๓. ปาจิตฺติยาทิปญฺหา

๔๘๑. อธิฏฺฐิตํ รชนาย รตฺตํ;

กปฺปกตมฺปิ สนฺตํ;

ปริภุญฺชนฺตสฺส อาปตฺติ;

ปญฺหา เมสา กุสเลหิ จินฺติตา.

อตฺถงฺคเต สูริเย ภิกฺขุ มํสานิ ขาทติ;

น อุมฺมตฺตโก น จ ปน ขิตฺตจิตฺโต;

น จาปิ โส เวทนาฏฺโฏ ภเวยฺย;

น จสฺส โหติ อาปตฺติ;

โส จ ธมฺโม สุคเตน เทสิโต;

ปญฺหา เมสา กุสเลหิ จินฺติตา.

น รตฺตจิตฺโต น จ ปน เถยฺยจิตฺโต;

น จาปิ โส ปรํ มรณาย เจตยิ;

สลากํ เทนฺตสฺส โหติ เฉชฺชํ;

ปฏิคฺคณฺหนฺตสฺส ถุลฺลจฺจยํ;

ปญฺหา เมสา กุสเลหิ จินฺติตา.

น จาปิ อารญฺญกํ สาสงฺกสมฺมตํ;

น จาปิ สงฺเฆน สมฺมุติ ทินฺนา;

น จสฺส กถินํ อตฺถตํ ตตฺเถว;

จีวรํ นิกฺขิปิตฺวา คจฺเฉยฺย อฑฺฒโยชนํ;

ตตฺเถว อรุณํ อุคฺคจฺฉนฺตสฺส อนาปตฺติ;

ปญฺหา เมสา กุสเลหิ จินฺติตา.

กายิกานิ น วาจสิกานิ;

สพฺพานิ นานาวตฺถุกานิ;

อปุพฺพํ อจริมํ อาปชฺเชยฺย เอกโต;

ปญฺหา เมสา กุสเลหิ จินฺติตา.

วาจสิกานิ น กายิกานิ;

สพฺพานิ นานาวตฺถุกานิ;

อปุพฺพํ อจริมํ อาปชฺเชยฺย เอกโต;

ปญฺหา เมสา กุสเลหิ จินฺติตา.

ติสฺสิตฺถิโย เมถุนํ ตํ น เสเว;

ตโย ปุริเส ตโย อนริยปณฺฑเก;

น จาจเร เมถุนํ พฺยญฺชนสฺมึ;

เฉชฺชํ สิยา เมถุนธมฺมปจฺจยา;

ปญฺหา เมสา กุสเลหิ จินฺติตา.

มาตรํ จีวรํ ยาเจ, โน จ สงฺเฆ [โน สํฆสฺส (ก.), โน จ สํฆสฺส (สฺยา.), โน เจ สํฆสฺส (สี.)] ปริณตํ;

เกนสฺส โหติ อาปตฺติ, อนาปตฺติ จ ญาตเก;

ปญฺหา เมสา กุสเลหิ จินฺติตา.

กุทฺโธ อาราธโก โหติ, กุทฺโธ โหติ ครหิโย;

อถ โก นาม โส ธมฺโม, เยน กุทฺโธ ปสํสิโย;

ปญฺหา เมสา กุสเลหิ จินฺติตา.

ตุฏฺโฐ อาราธโก โหติ, ตุฏฺโฐ โหติ ครหิโย;

อถ โก นาม โส ธมฺโม, เยน ตุฏฺโฐ ครหิโย;

ปญฺหา เมสา กุสเลหิ จินฺติตา.

สงฺฆาทิเสสํ ถุลฺลจฺจยํ;

ปาจิตฺติยํ ปาฏิเทสนียํ;

ทุกฺกฏํ อาปชฺเชยฺย เอกโต;

ปญฺหา เมสา กุสเลหิ จินฺติตา.

อุโภ ปริปุณฺณวีสติวสฺสา;

อุภินฺนํ เอกุปชฺฌาโย;

เอกาจริโย เอกา กมฺมวาจา;

เอโก อุปสมฺปนฺโน เอโก อนุปสมฺปนฺโน;

ปญฺหา เมสา กุสเลหิ จินฺติตา.

อกปฺปกตํ นาปิ รชนาย รตฺตํ;

เตน นิวตฺโถ เยน กามํ วเชยฺย;

น จสฺส โหติ อาปตฺติ;

โส จ ธมฺโม สุคเตน เทสิโต;

ปญฺหา เมสา กุสเลหิ จินฺติตา.

น เทติ น ปฏิคฺคณฺหาติ, ปฏิคฺคโห เตน น วิชฺชติ;

อาปชฺชติ ครุกํ น ลหุกํ, ตญฺจ ปริโภคปจฺจยา;

ปญฺหา เมสา กุสเลหิ จินฺติตา.

น เทติ น ปฏิคฺคณฺหาติ, ปฏิคฺคโห เตน น วิชฺชติ;

อาปชฺชติ ลหุกํ น ครุกํ, ตญฺจ ปริโภคปจฺจยา;

ปญฺหา เมสา กุสเลหิ จินฺติตา.

อาปชฺชติ ครุกํ สาวเสสํ;

ฉาเทติ อนาทริยํ ปฏิจฺจ;

น ภิกฺขุนี โน จ ผุเสยฺย วชฺชํ;

ปญฺหา เมสา กุสเลหิ จินฺติตา.

เสทโมจนคาถา นิฏฺฐิตา.