๑. อวิปฺปวาสปญฺหา

๔๗๙. อสํวาโส ภิกฺขูหิ จ ภิกฺขุนีหิ จ;

สมฺโภโค เอกจฺโจ ตหึ น ลพฺภติ;

อวิปฺปวาเสน อนาปตฺติ;

ปญฺหา เมสา กุสเลหิ จินฺติตา.

อวิสฺสชฺชิยํ อเวภงฺคิยํ;

ปญฺจ วุตฺตา มเหสินา;

วิสฺสชฺชนฺตสฺส ปริภุญฺชนฺตสฺส อนาปตฺติ;

ปญฺหา เมสา กุสเลหิ จินฺติตา.

ทส ปุคฺคเล น วทามิ, เอกาทส วิวชฺชิย;

วุฑฺฒํ วนฺทนฺตสฺส อาปตฺติ, ปญฺหา เมสา กุสเลหิ จินฺติตา.

น อุกฺขิตฺตโก น จ ปน ปาริวาสิโก;

น สงฺฆภินฺโน น จ ปน ปกฺขสงฺกนฺโต;

สมานสํวาสกภูมิยา ฐิโต;

กถํ นุ สิกฺขาย อสาธารโณ สิยา;

ปญฺหา เมสา กุสเลหิ จินฺติตา.

อุเปติ ธมฺมํ ปริปุจฺฉมาโน, กุสลํ อตฺถูปสญฺหิตํ;

น ชีวติ น มโต น นิพฺพุโต, ตํ ปุคฺคลํ กตมํ วทนฺติ พุทฺธา;

ปญฺหา เมสา กุสเลหิ จินฺติตา.

อุพฺภกฺขเก น วทามิ, อโธ นาภึ วิวชฺชิย;

เมถุนธมฺมปจฺจยา, กถํ ปาราชิโก สิยา;

ปญฺหา เมสา กุสเลหิ จินฺติตา.

ภิกฺขุ สญฺญาจิกาย กุฏึ กโรติ;

อเทสิตวตฺถุกํ ปมาณาติกฺกนฺตํ;

สารมฺภํ อปริกฺกมนํ อนาปตฺติ;

ปญฺหา เมสา กุสเลหิ จินฺติตา.

ภิกฺขุ สญฺญาจิกาย กุฏึ กโรติ;

เทสิตวตฺถุกํ ปมาณิกํ;

อนารมฺภํ สปริกฺกมนํ อาปตฺติ;

ปญฺหา เมสา กุสเลหิ จินฺติตา.

น กายิกํ กิญฺจิ ปโยคมาจเร;

น จาปิ วาจาย ปเร ภเณยฺย;

อาปชฺเชยฺย ครุกํ เฉชฺชวตฺถุํ;

ปญฺหา เมสา กุสเลหิ จินฺติตา.

น กายิกํ วาจสิกญฺจ กิญฺจิ;

มนสาปิ สนฺโต น กเรยฺย ปาปํ;

โส นาสิโต กินฺติ สุนาสิโต ภเว;

ปญฺหา เมสา กุสเลหิ จินฺติตา.

อนาลปนฺโต มนุเชน เกนจิ;

วาจาคิรํ โน จ ปเร ภเณยฺย;

อาปชฺเชยฺย วาจสิกํ น กายิกํ;

ปญฺหา เมสา กุสเลหิ จินฺติตา.

สิกฺขาปทา พุทฺธวเรน วณฺณิตา;

สงฺฆาทิเสสา จตุโร ภเวยฺยุํ;

อาปชฺเชยฺย เอกปโยเคน สพฺเพ;

ปญฺหา เมสา กุสเลหิ จินฺติตา.

อุโภ เอกโต อุปสมฺปนฺนา;

อุภินฺนํ หตฺถโต จีวรํ ปฏิคฺคเณฺหยฺย;

สิยา อาปตฺติโย นานา;

ปญฺหา เมสา กุสเลหิ จินฺติตา.

จตุโร ชนา สํวิธาย;

ครุภณฺฑํ อวาหรุํ;

ตโย ปาราชิกา เอโก น ปาราชิโก;

ปญฺหา เมสา กุสเลหิ จินฺติตา.