ทุติยคาถาสงฺคณิกํ

๑. กายิกาทิอาปตฺติ

๔๗๔. กติ อาปตฺติโย กายิกา, กติ วาจสิกา กตา.

ฉาเทนฺตสฺส กติ อาปตฺติโย, กติ สํสคฺคปจฺจยา.

ฉาปตฺติโย กายิกา, ฉ วาจสิกา กตา;

ฉาเทนฺตสฺส ติสฺโส อาปตฺติโย, ปญฺจ สํสคฺคปจฺจยา.

อรุณุคฺเค กติ อาปตฺติโย, กติ ยาวตติยกา;

กเตตฺถ อฏฺฐ วตฺถุกา, กติหิ สพฺพสงฺคโห.

อรุณุคฺเค ติสฺโส อาปตฺติโย, เทฺว ยาวตติยกา;

เอเกตฺถ อฏฺฐ วตฺถุกา, เอเกน สพฺพสงฺคโห.

วินยสฺส กติ มูลานิ, ยานิ พุทฺเธน ปญฺญตฺตา;

วินยครุกา กติ วุตฺตา, ทุฏฺฐุลฺลจฺฉาทนา กติ.

วินยสฺส เทฺว มูลานิ, ยานิ พุทฺเธน ปญฺญตฺตา;

วินยครุกา เทฺว วุตฺตา, เทฺว ทุฏฺฐุลฺลจฺฉาทนา.

คามนฺตเร กติ อาปตฺติโย, กติ นทิปารปจฺจยา;

กติมํเสสุ ถุลฺลจฺจยํ, กติมํเสสุ ทุกฺกฏํ.

คามนฺตเร จตสฺโส อาปตฺติโย, จตสฺโส นทิปารปจฺจยา;

เอกมํเส ถุลฺลจฺจยํ, นวมํเสสุ ทุกฺกฏํ.

กติ วาจสิกา รตฺตึ, กติ วาจสิกา ทิวา;

ททมานสฺส กติ อาปตฺติโย, ปฏิคฺคณฺหนฺตสฺส กิตฺตกา.

เทฺว วาจสิกา รตฺตึ, เทฺว วาจสิกา ทิวา;

ททมานสฺส ติสฺโส อาปตฺติโย, จตฺตาโร จ ปฏิคฺคเห.

๒. เทสนาคามินิยาทิอาปตฺติ

๔๗๕. กติ เทสนาคามินิโย, กติ สปฺปฏิกมฺมา กตา;

กเตตฺถ อปฺปฏิกมฺมา วุตฺตา, พุทฺเธนาทิจฺจพนฺธุนา.

ปญฺจ เทสนาคามินิโย, ฉ สปฺปฏิกมฺมา กตา;

เอเกตฺถ อปฺปฏิกมฺมา วุตฺตา, พุทฺเธนาทิจฺจพนฺธุนา.

วินยครุกา กติ วุตฺตา, กายวาจสิกานิ จ;

กติ วิกาเล ธญฺญรโส, กติ ญตฺติจตุตฺเถน สมฺมุติ.

วินยครุกา เทฺว วุตฺตา, กายวาจสิกานิ จ;

เอโก วิกาเล ธญฺญรโส, เอกา ญตฺติจตุตฺเถน สมฺมุติ.

ปาราชิกา กายิกา กติ, กติ สํวาสกภูมิโย;

กตินํ รตฺติจฺเฉโท, ปญฺญตฺตา ทฺวงฺคุลา กติ.

ปาราชิกา กายิกา เทฺว, เทฺว สํวาสกภูมิโย;

ทฺวินฺนํ รตฺติจฺเฉโท, ปญฺญตฺตา ทฺวงฺคุลา ทุเว.

กตตฺตานํ วธิตฺวาน, กติหิ สงฺโฆ ภิชฺชติ;

กเตตฺถ ปฐมาปตฺติกา, ญตฺติยา กรณา กติ.

เทฺว อตฺตานํ วธิตฺวาน, ทฺวีหิ สงฺโฆ ภิชฺชติ;

เทฺวตฺถ ปฐมาปตฺติกา, ญตฺติยา กรณา ทุเว.

ปาณาติปาเต กติ อาปตฺติโย, วาจา ปาราชิกา กติ;

โอภาสนา กติ วุตฺตา, สญฺจริตฺเตน วา กติ.

ปาณาติปาเต ติสฺโส อาปตฺติโย;

วาจา ปาราชิกา ตโย;

โอภาสนา ตโย วุตฺตา;

สญฺจริตฺเตน วา ตโย.

กติ ปุคฺคลา น อุปสมฺปาเทตพฺพา, กติ กมฺมานํ สงฺคหา;

นาสิตกา กติ วุตฺตา, กตินํ เอกวาจิกา.

ตโย ปุคฺคลา น อุปสมฺปาเทตพฺพา, ตโย กมฺมานํ สงฺคหา;

นาสิตกา ตโย วุตฺตา, ติณฺณนฺนํ เอกวาจิกา.

อทินฺนาทาเน กติ อาปตฺติโย, กติ เมถุนปจฺจยา;

ฉินฺทนฺตสฺส กติ อาปตฺติโย, กติ ฉฑฺฑิตปจฺจยา.

อทินฺนาทาเน ติสฺโส อาปตฺติโย, จตสฺโส เมถุนปจฺจยา;

ฉินฺทนฺตสฺส ติสฺโส อาปตฺติโย, ปญฺจ ฉฑฺฑิตปจฺจยา.

ภิกฺขุโนวาทกวคฺคสฺมึ, ปาจิตฺติเยน ทุกฺกฏา;

กเตตฺถ นวกา วุตฺตา, กตินํ จีวเรน จ.

ภิกฺขุโนวาทกวคฺคสฺมึ, ปาจิตฺติเยน ทุกฺกฏา กตา;

จตุเรตฺถ นวกา วุตฺตา, ทฺวินฺนํ จีวเรน จ.

ภิกฺขุนีนญฺจ อกฺขาตา, ปาฏิเทสนิยา กติ;

ภุญฺชนฺตามกธญฺเญน, ปาจิตฺติเยน ทุกฺกฏา กติ.

ภิกฺขุนีนญฺจ อกฺขาตา, อฏฺฐ ปาฏิเทสนียา กตา;

ภุญฺชนฺตามกธญฺเญน, ปาจิตฺติเยน ทุกฺกฏา กตา.

คจฺฉนฺตสฺส กติ อาปตฺติโย, ฐิตสฺส จาปิ กิตฺตกา;

นิสินฺนสฺส กติ อาปตฺติโย, นิปนฺนสฺสาปิ กิตฺตกา.

คจฺฉนฺตสฺส จตสฺโส อาปตฺติโย, ฐิตสฺส จาปิ ตตฺตกา;

นิสินฺนสฺส จตสฺโส อาปตฺติโย, นิปนฺนสฺสาปิ ตตฺตกา.

๓. ปาจิตฺติยํ

๔๗๖. กติ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโต.

ปญฺจ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโต.