๓. ปาจิตฺติยํ

๔๗๖. กติ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโต.

ปญฺจ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโต.

กติ ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโต.

น ปาจิตฺติยานิ, สพฺพานิ นานาวตฺถุกานิ;

อปุพฺพํ อจริมํ, อาปชฺเชยฺย เอกโต.

กติ ปาจิตฺติยานิ, สพฺพานิ นานาวตฺถุกานิ;

กติ วาจาย เทเสยฺย, วุตฺตา อาทิจฺจพนฺธุนา.

ปญฺจ ปาจิตฺติยานิ, สพฺพานิ นานาวตฺถุกานิ;

เอกวาจาย เทเสยฺย, วุตฺตา อาทิจฺจพนฺธุนา.

กติ ปาจิตฺติยานิ, สพฺพานิ นานาวตฺถุกานิ;

กติ วาจาย เทเสยฺย, วุตฺตา อาทิจฺจพนฺธุนา.

นว ปาจิตฺติยานิ, สพฺพานิ นานาวตฺถุกานิ;

เอกวาจาย เทเสยฺย, วุตฺตา อาทิจฺจพนฺธุนา.

กติ ปาจิตฺติยานิ, สพฺพานิ นานาวตฺถุกานิ;

กิญฺจ กิตฺเตตฺวา เทเสยฺย, วุตฺตา อาทิจฺจพนฺธุนา.

ปญฺจ ปาจิตฺติยานิ, สพฺพานิ นานาวตฺถุกานิ;

วตฺถุํ กิตฺเตตฺวา เทเสยฺย, วุตฺตา อาทิจฺจพนฺธุนา.

กติ ปาจิตฺติยานิ, สพฺพานิ นานาวตฺถุกานิ;

กิญฺจ กิตฺเตตฺวา เทเสยฺย, วุตฺตา อาทิจฺจพนฺธุนา.

นว ปาจิตฺติยานิ, สพฺพานิ นานาวตฺถุกานิ;

วตฺถุํ กิตฺเตตฺวา เทเสยฺย, วุตฺตา อาทิจฺจพนฺธุนา.

ยาวตติยเก กติ อาปตฺติโย, กติ โวหารปจฺจยา;

ขาทนฺตสฺส กติ อาปตฺติโย, กติ โภชนปจฺจยา.

ยาวตติยเก ติสฺโส อาปตฺติโย, ฉ โวหารปจฺจยา;

ขาทนฺตสฺส ติสฺโส อาปตฺติโย, ปญฺจ โภชนปจฺจยา.

สพฺพา ยาวตติยกา, กติ ฐานานิ คจฺฉนฺติ;

กตินญฺเจว อาปตฺติ, กตินํ อธิกรเณน จ.

สพฺพา ยาวตติยกา, ปญฺจ ฐานานิ คจฺฉนฺติ;

ปญฺจนฺนญฺเจว อาปตฺติ, ปญฺจนฺนํ อธิกรเณน จ.

กตินํ วินิจฺฉโย โหติ, กตินํ วูปสเมน จ;

กตินญฺเจว อนาปตฺติ, กติหิ ฐาเนหิ โสภติ.

ปญฺจนฺนํ วินิจฺฉโย โหติ, ปญฺจนฺนํ วูปสเมน จ;

ปญฺจนฺนญฺเจว อนาปตฺติ, ตีหิ ฐาเนหิ โสภติ.

กติ กายิกา รตฺตึ, กติ กายิกา ทิวา;

นิชฺฌายนฺตสฺส กติ อาปตฺติ, กติ ปิณฺฑปาตปจฺจยา.

เทฺว กายิกา รตฺตึ, เทฺว กายิกา ทิวา;

นิชฺฌายนฺตสฺส เอกา อาปตฺติ, เอกา ปิณฺฑปาตปจฺจยา.

กตานิสํเส สมฺปสฺสํ, ปเรสํ สทฺธาย เทสเย;

อุกฺขิตฺตกา กติ วุตฺตา, กติ สมฺมาวตฺตนา.

อฏฺฐานิสํเส สมฺปสฺสํ, ปเรสํ สทฺธาย เทสเย;

อุกฺขิตฺตกา ตโย วุตฺตา, เตจตฺตาลีส สมฺมาวตฺตนา.

กติ ฐาเน มุสาวาโท, กติ ปรมนฺติ วุจฺจติ;

กติ ปาฏิเทสนียา, กตินํ เทสนาย จ.

ปญฺจ ฐาเน มุสาวาโท, จุทฺทส ปรมนฺติ วุจฺจติ;

ทฺวาทส ปาฏิเทสนียา, จตุนฺนํ เทสนาย จ.

กตงฺคิโก มุสาวาโท, กติ อุโปสถงฺคานิ;

กติ ทูเตยฺยงฺคานิ, กติ ติตฺถิยวตฺตนา.

อฏฺฐงฺคิโก มุสาวาโท, อฏฺฐ อุโปสถงฺคานิ;

อฏฺฐ ทูเตยฺยงฺคานิ, อฏฺฐ ติตฺถิยวตฺตนา.

กติวาจิกา อุปสมฺปทา, กตินํ ปจฺจุฏฺฐาตพฺพํ;

กตินํ อาสนํ ทาตพฺพํ, ภิกฺขุโนวาทโก กติหิ.

อฏฺฐวาจิกา อุปสมฺปทา, อฏฺฐนฺนํ ปจฺจุฏฺฐาตพฺพํ;

อฏฺฐนฺนํ อาสนํ ทาตพฺพํ, ภิกฺขุโนวาทโก อฏฺฐหิ.

กตินํ เฉชฺชํ โหติ, กตินํ ถุลฺลจฺจยํ;

กตินญฺเจว อนาปตฺติ, สพฺเพสํ เอกวตฺถุกา.

เอกสฺส เฉชฺชํ โหติ, จตุนฺนํ ถุลฺลจฺจยํ;

จตุนฺนญฺเจว อนาปตฺติ, สพฺเพสํ เอกวตฺถุกา.

กติ อาฆาตวตฺถูนิ, กติหิ สงฺโฆ ภิชฺชติ;

กเตตฺถ ปฐมาปตฺติกา, ญตฺติยา กรณา กติ.

นว อาฆาตวตฺถูนิ, นวหิ สงฺโฆ ภิชฺชติ;

นเวตฺถ ปฐมาปตฺติกา, ญตฺติยา กรณา นว.