อนิยตกถา

๕๔๒. รโห นิสชฺชสฺสาเทน, มาตุคามสฺส สนฺติกํ;

คนฺตุกาโม นิวาเสติ, อกฺขึ อญฺเชติ ภุญฺชติ.

๕๔๓. ปโยเค จ ปโยเค จ, โหติ สพฺพตฺถ ทุกฺกฏํ;

คจฺฉโต ปทวาเรน, คนฺตฺวา จสฺส นิสีทโต.

๕๔๔. นิสชฺชาย อุภินฺนมฺปิ, ปโยคคณนาย จ;

โหติ ปาจิตฺติยํ ตสฺส, พหุกานิ พหูสฺวปิ.

๕๔๕. สมีเปปิ ฐิโต อนฺโธ, อนฺโตทฺวาทสหตฺถเก;

น กโรติ อนาปตฺตึ, อิตฺถีนํ ตุ สตมฺปิ จ.

๕๔๖. จกฺขุมาปิ นิปชฺชิตฺวา, นิทฺทายนฺโตปิ เกวลํ;

ทฺวาเร ปิหิตคพฺภสฺส, นิสินฺโนปิ น รกฺขติ.

๕๔๗. อนนฺเธ สติ วิญฺญุสฺมึ, ฐิตสฺสารหสญฺญิโน;

นิสชฺชปจฺจยา โทโส, นตฺถิ วิกฺขิตฺตเจตโส.

๕๔๘. น โทสุมฺมตฺตกาทีนํ, อาปตฺตีหิปิ ตีหิปิ;

สมุฏฺฐานาทโย ตุลฺยา, ปฐมนฺติมวตฺถุนา.

ปฐมานิยตกถา.

๕๔๙. อนนฺธาพธิโร วิญฺญู, อิตฺถี วา ปุริโสปิ วา;

อนฺโตทฺวาทสหตฺถฏฺโฐ, อนาปตฺติกโร สิยา.

๕๕๐. อนฺโธ อพธิโร วาปิ, พธิโร วาปิ จกฺขุมา;

น กโรติ อนาปตฺตึ, ติสมุฏฺฐานเมวิทํ.

ทุติยานิยตกถา.

อิติ วินยวินิจฺฉเย อนิยตกถา นิฏฺฐิตา.