อุปาลิปญฺจกวณฺณนา

อนิสฺสิตวคฺควณฺณนา

๔๑๙. กายิกอุปฆาติกา นาม กาเยน วีติกฺกโม.

นปฺปฏิปฺปสฺสมฺภนวคฺควณฺณนา

๔๒๐. โอมทฺทการโกติ โอมทฺทิตฺวา อภิภวิตฺวา การโก.

โวหารวคฺควณฺณนา

๔๒๔. เภทกรวตฺถูนิ นิสฺสาย วิวาทาธิกรณํ สมุฏฺฐาติ, เอวํ ยถาสงฺขฺยํ คจฺฉติ. โกโธปนาหาทิทฺวาทสมูลปโยคํ วิวาทาธิกรณํ, ตถา เสเสสุ. โอสารณาทีสุ นวสุ ฐาเนสุ กมฺมญตฺติยา กรณํ. ทฺวีสุ ฐาเนสุ ญตฺติทุติยญตฺติจตุตฺถกมฺเมสุ. ยสฺมา มหาอฏฺฐกถายํ วุตฺตนเยเนว อุภโตวิภงฺคา อสงฺคหิตา, ตสฺมา ยํ กุรุนฺทิยํ วุตฺตํ, ตํ คเหตพฺพนฺติ สมฺพนฺโธ.

ทิฏฺฐาวิกมฺมวคฺควณฺณนา

๔๒๕. ติณฺณนฺนํ อุปริ สห อาปตฺตึ เทเสตุํ น ลพฺภนฺติ. กมฺมนานาสํวาสกานํ ลทฺธิคฺคหิตโกว ลทฺธินานาสํวาสโก. ‘‘อวิปฺปวาสสีมาย ฐิตสฺสา’’ติ มหาสีมํ กิร สนฺธาย วุตฺตํ.

๔๓๓. ‘‘อุมฺมาทา จิตฺตกฺเขปา’’ติ ปาโฐ.

มุสาวาทวคฺควณฺณนา

๔๔๔. ปริยาเยน ชานนฺตสฺสาติ ยสฺส กสฺสจิ ชานนฺตสฺส ปริยาเยน วุตฺตมุสาวาโทติ อตฺโถ.

๔๔๖. อนุโยโค น ทาตพฺโพติ เตน วุตฺตํ อนาทิยิตฺวา ตุณฺหี ภวิตพฺพนฺติ อตฺโถ.

ภิกฺขุโนวาทวคฺควณฺณนา

๔๕๔. โวหารนิรุตฺติยํ สทฺทนิรุตฺติยํ. มคฺคปจฺจเวกฺขณาทโย เอกูนวีสติ.

อุพฺพาหิกวคฺควณฺณนา

๔๕๕. ปสาเรตา โมเหตา.

อธิกรณวูปสมวคฺควณฺณนา

๔๕๘. ‘‘ยถารตฺตนฺติ อนุปสมฺปนฺเน อเปกฺขตี’’ติปิ วทนฺติ. ‘‘ยถาวุฑฺฒนฺติ อุปสมฺปนฺเน อเปกฺขตี’’ติ ลิขิตํ.

กถินตฺถารวคฺควณฺณนา

๔๖๗. ‘‘เอกาวตฺโต’’ติปิ ปฐนฺติ, ตสฺส กุทฺโธ โกธาภิภูโตติ กิรตฺโถ. เอกวตฺโถติปิ เกจิ, อุตฺตราสงฺคํ อปเนตฺวา ฐิโตติ กิรตฺโถ, ตํ สพฺพํ อฏฺฐกถายํ อุทฺธฏปาฬิยา วิรุชฺฌตีติ. เอกาวฏฺโฏติ หิ อุทฺธฏํ, ตสฺมา น คเหตพฺพํ. อนฺตรา วุตฺตการเณนาติ ‘‘กิจฺจยปสุตตฺตา วนฺทนํ อสมนฺนาหรนฺโต นลาฏํ ปฏิหญฺเญยฺยา’’ติอาทิวุตฺตการเณน.

อุปาลิปญฺจกวณฺณนา นิฏฺฐิตา.

อาปตฺติสมุฏฺฐานวณฺณนา

๔๗๐. ปุพฺเพ วุตฺตเมวาติ สหเสยฺยาทิปณฺณตฺติวชฺชํ. อิตรนฺติ สจิตฺตกํ. เทเสนฺโต, โทมนสฺสิโก อญฺเญหิ ภึสาปนาทีนิ กตฺวา อาปตฺตึ อาปชฺชิตฺวาติ อธิปฺปาโย.