ทุติยคาถาสงฺคณิกวณฺณนา

กายิกาทิอาปตฺติวณฺณนา

๔๗๔-๕. นิทานุทฺเทสํ วินา เสสุทฺเทสาภาวา ‘‘สพฺพปาติโมกฺขุทฺเทสานญฺจ สงฺคโห โหตี’’ติ วุตฺตํ. วินเย ครุกา วินยครุกา. อิทํ ปน ทฺวีสุ คาถาสุ กิญฺจาปิ อาคตํ, อญฺเญหิ ปน มิสฺเสตฺวา วุตฺตภาวา นานากรณํ ปจฺเจตพฺพํ. นวสุ ฐาเนสุ กมฺมํ โหตีติ กมฺมญตฺติ โหติ. วาจาติ วจีสมฺภวา. อทฺธานหีโน อูนวีสติวสฺโส. ‘‘อปิเจตฺถาติ กุรุนฺทิวาโท’’ติ วุตฺตํ. วนปฺปตินฺติ เอวํ อทินฺนาทาเน อาคตํ วนปฺปตึ. วิสฺสฏฺฐิฉฑฺฑเนติ สุกฺกวิสฺสฏฺฐิยํ. ทุกฺกฏา กตาติ ทุกฺกฏํ วุตฺตํ. อามกธญฺญํ วิญฺญาเปตฺวา ภุญฺชนฺติยา ปุพฺพปโยเค ทุกฺกฏํ, อชฺโฌหาเร ปาจิตฺติยํ.

ปาจิตฺติยวณฺณนา

๔๗๖. มหาสงฺฆิกา สามเณเรปิ อาปตฺตึ เทสาเปนฺติ กิร, เตน วุตฺตํ ‘‘น เทสาเปตพฺพา’’ติ, ทณฺฑกมฺมํ ปน เตสํ กาตพฺพํ ตถารูเป โอฬาริกวีติกฺกเม.

อวนฺทนียปุคฺคลาทิวณฺณนา

๔๗๗. ทสสตํ อาปตฺติโยติ สหสฺสํ อาปตฺติโย. จมฺปายํ วินยวตฺถุสฺมินฺติ จมฺเปยฺยกฺขนฺธเก. อธมฺเมน วคฺคนฺติอาทีนิ จตฺตาริ กมฺมานิเยว ภควตา วุตฺตานีติ อตฺโถ. น เกวลํ อาปตฺติเยว, อถ โข ฉ สมถา…เป… สมฺมุขาวินเยน สมฺมนฺติ, สมาโยคํ คจฺฉนฺติ สมฺมุขาวินเยน สมฺปโยคํ คจฺฉนฺตีติ อตฺโถ. วินา สมเถหิ สมฺมติ, สมถภาวํ คจฺฉติ. ปฏิเสธตฺเถ สติ วินา สมเถหีติ สมเถหิ วินาติ อตฺโถ.

โสฬสกมฺมาทิวณฺณนา

๔๗๘. อสุตฺตกนฺติ สุตฺตวิรหิตํ, อุสุตฺตํ ตตฺร นตฺถีติ อธิปฺปาโย.

ทุติยคาถาสงฺคณิกวณฺณนา นิฏฺฐิตา.