จตุวิปตฺติกถาวณฺณนา

๒๗๓. อิทานิ อุภยสาธารณํ กตฺวา วิปตฺติวาราทีนํ วิสิฏฺฐวารานํ สงฺคหํ กาตุมาห ‘‘กติ อาปตฺติโย’’ติอาทิ.

๒๗๔. ภิกฺขุนี สเจ ฉาเทติ, จุตา โหติ. สเจ เวมติกา ฉาเทติ, ถุลฺลจฺจยํ สิยาติ โยชนา.

๒๗๕. สงฺฆาทิเสสนฺติ ปรสฺส สงฺฆาทิเสสํ.

๒๗๖. ‘‘กติ อาจารวิปตฺติปจฺจยา’’ติ ปทจฺเฉโท.

๒๗๗. อาจารวิปตฺตินฺติ อตฺตโน วา ปรสฺส วา อาจารวิปตฺตึ.

๒๗๙. ปาปิกํ ทิฏฺฐินฺติ อเหตุกอกิริยนตฺถิกทิฏฺฐิอาทึ ลามิกํ ทิฏฺฐึ.

๒๘๑. มนุสฺสุตฺตริธมฺมนฺติ อุตฺตริมนุสฺสธมฺมํ.

๒๘๒. อาชีวเหตุ สญฺจริตฺตํ สมาปนฺโนติ โยชนา. ปริยายวจเนติ ‘‘โย เต วิหาเร วสติ, โส ภิกฺขุ อรหา’’ติอาทิเก เลสวจเน. ญาเตติ ยํ อุทฺทิสฺส วทติ, ตสฺมึ มนุสฺสชาติเก วจนสมนนฺตรเมว ญาเต.

๒๘๓. วตฺวาติ อคิลาโน อตฺตโน อตฺถาย วิญฺญาเปตฺวา. ภิกฺขุนี ปน สเจ เอวํ โหติ, ภิกฺขุนี อคิลานา อตฺตโน อตฺถาย ปณีตโภชนํ วิญฺญาเปตฺวา ภุตฺตาวินี สเจ โหตีติ อธิปฺปาโย. ตสฺสา ปาฏิเทสนียํ สิยาติ โยชนา.

๒๘๔. ‘‘อตฺตโน อตฺถาย วิญฺญาเปตฺวานา’’ติ อิมินา ปรสฺส ญาตกปวาริเต ตสฺเสวตฺถาย วิญฺญาเปตฺวา เตน ทินฺนํ วา ตสฺส วิสฺสาเสน วา ปริภุญฺชนฺตสฺส เตสํ อตฺตโน อญฺญาตกอปฺปวาริเต สุทฺธจิตฺตตาย อนาปตฺตีติ ทีเปติ.

อิติ อุตฺตเร ลีนตฺถปกาสนิยา

จตุวิปตฺติกถาวณฺณนา นิฏฺฐิตา.