มหาวคฺโค

มหาขนฺธกกถา

ปพฺพชฺชากถา

๒๔๔๔. สีลกฺขนฺธาทิยุตฺเตน, สุภกฺขนฺเธน เทสิเต;

ขนฺธเกปิ ปวกฺขามิ, สมาเสน วินิจฺฉยํ.

๒๔๔๕. มาตรา อนนุญฺญาตํ, ปิตรา วาปิ ภิกฺขุโน;

ภณฺฑุกมฺมมปุจฺฉิตฺวา, ปพฺพาเชนฺตสฺส ทุกฺกฏํ.

๒๔๔๖. อุทฺเทสปริปุจฺฉาย, สยํ เจ พฺยาวโฏ สิยา;

ทหโร อาณาเปตพฺโพ, ปพฺพาเชตฺวานยาติ จ.

๒๔๔๗. อุปชฺฌายมถุทฺทิสฺส, อวุตฺโต ทหโร ปน;

ปพฺพาเชติ สเจ ตํ โส, สยเมวาปิ วฏฺฏติ.

๒๔๔๘. สามเณโรปิ วตฺตพฺโพ, ทหโร นตฺถิ ตตฺถ เจ;

‘‘ขณฺฑสีมมิมํ เนตฺวา, ปพฺพาเชตฺวานยา’’ติ จ.

๒๔๔๙. สรณานิ ปเนตสฺส, ทาตพฺพาเนว อตฺตนา;

เอวมฺปิ ภิกฺขุนาเยว, โหติ ปพฺพาชิโต นโร.

๒๔๕๐. ปุริสํ ภิกฺขุโต อญฺโญ, ปพฺพาเชติ น วฏฺฏติ;

อิตฺถึ ภิกฺขุนิโต อญฺโญ, ปพฺพาเชติ น วฏฺฏติ.

๒๔๕๑. สามเณโรปิ วา ทาตุํ, สามเณรีปิ วา ตถา;

อาณตฺติยา อุภินฺนมฺปิ, กาสายานิ ลภนฺติ เต.

๒๔๕๒. สยเมว จ ยํ กิญฺจิ, ปพฺพาเชนฺเตน ภิกฺขุนา;

เกสาปนยนํ กตฺวา, ปฐมํ อุทเก ปุน.

๒๔๕๓. นฺหาเปตพฺโพ สิยา สุฏฺฐุ, ฆํสิตฺวา โคมยาทินา;

สรีเร ปีฬกา วาปิ, กจฺฉุ วา ตสฺส โหนฺติ เจ.

๒๔๕๔. มาตา ยถา นิยํปุตฺตํ, น ชิคุจฺฉติ สพฺพโส;

นฺหาเปตพฺโพว ยตินา, ตเถว อชิคุจฺฉตา.

๒๔๕๕. กสฺมา? ปเนตฺตเกนาปิ, อุปกาเรน สาสเน;

โส สทา พลวเสฺนโห, โหตุปชฺฌายกาทิสุ.

๒๔๕๖. วิโนเทตฺวา ปนุปฺปนฺนํ, อุกฺกณฺฐํ กุลปุตฺตกา;

สิกฺขาโย ปริปูเรตฺวา, นิพฺพานํ ปาปุณนฺติ หิ.

๒๔๕๗. คนฺธจุณฺเณน วา ปจฺฉา, จุณฺเณนปิ หลิทฺทิยา;

สรีรํ ตสฺส สีสญฺจ, อุพฺพฏฺเฏตฺวา ปุนปฺปุนํ.

๒๔๕๘. คิหิคนฺธํ วิโนเทตฺวา, กาสายานิ ปเนกโต;

ทฺวตฺติกฺขตฺตุํ สกึ วาปิ, ทาตพฺพานิสฺส ภิกฺขุนา.

๒๔๕๙. อถ หตฺเถปิ วา ตสฺส, อทตฺวา สยเมว ตํ;

อจฺฉาเทติ อุปชฺฌาโย, วฏฺฏตาจริโยปิ วา.

๒๔๖๐. นิวาเสติ อนาณตฺโต, โส ปารุปติ วา สยํ;

อปเนตฺวา ตโต สพฺพํ, ปุน ทาตพฺพเมว ตํ.

๒๔๖๑. ภิกฺขุนา ตุ สหตฺเถน, ตถา อาณตฺติยาปิ วา;

ทินฺนํ วฏฺฏติ กาสาวํ, นาทินฺนํ ปน วฏฺฏติ.

๒๔๖๒. ตสฺเสว สนฺตกํ วาปิ, กา กถา อตฺตสนฺตเก;

วนฺทาเปตฺวา ตตฺถ ภิกฺขู, การาเปตฺวาน อุกฺกุฏึ.

๒๔๖๓. อญฺชลึ ปคฺคหาเปตฺวา, ทาตพฺพํ สรณตฺตยํ;

ปฏิปาฏิวเสเนว, น จ อุปฺปฏิปาฏิยา.

๒๔๖๔. สเจ เอกปทํ วาปิ, เทติ เอกกฺขรมฺปิ วา;

ปฏิปาฏึ วิรชฺฌิตฺวา, คหิตํ เจ น วฏฺฏติ.

๒๔๖๕. ติกฺขตฺตุํ ยทิ วา เทติ, พุทฺธํ สรณเมว วา;

ตถา เสเสสุ เจวมฺปิ, น ทินฺนาเนว โหนฺติ หิ.

๒๔๖๖. กตฺวานุนาสิกนฺตานิ, เอกาพทฺธานิ วา ปน;

วิจฺฉินฺทิตฺวาถ ม-นฺตานิ, ทาตพฺพานิ วิชานตา.

๒๔๖๗. อุปสมฺปทกมฺมํ ตุ, เอกโตสุทฺธิยา สิยา;

น โหติ ปน ปพฺพชฺชา, อุภโตสุทฺธิยา วินา.

๒๔๖๘. ตสฺมา อาจริเยนาปิ, ตถานฺเตวาสิเกนปิ;

พุ-ทฺธ-การาทโย วณฺณา, ฐานกรณสมฺปทํ.

๒๔๖๙. อหาเปนฺเตน วตฺตพฺพา, ปพฺพชฺชาคุณมิจฺฉตา;

เอกวณฺณวินาเสน, ปพฺพชฺชา หิ น รูหติ.

๒๔๗๐. ยทิ สิทฺธาปิ ปพฺพชฺชา, สรณาคมนโตว หิ;

ทาตพฺพา ทส สีลานิ, ปูรณตฺถาย ภิกฺขุนา.

ปพฺพชฺชากถา.

๒๔๗๑. อุปชฺฌายมถาจริยํ, นิสฺสาย วสตา ปน;

กตฺตพฺพาเนว วตฺตานิ, ปิยสีเลน ภิกฺขุนา.

๒๔๗๒. อาสนํ ปญฺญเปตพฺพํ, ทนฺตกฏฺฐํ มุโขทกํ;

ทาตพฺพํ ตสฺส กาเลน, สเจ ยาคุ ภวิสฺสติ.

๒๔๗๓. ยาคุ ตสฺสุปเนตพฺพา, สงฺฆโต กุลโตปิ วา;

ปตฺเต วตฺตญฺจ กาตพฺพํ, วตฺตํ คามปฺปเวสเน.

๒๔๗๔. จีวเร ยานิ วตฺตานิ, วุตฺตานิ หิ มเหสินา;

เสนาสเน ตถา ปาท-ปีฐกถลิกาทิสุ.

๒๔๗๕. เอวมาทีนิ วตฺตานิ, สพฺพานิ ปน โรคโต;

วุฏฺฐานาคมนนฺตานิ, สตฺตตึสสตํ สิยุํ.

๒๔๗๖. วตฺตเภเทน สพฺพตฺถ, ทุกฺกฏํ ตุ ปกาสิตํ;

อนาทรวเสเนว, อกโรนฺตสฺส ภิกฺขุโน.

อุปชฺฌายาจริยวตฺตกถา.

๒๔๗๗. อุปชฺฌายสฺส วตฺตานิ, ตถา สทฺธิวิหาริเก;

สตํ เตรส โหนฺเตว, ตถานฺเตวาสิเกปิ จ.

สทฺธิวิหาริกนฺเตวาสิกวตฺตกถา.

๒๔๗๘. ปกฺกนฺเต วาปิ วิพฺภนฺเต, ปกฺขสงฺกนฺตเก มเต;

อาณตฺติยา อุปชฺฌายา, ปสฺสมฺภติ จ นิสฺสโย.

๒๔๗๙. โหติ อาจริยมฺหาปิ, ฉธา นิสฺสยเภทนํ;

ปกฺกนฺเต วาปิ วิพฺภนฺเต, ปกฺขสงฺกนฺตเก มเต.

๒๔๘๐. อาณตฺติยํ อุภินฺนมฺปิ, ธุรนิกฺเขปเนปิ จ;

เอเกกสฺส อุภินฺนํ วา, นาลเย สติ ภิชฺชติ.

๒๔๘๑. อุปชฺฌายสโมธาน-คตสฺสาปิ จ ภิชฺชติ;

ทสฺสนํ สวนญฺจาติ, สโมธานํ ทฺวิธา มตํ.

๒๔๘๒. อทฺธิกสฺส คิลานสฺส, คิลานุปฏฺฐกสฺส จ;

ยาจิตสฺส น โทโสว, วสิตุํ นิสฺสยํ วินา.

๒๔๘๓. ชานตา อตฺตโน เจว, วเน ผาสุวิหารตํ;

สภาเค ทายเกสนฺเต, วสิตุมฺปิ จ วฏฺฏติ.

นิสฺสยปฏิปฺปสฺสมฺภนกถา.

๒๔๘๔. กุฏฺฐึ คณฺฑึ กิลาสิญฺจ, โสสิญฺจ อปมาริกํ;

ตถา ราชภฏํ โจรํ, ลิขิตํ การเภทกํ.

๒๔๘๕. กสาหตํ นรญฺเจว, ปุริสํ ลกฺขณาหตํ;

อิณายิกญฺจ ทาสญฺจ, ปพฺพาเชนฺตสฺส ทุกฺกฏํ.

๒๔๘๖. หตฺถจฺฉินฺนมฬจฺฉินฺนํ, ปาทจฺฉินฺนญฺจ ปุคฺคลํ;

กณฺณนาสงฺคุลิจฺฉินฺนํ, กณฺฑรจฺฉินฺนเมว จ.

๒๔๘๗. กาณํ กุณิญฺจ ขุชฺชญฺจ, วามนํ ผณหตฺถกํ;

ขญฺชํ ปกฺขหตญฺเจว, สีปทึ ปาปโรคินํ.

๒๔๘๘. ชราย ทุพฺพลํ อนฺธํ, พธิรญฺเจว มมฺมนํ;

ปีฐสปฺปึ ตถา มูคํ, ปพฺพาเชนฺตสฺส ทุกฺกฏํ.

๒๔๘๙. อติทีโฆติรสฺโส วา, อติกาโลปิ วา ตถา;

อจฺโจทาโตปิ วา มฏฺฐ-ตมฺพโลหนิทสฺสโน.

๒๔๙๐. อติถูโล อติกิสฺโส, มหาสีโสปิ วา ตถา;

อติขุทฺทกสีเสน, สหิเตน ยุตฺโตปิ วา.

๒๔๙๑. กุฏกุฏกสีโส วา, ตถา สิขรสีสโก;

เวฬุนาฬิสมาเนน, สีเสน จ ยุโต นโร.

๒๔๙๒. กปฺปสีโสปิ ปพฺภาร-สีโส วา วณสีสโก;

ตถา กณฺณิกเกโส วา, ถูลเกโสปิ วา ตถา.

๒๔๙๓. ปูตินิลฺโลมสีโส วา, ชาติปณฺฑรเกสโก;

ชาติยา ตมฺพเกโส วา, ตเถวาวฏฺฏสีสโก.

๒๔๙๔. สีสโลเมกพทฺเธหิ, ภมุเกหิ ยุโตปิ วา;

สมฺพทฺธภมุโก วาปิ, นิลฺโลมภมุโกปิ วา.

๒๔๙๕. มหนฺตขุทฺทเนตฺโต วา, ตถา วิสมโลจโน;

เกกโร วาปิ คมฺภีร-เนตฺโต วิสมจกฺกโล.

๒๔๙๖. ชตุมูสิกกณฺโณ วา, หตฺถิกณฺโณปิ วา ปน;

ฉิทฺทมตฺตกกณฺโณ วา, ตเถวาวิทฺธกณฺณโก.

๒๔๙๗. ตถา ฏงฺกิตกณฺโณ วา, ปูติกณฺโณปิ วา ปน;

โยนกาทิปฺปเภโทปิ, นายํ ปริสทูสโก.

๒๔๙๘. อติปิงฺคลเนตฺโต วา, ตถา นิปฺปขุมกฺขิ วา;

อสฺสุปคฺฆรเนตฺโต วา, ปกฺกปุปฺผิตโลจโน.

๒๔๙๙. ตเถว จ มหานาโส, อติขุทฺทกนาสิโก;

ตถา จิปิฏนาโส วา, นโร กุฏิลนาสิโก.

๒๕๐๐. นิจฺจวิสฺสวนาโส วา, โย วา ปน มหามุโข;

วงฺกภินฺนมุโข วาปิ, มหาโอฏฺโฐปิ วา ปน.

๒๕๐๑. ตถา ตนุกโอฏฺโฐ วา, วิปุลุตฺตรโอฏฺฐโก;

โอฏฺฐฉินฺโนปิ อุปฺปกฺก-มุโข เอฬมุโขปิ วา.

๒๕๐๒. สงฺขตุณฺโฑปิ ทุคฺคนฺธ-มุโข วา ปน ปุคฺคโล;

มหาทนฺโตปิ อจฺจนฺตํ, ตถา อสุรทนฺตโก.

๒๕๐๓. เหฏฺฐา อุปริโต วาปิ, พหินิกฺขนฺตทนฺตโก;

อทนฺโต ปูติทนฺโต วา, อติขุทฺทกทนฺตโก.

๒๕๐๔. ยสฺส ทนฺตนฺตเร ทนฺโต, กาฬกทนฺตสนฺนิโภ;

สุขุโมว ฐิโต, ตํ เจ, ปพฺพาเชตุมฺปิ วฏฺฏติ.

๒๕๐๕. โย มหาหนุโก โปโส;

ทีเฆน หนุนา ยุโต;

จิปิฏหนุโก วาปิ;

รสฺเสน หนุนา ยุโต.

๒๕๐๖. นิมฺมสฺสุทาฐิโก วาปิ, อติทีฆคโลปิ วา;

อติรสฺสคโลปิ วา, ภินฺนคณฺฐิคโลปิ วา.

๒๕๐๗. ตถา ภฏฺฐํสกูโฏ วา, ภินฺนปิฏฺฐิอุโรปิ วา;

สุทีฆรสฺสหตฺโถ วา, กจฺฉุกณฺฑุสมายุโต.

๒๕๐๘. มหานิสทมํโส วา, อุทฺธนคฺคุปมายุโต;

วาตณฺฑิโก มหาอูรุ, สงฺฆฏฺฏนกชาณุโก.

๒๕๐๙. ภินฺนชาณุ มหาชาณุ, ทีฆชงฺโฆ วิชงฺฆโก;

วิกโฏ วาปิ ปโณฺห วา, ตถา อุพฺพทฺธปิณฺฑิโก.

๒๕๑๐. ยฏฺฐิชงฺโฆ มหาชงฺโฆ, มหาปาโทปิ โย นโร;

ตถา ปิฏฺฐิกปาโท วา, มหาปณฺหิปิ วา ปน.

๒๕๑๑. วงฺกปาโท นโร โย วา, คณฺฐิกงฺคุลิโกปิ วา;

โย ปนนฺธนโข วาปิ, กาฬปูตินโขปิ จ.

๒๕๑๒. อิจฺเจวมาทิกํ กญฺจิ, นรํ ปริสทูสกํ;

ปพฺพาเชนฺตสฺส ภิกฺขุสฺส, โหติ อาปตฺติ ทุกฺกฏํ.

ปริสทูสกกถา.

๒๕๑๓. ‘‘สามเณรชฺช มา ขาท, มา ภุญฺช จ ปิวา’’ติ จ;

นิวาเรนฺตสฺส อาหารํ, โหติ อาปตฺติ ทุกฺกฏํ.