๒๓๑. ทุคฺคหิตสุคฺคหิตาทิกถา

๓๗๗. เตน โข ปน สมเยน อายสฺมา เรวโต อญฺญตรสฺส ภิกฺขุโน หตฺเถ อายสฺมโต สาริปุตฺตสฺส จีวรํ ปาเหสิ – ‘‘อิมํ จีวรํ เถรสฺส เทหี’’ติ. อถ โข โส ภิกฺขุ อนฺตรามคฺเค อายสฺมโต เรวตสฺส วิสฺสาสา ตํ จีวรํ อคฺคเหสิ. อถ โข อายสฺมา เรวโต อายสฺมตา สาริปุตฺเตน สมาคนฺตฺวา ปุจฺฉิ – ‘‘อหํ, ภนฺเต, เถรสฺส จีวรํ ปาเหสึ. สมฺปตฺตํ ตํ จีวร’’นฺติ? ‘‘นาหํ ตํ, อาวุโส, จีวรํ ปสฺสามี’’ติ. อถ โข อายสฺมา เรวโต ตํ ภิกฺขุํ เอตทโวจ – ‘‘อหํ, อาวุโส, อายสฺมโต หตฺเถ เถรสฺส จีวรํ ปาเหสึ. กหํ ตํ จีวร’’นฺติ? ‘‘อหํ, ภนฺเต, อายสฺมโต วิสฺสาสา ตํ จีวรํ อคฺคเหสิ’’นฺติ. ภควโต เอตมตฺถํ อาโรเจสุํ.

๓๗๘. อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติ. โส อนฺตรามคฺเค โย ปหิณติ ตสฺส วิสฺสาสา คณฺหาติ. สุคฺคหิตํ. ยสฺส ปหิยฺยติ ตสฺส วิสฺสาสา คณฺหาติ. ทุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติ. โส อนฺตรามคฺเค ยสฺส ปหิยฺยติ ตสฺส วิสฺสาสา คณฺหาติ. ทุคฺคหิตํ. โย ปหิณติ ตสฺส วิสฺสาสา คณฺหาติ. สุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติ. โส อนฺตรามคฺเค สุณาติ – โย ปหิณติ โส กาลงฺกโตติ. ตสฺส มตกจีวรํ อธิฏฺฐาติ. สฺวาธิฏฺฐิตํ. ยสฺส ปหิยฺยติ ตสฺส วิสฺสาสา คณฺหาติ. ทุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติ. โส อนฺตรามคฺเค สุณาติ – ยสฺส ปหิยฺยติ โส กาลงฺกโตติ. ตสฺส มตกจีวรํ อธิฏฺฐาติ. ทฺวาธิฏฺฐิตํ. โย ปหิณติ ตสฺส วิสฺสาสา คณฺหาติ. สุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส เทหี’’ติ. โส อนฺตรามคฺเค สุณาติ – อุโภ กาลงฺกตาติ. โย ปหิณติ ตสฺส มตกจีวรํ อธิฏฺฐาติ. สฺวาธิฏฺฐิตํ. ยสฺส ปหิยฺยติ ตสฺส มตกจีวรํ อธิฏฺฐาติ. ทฺวาธิฏฺฐิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติ. โส อนฺตรามคฺเค โย ปหิณติ ตสฺส วิสฺสาสา คณฺหาติ. ทุคฺคหิตํ. ยสฺส ปหิยฺยติ ตสฺส วิสฺสาสา คณฺหาติ. สุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติ. โส อนฺตรามคฺเค ยสฺส ปหิยฺยติ ตสฺส วิสฺสาสา คณฺหาติ. สุคฺคหิตํ. โย ปหิณติ ตสฺส วิสฺสาสา คณฺหาติ. ทุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติ. โส อนฺตรามคฺเค สุณาติ – ‘‘โย ปหิณติ โส กาลงฺกโต’’ติ. ตสฺส มตกจีวรํ อธิฏฺฐาติ. ทฺวาธิฏฺฐิตํ. ยสฺส ปหิยฺยติ ตสฺส วิสฺสาสา คณฺหาติ. สุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติ. โส อนฺตรามคฺเค สุณาติ – ‘‘ยสฺส ปหิยฺยติ โส กาลงฺกโต’’ติ. ตสฺส มตกจีวรํ อธิฏฺฐาติ. สฺวาธิฏฺฐิตํ. โย ปหิณติ ตสฺส วิสฺสาสา คณฺหาติ. ทุคฺคหิตํ.

อิธ ปน, ภิกฺขเว, ภิกฺขุ ภิกฺขุสฺส หตฺเถ จีวรํ ปหิณติ – ‘‘อิมํ จีวรํ อิตฺถนฺนามสฺส ทมฺมี’’ติ. โส อนฺตรามคฺเค สุณาติ ‘‘อุโภ กาลงฺกตา’’ติ. โย ปหิณติ ตสฺส มตกจีวรํ อธิฏฺฐาติ. ทฺวาธิฏฺฐิตํ. ยสฺส ปหิยฺยติ ตสฺส มตกจีวรํ อธิฏฺฐาติ. สฺวาธิฏฺฐิตํ.

ทุคฺคหิตสุคฺคหิตาทิกถา นิฏฺฐิตา.