ปาฏิเทสนียกถา

๑๘๓๐. โย จนฺตรฆรํ ภิกฺขุ, ปวิฏฺฐาย ตุ หตฺถโต;

อญฺญาติกาย ยํ กิญฺจิ, ตสฺส ภิกฺขุนิยา ปน.

๑๘๓๑. สหตฺถา ปฏิคฺคเณฺหยฺย, ขาทนํ โภชนมฺปิ วา;

คหเณ ทุกฺกฏํ โภเค, ปาฏิเทสนิยํ สิยา.

๑๘๓๒. รถิกายปิ วา พฺยูเห, สนฺธิสิงฺฆาฏเกสุ วา;

หตฺถิสาลาทิเก ฐตฺวา, คณฺหโตปิ อยํ นโย.

๑๘๓๓. รถิกาย สเจ ฐตฺวา, เทติ ภิกฺขุนิ โภชนํ;

อาปตฺติ อนฺตราราเม, ฐตฺวา คณฺหาติ ภิกฺขุ เจ.

๑๘๓๔. เอตฺถนฺตรฆรํ ตสฺสา, ปวิฏฺฐาย หิ วากฺยโต;

ภิกฺขุสฺส จ ฐิตฏฺฐานํ, นปฺปมาณนฺติ วณฺณิตํ.

๑๘๓๕. ตสฺมา ภิกฺขุนิยา ฐตฺวา, อารามาทีสุ เทนฺติยา;

วีถิยาทีสุ เจ ฐตฺวา, น โทโส ปฏิคณฺหโต.

๑๘๓๖. ยามกาลิกสตฺตาห-กาลิกํ ยาวชีวิกํ;

อาหารตฺถาย คหเณ, อชฺโฌหาเร จ ทุกฺกฏํ.

๑๘๓๗. อามิเสน อสมฺภินฺน-รสํ สนฺธาย ภาสิตํ;

ปาฏิเทสนิยาปตฺติ, สมฺภินฺเนกรเส สิยา.

๑๘๓๘. เอกโตอุปสมฺปนฺน-หตฺถโต ปฏิคณฺหโต;

กาลิกานํ จตุนฺนมฺปิ, อาหารตฺถาย ทุกฺกฏํ.

๑๘๓๙. ญาติกายปิ อญฺญาติ-สญฺญิโน วิมติสฺส วา;

ทุกฺกฏํ ญาติสญฺญิสฺส, ตถา อญฺญาติกาย วา.

๑๘๔๐. ทาเปนฺติยา อนาปตฺติ, ททมานาย วา ปน;

นิกฺขิปิตฺวานฺตรารามา-ทีสุ ฐตฺวาปิ เทนฺติยา.

๑๘๔๑. คามโต นีหริตฺวา วา, เทติ เจ พหิ วฏฺฏติ;

‘‘ปจฺจเย สติ ภุญฺชา’’ติ, เทติ เจ กาลิกตฺตยํ.

๑๘๔๒. หตฺถโต สามเณรีนํ, สิกฺขมานาย วา ตถา;

อิทํ เอฬกโลเมน, สมุฏฺฐานํ สมํ มตํ.

ปฐมปาฏิเทสนียกถา.

๑๘๔๓. อวุตฺเต ‘‘อปสกฺกา’’ติ, เอเกนาปิ จ ภิกฺขุนา;

สเจชฺโฌหรณตฺถาย, อามิสํ ปฏิคณฺหติ.

๑๘๔๔. คหเณ ทุกฺกฏํ โภเค, ปาฏิเทสนิยํ สิยา;

เอกโตอุปสมฺปนฺนํ, น วาเรนฺตสฺส ทุกฺกฏํ.

๑๘๔๕. ตเถวานุปสมฺปนฺนา-ยุปสมฺปนฺนสญฺญิโน;

ตตฺถ เวมติกสฺสาปิ, โหติ อาปตฺติ ทุกฺกฏํ.

๑๘๔๖. อนาปตฺติตฺตโน ภตฺตํ, ปทาเปติ น เทติ เจ;

ตถา อญฺญสฺส ภตฺตํ วา, น ทาเปติ ปเทติ เจ.

๑๘๔๗. ยํ น ทินฺนํ ตํ ทาเปติ, น ทินฺนํ ยตฺถ วาปิ จ;

ตตฺถ ตมฺปิ จ สพฺเพสํ, สมํ ทาเปติ ภิกฺขุนี.

๑๘๔๘. โวสาสนฺตี ฐิตา สิกฺข-มานา วา สามเณริกา;

โภชนานิ จ ปญฺเจว, วินา, อุมฺมตฺตกาทิโน.

๑๘๔๙. กถิเนน สมุฏฺฐานํ, สมานนฺติ ปกาสิตํ;

กฺริยากฺริยมิทํ วุตฺตํ, ติจิตฺตญฺจ ติเวทนํ.

ทุติยปาฏิเทสนียกถา.

๑๘๕๐. เสกฺขนฺติ สมฺมเต ภิกฺขุ, ลทฺธสมฺมุติเก กุเล;

ฆรูปจาโรกฺกมนา, ปุพฺเพว อนิมนฺติโต.

๑๘๕๑. อคิลาโน คเหตฺวา เจ, ปริภุญฺเชยฺย อามิสํ;

คหเณ ทุกฺกฏํ โภเค, ปาฏิเทสนิยํ สิยา.

๑๘๕๒. ยามกาลิกสตฺตาห-กาลิเก ยาวชีวิเก;

คหเณ ปริโภเค จ, โหติ อาปตฺติ ทุกฺกฏํ.

๑๘๕๓. อเสกฺขสมฺมเต เสกฺข-สมฺมตนฺติ จ สญฺญิโน;

ตตฺถ เวมติกสฺสาปิ, ตเถว ปริทีปิตํ.

๑๘๕๔. อนาปตฺติ คิลานสฺส, คิลานสฺสาวเสสเก;

นิมนฺติตสฺส วา ภิกฺขา, อญฺเญสํ ตตฺถ ทียติ.

๑๘๕๕. ฆรโต นีหริตฺวา วา, เทนฺติ เจ ยตฺถ กตฺถจิ;

นิจฺจภตฺตาทิเก วาปิ, ตถา อุมฺมตฺตกาทิโน.

๑๘๕๖. อนาคเต หิ ภิกฺขุมฺหิ, ฆรโต ปฐมํ ปน;

นีหริตฺวา สเจ ทฺวาเร, สมฺปตฺเต เทนฺติ วฏฺฏติ.

๑๘๕๗. ภิกฺขุํ ปน จ ทิสฺวาว, นีหริตฺวาน เคหโต;

น วฏฺฏติ สเจ เทนฺติ, สมุฏฺฐาเนฬกูปมํ.

ตติยปาฏิเทสนียกถา.

๑๘๕๘. คหฏฺเฐนาคหฏฺเฐน, อิตฺถิยา ปุริเสน วา;

อารามํ อุปจารํ วา, ปวิสิตฺวา สเจ ปน.

๑๘๕๙. ‘‘อิตฺถนฺนามสฺส เต ภตฺตํ, ยาคุ วา อาหรียติ’’;

เอวมาโรจิตํ วุตฺตํ, ปฏิสํวิทิตนฺติ หิ.

๑๘๖๐. อาหรียตุ ตํ ปจฺฉา, ยถาโรจิตเมว วา;

ตสฺส วา ปริวารมฺปิ, อญฺญํ กตฺวา พหุํ ปน.

๑๘๖๑. ยาคุยา วิทิตํ กตฺวา, ปูวํ ภตฺตํ หรนฺติ เจ;

อิทมฺปิ วิทิตํ วุตฺตํ, วฏฺฏตีติ กุรุนฺทิยํ.

๑๘๖๒. กุลานิ ปน อญฺญานิ, เทยฺยธมฺมํ ปนตฺตโน;

หรนฺติ เตน สทฺธึ เจ, สพฺพํ วฏฺฏติ ตมฺปิ จ.

๑๘๖๓. อนาโรจิตเมวํ ยํ, ยํ อารามมนาภตํ;

ตํ อสํวิทิตํ นาม, สหธมฺมิกญาปิตํ.

๑๘๖๔. ยํ อสํวิทิตํ กตฺวา, อาภตํ ปน ตํ พหิ;

อารามํ ปน เปเสตฺวา, การาเปตฺวา ตมาหเร.

๑๘๖๕. คนฺตฺวา วา อนฺตรามคฺเค, คเหตพฺพํ ตุ ภิกฺขุนา;

สเจ เอวมกตฺวา ตํ, อาราเม อุปจารโต.

๑๘๖๖. คเหตฺวาชฺโฌหรนฺตสฺส, คหเณ ทุกฺกฏํ สิยา;

อชฺโฌหารปโยเคสุ, ปาฏิเทสนิยํ มตํ.

๑๘๖๗. ปฏิสํวิทิเตเยว, อสํวิทิตสญฺญิโน;

ตตฺถ เวมติกสฺสาปิ, โหติ อาปตฺติ ทุกฺกฏํ.

๑๘๖๘. ปฏิสํวิทิเต ตสฺส, คิลานสฺสาวเสสเก;

พหาราเม คเหตฺวา วา, อนฺโตเยวสฺส ภุญฺชโต.

๑๘๖๙. ตตฺถชาตผลาทีนิ, อนาปตฺเตว ขาทโต;

สมุฏฺฐานาทโย สพฺเพ, กถิเนน สมา มตา.

จตุตฺถปาฏิเทสนียกถา.

อิติ วินยวินิจฺฉเย ปาฏิเทสนียกถา นิฏฺฐิตา.