๓. นคฺควคฺควณฺณนา

๑-๒. ปฐมทุติยสิกฺขาปทวณฺณนา

๘๘๓. นคฺควคฺคสฺส ปฐมทุติยานิ อุตฺตานานิ. ปฐเม อยํ วิเสโส – ภิกฺขุสฺส ตถา นฺหายนฺตสฺส ทุกฺกฏํ อญฺญตฺร ชนฺตาฆรอุทกปฏิจฺฉาทีหิ. น จ วิครหิ ตตฺถ ภควา อตฺตนาว อนนุญฺญาตตฺตา อุทกสาฏิกายาติ โปราณา. ‘‘เอกเมว นิวาเสตฺวา, ปารุปิตฺวา จ นหายิตุํ น วฏฺฏตี’’ติ โปราณคณฺฐิปเท วุตฺตํ.

ปฐมทุติยสิกฺขาปทวณฺณนา นิฏฺฐิตา.

๓. ตติยสิกฺขาปทวณฺณนา

๘๙๔. ตติเย อนฺโตจตูหปญฺจาหํ ธุรํ นิกฺขิปนฺติยาปิ อาปตฺติ เอว. ลิงฺคปริวตฺเต ธุรํ นิกฺขิปนฺติยา ทุกฺกฏํ ติกทุกฺกฏตฺตา. ‘‘สมฺพหุลาหิ ภิกฺขุนีหิ สทฺธินฺติ เอตฺถ จตสฺโสปิ สมฺพหุลา’’ติ โปราณคณฺฐิปเท วุตฺตํ.

ตติยสิกฺขาปทวณฺณนา นิฏฺฐิตา.

๔. จตุตฺถสิกฺขาปทวณฺณนา

๘๙๘. จตุตฺเถ สงฺฆาฏิจารนฺติ เอตฺถ สงฺฆาฏิอาทิวเสน อธิฏฺฐิตานํเยวายํ วิธิ, เนตราสํ กิร. ตตฺถ ติจีวเร เอว วิปฺปวาสปจฺจยา นิสฺสคฺคิยํ. อนฺโตจีวรกาเลปิ ปญฺจาหิกํ สงฺฆาฏิจารํ อติกฺกาเมนฺติยา อาปตฺติเยว. ‘‘วินา เอเตหิ จีวเรหิ อุปสมฺปทํ กาตุํ น วฏฺฏตี’’ติ โปราณคณฺฐิปเท วุตฺตํ.

จตุตฺถสิกฺขาปทวณฺณนา นิฏฺฐิตา.

๕. ปญฺจมสิกฺขาปทวณฺณนา

๙๐๖. ปญฺจมสฺส อนาปตฺติวาเร ตาย วา อวิปฺปวาสายาติ อตฺถโต ลพฺภติ.

ปญฺจมสิกฺขาปทวณฺณนา นิฏฺฐิตา.

๙๐๗-๙๑๑. ฉฏฺฐสตฺตมานิ อุตฺตานานิ.

๘. อฏฺฐมสิกฺขาปทวณฺณนา

๙๑๖. โสกชฺฌายิกา นาม กิร มายาการา. วิลุมฺปกา ภณฺฑกาติ จ โปราณา.

อฏฺฐมสิกฺขาปทวณฺณนา นิฏฺฐิตา.

๙. นวมสิกฺขาปทวณฺณนา

๙๒๐. ‘‘กถญฺหิ นาม อติกฺกาเมสฺสตี’’ติ วุตฺตตฺตา ถุลฺลนนฺทา จีวรกาลสมยํ อาคเมถาติ อติกฺกมาเปสีติ สิทฺธํ โหติ.

นวมสิกฺขาปทวณฺณนา นิฏฺฐิตา.

๑๐. ทสมสิกฺขาปทวณฺณนา

๙๒๗. ทสเม เอกกุลํ เอตทโวจุนฺติ เอตฺถ กุลํ นาม ตสฺมึ มนุสฺสา, ตสฺมา พหุวจนํ.

ทสมสิกฺขาปทวณฺณนา นิฏฺฐิตา.

นคฺควคฺควณฺณนา นิฏฺฐิตา.