๔. อวนฺทนียปุคฺคลาทิ

๔๗๗. กติ ปุคฺคลา นาภิวาเทตพฺพา, อญฺชลิสามิเจน จ;

กตินํ ทุกฺกฏํ โหติ, กติ จีวรธารณา.

ทส ปุคฺคลา นาภิวาเทตพฺพา, อญฺชลิสามิเจน จ;

ทสนฺนํ ทุกฺกฏํ โหติ, ทส จีวรธารณา.

กตินํ วสฺสํวุฏฺฐานํ, ทาตพฺพํ อิธ จีวรํ;

กตินํ ภนฺเต ทาตพฺพํ, กตินญฺเจว น ทาตพฺพํ.

ปญฺจนฺนํ วสฺสํวุฏฺฐานํ, ทาตพฺพํ อิธ จีวรํ;

สตฺตนฺนํ สนฺเต ทาตพฺพํ, โสฬสนฺนํ น ทาตพฺพํ.

กติสตํ รตฺติสตํ, อาปตฺติโย ฉาทยิตฺวาน;

กติ รตฺติโย วสิตฺวาน, มุจฺเจยฺย ปาริวาสิโก.

ทสสตํ รตฺติสตํ, อาปตฺติโย ฉาทยิตฺวาน;

ทส รตฺติโย วสิตฺวาน, มุจฺเจยฺย ปาริวาสิโก.

กติ กมฺมโทสา วุตฺตา, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, สพฺเพว อธมฺมิกา [สพฺเพ อธมฺมิกา (สี. สฺยา.)] กติ.

ทฺวาทส กมฺมโทสา วุตฺตา, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, สพฺเพว อธมฺมิกา [สพฺเพวาธมฺมิกา (สี.), สพฺเพ อธมฺมิกา (สฺยา.)] กตา.

กติ กมฺมสมฺปตฺติโย วุตฺตา, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, สพฺเพว ธมฺมิกา กติ.

จตสฺโส กมฺมสมฺปตฺติโย วุตฺตา, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, สพฺเพว ธมฺมิกา กตา.

กติ กมฺมานิ วุตฺตานิ, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, ธมฺมิกา อธมฺมิกา กติ.

ฉ กมฺมานิ วุตฺตานิ, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, เอเกตฺถ ธมฺมิกา กตา;

ปญฺจ อธมฺมิกา วุตฺตา, พุทฺเธนาทิจฺจพนฺธุนา.

กติ กมฺมานิ วุตฺตานิ, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, ธมฺมิกา อธมฺมิกา กติ.

จตฺตาริ กมฺมานิ วุตฺตานิ, พุทฺเธนาทิจฺจพนฺธุนา;

จมฺปายํ วินยวตฺถุสฺมึ, เอเกตฺถ ธมฺมิกา กตา;

ตโย อธมฺมิกา วุตฺตา, พุทฺเธนาทิจฺจพนฺธุนา.

ยํ เทสิตํนนฺตชิเนน ตาทินา;

อาปตฺติกฺขนฺธานิ วิเวกทสฺสินา;

กเตตฺถ สมฺมนฺติ วินา สมเถหิ;

ปุจฺฉามิ ตํ พฺรูหิ วิภงฺคโกวิท.

ยํ เทสิตํนนฺตชิเนน ตาทินา;

อาปตฺติกฺขนฺธานิ วิเวกทสฺสินา;

เอเกตฺถ สมฺมติ วินา สมเถหิ;

เอตํ เต อกฺขามิ วิภงฺคโกวิท.

กติ อาปายิกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ [วิสยานิ (สี. สฺยา. เอวมุปริปิ)] สุโณม เต.

ฉอูนทิยฑฺฒสตา วุตฺตา, พุทฺเธนาทิจฺจพนฺธุนา;

อาปายิกา เนรยิกา, กปฺปฏฺฐา สงฺฆเภทกา;

วินยํ ปฏิชานนฺตสฺส, วินยานิ สุโณหิ เม.

กติ นาปายิกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

อฏฺฐารส นาปายิกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.

กติ อฏฺฐกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณม เต.

อฏฺฐารส อฏฺฐกา วุตฺตา, พุทฺเธนาทิจฺจพนฺธุนา;

วินยํ ปฏิชานนฺตสฺส, วินยานิ สุโณหิ เม.