛ་ཏི.

‘‘སོ ཨེ་ཝཾ པ་བྦ་ཛི་ཏོ ས་མཱ་ནོ བྷི་ཀྑཱུ་ནཾ སི་ཀྑཱ་སཱ་ཛཱི་ཝ་ས་མཱ་པ་ནྣོ པཱ་ཎཱ་ཏི་པཱ་ཏཾ པ་ཧཱ་ཡ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི ནི་ཧི་ཏ་ད་ཎྜོ ནི་ཧི་ཏ་ས་ཏྠོ ལ་ཛྫཱི ད་ཡཱ་པ་ནྣོ ས་བྦ་པཱ་ཎ་བྷཱུ་ཏ་ཧི་ཏཱ་ནུ་ཀ་མྤཱི ཝི་ཧ་ར་ཏི.

‘‘ཨ་དི་ནྣཱ་དཱ་ནཾ པ་ཧཱ་ཡ ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི དི་ནྣཱ་དཱ་ཡཱི དི་ནྣ་པཱ་ཊི་ཀ་ངྑཱི; ཨ་ཐེ་ནེ་ན སུ་ཙི་བྷཱུ་ཏེ་ན ཨ་ཏྟ་ནཱ ཝི་ཧ་ར་ཏི.

‘‘ཨ་བྲ་ཧྨ་ཙ་རི་ཡཾ པ་ཧཱ་ཡ བྲ་ཧྨ་ཙཱ་རཱི ཧོ་ཏི ཨཱ་རཱ་ཙཱ་རཱི ཝི་ར་ཏོ མེ་ཐུ་ནཱ གཱ་མ་དྷ་མྨཱ.

‘‘མུ་སཱ་ཝཱ་དཾ པ་ཧཱ་ཡ མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི ས་ཙྩ་ཝཱ་དཱི ས་ཙྩ་ས་ནྡྷོ ཐེ་ཏོ པ་ཙྩ་ཡི་ཀོ ཨ་ཝི་སཾ་ཝཱ་ད་ཀོ ལོ་ཀ་སྶ.

‘‘པི་སུ་ཎཾ ཝཱ་ཙཾ པ་ཧཱ་ཡ པི་སུ་ཎཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ཨི་ཏོ སུ་ཏྭཱ ན ཨ་མུ་ཏྲ ཨ་ཀྑཱ་ཏཱ ཨི་མེ་སཾ བྷེ་དཱ་ཡ, ཨ་མུ་ཏྲ ཝཱ སུ་ཏྭཱ ན ཨི་མེ་སཾ ཨ་ཀྑཱ་ཏཱ ཨ་མཱུ་སཾ བྷེ་དཱ་ཡ. ཨི་ཏི བྷི་ནྣཱ་ནཾ ཝཱ ས་ནྡྷཱ་ཏཱ ས་ཧི་ཏཱ་ནཾ ཝཱ ཨ་ནུ་པྤ་དཱ་ཏཱ, ས་མ་གྒཱ་རཱ་མོ ས་མ་གྒ་ར་ཏོ ས་མ་གྒ་ན་ནྡཱི; ས་མ་གྒ་ཀ་ར་ཎིཾ ཝཱ་ཙཾ བྷཱ་སི་ཏཱ ཧོ་ཏི.

‘‘ཕ་རུ་སཾ ཝཱ་ཙཾ པ་ཧཱ་ཡ ཕ་རུ་སཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི. ཡཱ སཱ ཝཱ་ཙཱ ནེ་ལཱ ཀ་ཎྞ་སུ་ཁཱ པེ་མ་ནཱི་ཡཱ ཧ་ད་ཡ་ངྒ་མཱ པོ་རཱི བ་ཧུ་ཛ་ན་ཀ་ནྟཱ བ་ཧུ་ཛ་ན་མ་ནཱ་པཱ, ཏ་ཐཱ་རཱུ་པིཾ ཝཱ་ཙཾ བྷཱ་སི་ཏཱ ཧོ་ཏི.

‘‘ས་མྥ་པྤ་ལཱ་པཾ པ་ཧཱ་ཡ ས་མྥ་པྤ་ལཱ་པཱ པ་ཊི་ཝི་ར་ཏོ ཧོ་ཏི ཀཱ་ལ་ཝཱ་དཱི བྷཱུ་ཏ་ཝཱ་དཱི ཨ་ཏྠ་ཝཱ་དཱི དྷ་མྨ་ཝཱ་དཱི ཝི་ན་ཡ་ཝཱ་དཱི, ནི་དྷཱ་ན་ཝ་ཏིཾ ཝཱ་ཙཾ བྷཱ་སི་ཏཱ ཧོ་ཏི ཀཱ་ལེ་ན སཱ་པ་དེ་སཾ པ་རི་ཡ་ནྟ་ཝ་ཏིཾ ཨ་ཏྠ་སཾ་ཧི་ཏཾ.

‘‘སོ བཱི་ཛ་གཱ་མ་བྷཱུ་ཏ་གཱ་མ་ས་མཱ་ར་མྦྷཱ པ་ཊི་ཝི་ར་ཏོ ཧོ་ཏི. ཨེ་ཀ་བྷ་ཏྟི་ཀོ ཧོ་ཏི ར་ཏྟཱུ་པ་ར་ཏོ, ཝི་ར་ཏོ ཝི་ཀཱ་ལ་བྷོ་ཛ་ནཱ. ན་ཙྩ་གཱི་ཏ་ཝཱ་དི་ཏ་ཝི་སཱུ་ཀ་ད་སྶ་ནཱ པ་ཊི་ཝི་ར་ཏོ ཧོ་ཏི, མཱ་ལཱ་ག་ནྡྷ་ཝི་ལེ་པ་ན་དྷཱ་ར་ཎ་མ་ཎྜ་ན་ཝི་བྷཱུ་ས་ན་ཊྛཱ་ནཱ པ་ཊི་ཝི་ར་ཏོ ཧོ་ཏི, ཨུ་ཙྩཱ་ས་ཡ་ན་མ་ཧཱ་ས་ཡ་ནཱ པ་ཊི་ཝི་ར་ཏོ ཧོ་ཏི, ཛཱ་ཏ་རཱུ་པ་ར་ཛ་ཏ་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཨཱ་མ་ཀ་དྷ་ཉྙ་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཨཱ་མ་ཀ་མཾ་ས་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཨི་ཏྠི་ཀུ་མཱ་རི་ཀ་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, དཱ་སི་དཱ་ས་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཨ་ཛེ་ལ༹་ཀ་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཀུ་ཀྐུ་ཊ་སཱུ་ཀ་ར་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཧ་ཏྠི་ག་ཝ་སྶ་ཝ་ལ༹་ཝ་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, ཁེ་ཏྟ་ཝ་ཏྠུ་པ་ཊི་གྒ་ཧ་ཎཱ པ་ཊི་ཝི་ར་ཏོ ཧོ་ཏི, དཱུ་ཏེ་ཡྻ་པ་ཧི་ཎ་ག་མ་ནཱ་ནུ་ཡོ་གཱ པ་ཊི་ཝི་ར་ཏོ ཧོ་ཏི, ཀ་ཡ་ཝི་ཀྐ་ཡཱ པ་ཊི་ཝི་ར་ཏོ ཧོ་ཏི, ཏུ་ལཱ་ཀཱུ་ཊ་ཀཾ་ས་ཀཱུ་ཊ་མཱ་ན་ཀཱུ་ཊཱ པ་ཊི་ཝི་ར་ཏོ ཧོ་ཏི, ཨུ་ཀྐོ་ཊ་ན་ཝ་ཉྩ་ན་ནི་ཀ་ཏི་སཱ་ཙི་ཡོ་གཱ པ་ཊི་ཝི་ར་ཏོ ཧོ་ཏི, ཚེ་ད་ན་ཝ་དྷ་བ་ནྡྷ་ན་ཝི་པ་རཱ་མོ་ས་ཨཱ་ལོ་པ་ས་ཧ་སཱ་ཀཱ་རཱ པ་ཊི་ཝི་ར་ཏོ ཧོ་ཏི.

‘‘སོ ས་ནྟུ་ཊྛོ ཧོ་ཏི ཀཱ་ཡ་པ་རི་ཧཱ་རི་ཀེ་ན ཙཱི་ཝ་རེ་ན ཀུ་ཙྪི་པ་རི་ཧཱ་རི་ཀེ་ན པི་ཎྜ་པཱ་ཏེ་ན. ཡེ་ན ཡེ་ནེ་ཝ པ་ཀྐ་མ་ཏི ས་མཱ་དཱ་ཡེ་ཝ པ་ཀྐ་མ་ཏི, སེ་ཡྻ་ཐཱ་པི ནཱ་མ པ་ཀྑཱི ས་ཀུ་ཎོ ཡེ་ན ཡེ་ནེ་ཝ ཌེ་ཏི ས་པ་ཏྟ་བྷཱ་རོ་ཝ ཌེ་ཏི. ཨེ་ཝ་མེ་ཝཾ བྷི་ཀྑུ ས་ནྟུ་ཊྛོ ཧོ་ཏི ཀཱ་ཡ་པ་རི་ཧཱ་རི་ཀེ་ན ཙཱི་ཝ་རེ་ན ཀུ་ཙྪི་པ་རི་ཧཱ་རི་ཀེ་ན པི་ཎྜ་པཱ་ཏེ་ན. ཡེ་ན ཡེ་ནེ་ཝ པ་ཀྐ་མ་ཏི ས་མཱ་དཱ་ཡེ་ཝ པ་ཀྐ་མ་ཏི. སོ ཨི་མི་ནཱ ཨ་རི་ཡེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏོ ཨ་ཛ྄ཛྷ་ཏྟཾ ཨ་ན་ཝ་ཛྫ་སུ་ཁཾ པ་ཊི་སཾ་ཝེ་དེ་ཏི.

‘‘སོ ཙ་ཀྑུ་ནཱ རཱུ་པཾ དི་སྭཱ ན ནི་མི་ཏྟ་གྒཱ་ཧཱི ཧོ་ཏི ནཱ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ ཙ་ཀྑུ་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ པ་ཊི་པ་ཛྫ་ཏི; ར་ཀྑ་ཏི ཙ་ཀྑུ་ནྡྲི་ཡཾ, ཙ་ཀྑུ་ནྡྲི་ཡེ སཾ་ཝ་རཾ ཨཱ་པ་ཛྫ་ཏི. སོ་ཏེ་ན ས་དྡཾ སུ་ཏྭཱ… གྷཱ་ནེ་ན ག་ནྡྷཾ གྷཱ་ཡི་ཏྭཱ… ཛི་ཝ྄ཧཱ་ཡ ར་སཾ སཱ་ཡི་ཏྭཱ… ཀཱ་ཡེ་ན ཕོ་ཊྛ་བྦཾ ཕུ་སི་ཏྭཱ… མ་ན་སཱ དྷ་མྨཾ ཝི་ཉྙཱ་ཡ ན ནི་མི་ཏྟ་གྒཱ་ཧཱི ཧོ་ཏི ནཱ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ མ་ནི་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ པ་ཊི་པ་ཛྫ་ཏི; ར་ཀྑ་ཏི མ་ནི་ནྡྲི་ཡཾ, མ་ནི་ནྡྲི་ཡེ སཾ་ཝ་རཾ ཨཱ་པ་ཛྫ་ཏི. སོ ཨི་མི་ནཱ ཨ་རི་ཡེ་ན ཨི་ནྡྲི་ཡ་སཾ་ཝ་རེ་ན ས་མ་ནྣཱ་ག་ཏོ ཨ་ཛ྄ཛྷ་ཏྟཾ ཨ་བྱཱ་སེ་ཀ་སུ་ཁཾ པ་ཊི་སཾ་ཝེ་དེ་ཏི.

‘‘སོ ཨ་བྷི་ཀྐ་ནྟེ པ་ཊི་ཀྐ་ནྟེ ས་མྤ་ཛཱ་ན་ཀཱ་རཱི ཧོ་ཏི, ཨཱ་ལོ་ཀི་ཏེ ཝི་ལོ་ཀི་ཏེ ས་མྤ་ཛཱ་ན་ཀཱ་རཱི ཧོ་ཏི, ས་མི་ཉྫི་ཏེ པ་སཱ་རི་ཏེ ས་མྤ་ཛཱ་ན་ཀཱ་རཱི ཧོ་ཏི, ས་ངྒྷཱ་ཊི་པ་ཏྟ་ཙཱི་ཝ་ར་དྷཱ་ར་ཎེ ས་མྤ་ཛཱ་ན་ཀཱ་རཱི ཧོ་ཏི, ཨ་སི་ཏེ པཱི་ཏེ ཁཱ་ཡི་ཏེ སཱ་ཡི་ཏེ ས་མྤ་ཛཱ་ན་ཀཱ་རཱི ཧོ་ཏི, ཨུ་ཙྩཱ་ར་པ་སྶཱ་ཝ་ཀ་མྨེ ས་མྤ་ཛཱ་ན་ཀཱ་རཱི ཧོ་ཏི, ག་ཏེ ཋི་ཏེ ནི་སི་ནྣེ སུ་ཏྟེ ཛཱ་ག་རི་ཏེ བྷཱ་སི་ཏེ ཏུ་ཎྷཱི་བྷཱ་ཝེ ས་མྤ་ཛཱ་ན་ཀཱ་རཱི ཧོ་ཏི.

‘‘སོ ཨི་མི་ནཱ ཙ ཨ་རི་ཡེ་ན སཱི་ལ་ཀྑ་ནྡྷེ་ན ས་མ་ནྣཱ་ག་ཏོ, ཨི་མི་ནཱ ཙ ཨ་རི་ཡེ་ན ཨི་ནྡྲི་ཡ་སཾ་ཝ་རེ་ན ས་མ་ནྣཱ་ག་ཏོ, ཨི་མི་ནཱ ཙ ཨ་རི་ཡེ་ན ས་ཏི་ས་མྤ་ཛ་ཉྙེ ས་མ་ནྣཱ་ག་ཏོ ཝི་ཝི་ཏྟཾ སེ་ནཱ་ས་ནཾ བྷ་ཛ་ཏི ཨ་ར་ཉྙཾ རུ་ཀྑ་མཱུ་ལཾ པ་བྦ་ཏཾ ཀ་ནྡ་རཾ གི་རི་གུ་ཧཾ སུ་སཱ་ནཾ ཝ་ན་པ་ཏྠཾ ཨ་བྦྷོ་ཀཱ་སཾ པ་ལཱ་ལ་པུ་ཉྫཾ. སོ ཨ་ར་ཉྙ་ག་ཏོ ཝཱ རུ་ཀྑ་མཱུ་ལ་ག་ཏོ ཝཱ སུ་ཉྙཱ་གཱ་ར་ག་ཏོ ཝཱ ནི་སཱི་ད་ཏི པ་ལླ་ངྐཾ ཨཱ་བྷུ་ཛི་ཏྭཱ ཨུ་ཛུཾ ཀཱ་ཡཾ པ་ཎི་དྷཱ་ཡ པ་རི་མུ་ཁཾ ས་ཏིཾ ཨུ་པ་ཊྛ་པེ་ཏྭཱ.

‘‘སོ ཨ་བྷི་ཛ྄ཛྷཾ ལོ་ཀེ པ་ཧཱ་ཡ ཝི་ག་ཏཱ་བྷི་ཛ྄ཛྷེ་ན ཙེ་ཏ་སཱ ཝི་ཧ་ར་ཏི, ཨ་བྷི་ཛ྄ཛྷཱ་ཡ ཙི་ཏྟཾ པ་རི་སོ་དྷེ་ཏི. བྱཱ་པཱ་ད་པ་དོ་སཾ པ་ཧཱ་ཡ ཨ་བྱཱ་པ་ནྣ་ཙི་ཏྟོ ཝི་ཧ་ར་ཏི ས་བྦ་པཱ་ཎ་བྷཱུ་ཏ་ཧི་ཏཱ་ནུ་ཀ་མྤཱི, བྱཱ་པཱ་ད་པ་དོ་སཱ ཙི་ཏྟཾ པ་རི་སོ་དྷེ་ཏི. ཐི་ན་མི་དྡྷཾ པ་ཧཱ་ཡ ཝི་ག་ཏ་ཐི་ན་མི་དྡྷོ ཝི་ཧ་ར་ཏི ཨཱ་ལོ་ཀ་ས་ཉྙཱི ས་ཏོ ས་མྤ་ཛཱ་ནོ, ཐི་ན་མི་དྡྷཱ ཙི་ཏྟཾ པ་རི་སོ་དྷེ་ཏི. ཨུ་དྡྷ་ཙྩ་ཀུ་ཀྐུ་ཙྩཾ པ་ཧཱ་ཡ ཨ་ནུ་དྡྷ་ཏོ ཝི་ཧ་ར་ཏི ཨ་ཛ྄ཛྷ་ཏྟཾ ཝཱུ་པ་ས་ནྟ་ཙི་ཏྟོ, ཨུ་དྡྷ་ཙྩ་ཀུ་ཀྐུ་ཙྩཱ ཙི་ཏྟཾ པ་རི་སོ་དྷེ་ཏི. ཝི་ཙི་ཀི་ཙྪཾ པ་ཧཱ་ཡ ཏི་ཎྞ་ཝི་ཙི་ཀི་ཙྪོ ཝི་ཧ་ར་ཏི ཨ་ཀ་ཐཾ་ཀ་ཐཱི ཀུ་ས་ལེ་སུ དྷ་མྨེ་སུ, ཝི་ཙི་ཀི་ཙྪཱ་ཡ ཙི་ཏྟཾ པ་རི་སོ་དྷེ་ཏི.

‘‘སོ ཨི་མེ པ་ཉྩ ནཱི་ཝ་ར་ཎེ པ་ཧཱ་ཡ ཙེ་ཏ་སོ ཨུ་པ་ཀྐི་ལེ་སེ པ་ཉྙཱ་ཡ དུ་བྦ་ལཱི་ཀ་ར་ཎེ, ཝི་ཝི་ཙྩེ་ཝ ཀཱ་མེ་ཧི ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི ས་ཝི་ཏ་ཀྐཾ ས་ཝི་ཙཱ་རཾ ཝི་ཝེ་ཀ་ཛཾ པཱི་ཏི་སུ་ཁཾ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏཾ ཀིཾ མ་ཉྙ་སི, ཨུ་པཱ་ལི, ‘ན་ནྭཱ་ཡཾ ཝི་ཧཱ་རོ པུ་རི་མེ་ཧི ཝི་ཧཱ་རེ་ཧི ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙཱ’’’ཏི? ‘‘ཨེ་ཝཾ, བྷ་ནྟེ’’.

‘‘ཨི་མ་མྤི ཁོ, ཨུ་པཱ་ལི, མ་མ སཱ་ཝ་ཀཱ ཨ་ཏྟ་ནི དྷ་མྨཾ ས་མྤ་སྶ་མཱ་ནཱ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ནྟི, ནོ ཙ ཁོ ཏཱ་ཝ ཨ་ནུ་པྤ་ཏྟ་ས་ད་ཏྠཱ ཝི་ཧ་ར་ནྟི.

‘‘པུ་ན ཙ་པ་རཾ, ཨུ་པཱ་ལི, བྷི་ཀྑུ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ…པེ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏཾ ཀིཾ མ་ཉྙ་སི, ཨུ་པཱ་ལི, ‘ན་ནྭཱ་ཡཾ ཝི་ཧཱ་རོ པུ་རི་མེ་ཧི ཝི་ཧཱ་རེ་ཧི ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙཱ’’’ཏི? ‘‘ཨེ་ཝཾ, བྷ་ནྟེ’’.

‘‘པུ་ན ཙ་པ་རཾ, ཨུ་པཱ་ལི, བྷི་ཀྑུ པཱི་ཏི་ཡཱ ཙ ཝི་རཱ་གཱ…པེ… ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏཾ ཀིཾ མ་ཉྙ་སི, ཨུ་པཱ་ལི, ‘ན་ནྭཱ་ཡཾ ཝི་ཧཱ་རོ པུ་རི་མེ་ཧི ཝི་ཧཱ་རེ་ཧི ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙཱ’’’ཏི? ‘‘ཨེ་ཝཾ, བྷ་ནྟེ’’.

‘‘པུ་ན ཙ་པ་རཾ, ཨུ་པཱ་ལི, བྷི་ཀྑུ སུ་ཁ་སྶ ཙ པ་ཧཱ་ནཱ…པེ… ཙ་ཏུ་ཏྠཾ ཛྷཱ་ནཾ…པེ….

པུ་ན ཙ་པ་རཾ, ཨུ་པཱ་ལི, བྷི་ཀྑུ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ‘ཨ་ན་ནྟོ ཨཱ་ཀཱ་སོ’ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏཾ ཀིཾ མ་ཉྙ་སི, ཨུ་པཱ་ལི, ‘ན་ནྭཱ་ཡཾ ཝི་ཧཱ་རོ པུ་རི་མེ་ཧི ཝི་ཧཱ་རེ་ཧི ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙཱ’’’ཏི? ‘‘ཨེ་ཝཾ, བྷ་ནྟེ’’.

‘‘པུ་ན ཙ་པ་རཾ, ཨུ་པཱ་ལི, བྷི་ཀྑུ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ཨ་ན་ནྟཾ ཝི་ཉྙཱ་ཎ’ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི…པེ….

‘‘ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི…པེ….

‘‘ས་བྦ་སོ ཨཱ་ཀི་ཉྩ་ཉྙཱ་ཡ་ཏ་ནཾ ས་མ་ཏི་ཀྐ་མྨ ‘ས་ནྟ་མེ་ཏཾ པ་ཎཱི་ཏ་མེ་ཏ’ནྟི ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཏཾ ཀིཾ མ་ཉྙ་སི, ཨུ་པཱ་ལི, ‘ན་ནྭཱ་ཡཾ ཝི་ཧཱ་རོ པུ་རི་མེ་ཧི ཝི་ཧཱ་རེ་ཧི ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙཱ’’’ཏི? ‘‘ཨེ་ཝཾ, བྷ་ནྟེ’’.

‘‘པུ་ན ཙ་པ་རཾ, ཨུ་པཱ་ལི, བྷི་ཀྑུ ས་བྦ་སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མ་ཏི་ཀྐ་མྨ ས་ཉྙཱ་ཝེ་ད་ཡི་ཏ་ནི་རོ་དྷཾ ཨུ་པ་ས་མྤ་ཛྫ ཝི་ཧ་ར་ཏི; པ་ཉྙཱ་ཡ ཙ་སྶ དི་སྭཱ ཨཱ་ས་ཝཱ པ་རི་ཀྑཱི་ཎཱ ཧོ་ནྟི. ཏཾ ཀིཾ མ་ཉྙ་སི, ཨུ་པཱ་ལི, ‘ན་ནྭཱ་ཡཾ ཝི་ཧཱ་རོ པུ་རི་མེ་ཧི ཝི་ཧཱ་རེ་ཧི ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙཱ’’’ཏི? ‘‘ཨེ་ཝཾ, བྷ་ནྟེ’’.

‘‘ཨི་མ་མྤི ཁོ, ཨུ་པཱ་ལི, མ་མ སཱ་ཝ་ཀཱ ཨ་ཏྟ་ནི དྷ་མྨཾ ས་མྤ་སྶ་མཱ་ནཱ ཨ་ར་ཉྙ་ཝ་ན་པ་ཏྠཱ་ནི པ་ནྟཱ་ནི སེ་ནཱ་ས་ནཱ་ནི པ་ཊི་སེ་ཝ་ནྟི, ཨ་ནུ་པྤ་ཏྟ་ས་ད་ཏྠཱ ཙ ཝི་ཧ་ར་ནྟི. ཨི་ངྒྷ ཏྭཾ, ཨུ་པཱ་ལི, ས་ངྒྷེ ཝི་ཧ་རཱ་ཧི. ས་ངྒྷེ ཏེ ཝི་ཧ་ར་ཏོ ཕཱ་སུ བྷ་ཝི་སྶ་ཏཱི’’ཏི. ན་ཝ་མཾ.