๘. ทุพฺพณฺณกรณสิกฺขาปทวณฺณนา

๓๖๘. อฏฺฐเม ‘‘จมฺมการนีลํ นาม ปกตินีล’’นฺติ ตีสุปิ คณฺฐิปเทสุ วุตฺตํ. คณฺฐิปเท ปน ‘‘จมฺมการา อุทเก ติปุมลํ อยคูถญฺจ ปกฺขิปิตฺวา จมฺมํ กาฬํ กโรนฺติ, ตํ จมฺมการนีล’’นฺติ วุตฺตํ. เสสเมตฺถ อุตฺตานเมว. วุตฺตปฺปการสฺส จีวรสฺส อกตกปฺปตา, อนฏฺฐจีวราทิตา, นิวาสนํ วา ปารุปนํ วาติ อิมานิ ปเนตฺถ ตีณิ องฺคานิ.

ทุพฺพณฺณกรณสิกฺขาปทวณฺณนา นิฏฺฐิตา.