๕. โสฬสกมฺมาทิ

๔๗๘. กติ กมฺมานิ วุตฺตานิ, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

โสฬส กมฺมานิ วุตฺตานิ, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ กมฺมโทสา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

ทฺวาทส กมฺมโทสา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ กมฺมสมฺปตฺติโย วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

จตสฺโส กมฺมสมฺปตฺติโย วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ กมฺมานิ วุตฺตานิ, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

ฉ กมฺมานิ วุตฺตานิ, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ กมฺมานิ วุตฺตานิ, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

จตฺตาริ กมฺมานิ วุตฺตานิ, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ ปาราชิกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

อฏฺฐ ปาราชิกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ สงฺฆาทิเสสา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

เตวีส สงฺฆาทิเสสา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ อนิยตา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

เทฺว อนิยตา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ นิสฺสคฺคิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

เทฺวจตฺตาลีส นิสฺสคฺคิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ ปาจิตฺติยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

อฏฺฐาสีติสตํ ปาจิตฺติยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ ปาฏิเทสนียา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

ทฺวาทส ปาฏิเทสนียา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ เสขิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

ปญฺจสตฺตติ เสขิยา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

ยาว สุปุจฺฉิตํ ตยา, ยาว สุวิสฺสชฺชิตํ มยา;

ปุจฺฉาวิสฺสชฺชนาย วา, นตฺถิ กิญฺจิ อสุตฺตกนฺติ.

ทุติยคาถาสงฺคณิกํ นิฏฺฐิตํ.