༦. ཨ་དྷི་མཱ་ན་སུ་ཏྟཾ

༨༦. ཨེ་ཀཾ ས་མ་ཡཾ ཨཱ་ཡ་སྨཱ མ་ཧཱ་ཀ་སྶ་པོ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏ་ཏྲ ཁོ ཨཱ་ཡ་སྨཱ མ་ཧཱ་ཀ་སྶ་པོ བྷི་ཀྑཱུ ཨཱ་མ་ནྟེ་སི – ‘‘ཨཱ་ཝུ་སོ བྷི་ཀྑ་ཝེ’’ཏི. ‘‘ཨཱ་ཝུ་སོ’’ཏི ཁོ ཏེ བྷི་ཀྑཱུ ཨཱ་ཡ་སྨ་ཏོ མ་ཧཱ་ཀ་སྶ་པ་སྶ པ་ཙྩ་སྶོ་སུཾ. ཨཱ་ཡ་སྨཱ མ་ཧཱ་ཀ་སྶ་པོ ཨེ་ཏ་ད་ཝོ་ཙ –

‘‘ཨི་དྷཱ་ཝུ་སོ, བྷི་ཀྑུ ཨ་ཉྙཾ བྱཱ་ཀ་རོ་ཏི – ‘ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ་ཏི པ་ཛཱ་ནཱ་མཱི’ཏི. ཏ་མེ་ནཾ ཏ་ཐཱ་ག་ཏོ ཝཱ ཏ་ཐཱ་ག་ཏ་སཱ་ཝ་ཀོ ཝཱ ཛྷཱ་ཡཱི ས་མཱ་པ་ཏྟི་ཀུ་ས་ལོ པ་ར་ཙི་ཏྟ་ཀུ་ས་ལོ པ་ར་ཙི་ཏྟ་པ་རི་ཡཱ་ཡ་ཀུ་ས་ལོ ས་མ་ནུ་ཡུ་ཉྫ་ཏི ས་མ་ནུ་གྒཱ་ཧ་ཏི ས་མ་ནུ་བྷཱ་ས་ཏི. སོ ཏ་ཐཱ་ག་ཏེ་ན ཝཱ ཏ་ཐཱ་ག་ཏ་སཱ་ཝ་ཀེ་ན ཝཱ ཛྷཱ་ཡི་ནཱ ས་མཱ་པ་ཏྟི་ཀུ་ས་ལེ་ན པ་ར་ཙི་ཏྟ་ཀུ་ས་ལེ་ན པ་ར་ཙི་ཏྟ་པ་རི་ཡཱ་ཡ་ཀུ་ས་ལེ་ན ས་མ་ནུ་ཡུ་ཉྫི་ཡ་མཱ་ནོ ས་མ་ནུ་གྒཱ་ཧི་ཡ་མཱ་ནོ ས་མ་ནུ་བྷཱ་སི་ཡ་མཱ་ནོ ཨི་རཱི་ཎཾ ཨཱ་པ་ཛྫ་ཏི ཝི་ཙི་ནཾ ཨཱ་པ་ཛྫ་ཏི ཨ་ན་ཡཾ ཨཱ་པ་ཛྫ་ཏི བྱ་ས་ནཾ ཨཱ་པ་ཛྫ་ཏི ཨ་ན་ཡ་བྱ་ས་ནཾ ཨཱ་པ་ཛྫ་ཏི.

‘‘ཏ་མེ་ནཾ ཏ་ཐཱ་ག་ཏོ ཝཱ ཏ་ཐཱ་ག་ཏ་སཱ་ཝ་ཀོ ཝཱ ཛྷཱ་ཡཱི ས་མཱ་པ་ཏྟི་ཀུ་ས་ལོ པ་ར་ཙི་ཏྟ་ཀུ་ས་ལོ པ་ར་ཙི་ཏྟ་པ་རི་ཡཱ་ཡ་ཀུ་ས་ལོ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ མ་ན་སི ཀ་རོ་ཏི – ‘ཀིཾ ནུ ཁོ ཨ་ཡ་མཱ་ཡ་སྨཱ ཨ་ཉྙཾ བྱཱ་ཀ་རོ་ཏི – ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ་ཏི པ་ཛཱ་ནཱ་མཱི’ཏི.

‘‘ཏ་མེ་ནཾ ཏ་ཐཱ་ག་ཏོ ཝཱ ཏ་ཐཱ་ག་ཏ་སཱ་ཝ་ཀོ ཝཱ ཛྷཱ་ཡཱི ས་མཱ་པ་ཏྟི་ཀུ་ས་ལོ པ་ར་ཙི་ཏྟ་ཀུ་ས་ལོ པ་ར་ཙི་ཏྟ་པ་རི་ཡཱ་ཡ་ཀུ་ས་ལོ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་ཏི –

‘ཨ་དྷི་མཱ་ནི་ཀོ ཁོ ཨ་ཡ་མཱ་ཡ་སྨཱ ཨ་དྷི་མཱ་ན་ས་ཙྩོ, ཨ་པྤ་ཏྟེ པ་ཏྟ་ས་ཉྙཱི, ཨ་ཀ་ཏེ ཀ་ཏ་ས་ཉྙཱི, ཨ་ན་དྷི་ག་ཏེ ཨ་དྷི་ག་ཏ་ས་ཉྙཱི. ཨ་དྷི་མཱ་ནེ་ན ཨ་ཉྙཾ བྱཱ་ཀ་རོ་ཏི – ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ་ཏི པ་ཛཱ་ནཱ་མཱི’ཏི.

‘‘ཏ་མེ་ནཾ ཏ་ཐཱ་ག་ཏོ ཝཱ ཏ་ཐཱ་ག་ཏ་སཱ་ཝ་ཀོ ཝཱ ཛྷཱ་ཡཱི ས་མཱ་པ་ཏྟི་ཀུ་ས་ལོ པ་ར་ཙི་ཏྟ་ཀུ་ས་ལོ པ་ར་ཙི་ཏྟ་པ་རི་ཡཱ་ཡ་ཀུ་ས་ལོ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ མ་ན་སི ཀ་རོ་ཏི – ‘ཀིཾ ནུ ཁོ ཨ་ཡ་མཱ་ཡ་སྨཱ ནི་སྶཱ་ཡ ཨ་དྷི་མཱ་ནི་ཀོ ཨ་དྷི་མཱ་ན་ས་ཙྩོ, ཨ་པྤ་ཏྟེ པ་ཏྟ་ས་ཉྙཱི, ཨ་ཀ་ཏེ ཀ་ཏ་ས་ཉྙཱི, ཨ་ན་དྷི་ག་ཏེ ཨ་དྷི་ག་ཏ་ས་ཉྙཱི. ཨ་དྷི་མཱ་ནེ་ན ཨ་ཉྙཾ བྱཱ་ཀ་རོ་ཏི – ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ་ཏི པ་ཛཱ་ནཱ་མཱི’ཏི.

‘བ་ཧུ་སྶུ་ཏོ ཁོ པ་ན ཨ་ཡ་མཱ་ཡ་སྨཱ སུ་ཏ་དྷ་རོ སུ་ཏ་ས་ནྣི་ཙ་ཡོ, ཡེ ཏེ དྷ་མྨཱ ཨཱ་དི་ཀ་ལྱཱ་ཎཱ མ་ཛ྄ཛྷེ་ཀ་ལྱཱ་ཎཱ པ་རི་ཡོ་སཱ་ན་ཀ་ལྱཱ་ཎཱ སཱ་ཏྠཾ ས་བྱ་ཉྫ་ནཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ བྲ་ཧྨ་ཙ་རི་ཡཾ ཨ་བྷི་ཝ་ད་ནྟི, ཏ་ཐཱ་རཱུ་པཱ་སྶ དྷ་མྨཱ བ་ཧུ་སྶུ་ཏཱ ཧོ་ནྟི དྷཱ་ཏཱ ཝ་ཙ་སཱ པ་རི་ཙི་ཏཱ མ་ན་སཱ་ནུ་པེ་ཀྑི་ཏཱ དི་ཊྛི་ཡཱ སུ་པྤ་ཊི་ཝི་དྡྷཱ. ཏ་སྨཱ ཨ་ཡ་མཱ་ཡ་སྨཱ ཨ་དྷི་མཱ་ནི་ཀོ ཨ་དྷི་མཱ་ན་ས་ཙྩོ, ཨ་པྤ་ཏྟེ པ་ཏྟ་ས་ཉྙཱི, ཨ་ཀ་ཏེ ཀ་ཏ་ས་ཉྙཱི, ཨ་ན་དྷི་ག་ཏེ ཨ་དྷི་ག་ཏ་ས་ཉྙཱི. ཨ་དྷི་མཱ་ནེ་ན ཨ་ཉྙཾ བྱཱ་ཀ་རོ་ཏི – ཁཱི་ཎཱ ཛཱ་ཏི, ཝུ་སི་ཏཾ བྲ་ཧྨ་ཙ་རི་ཡཾ, ཀ་ཏཾ ཀ་ར་ཎཱི་ཡཾ, ནཱ་པ་རཾ ཨི་ཏྠ་ཏྟཱ་ཡཱ་ཏི པ་ཛཱ་ནཱ་མཱི’ཏི.

‘ཨ་བྷི་ཛ྄ཛྷཱ་ལུ ཁོ པ་ན ཨ་ཡ་མཱ་ཡ་སྨཱ; ཨ་བྷི་ཛ྄ཛྷཱ་པ་རི་ཡུ་ཊྛི་ཏེ་ན ཙེ་ཏ་སཱ བ་ཧུ་ལཾ ཝི་ཧ་ར་ཏི. ཨ་བྷི་ཛ྄ཛྷཱ་པ་རི་ཡུ་ཊྛཱ་ནཾ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘བྱཱ་པ་ནྣོ ཁོ པ་ན ཨ་ཡ་མཱ་ཡ་སྨཱ; བྱཱ་པཱ་ད་པ་རི་ཡུ་ཊྛི་ཏེ་ན ཙེ་ཏ་སཱ བ་ཧུ་ལཾ ཝི་ཧ་ར་ཏི. བྱཱ་པཱ་ད་པ་རི་ཡུ་ཊྛཱ་ནཾ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ཐི་ན་མི་དྡྷོ ཁོ པ་ན ཨ་ཡ་མཱ་ཡ་སྨཱ; ཐི་ན་མི་དྡྷ་པ་རི་ཡུ་ཊྛི་ཏེ་ན ཙེ་ཏ་སཱ བ་ཧུ་ལཾ ཝི་ཧ་ར་ཏི. ཐི་ན་མི་དྡྷ་པ་རི་ཡུ་ཊྛཱ་ནཾ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ཨུ་དྡྷ་ཏོ ཁོ པ་ན ཨ་ཡ་མཱ་ཡ་སྨཱ; ཨུ་དྡྷ་ཙྩ་པ་རི་ཡུ་ཊྛི་ཏེ་ན ཙེ་ཏ་སཱ བ་ཧུ་ལཾ ཝི་ཧ་ར་ཏི. ཨུ་དྡྷ་ཙྩ་པ་རི་ཡུ་ཊྛཱ་ནཾ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ཝི་ཙི་ཀི་ཙྪོ ཁོ པ་ན ཨ་ཡ་མཱ་ཡ་སྨཱ; ཝི་ཙི་ཀི་ཙྪཱ་པ་རི་ཡུ་ཊྛི་ཏེ་ན ཙེ་ཏ་སཱ བ་ཧུ་ལཾ ཝི་ཧ་ར་ཏི. ཝི་ཙི་ཀི་ཙྪཱ་པ་རི་ཡུ་ཊྛཱ་ནཾ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ཀ་མྨཱ་རཱ་མོ ཁོ པ་ན ཨ་ཡ་མཱ་ཡ་སྨཱ ཀ་མྨ་ར་ཏོ ཀ་མྨཱ་རཱ་མ་ཏཾ ཨ་ནུ་ཡུ་ཏྟོ. ཀ་མྨཱ་རཱ་མ་ཏཱ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘བྷ་སྶཱ་རཱ་མོ ཁོ པ་ན ཨ་ཡ་མཱ་ཡ་སྨཱ བྷ་སྶ་ར་ཏོ བྷ་སྶཱ་རཱ་མ་ཏཾ ཨ་ནུ་ཡུ་ཏྟོ. བྷ་སྶཱ་རཱ་མ་ཏཱ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ནི་དྡཱ་རཱ་མོ ཁོ པ་ན ཨ་ཡ་མཱ་ཡ་སྨཱ ནི་དྡཱ་ར་ཏོ ནི་དྡཱ་རཱ་མ་ཏཾ ཨ་ནུ་ཡུ་ཏྟོ. ནི་དྡཱ་རཱ་མ་ཏཱ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ས་ངྒ་ཎི་ཀཱ་རཱ་མོ ཁོ པ་ན ཨ་ཡ་མཱ་ཡ་སྨཱ ས་ངྒ་ཎི་ཀ་ར་ཏོ ས་ངྒ་ཎི་ཀཱ་རཱ་མ་ཏཾ ཨ་ནུ་ཡུ་ཏྟོ. ས་ངྒ་ཎི་ཀཱ་རཱ་མ་ཏཱ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ.

‘ས་ཏི ཁོ པ་ན ཨ་ཡ་མཱ་ཡ་སྨཱ ཨུ་ཏྟ་རི ཀ་ར་ཎཱི་ཡེ ཨོ་ར་མ་ཏྟ་ཀེ་ན ཝི་སེ་སཱ་དྷི་ག་མེ་ན ཨ་ནྟ་རཱ ཝོ་སཱ་ནཾ ཨཱ་པ་ནྣོ. ཨ་ནྟ་རཱ ཝོ་སཱ་ན་ག་མ་ནཾ ཁོ པ་ན ཏ་ཐཱ་ག་ཏ་པྤ་ཝེ་དི་ཏེ དྷ་མྨ་ཝི་ན་ཡེ པ་རི་ཧཱ་ན་མེ་ཏཾ’.

‘‘སོ ཝ་ཏཱ་ཝུ་སོ, བྷི་ཀྑུ ‘ཨི་མེ ད་ས དྷ་མྨེ ཨ་པྤ་ཧཱ་ཡ ཨི་མ་སྨིཾ དྷ་མྨ་ཝི་ན་ཡེ ཝུ་དྡྷིཾ ཝི་རཱུ་ལ༹ྷིཾ ཝེ་པུ་ལླཾ ཨཱ་པ་ཛྫི་སྶ་ཏཱི’ཏི ནེ་ཏཾ ཋཱ་ནཾ ཝི་ཛྫ་ཏི. སོ ཝ་ཏཱ་ཝུ་སོ, བྷི་ཀྑུ ‘ཨི་མེ ད་ས དྷ་མྨེ པ་ཧཱ་ཡ ཨི་མ་སྨིཾ དྷ་མྨ་ཝི་ན་ཡེ ཝུ་དྡྷིཾ ཝི་རཱུ་ལ༹ྷིཾ ཝེ་པུ་ལླཾ ཨཱ་པ་ཛྫི་སྶ་ཏཱི’ཏི ཋཱ་ན་མེ་ཏཾ ཝི་ཛྫ་ཏཱི’’ཏི. ཚ་ཊྛཾ.