๒. ปาราชิกาทิปญฺหา

๔๘๐. อิตฺถี จ อพฺภนฺตเร สิยา,

ภิกฺขุ จ พหิทฺธา สิยา;

ฉิทฺทํ ตสฺมึ ฆเร นตฺถิ;

เมถุนธมฺมปจฺจยา;

กถํ ปาราชิโก สิยา;

ปญฺหา เมสา กุสเลหิ จินฺติตา.

เตลํ มธุํ ผาณิตญฺจาปิ สปฺปึ;

สามํ คเหตฺวาน นิกฺขิเปยฺย;

อวีติวตฺเต สตฺตาเห;

สติ ปจฺจเย ปริภุญฺชนฺตสฺส อาปตฺติ;

ปญฺหา เมสา กุสเลหิ จินฺติตา.

นิสฺสคฺคิเยน อาปตฺติ;

สุทฺธเกน ปาจิตฺติยํ;

อาปชฺชนฺตสฺส เอกโต;

ปญฺหา เมสา กุสเลหิ จินฺติตา.

ภิกฺขู สิยา วีสติยา สมาคตา;

กมฺมํ กเรยฺยุํ สมคฺคสญฺญิโน;

ภิกฺขุ สิยา ทฺวาทสโยชเน ฐิโต;

กมฺมญฺจ ตํ กุปฺเปยฺย วคฺคปจฺจยา;

ปญฺหา เมสา กุสเลหิ จินฺติตา.

ปทวีติหารมตฺเตน วาจาย ภณิเตน จ;

สพฺพานิ ครุกานิ สปฺปฏิกมฺมานิ;

จตุสฏฺฐิ อาปตฺติโย อาปชฺเชยฺย เอกโต;

ปญฺหา เมสา กุสเลหิ จินฺติตา.

นิวตฺโถ อนฺตรวาสเกน;

ทิคุณํ สงฺฆาฏึ ปารุโต;

สพฺพานิ ตานิ นิสฺสคฺคิยานิ โหนฺติ;

ปญฺหา เมสา กุสเลหิ จินฺติตา.

น จาปิ ญตฺติ น จ ปน กมฺมวาจา;

น เจหิ ภิกฺขูติ ชิโน อโวจ;

สรณคมนมฺปิ น ตสฺส อตฺถิ;

อุปสมฺปทา จสฺส อกุปฺปา;

ปญฺหา เมสา กุสเลหิ จินฺติตา.

อิตฺถึ หเน น มาตรํ, ปุริสญฺจ น ปิตรํ หเน;

หเนยฺย อนริยํ มนฺโท, เตน จานนฺตรํ ผุเส;

ปญฺหา เมสา กุสเลหิ จินฺติตา.

อิตฺถึ หเน จ มาตรํ, ปุริสญฺจ ปิตรํ หเน;

มาตรํ ปิตรํ หนฺตฺวา, น เตนานนฺตรํ ผุเส;

ปญฺหา เมสา กุสเลหิ จินฺติตา.

อโจทยิตฺวา อสฺสารยิตฺวา;

อสมฺมุขีภูตสฺส กเรยฺย กมฺมํ;

กตญฺจ กมฺมํ สุกตํ ภเวยฺย;

การโก จ สงฺโฆ อนาปตฺติโก สิยา;

ปญฺหา เมสา กุสเลหิ จินฺติตา.

โจทยิตฺวา สารยิตฺวา;

สมฺมุขีภูตสฺส กเรยฺย กมฺมํ;

กตญฺจ กมฺมํ อกตํ ภเวยฺย;

การโก จ สงฺโฆ สาปตฺติโก สิยา;

ปญฺหา เมสา กุสเลหิ จินฺติตา.

ฉินฺทนฺตสฺส อาปตฺติ, ฉินฺทนฺตสฺส อนาปตฺติ;

ฉาเทนฺตสฺส อาปตฺติ, ฉาเทนฺตสฺส อนาปตฺติ;

ปญฺหา เมสา กุสเลหิ จินฺติตา.

สจฺจํ ภณนฺโต ครุกํ, มุสา จ ลหุ ภาสโต;

มุสา ภณนฺโต ครุกํ, สจฺจญฺจ ลหุ ภาสโต;

ปญฺหา เมสา กุสเลหิ จินฺติตา.