๒๓๐. สงฺเฆ ภินฺเน จีวรุปฺปาทกถา

๓๗๖. อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติ. ตตฺถ มนุสฺสา เอกสฺมึ ปกฺเข อุทกํ เทนฺติ, เอกสฺมึ ปกฺเข จีวรํ เทนฺติ – สงฺฆสฺส เทมาติ. สงฺฆสฺเสเวตํ.

อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติ. ตตฺถ มนุสฺสา เอกสฺมึ ปกฺเข อุทกํ เทนฺติ, ตสฺมึเยว ปกฺเข จีวรํ เทนฺติ – สงฺฆสฺส เทมาติ. สงฺฆสฺเสเวตํ.

อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติ. ตตฺถ มนุสฺสา เอกสฺมึ ปกฺเข อุทกํ เทนฺติ, เอกสฺมึ ปกฺเข จีวรํ เทนฺติ – ปกฺขสฺส เทมาติ. ปกฺขสฺเสเวตํ.

อิธ ปน, ภิกฺขเว, วสฺสํวุฏฺฐานํ ภิกฺขูนํ อนุปฺปนฺเน จีวเร สงฺโฆ ภิชฺชติ. ตตฺถ มนุสฺสา เอกสฺมึ ปกฺเข อุทกํ เทนฺติ, ตสฺมึเยว ปกฺเข จีวรํ เทนฺติ – ปกฺขสฺส เทมาติ. ปกฺขสฺเสเวตํ.

อิธ ปน, ภิกฺขเว, วสฺสํวุฏฺฐานํ ภิกฺขูนํ อุปฺปนฺเน จีวเร อภาชิเต สงฺโฆ ภิชฺชติ. สพฺเพสํ สมกํ ภาเชตพฺพนฺติ.

สงฺเฆ ภินฺเน จีวรุปฺปาทกถา นิฏฺฐิตา.