สาสนปฏฺฐานวณฺณนา

อิทํ ปน สุตฺตํ โสฬสวิเธ สาสนปฏฺฐาเน สํกิเลสวาสนาเสกฺขภาคิยํ ตณฺหาทิฏฺฐาทิสํกิเลสานํ สีลาทิปุญฺญกิริยสฺส, อเสกฺขสีลาทิกฺขนฺธสฺส จ วิภตฺตตฺตา, สํกิเลสวาสนานิพฺเพธาเสกฺขภาคิยเมว วา ยถาวุตฺตตฺถานํ เสกฺขสีลกฺขนฺธาทิกสฺส จ วิภตฺตตฺตา. อฏฺฐวีสติวิเธ ปน สาสนปฏฺฐาเน โลกิยโลกุตฺตรํ สตฺตธมฺมาธิฏฺฐานํ ญาณเญยฺยํ ทสฺสนภาวนํ สกวจนปรวจนํ วิสฺสชฺชนียาวิสฺสชฺชนียํ กมฺมวิปากํ กุสลากุสลํ อนุญฺญาตปฏิกฺขิตฺตํ ภโว จ โลกิยโลกุตฺตราทีนมตฺถานํ อิธ วิภตฺตตฺตาติ. อยํ สาสนปฏฺฐานโยชนา.

ปกรณนยวณฺณนา นิฏฺฐิตา.

อิติ สุมงฺคลวิลาสินิยา ทีฆนิกายฏฺฐกถาย ปรมสุขุมคมฺภีรทุรนุโพธตฺถปริทีปนาย สุวิมลวิปุลปญฺญาเวยฺยตฺติยชนนาย อชฺชวมทฺทวโสรจฺจสทฺธาสติธิติพุทฺธิขนฺติวีริยาทิธมฺมสมงฺคินา สาฏฺฐกเถ ปิฏกตฺตเย อสงฺคาสํหีรวิสารทญาณจารินา อเนกปฺปเภทสกสมยสมยนฺตรคหนชฺโฌคาหินา มหาคณินา มหาเวยฺยากรเณน ญาณาภิวํสธมฺมเสนาปตินามเถเรน มหาธมฺมราชาธิราชครุนา กตาย สาธุวิลาสินิยา นาม ลีนตฺถปกาสนิยา พฺรหฺมชาลสุตฺตวณฺณนาย ลีนตฺถวิภาวนา.

พฺรหฺมชาลสุตฺตวณฺณนา นิฏฺฐิตา.

ปฐโม ภาโค นิฏฺฐิโต.